སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་དབྱང་གི་དཔལ་འབྱོར་ལས་དོན་ཚོགས་འདུར་གནང་བའི་གསུང་བཤད་གལ་ཆེན་གྱིས་དཔལ་འབྱོར་ལས་དོན་གྱི་རིགས་པའི་གཞུང་ལུགས་དང་ལག་ལེན་གྱི་གནད་དོན་གལ་ཆེན་རབ་དང་རིམ་པར་རྒྱས་བཤད་གཏིང་ཟབ་གནང་བ་དང་། དུས་རབས་གསར་པར་དཔལ་འབྱོར་གྱི་ལས་དོན་ཡག་པོ་སྒྲུབ་པའི“ངེས་པར་དུ་སྒྲུབ་དགོས་པ་ལྔ”ཡི་ཆོས་ཉིད་རང་བཞིན་གྱི་ངོས་འཛིན་ཟབ་ཏུ་བཏང་ཡོད། རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་ལྔ་པ་དང་རང་སྐྱོང་ལྗོངས་ཏང་ཨུད་ཀྱི་དཔལ་འབྱོར་ལས་དོན་ཚོགས་འདུར་ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ནས་མིག་སྔའི་རང་ལྗོངས་ཀྱི་དུས་བབ་དང་། འགྲན་སློང་། དཀའ་ངལ་དང་གོ་སྐབས་བཅས་ལ་དབྱེ་ཞིབ་གཏིང་ཟབ་དང“ཇི་ལྟར་ལྟ་དགོས་པ”གསལ་སྟོན་དང“ཇི་ལྟར་སྒྲུབ་དགོས་པ”བཏོན་ཡོད། ལྗོངས་ཡོངས་ཀྱི་གོང་འོག་ཚང་མས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་ལྗོངས་ཏང་ཨུད་ཀྱི་ལས་དོན་བཀོད་སྒྲིག་ལྟར་དུས་བབ་དང་བསྟུན་ནས་དོན་གཉེར་དང་དུས་བབ་དང་བསྟུན་ནས་བྱ་བ་སྒྲུབ་པ་དང་། དམ་པ་དོན་གཉེར། དངོས་འཛིན་དངོས་སྒྲུབ་བཅས་བྱས་ཏེ་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་ནུས་ཤུགས་ཡོད་རྒུས་སྐུལ་འདེད་གཏོང་དགོས།

དཔལ་འབྱོར་གྱི་དུས་བབ་ལ་ལྟ་བར། ལོ་རྒྱུས་དང་བསྡུར་གཞི་ཡོད་པའི་སྒོ་ནས་ལྟ་མཁས་པོ་བྱེད་དགོས། གོང་འོག་ནས་བལྟས་ན་རང་ལྗོངས་ཀྱི་ད་ལོའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཕན་འབྲས་བཟང་པོ་ཐོན་པ་དང་དཔལ་འབྱོར་གྱི་དམིགས་ཚད་གཙོ་བོ་ན་ནིང་ལས་ཆེས་ཆེར་འཕར་བ་ནི་ཕྱོགས་གཅིག་ནས་ན་ནིང་ནད་ཡམས་ཀྱི་ཤུགས་རྐྱེན་ཐེབས་ནས་དཔལ་འབྱོར་གྱི་དམིགས་ཚད་ཁག་གི་གཞི་གྲངས་ཅུང་དམའ་པོ་ཡིན་པ་དང་། ཕྱོགས་གཞན་ཞིག་ནས་རང་སྐྱོང་ལྗོངས་ཏང་ཨུད་ཀྱིས་བཏོན་པའི་འཕེལ་རྒྱས་ལ་སྐུལ་འདེད་གཏོང་བའི་སྲིད་ཇུས་བྱ་ཐབས་རབ་དང་རིམ་པས་ནུས་པ་ཧུར་ཐག་བཏོན་ཡོད་པའང་གསལ་བཤད་ཐུབ་ཡོད། རིམ་མཚུངས་ནས་བལྟས་ན། ང་ཚོའི་དཔལ་འབྱོར་གྱི་གཞི་ཁྱོན་ནང་སའི་ཞིང་ཆེན་དང་གྲོང་ཁྱེར་དང་བསྡུར་ན་ད་དུང་ཧེ་བག་ཡོད་མོད། འོན་ཀྱང་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་དང་གཏན་འཇགས་རྒྱུ་ནོར་ལ་མ་དངུལ་གཏོང་ཚད་སོགས་འཕར་ཚད་ཞིང་ཆེན་དང་གྲོང་ཁྱེར་མང་པོ་ཞིག་ལས་མགྱོགས་པ་ཡོད་པ་དང་། གྲོང་ཁྱེར་དང་གྲོང་གསེབ་ཀྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་དང་རྒྱལ་ཡོངས་ཀྱི་ཆ་སྙོམས་ཆུ་ཚད་དབར་གྱི་ཧེ་བག་རིམ་བཞིན་ཆུང་དུ་ཕྱིན་ནས་རྗེས་སུ་སྙེག་ཤུགས་ཆེ་རུ་ཕྱིན་ཡོད།

ཁྱོན་ཡོངས་ནས་ཆ་ཤས་དང་འབྱུང་འགྱུར་ནས་མིག་སྔར་བལྟས་ཚེ། དེང་སྐབས་ང་ཚོར་སྔར་བཞིན་རྙོག་འཛིང་ཆེ་ལ་འགྱུར་ལྡོག་མང་བའི་རྒྱལ་ཁབ་ཕྱི་ནང་གི་དུས་བབ་ཕྲད་ཡོད་པས། འགྲན་སློང་དང་གོ་སྐབས་མཉམ་དུ་གནས་ཡོད་ཅེས་བརྗོད་ཆོག་མོད། འོན་ཀྱང་སྤྱི་ཡོངས་ནས་བལྟས་ཚེ་གོ་སྐབས་འགྲན་སློང་ལས་ཆེ་བ་ཡོད། གོ་སྐབས་ནི་ཏང་ཀྲུང་དབྱང་གི་བྱམས་བརྩེའི་ཐུགས་ཁུར་ལས་བྱུང་ཞིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གིས་བོད་ཀྱི་ལས་དོན་ལ་ཚད་མཐོའི་མཐོང་ཆེན་གནང་ནས་བོད་ལ་གཏན་འབེབས་བྱས་པའི་དམིགས་བསལ་གཟིགས་སྐྱོང་སྲིད་ཇུས་རབ་དང་རིམ་པས་མུ་མཐུད་ནུས་པ་ཐོན་པ་དང་བོད་ལ་རྒྱབ་སྐྱོར་བྱེད་ཤུགས་ཟམ་མི་ཆད་པར་ཆེ་རུ་གཏོང་བ་དང་། གོ་སྐབས་ནི་རྣམ་གྲངས་གལ་ཆེན་གྱི་འདེགས་སྐྱོར་ཤུགས་ཆེན་ལས་བྱུང་ཞིང་། 2024ལོར་རྒྱལ་ཁབ་དང་རང་སྐྱོང་ལྗོངས་ཀྱི་གཙོ་གནད་རྣམ་གྲངས་ཁག་གཅིག་སྔ་རྗེས་སུ་དོན་འཁྱོལ་བྱེད་པ་དང་། ནུས་རྒྱུ་གཙང་མ་དང་། སྤུས་ལེགས་གཏེར་ཐོན། གྲངས་འཛིན་དཔལ་འབྱོར་སོགས་ལེགས་ལྡན་ཐོན་ལས་འཕེལ་རྒྱས་མགྱོགས་སུ་གཏོང་རྒྱུ། གོ་སྐབས་ནི་འཕེལ་རྒྱས་ཀྱི་ཁོར་ཡུག་རྒྱུན་མཐུད་ལེགས་སུ་ཕྱིན་པ་ལས་བྱུང་ཞིང་། ང་ཚོས་བྱེད་ཐབས་རབ་དང་རིམ་པ་སྤྱད་དེ་ཚོང་གཉེར་ཁོར་ཡུག་ལེགས་སུ་གཏོང་བ་དང་། ནང་ངོས་དང་ཕྱི་ཕྱོགས་སུ་སྒོ་མོ་འབྱེད་ཤུགས་ཆེ་རུ་གཏོང་བ། ས་ཁོངས་མཉམ་ལས་གཏིང་ཟབ་ཏུ་གཏོང་བ། མཐའ་མཚམས་ཀྱི་དཔལ་འབྱོར་མཉམ་ལས་ཁུལ་དང་སྐམ་སའི་གྲུ་ཁ་འཛུགས་སྐྲུན་མགྱོགས་སུ་གཏོང་བ་བཅས་བྱེད་དགོས། གོ་སྐབས་ནི་ལས་བྱེད་པ་དང་མང་ཚོགས་ཀྱི་མཐུན་སྒྲིལ་འབད་འཐབ་ལ་བརྟེན་ནས་བྱུང་ཞིང་། བརྟན་ལྷིང་ལ་འགན་ལེན་དང་འཕེལ་རྒྱས་ལ་དམ་འཛིན་བྱ་རྒྱུ་དེ་མི་རིགས་ཁག་གི་ལས་བྱེད་པ་དང་མང་ཚོགས་ཀྱི་རང་རྟོགས་ཀྱི་བྱ་སྤྱོད་ཅིག་ཏུ་གྱུར་པ་དང་ཏང་ཡོན་དང་ལས་བྱེད་པའི“དོན་ཆེན་བཞི”དང“འཛུགས་གཏོད་བཞིར”སྐུལ་འདེད་གཏོང་བའི་འཇོན་ཐང་དང་ཆུ་ཚད་སྔར་བས་མཐོ་རུ་ཕྱིན་ནས་ལྗོངས་ཡོངས་ཀྱི་གོང་འོག་ཚང་མར་བསམ་བློ་གཅིག་ཏུ་གཏོང་བ་དང་། ངར་ཤུགས་གཅིག་ཏུ་སྒྲིལ་བ། སེམས་ནུས་ཡོད་རྒུ་འདོན་པ་བཅས་ཀྱི་གསོན་ཉམས་དོད་པའི་རྣམ་པ་ཞིག་ཆགས་ཡོད།

རང་ལྗོངས་ཀྱི་རང་ངོས་འཕེལ་རྒྱས་ལ་བལྟས་ན། བོད་ཀྱི་དཔལ་འབྱོར་དང་སྤྱི་ཚོགས་ལ་ད་དུང་དཀའ་ངལ་དང་འགྲན་སློང་ཁག་གཅིག་འཕྲད་ཡོད་ཅིང་། རང་ལྗོངས་འདི་ཉིད་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་གཡུལ་ས་མདུན་མར་གནས་པ་དང་ད་དུང་རྣོ་ངར་དང་རྙོག་འཛིང་ཆེ་བའི་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་དུས་བབ་སྔར་བཞིན་འཕྲད་ཡོད། དཔལ་འབྱོར་འཕེལ་རྒྱས་དོ་མི་སྙོམས་པ་དང་། འཐུས་སྒོ་མི་ཚང་བ། རྨང་གཞི་ཅུང་ཞན་པ། སྲོལ་རྒྱུན་གྱི་ཐོན་ལས་བཟང་སྒྲིག་རིམ་སྤོར་ལ་དཀའ་ངལ་མི་ཉུང་བ་འཕྲད་པ། འཐབ་ཇུས་ཀྱི་རང་བཞིན་ལྡན་པའི་གསར་དར་ཐོན་ལས་འཕེལ་རྒྱས་གཏོང་བར་ད་དུང་འགལ་རྐྱེན་འཕྲད་པ་བཅས་དང་ལས་བྱེད་པ་ཉུང་ཤས་ཤིག་གི་འགན་འཁྲི་ཁུར་སེམས་དེ་ཙམ་ཆེན་པོ་མེད་པ་དང་འཕེལ་རྒྱས་ལ་དམ་འཛིན་བྱེད་པའི་འཇོན་ཐང་ད་དུང་ཆེ་རུ་གཏོང་དགོས་ཀྱི་ཡོད། ང་ཚོས་གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་ཀྱིས་ལས་ཀའི་ཁྲོད་གནས་པའི་ཆད་སྐྱོན་དང་ཞན་ཆར་ངོས་འཛིན་གང་ལེགས་བྱས་ཏེ་འགལ་ཟླ་གཙོ་བོར་དམ་འཛིན་གྱིས་བྱེད་ཐབས་ནུས་ལྡན་སྤྱད་དེ་ཐག་གཅོད་བྱེད་དགོས།

རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པ་འཚོགས་པ་ནས་བཟུང་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་རིམ་ཁག་ཏང་ཨུད་ཀྱིས་གནས་ཚུལ་གསར་པར་ཞིབ་འཇུག་ཧུར་ཐག་དང་། རང་འགུལ་ངང་གནད་དོན་གསར་པ་ཐག་གཅོད། ལམ་སྲོལ་གསར་པ་འཚོལ་ཞིབ་དང་བཟོ་བ་བཅས་བྱས་ཏེ། ལག་ལེན་ཁྲོད་དུས་རབས་གསར་པའི་བོད་ཀྱི་ལས་དོན་ཡག་པོ་སྒྲུབ་པའི་ཆོས་ཉིད་རང་བཞིན་ལ་སྔར་བས་ངོས་འཛིན་ཟབ་མོ་བྱུང་ཡོད། ངེས་པར་དུ“དོན་ཆེན་བཞི”དང“འཛུགས་གཏོད་བཞིར”སྤྱི་འདོམས་སྐུལ་འདེད་གཏོང་རྒྱུ་མཐའ་འཁྱོངས་དང་། ངེས་པར་དུ་སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་བདེ་འཇགས་ཀྱི་མཉམ་འགུལ་བཟང་པོ་མཐའ་འཁྱོངས། ངེས་པར་དུ་འདུ་ཤེས་འགྱུར་ལྡོག་གཏོང་བར་བརྟེན་ནས་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་སྐུལ་ཁྲིད་བྱ་རྒྱུ་མཐའ་འཁྱོངས། ངེས་པར་དུ་སྒྱུར་བཅོས་སྒོ་དབྱེར་བརྟེན་ནས་འཕེལ་རྒྱས་ཀྱི་ནང་སྐྱེས་སྒུལ་ཤུགས་ཆེ་རུ་གཏོང་རྒྱུ་མཐའ་འཁྱོངས། ངེས་པར་དུ“ཚང་དགོས་པ་གསུམ་དང་ཕན་འདོགས་པ་གཅིག”གི་སྤྱིའི་བླང་བྱ་མཐའ་འཁྱོངས་བཅས་བྱས་ཡོད། རང་སྐྱོང་ལྗོངས་ཏང་ཨུད་ཀྱི་སྐབས་བཅུ་པའི་ཚང་འཛོམས་གྲོས་ཚོགས་ཐེངས་ལྔ་པ་དང་རང་སྐྱོང་ལྗོངས་ཏང་ཨུད་ཀྱི་དཔལ་འབྱོར་ལས་དོན་ཚོགས་འདུའི་དགོངས་དོན་ལག་བསྟར་དོན་འཁྱོལ་བྱེད་དགོས་ཚེ“ངེས་པར་དུ་མཐའ་འཁྱོངས་བྱེད་དགོས་པ”ལྔ་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ལས་དོན་ཁག་དང་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་ལས་འགན་ཁག་ཏུ་མངོན་པར་བྱེད་དགོས།

མདུན་སྐྱོད་ཀྱི་ལམ་བུར་ང་ཚོས་ཚད་གཞི་དང་ཡང་ཡང་བསྡུར་བ་དང་ཇི་མ་ཇི་བཞིན་དོན་འཁྱོལ་ལ་དམ་འཛིན་ཡག་པོ་བྱས་ཏེ་ཚོགས་འདུའི་དགོངས་དོན་རང་རྟོགས་ཀྱི་བྱ་སྤྱོད་དུ་ཏན་ཏིག་སྒྱུར་བ་དང་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་ལྗོངས་ཏང་ཨུད་ཀྱི་ལས་ཀའི་བླང་བྱ་དོན་འཁྱོལ་ཡག་པོ་བཅས་བྱས་ཚེ་2024ལོའི་དམིགས་ཚད་ལས་འགན་ཁག་ཐུགས་གྲ་ལེགས་འགྲིག་ཡོང་ངེས་རེད།