མིག་སྔར་ལྷུན་རྩེ་རྫོང་ལྷུན་རྩེ་གྲོང་རྡལ་ཟངས་ཡུལ་གྲོང་ཚོའི་ཡུལ་མི་ཚོ་གྲོང་ཚོའི་རིག་གནས་ཁང་དུ་འཛོམས་ནས་རང་སྐྱོང་ལྗོངས་སྲིད་གྲོས་ཀྱི་ཨུ་ཡོན་བསོད་ནམས་སྒྲོལ་མས་བརྗོད་པའི“ཁྱིམ་ཚང་གི་ལོ་རྒྱུས”ཉན་བཞིན་ཡོད།

འདི་ནི་རང་སྐྱོང་ལྗོངས་སྲིད་གྲོས་ཞིང་ལས་དང་གྲོང་གསེབ་རིགས་ཁོངས་ཀྱི་རིམ་གསུམ་སྲིད་གྲོས་ཨུ་ཡོན་གྱིས་དུས་རབས་གསར་པའི“གྲོང་ཚོའི་ལོ་རྒྱུས”དང“ཁྱིམ་ཚང་གི་ལོ་རྒྱུས”བརྗོད་པའི་བྱེད་སྒོ་སྤེལ་བའི་རྣམ་པ་ཞིག་རེད། ཉིན་ཤས་བསྟུད་མར་བྱེད་སྒོ་དེ་ལྷོ་ཁ་གྲོང་ཁྱེར་གྱི་རྫོང་དང་ཆུས་12ཀྱི་ཤང་དང་གྲོང་རྡལ་གྲོང་ཚོ་གྲོང་ལྷན་ཁག་ཏུ་ཚ་ཚ་འུར་འུར་ངང་སྤེལ་བཞིན་ཡོད། བསོད་ནམས་སྒྲོལ་མ་དང་། དབང་འདུས། འགྱུར་མེད་བཀྲ་ཤིས། འཇམ་དབྱངས་བཟང་པོ། འཆི་མེད་རྡོ་རྗེ་སོགས་ཨུ་ཡོན་གྱིས་གྲོང་ཚོ་དང་གྲོང་ལྷན་གྱི་འཐབ་ས་དང་པོར་ཞིང་འབྲོག་མང་ཚོགས་ལ་རང་ཉིད་ཀྱི“ཁྱིམ་ཚང་གི་ལོ་རྒྱུས་དང་དོན་དག”དང“གྲོང་ཚོའི་ལོ་རྒྱུས་དང་དོན་དག”བརྗོད་པ་དང་། ཨུ་ཡོན་གྱིས་བརྗོད་པའི་གཏམ་ཐུང་ཡང་དོན་ཟབ་པའི་དུས་རབས་གསར་པར་བསྟོད་གླུ་ཕུལ་བ་དང་རྒྱང་ལམ་གསར་པར་སྐྱོད་པའི་གཏམ་རྒྱུད་ལས་ཞིང་འབྲོག་མང་ཚོགས་ཀྱི་དགའ་བསུ་ཆེན་པོ་ཐོབ་ཡོད། 

“གྲོང་ཚོའི་ལོ་རྒྱུས”དང“ཁྱིམ་ཚང་གི་ལོ་རྒྱུས”ལས་དྲིན་ཚོར་གྱི་ཐུན་མོང་ངོས་འཛིན་གཅིག་མཐུན་བྱུང་བ།

ཨུ་ཡོན་འགྱུར་མེད་བཀྲ་ཤིས་ཀྱིས་བརྗོད་པའི“གྲོང་ཚོའི་ལོ་རྒྱུས”ཆོབ་ཚ་པོ་ཡོད།

འགྲིམ་འགྲུལ་འགྲོ་སྐྱོད་སྐོར་གླེང་སྐབས། ཁོང་གིས“དེ་སྔ་ཁྱིམ་དུ་མག་པ་ཁ་ལོ་བ་ཞིག་ལེན་ཐུབ་ན་དགའ་ཚོར་ཆེན་པོ་བྱེད་ཀྱི་ཡོད། ད་ཆ་ཁྱིམ་ཚང་ཚང་མར་རླངས་འཁོར་ཡོད་པས་མག་པ་ཁ་ལོ་བ་ཡིན་མིན་ལ་སྣང་བ་དེ་ཙམ་གཏོང་གི་མེད”ཅེས་བརྗོད།

གྲོང་ཚོའི་ཁོར་ཡུག་སྐོར་གླེང་སྐབས། ཁོང་གིས“དེ་སྔ་གྲོང་ཚོའི་ནང་བཙོག་ཟིང་ཞན་གསུམ་གྱི་སྣང་ཚུལ་རྟག་ཏུ་ཐོན་གྱི་ཡོད། ལམ་ཁར་སྒོ་ཕྱུགས་དེད་དེ་འགྲོ་དུས་ལྕི་བར་རྡོག་རྫིས་ཐེབས་ཀྱང་སྣང་བ་གཏོང་གི་མེད། ད་ཆ་གྲོང་ཚོ་ཁག་ཏུ་གནས་འཕྲོད་ལས་འཚམ་མཛེས་མཐུན་གསུམ་ལྡན་གྱི་གྲོང་གསེབ་བསྐྲུན་པ་དང་སྡོད་མལ་ཁོར་ཡུག་ལེགས་སུ་ཕྱིན་པས་གྱོན་གོས་ལ་ཐལ་བ་ཕྲན་བུ་འགོས་ཀྱང་བཙོག་སྣང་བྱེད་ཀྱི་ཡོད”ཅེས་བརྗོད།

འཕྲིན་གཏོང་གི་སྐོར་གླེང་སྐབས། ཁོང་གིས“དེ་སྔ་པར་ཞིག་རྒྱག་པར་ཡང་མ་ཡིན་ཡིན་ཁུལ་གྱིས་ཁ་པར་རྒྱག་པའི་བཟོ་ལྟ་ཞིག་བསྟན་ཏེ་པར་རྒྱག་གི་ཡོད། ད་ཆ་ཡུལ་མི་མི་རེ་ངོ་རེས་རིག་ནུས་ཁ་པར་སྤྱད་ནས་ཁྱུག་དབྱིངས་དང་གསར་འགྱུར་ལྟ་གི་ཡོད་པས་ལག་ཐོགས་ཁ་པར་གྱི་གློག་རྫས་མི་འདང་བའི་སེམས་ཁྲལ་ཆེན་པོ་ཡོད” ད་དུང་སྨན་བཅོས་འཕྲོད་བསྟེན་དང་རྒན་གསོ་དང་བུ་བཅོལ་སོགས་ཀྱི་སྐོར་ཡང་བརྗོད་ཡོད།

“འགྱུར་མེད་བཀྲ་ཤིས་ཀྱིས་བཤད་པའི་གཏམ་རྒྱུད་ལས་གྲོང་ཚོའི་འགྱུར་ལྡོག་དག་དྲན་བྱུང་། དུས་རབས་གསར་པའི་ལོ་བཅུ་ལྷག་ཙམ་རིང་མང་ཚོགས་ལ་སྲིད་ཇུས་བཟང་པོ་སྔར་བས་མང་བ་ལོངས་སྤྱོད་ཐུབ་ཅིང་། སྨན་པ་བསྟེན་པ་ཁོ་ནར་ཆ་བཞག་ན། སྨན་རིན་རྩིས་ཞུའི་བསྡུར་གྲངས་དེ་བས་མཐོ་རུ་ཕྱིན་པ་མ་ཟད། ད་དུང་སྨན་ཁང་དུ་དུས་ཐོག་རྩིས་ཞུ་ཡང་ཧ་ཅང་སྟབས་བདེ་པོ་འདུག འགྱུར་ལྡོག་ཆུང་ཙག་འདི་དག་ལས་ཏང་ཀྲུང་དབྱང་གིས་ང་ཚོ་བོད་ཀྱི་ཞིང་འབྲོག་མང་ཚོགས་ལ་བྱམས་བརྩེའི་ཐུགས་ཁུར་དང་དམིགས་བསལ་གྱི་གཟིགས་སྐྱོང་གནང་ལུགས་མཚོན་པས་ངས་སྙིང་དབུས་ནས་ཏང་ཀྲུང་དབྱང་དང་སྤྱི་ཁྱབ་ཧྲུའུ་ཅིར་ཐུགས་རྗེ་ཆེ་ཞུ་རྒྱུ་ཡིན”ཞེས་མང་ཚོགས་ཤིག་གིས་དེ་ལྟར་བརྗོད་པས་ཉེ་འགྲམ་གྱི་མང་ཚོགས་ཚོས་ཀྱང་གཅིག་རྗེས་གཉིས་མཐུད་ངང་ཡག་པོ་བཤད་སོང་ཞེས་བརྗོད།

“གྲོང་ཚོའི་ལོ་རྒྱུས”དང“ཁྱིམ་ཚང་གི་ལོ་རྒྱུས”བརྗོད་པའི་བྱེད་སྒོ་ཐེངས་མང་སྤེལ་བ་ལས་ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲང་བ་བཅས་ཀྱི་ཚང་མའི་ཡིད་ཆེས་དང་ཆོད་སེམས་དེ་བས་བརྟན་དུ་ཕྱིན་ཡོད་ལ། “གཏན་འཁེལ་གཉིས”ལ་མཐའ་གཅིག་ཏུ་བརྩི་བཀུར་ཞུ་བ་དང“སྲུང་སྐྱོང་གཉིས”མཐའ་གཅིག་ཏུ་ཐུབ་པར་བྱེད་པའི་མང་ཚོགས་ཀྱི་རྨང་གཞི་སྔར་བས་བརྟན་དུ་ཕྱིན་ཡོད།

“གྲོང་ཚོའི་ལོ་རྒྱུས”དང“ཁྱིམ་ཚང་གི་ལོ་རྒྱུས”ལས་བརྩེ་སེམས་ཟབ་ཏུ་ཕྱིན་པ།

ཨུ་ཡོན་བསོད་ནམས་སྒྲོལ་མའི“ཁྱིམ་ཚང་གི་ལོ་རྒྱུས”དེ་ཁོང་ལ་སྐྱིད་པོ་ཉིས་བརྩེགས་མེད་པར་སྡུག་པོ་གསུམ་བརྩེགས་བྱུང་བ་ནས་བརྗོད་དགོས་ཤིང་། ཁོ་མོ་ན་སོ་གཞོན་དུས་ཕ་མ་སྔ་ས་ནས་གྲོངས་པས་གཅུང་པོ་དང་གཅུང་མོ་སློབ་གྲྭར་གཏོང་བའི་ཁུར་པོ་ལྗིད་པོ་དེ་རང་བཞིན་དུ་ཁོང་གི་ཕྲག་ཏུ་བབས། དེ་རྗེས་ཆང་ས་བརྒྱབ་ནས་བདེ་སྐྱིད་ལྡན་པའི་འཚོ་བ་སྐྱེལ་འགོ་ཚུགས་མ་ཐག་རང་གི་མིག་འབྲས་བཞིན་གཅེས་པའི་ཕྲུ་གུ་གཅིག་རང་ཡོད་པ་དེ་ལོ་18ལ་སླེབས་སྐབས་ནད་ཀྱིས་མནར་ནས་གྲོངས་པ་སོགས་འཚོ་བའི་ཐད་དཀའ་ངལ་ཧ་ཅང་ཆེན་པོ་འཕྲད་ནས་འུ་ཐུག་ཐབས་ཟད་ཀྱི་གནས་སུ་གྱར་མྱོང་། ཡིན་ནའང་རིམ་ཁག་རྩ་འཛུགས་ཀྱི་ཐུགས་ཁུར་དང་ལྟ་རྟོག་འོག་ཁོང་གཞི་ནས་སྡུག་བསྔལ་གྱི་གནས་ལས་ཐར་ཏེ་བདེ་ཞིང་སྐྱིད་པའི་འཚོ་བ་སྐྱེལ་འགོ་ཚུགས་པས་དེ་སྔ་སྐྱོབ་གསོ་ལེན་པའི་མང་ཚོགས་ཤིག་ནས་ད་ཆ་རྟག་ཏུ་མི་གཞན་ལ་རོགས་རམ་བྱེད་མཁན་ཞིག་ཏུ་གྱུར་ཡོད།

“ཚང་མར་དཀའ་གནད་འཕྲད་མྱོང་བ་དང་། ཐ་ན་སྐབས་དེ་དུས་བལྟས་ན་སྒྲུབ་ཐབས་གཏན་ནས་མེད་པ་ཞིག་ཡིན་མོད། འོན་ཀྱང་ཏང་གི་སྲིད་ཇུས་བཟང་པོའི་བཀའ་དྲིན་དང་རང་ཉིད་ཀྱི་ལས་ལ་བརྩོན་པའི་ལག་གཉིས་ལ་བརྟེན་པ་བརྒྱུད་སེལ་མི་ཐུབ་པའི་དཀའ་ངལ་གང་ཡང་མ་བྱུང”ཞེས་བསོད་ནམས་སྒྲོལ་མས་བརྗོད།

རང་ཉིད་ཀྱི་འདས་ཟིན་པའི་དཀའ་ངལ་དང་འབད་བརྩོན་ལྷོད་མེད་ཀྱི་འབད་འཐབ་ཀྱི་བརྒྱུད་རིམ་བརྗོད་སྐབས་ཡུལ་མི་ཚོས་བསོད་ནམས་སྒྲོལ་མའི་ལས་དབང་ལ་སྐྱོ་སྣང་ཆེན་པོ་སྐྱེས་པ་མ་ཟད། ལས་དབང་དང་འཐབ་རྩོད་བྱེད་ཕོད་པའི་ཁོང་གི་སྙིང་སྟོབས་ལའང་སེམས་འགུལ་ཆེན་པོ་ཐེབས་པ་དང་། དུས་རབས་གསར་པའི་ཏང་གི་དམངས་ཕན་སྲིད་ཇུས་ལས་སེམས་ཤུགས་སྐྱེད་པ་དང་བདེ་སྐྱིད་ཀྱི་ཚོར་སྣང་དེ་བས་ཆེན་པོ་བྱུང་ཡོད།

“གྲོང་ཚོའི་ལོ་རྒྱུས”དང་། “ཁྱིམ་ཚང་གི་ལོ་རྒྱུས”བརྗོད་པའི་བྱེད་སྒོ་ལས“མི་དམངས་སྲིད་གྲོས་རང་ཉིད་དང་ཐག་ཉེ་བ་དང་སྲིད་གྲོས་ཨུ་ཡོན་དང་རང་ཉིད་བརྩེ་བ་ཟབ་མོ་ཡོད་པ”དེ་གསོན་ཉམས་དོད་པའི་དོན་དངོས་སུ་གྱུར་ལ། ཨུ་ཡོན་དང་རིགས་ཁོངས་ཁག་གི་མང་ཚོགས་དབར་གྱི་འབྲེལ་བ་ཟབ་ཏུ་གཏོང་བའི་བརྩེ་སེམས་ཀྱི་འབྲེལ་ཐག་ཅིག་ཏུ་གྱུར་ཡོད།

“གྲོང་ཚོའི་ལོ་རྒྱུས”དང“ཁྱིམ་ཚང་གི་ལོ་རྒྱུས”ལས་འབད་འབུངས་ཡར་བརྩོན་གྱི་སྒུལ་ཤུགས་འཕེལ་བ།

“ཚེ་སྨད”ཀྱི་སྐོར་གླེང་སྐབས་ཨུ་ཡོན་དབང་འདུས་ལ་རྒྱུས་མངའ་ཤིན་ཏུ་ཆེ།

དབང་འདུས་ཀྱིས། དེ་སྔ་ཚེ་སྨད་གྲོང་ཚོ་ནི་མཐའ་མཚམས་སུ་སྐད་གྲགས་ཆོད་པའི“ཁ་ཡ་བྱེད་མཁན་མེད་པའི་གྲོང་ཚོ”ཞིག་རེད། འབྲུ་རིགས་ཏོག་ཙམ་བྱུང་ན་ཆང་བསྙལ་ནས་འཐུང་བ་དང་ཕྱུགས་རིགས་ཁ་ཤས་བགོས་ན་བཤས་གཏོང་གི་ཡོད་པས། གྲོང་ཚོ་གཞན་དག་གི་མི་ཚོས་ཚེ་སྨད་གྲོང་ཚོའི་སྐོར་ཐོས་སྐབས་མགོ་བོ་གཡུག་གཡུག་བྱེད་པ་དང་། ཚང་མས་ཚེ་སྨད་བ་དང་འབྲེལ་བ་བྱེད་འདོད་བྱེད་ཀྱི་མེད། ཡིན་ནའང་ད་ཆ་གྲོང་ཚོས་གཉེར་བའི་བོད་བྱ་གསོ་ཚགས་ར་བར་2021ལོ་ཁོ་ནར་ཡོང་འབབ་སྒོར་ཁྲི་120བྱུང་ནས་མང་ཚོགས་ལ་ཡོང་འབབ་སྒོར་ཁྲི་30བྱུང་ཡོད། 2010ལོ་ནས་2020ལོ་བར་གྲོང་ཚོས་གཉེར་བའི་ཨར་ལས་རུ་ཁག་གིས་མང་ཚོགས་ལ་གླ་ཆ་སྒོར་ཁྲི་1364.88སྤྲད་པ་དང་། མང་ཚོགས་མ་རྐང་ལ་ཞུགས་པའི་སྐྱེད་ཀ་ཡང་སྒོར་ཁྲི་108.4ཟིན་པ་སོགས་ཀྱི་ཡོང་འབབ་སྣ་ཚོགས་རག་ཡོད།

གྲོང་ཚོས་སྲིད་ཇུས་བཟང་པོའི་གོ་སྐབས་མུ་མཐུད་དམ་འཛིན་བྱས་ཏེ་མཉམ་སྡེབ་དཔལ་འབྱོར་རྒྱུན་ཆད་མེད་པར་རྒྱ་སྟོབས་ཆེ་རུ་གཏོང་བ་དང་། ཞིང་ལས་དང་། འབྲོག་ལས། ཞོར་ལས་སོགས་ཀྱི་ཐོན་ལས་ལ་དམ་འཛིན་ཡག་པོ་བྱེད་པ། ཚེ་སྨད་གྲོང་ཚོའི་མང་ཚོགས་སྒྲིག་འཛུགས་ཀྱིས་ལོ་མང་རིང་ཐོན་སྐྱེད་དང་འཚོ་བ་འཚོལ་ཞིབ་བྱེད་རིང་ཐོན་སྐྱེད་ཀྱི་རྒྱུ་རྐྱེན་གཙོ་བོ་བསྡུ་སྒྲིལ་དང་། སྡེ་ཁུལ་གྱིས་སྤྱི་འདོམས་བཀོད་སྒྲིག གྲོང་མི་ཕན་ཚུན་རོགས་རེས་དང་གཉིས་ཕན་བཅས་གཙོ་གནད་དུ་བྱས་པའི“ཚེ་སྨད་ཀྱི་བྱ་ཐབས”རིམ་བཞིན་ཆགས་པར་བྱས་ཡོད། ཡུལ་མིའི་བསམ་པའི་ཉམས་འགྱུར་ལ་འགྱུར་ལྡོག་བྱུང་ནས་ཟ་འདོད་འགུལ་འཚེར་དང་ལོངས་སྤྱོད་ལ་དགའ་བའི“མི་འཁྱམ”གྱི་སྣང་ཚུལ་མཐོང་རྒྱུ་མེད། ད་ཆ་རང་སྟོབས་རང་སྤེལ་གྱིས་ཐོན་སྐྱེད་འཕེལ་རྒྱས་གཏོང་བ་དང་། ཇུས་ཤུགས་མཉམ་འདོན་གྱིས་འཚོ་བ་ལེགས་སུ་གཏོང་བ་དོན་གཉེར་བྱ་ཡུལ་གཙོ་བོར་གྱུར་ཡོད།

ཚེ་སྨད་ཀྱི་འཕེལ་རྒྱས་དང་འགྱུར་ལྡོག་ལ་མི་རྣམས་ཀྱིས་བསྔགས་བརྗོད་ཆེན་པོ་བྱེད་ཅིང་། ཚང་མས། ཚེ་སྨད་བའི་རྩ་ཆེའི་ཉམས་མྱོང་སློབ་སྦྱོང་བྱས་ནས་ཏང་དང་སྲིད་གཞུང་གི་དམངས་ཕན་སྲིད་ཇུས་ཡག་པོ་སྤྱོད་པ་དང་ལས་ལ་བརྩོན་པའི་ལག་གཉིས་དང་མཐུན་སྒྲིལ་འབད་འཐབ་ལ་བརྟེན་ནས་འཚོ་བ་ཡག་ཐོག་ཡག་བརྩེགས་ཡོང་བར་བྱེད་ཀྱི་ཡིན་ཞེས་གཅིག་རྗེས་གཉིས་མཐུད་ངང་བརྗོད།

ཨུ་ཡོན་གྱི་གཏམ་རྒྱུད་ལས་ཡང་ན་མི་སེམས་ལ་སྐུལ་མ་ཐེབས་པ་དང་། ཡང་ན་ཆོབ་ཚ་བ། གཅིག་བྱས་ན་མི་རྣམས་ཀྱི་བློ་སྒོ་འབྱེད་པ་བཅས་ཡོད་པས་གསོན་ཉམས་དོད་པའི་དཔེ་མཚོན་སྣ་ཚོགས་ལས་མང་ཚོགས་ཚོས་གོ་ཐུབ་པའི་སྐད་ཆ་དང་བློ་ལ་ངེས་བདེ་བའི་བྱ་ཐབས་སྤྱད་དེ། སློབ་གསོ་ཡག་པོ་ཡོངས་སུ་ཁྱབ་སར་བརྟེན་ནས་ཏང་གི་སྲིད་ཇུས་བཟང་པོ་དང་གསུང་སྒྲ་ཡག་པོ་མང་ཚོགས་ཁྲོད་དུ་དྲིལ་བསྒྲགས་བྱས་ཡོད། མིག་སྔའི་བར། རང་སྐྱོང་ལྗོངས་སྲིད་གྲོས་ཀྱི་ཞིང་ལས་དང་གྲོང་གསེབ་རིགས་ཁོངས་ཀྱི་རིམ་གསུམ་སྲིད་གྲོས་ཨུ་ཡོན་གྱིས་ལྷོ་ཁ་གྲོང་ཁྱེར་དུ་དུས་རབས་གསར་པའི“གྲོང་ཚོའི་ལོ་རྒྱུས”དང“ཁྱིམ་ཚང་གི་ལོ་རྒྱུས”ཀྱི་བྱེད་སྒོ་ཐེངས་30སྤེལ་བ་དང་མང་ཚོགས་3800ལྷག་ཙམ་ལ་ཁྱབ་ཡོད་པ་རེད།