ཞོགས་པ་ཇ་མངར་མོ་དང་ཐུག་པ་འཐུང་བ་ནི་ལྷ་སའི་གྲོང་མི་མང་པོའི་གོམས་གཤིས་སུ་གྱུར་ཡོད། སྲང་ལམ་ཆེ་ཆུང་གང་སར་ཡོད་པའི་ཇ་ཁང་དང་བསྡུར་ན། མི་རིང་བའི་གོང་སྒོ་ཕྱེ་བའི་དྲིན་སྐྱོང་གླིང་སྡེ་ཁུལ་གྱི་མཉམ་སྡེབ་དཔལ་འབྱོར་རྣམ་གྲངས་ཀྱི“དམངས་ཕན་ཇ་ཁང”འདི་གཞན་དང་མི་འདྲ་བ་ཞིག་ཡོད་དེ། ཇ་ཁང་དེས་ལོ་ན་བགྲེས་པ་དང་རང་ཁ་རང་གསོ་མ་ཐུབ་པའི་རྒན་རྒོན་རྣམས་ཞབས་འདེགས་ཞུ་ཡུལ་གཙོ་བོར་བྱས་ནས། ཁོང་ཚོར་རིན་པ་མི་དགོས་པར་ཁ་ལག་སྤྲོད་ལ། སྡེ་ཁུལ་དེའི་གྲོང་མིས་ཁ་ལག་བཟས་ཚེ་རིན་གོང་ཡང་ཁྲོམ་རའི་རིན་གོང་ལས་ཁེ་བས་མང་ཚོགས་ཚོས་ཧ་ཅང་དགའ་པོ་བྱེད་ཀྱི་ཡོད།

དྲིན་སྐྱོང་གླིང་སྡེ་ཁུལ་དུ་གནས་སྤོས་དུད་ཚང་758ཀྱི་མི་3278ཡོད་པ་དང་། སྔར་ལས་ལྷག་པའི་སྒོ་ནས་དམངས་ཕན་འབབ་འཕར་ལ་སྐུད་འདེད་ཐུབ་ཆེད། འདི་ལོ་ཁྲེང་ཀོན་ཆུས་ཀྱིས་མ་དངུལ་སྒོར་ཁྲི་180བཏང་ནས་སྡེ་ཁུལ་ནང་གི་སྨི་ངོས་གྲུ་400ཙམ་ཟིན་པའི་བྱེད་སྒོ་ཁང་འདི“དམངས་ཕན་ཇ་ཁང”དུ་བསྒྱུར་བ་རེད།

གྲོང་མི་པ་སངས་ཀྱིས་བརྗོད་དོན།

ང་ཚོ་རྒན་རྒོན་ཚོས“དམངས་ཕན་ཇ་ཁང”གི་ཇ་མངར་མོ་དང་བོད་ཐུག་བཏུངས་ན་དངུལ་སྤྲོད་དགོས་མེད།

དྲིན་སྐྱོང་གླིང་སྡེ་ཁུལ་དུ་བགྲེས་སོང་པ་སངས་འདྲ་བའི་རྒན་རྒོན་200ཙམ་ཡོད། ཁོང་ཚོ་ཇ་ཁང་དུ་ཡོང་ཚེ། ལས་མིས་རིན་མེད་ངང་ཇ་དང་ཐུག་པ་བླུགས་པ་མ་ཟད། སྡེ་ཁུལ་ནང་གི་འགྲོ་སྐྱོད་སྟབས་བདེ་མེད་པའི་རྒན་རྒོན་ལ་ཇ་ཁང་གིས་རིན་མེད་ངང་ཁ་ལག་སྐྱེལ་བར་འགྲོ་གི་ཡོད། དེས་ད་དུང་སྡེ་ཁུལ་གྱི་གྲོང་མི་8ཀྱི་ལས་ཞུགས་ཀྱི་གནད་དོན་ཐག་གཅོད་བྱས་ཡོད།

དྲིན་སྐྱོང་གླིང་སྡེ་ཁུལ་གྱི་ཏང་ཨུད་ཀྱི་ཧྲུའུ་ཅི་ཚེ་རིང་བག་གྲོས་བརྗོད་དོན།

མཉམ་སྡེབ་དཔལ་འབྱོར་གྱི་རྣམ་གྲངས་ཀྱིས་སྡེ་ཁུལ་གྱི་གྲོང་མིར་བགོ་འགྲེམས་བརྒྱབ་ཐུབ་ནས། སྡེ་ཁུལ་གྱི་གྲོང་མིའི་མི་རེའི་ཆ་སྙོམས་ཡོང་འབབ་སྔར་བས་མཐོ་རུ་འགྲོ་བ་དང་ཆབས་ཅིག ཁོངས་གཏོགས་ཁུལ་གྱི་རང་ཁ་རང་གསོ་མ་ཐུབ་པའི་རྒན་རྒོན་ལ་རིན་མེད་ཀྱི་བཟའ་བཅའ་སྤྲད་དེ། ཁོང་ཚོར་སྡེ་ཁུལ་གྱི་དྲོ་སྐྱིད་ཚོར་ཐུབ་པའི་རེ་བ་བྱེད་ཀྱི་ཡོད།