ཚེས་8ཉིན་གྱི་སྔ་དྲོར། རང་སྐྱོང་ལྗོངས་མི་དམངས་འཐུས་ཚོགས་སྐབས་བཅུ་གཉིས་པའི་ཚོགས་འདུ་ཐེངས་གཉིས་པས་མུ་མཐུད་ཚོགས་ཆུང་ཁག་བགོས་ཀྱིས་སྲིད་གཞུང་གི་ལས་དོན་སྙན་སྒྲོན་ལ་གྲོས་ཞིབ་གནང་བ་དང་། འཆར་གཞིའི་སྙན་སྒྲོན་དང་འཆར་ཟིན་དང་། སྔོན་རྩིས་སྙན་སྒྲོན་དང་འཆར་ཟིན་ལ་ཞིབ་བཤེར་གནང་བ་རེད།

འཐུས་མི་ཚོགས་པ་ཁག་གི་ཚོགས་རར་འཐུས་མི་ཚོས་སྲིད་གཞུང་གི་ལས་དོན་སྙན་སྒྲོན་ལ་དམ་པོར་དམིགས་ནས་ངོས་འཛིན་དང་། གྲུབ་འབྲས། འཕེལ་རྒྱས་བཅས་གླེང་ཞིང་། ཚང་མས། སྲིད་གཞུང་གི་ལས་དོན་སྙན་སྒྲོན་ཧྲིལ་པོར་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་དང་། ཏང་གི་ཚོགས་ཆེན་ཉི་ཤུ་པའི་དགོངས་དོན་དང་ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་དགོངས་དོན་ཕྱོགས་ཡོངས་ནས་ལག་བསྟར་དོན་འཁྱོལ་བྱ་རྒྱུ་ཁྱབ་ཡོད་པས། རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་ལྔ་པ་དང་རང་སྐྱོང་ལྗོངས་ཏང་ཨུད་ཀྱི་དཔལ་འབྱོར་ལས་དོན་ཚོགས་འདུའི་དགོངས་དོན་གང་ལེགས་མངོན་ཡོད་ལ། ཕྱོགས་དགུའི་ཐད་ནས་གྲངས་གཞི་དང་དོན་དངོས་ལ་བརྟེན་ཏེ་2023ལོའི་ལས་དོན་ལ་ཕྱོགས་ཡོངས་ནས་ཕྱོགས་སྡོམ་དང་། 2024ལོའི་ལས་འགན་གཙོ་བོ་ཚན་རིག་དང་མཐུན་པའི་ངང་ཇུས་འགོད་དང་བཀོད་སྒྲིག་བྱས་ཏེ་2024ལོའི་ལས་དོན་ཁག་ཡག་པོ་སྒྲུབ་པར་ཁ་ཕྱོགས་གསལ་སྟོན་བྱས་ཡོད། སྙན་སྒྲོན་གྱི་ཆབ་སྲིད་ཀྱི་ཚུགས་གནས་མཐོ་བ་དང་ནང་དོན་དམ་པ་དོན་གཉེར་ཡིན་པས། དེ་ནི་དར་ཆ་མཐོན་པོར་སྒྲེང་བ་དང་། མི་སེམས་གཅིག་ཏུ་སྒྲིལ་བ། མི་སེམས་ལ་སྐུལ་མ་ཐེབས་པ་བཅས་ཀྱི་སྙན་སྒྲོན་ཡག་པོ་ཞིག་ཡིན་པའི་ངོས་འཛིན་གནང་བ་རེད།

འཐུས་མི་ཚོས། སྲིད་གཞུང་གི་ལས་དོན་སྙན་སྒྲོན་ནང་། 2024ལོར་རང་ལྗོངས་ཀྱིས་བུད་མེད་དང་། བྱིས་པ། གཞོན་ནུ་ལོ་ཆུང་། རྒན་རྒོན། དབང་པོ་སྐྱོན་ཅན་བཅས་ཀྱི་ཁྲིམས་མཐུན་ཁེ་དབང་ལ་འགན་ལེན་ཏན་ཏིག་བྱས་ནས། མང་ཚོགས་ཚོགས་པའི་རྩ་འཛུགས་འཕེལ་རྒྱས་གཏོང་རྒྱུར་རྒྱབ་སྐྱོར་གྱིས་དམག་དམངས་མཉམ་འདྲེས་དང་། རྒྱལ་སྲུང་སྐུལ་སློང་། གཉིས་བཀུར་མཉམ་སྐྲུན། དམག་ཞབས་ཐིམ་པའི་དམག་མིའི་ལས་དོན། ཁ་གཏད་བོད་སྐྱོར་སོགས་ཀྱི་ལས་དོན་ལ་དམ་འཛིན་ནན་ཏན་བྱ་རྒྱུ་དང་ཆབས་ཅིག ཕྱོགས་ཡོངས་ནས་ཏང་ནན་པོས་སྐྱོང་བ་མཐའ་འཁྱོངས་ཀྱིས་སྒྲིག་ཁྲིམས་དང་སྒྲིག་ལམ་ནན་པོར་སྲུང་བ་དང་། ལྷག་བསམ་ཟོལ་མེད་མཐའ་གཅིག་ཏུ་བྱེད་པ། “གཏན་འཁེལ་གཉིས”ལ་སྲུང་སྐྱོང་མཐའ་གཅིག་ཏུ་བྱེད་པ། “སྲུང་སྐྱོང་གཉིས”མཐའ་གཅིག་ཏུ་ཐུབ་པ་བཅས་བྱེད་དགོས། གཞན་ཡང་། “དོན་འཁྱོལ་ལ་དམ་འཛིན་བྱེད་དགོས་པ་བཞིའི”གལ་ཆེའི་བླང་བྱ་དོན་འཁྱོལ་ནན་ཏན་བྱས་ནས“གཞི་རིམ་དུ་སྐྱོད་པ་བཞིའི”སྤྱོད་ཚུལ་བཟང་པོ་དར་སྤེལ་གཏོང་བ་དང་། ཕན་འབྲས་བཟང་པོ་ཐོན་པ་དང་རྣམ་པ་གསར་པ་ཐོན་པ་ཧུར་ཐག་བྱེད་དགོས་པ་སོགས་བསྟན་པ་ལས་རང་ལྗོངས་ཀྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་དོན་སྙིང་གལ་ཆེན་ལྡན་ཡོད་ཅེས་ངོས་འཛིན་གཅིག་གྱུར་གནང་བ་རེད།