བརྗོད་དོན་གཙོ་བོའི་སློབ་གསོ་ཁག་གཉིས་པ་སྤེལ་བ་ནས་བཟུང་། སྤོ་བོ་རྫོང་གི་རིམ་ཁག་ཏང་རྩ་འཛུགས་ཀྱིས་བརྗོད་དོན་གཙོ་བོའི་སློབ་གསོའི་སྤྱིའི་བླང་བྱར་དམ་པོར་དམིགས་ཏེ་དམངས་འཚོའི་ཁྱབ་ཁོངས་ཀྱི་མངོན་གསལ་དོད་པའི་དཀའ་གནད་ཟམ་མི་ཆད་པར་བསལ་བ་དང་། དམངས་ལ་བྱ་བ་དངོས་སྒྲུབ་པ་དང་དཀའ་གནད་སེལ་རྒྱུ་དེ་བརྗོད་དོན་གཙོ་བོའི་སློབ་གསོའི་གྲུབ་འབྲས་ལ་ཞིབ་དཔྱད་ཀྱི་ཆེས་ཐད་ཀར་དང་ཆེས་ནུས་ལྡན་གྱི་ཐབས་ལམ་ལ་བརྩིས་ནས་བརྗོད་དོན་གཙོ་བོའི་སློབ་གསོ་གཏིང་ཟབ་ཀྱི་ཕྱོགས་སུ་སྤེལ་བར་རྒྱུན་མཐུད་སྐུལ་འདེད་བཏང་བ་རེད།

སྤོ་བོ་རྫོང་ཡིད་འོང་ཤང་ཏང་ཨུད་ཀྱིས“གཞི་རིམ་དུ་སྐྱོད་པ་བཞི”བརྗོད་དོན་གཙོ་བོའི་སློབ་གསོའི་དམ་འཛིན་བྱ་གཞི་གལ་ཆེན་ལ་བརྩི་རྒྱུ་མཐའ་འཁྱོངས་ཀྱིས་ཐོག་སྨད་ནས་ཡིད་འོང་བར་ལམ་གུ་དོག་ལ་ཀྱོག་ཅིང་གཟར་བའི་ལམ་དུམ་གྱི་འགྲིམ་འགྲུལ་བདེ་འཇགས་ཀྱི་མངོན་མེད་རྐྱེན་ངན་ལ་དམིགས་ཏེ། ཡུལ་དངོས་སུ་དབྱེ་ཞིབ་བརྡར་གཅོད་དང་གཞུང་ལས་བསྒྲུབས་ནས་འཕྲལ་སྡོམ་ཉེན་གཡོལ་གྱི་ཇུས་གཞི་བཟོས་ཏེ“ངས་མང་ཚོགས་ལ་བྱ་བ་དངོས་སྒྲུབ་པ”གསལ་ཐོའི་ནང་བཅུག་པ་མ་ཟད། ཀྲུང་གོ་ལྕགས་ལམ་ཅུས་གཉིས་པ་དང་འགྲིམ་འགྲུལ་སྐྱེལ་འདྲེན་ཅུས་སོགས་ཚན་པའི་རྒྱབ་སྐྱོར་ཐོབ་ཐབས་བྱས་ནས་ཏང་ཡོན་དང་མང་ཚོགས་ཀྱིས་སེམས་ནུས་གཅིག་མཐུན་ངང་རླངས་འཁོར་གཡོལ་ས་25བཟོས་ཏེ་ལམ་རྒྱ་ཆུང་བའི་རྐྱེན་གྱིས་རླངས་འཁོར་སྐྱོད་དཀའ་བའི་དངོས་ཡོད་དཀའ་ངལ་ཐག་གཅོད་བྱས་ནས་ཕྱིར་སྐྱོད་བདེ་འཇགས་འགན་ལེན་ནུས་ལྡན་བྱས་ཡོད།

སྤོ་བོ་རྫོང་སྲིད་འཛིན་ཞིབ་མཆན་ཅུས་ཏང་ཀྲི་པུའུ་ཡིས“སྐར་ཁུང་དུ་ཀྲི་པུའུ་བཙུགས་ནས་ལས་གནས་ཐོག་གདོང་ལེན་དཔེ་བཟང་གི་ནུས་པ་འདོན་པའི”ལས་ཀའི་འདུ་ཤེས་མཐའ་འཁྱོངས་བྱས་ཏེ“སྐར་ཁུང་གཅིག་ནས་བདག་སྤྲོད”དང་། “སྒྲུབ་རོགས་དང་ཚབ་སྒྲུབ” “དུས་འགྱངས་ཞབས་ཞུ”སོགས་ཀྱི་བྱེད་ཐབས་སྤྱད་དེ་གྲོང་ཁྱེར་དོ་དམ་ཅུས་དང་སྒུལ་བདེ་ཀུང་སི་སོགས་ཚན་པ་5ཡི་དོན་གནད་27“ཧེ་བག་མེད་པའི་བདག་སྤྲོད་ཀྱི་ཕྱོགས་བསྡུས་སྐར་ཁུང”དུ་ལེགས་སྒྲིག་བྱས་པ་དང་། འཕྲོད་བསྟེན་བདེ་ཐང་ཨུ་ལྷན་དང་སྨན་བཅོས་འགན་སྲུང་ཅུས་སོགས་ཚན་པ་7ལ་ཆེད་སྒྲུབ་སྐར་ཁུང་བཙུགས་ནས་དོན་གནད་69སྒྲུབ་ཆོག་པ་མ་ཟད། རྒྱལ་ལམ་318ལམ་རྒྱུད་དུ་སྒེར་འཁོར་བཏང་ནས་ཡུལ་སྐོར་ལ་འགྲོ་མཁན་ཡུལ་སྐོར་བའི“གྲོང་ཁུལ་དུ་མཐའ་སྲུང་ལག་ཁྱེར་གཉེར་བར་འགྲོ་བའི་ལམ་ཐག་རིང་བའི”གནད་དོན་ལ་དམིགས་ཏེ་སྲིད་དོན་ཞབས་ཞུ་ལྟེ་གནས་ཀྱི་མཐའ་སྲུང་ལག་ཁྱེར་གཉེར་ས་བཟོས་པ་དང“དུས་ཆེན་དང་ངལ་གསོའི་རིང་གི་ཞབས་ཞུའི་སྐར་ཁུང”བཟོས་ཏེ་རིམ་རྩིས་བྱས་ན་མི་ཐེངས་2700ལྷག་ཙམ་ལ“དུས་འགྱངས་ཞབས་འདེགས”ཞུས་ཡོད།

སྤོ་བོ་རྫོང་འཕྲོད་བསྟེན་བདེ་ཐང་ཨུ་ལྷན་དང་མི་དམངས་སྨན་ཁང་ཏང་ཀྲི་པུའུ་ཡིས་ཁྲབ་རྨོག་སྡེ་ཁུལ་ཨུ་ལྷན་དང་མཉམ་དུ་སློབ་མ་1000ལྷག་ཙམ་ལ་སྒལ་ཚིགས་འཁྱོག་པ་སོགས་སློབ་མའི་རྒྱུན་མཐོང་གི་ནད་རིན་མེད་བརྟག་དཔྱད་བྱས་པ་དང་། སྤོ་བོ་རྫོང་མི་དམངས་སྨན་ཁང་ཏང་ཀྲི་པུའུ་ཡིས་བོད་སྐྱོར་གྱི་ལེགས་ཆར་བརྟེན་ནས་ཀོང་ཀྲོའུ་གྲོང་ཁྱེར་མི་དམངས་སྨན་ཁང་དང་པོ་དང་འབྲེལ་བ་བྱས་ཏེ་རིགས་གཅིག་མཁས་ཅན་ཚོགས་པ་གདན་དྲངས་ནས་སྤོ་བོ་རྫོང་དུ་འོས་འགན་སྨན་བཅོས་ལ་བསྐྱོད་དེ་མང་ཚོགས་ལ་ཐག་ཉེ་ས་དང་སྟབས་བདེ་སར་སྤུས་ལེགས་ཀྱི་སྨན་བཅོས་ཞབས་ཞུ་ལོངས་སྤྱོད་ཐུབ་པར་བྱས་པ་མ་ཟད། སྔ་རྗེས་སུ“ཀོང་ཀྲོའུ་ཡི་ལྷད་མེད་བརྩེ་བ་ས་མཐོར་འཆང”ཞེས་པའི་སྐྱ་གྲིབ་ཕོག་པའི་ནད་པར་རིན་མེད་སྨན་བཅོས་ཀྱི་བྱེད་སྒོ་དང“ཀོང་ཀྲོའུ་དང་སྤོ་བོ་ཁྱིམ་ཚང་གཅིག་ལྟར་བརྩེ། བདེ་ཐང་བྱ་སྤྱོད་མཉམ་དུ་སྤེལ”ཞེས་པའི་རུས་ནད་གཤགས་བཅོས་ཀྱི་འོས་འགན་སྨན་བཅོས་བྱེད་སྒོ་སོགས་སྤེལ་བ་རེད།

དམངས་འཚོའི་བྱ་བ་ཡིན་ཕྱིན་ཐམས་ཅད་དོན་ཆེན་ཡིན། སྤོ་བོ་རྫོང་གིས་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་ཀྱིས་བློ་བརྟན་འགྱུར་མེད་ངང་དམིགས་ཡུལ་ལག་བསྟར་བྱས་ནས་དམངས་ལ་བདེ་སྐྱིད་བསྐྲུན་པ་དང་། བརྗོད་དོན་གཙོ་བོའི་སློབ་གསོའི་ཕན་འབྲས་དེ་དམངས་འཚོར་ཕན་འདོགས་པ་དང་། དམངས་ཀྱི་དཀའ་ངལ་སེལ་བ། དམངས་ལ་དྲོ་སྐྱིད་སྦྱིན་པ་བཅས་ཀྱི་དངོས་སྒྲུབ་འགན་འཁུར་གྱི་བྱ་སྤྱོད་ལ་བསྒྱུར་ནས་རྒྱ་ཆེའི་མང་ཚོགས་ལ་ཐོབ་སྣང་དེ་བས་ཆེ་བ་དང་། སྐྱིད་སྣང་དེ་བས་རྒྱུན་མཐུད་ཐུབ་པ། བདེ་སྣང་དེ་བས་འགན་ལེན་ཐུབ་པ་བཅས་བྱས་ཡོད།