བརྗོད་དོན་གཙོ་བོའི་སློབ་གསོ་ཁག་གཉིས་པ་སྤེལ་བ་ནས་བཟུང་། ནག་ཆུ་གྲོང་ཁྱེར་ཉི་མ་རྫོང་གིས“དྲ་ཐོག་དང་དྲ་ཕྱི་ཟུང་འབྲེལ”གྱི་བྱ་ཐབས་སྤྱད་དེ“འདྲི་ཤོག་བརྟག་དཔྱད་དང་ཐབས་འདོན་ཇུས་འབུལ”གྱི་བྱེད་སྒོ་ཏན་ཏིག་སྤེལ་ནས“གཞི་ཚུགས་པ་དང་། ཕྱིར་བསྐྱོད་པ། གདན་དྲངས་པ”སོགས་ཀྱི་བྱེད་ཐབས་སྤྱད་ནས་བསམ་འཆར་དང་གྲོས་འགོ་བསྡུ་ལེན་རྒྱ་ཁྱབ་བྱས་པ་དང་འཕྲལ་སྒྲུབ་འཕྲལ་བཅོས་དང་དུས་བཀག་བཅོས་སྒྲིག་གི་ལས་དོན་ཏན་ཏིག་སྤེལ་བ་རེད།

“གཞི་ཚུགས་པ”བྱས་ཏེ་སྲིད་དོན་དམངས་ལ་འདྲི་རྒྱུ་མཐའ་འཁྱོངས་བྱས་ཤིང་། ཉི་མ་རྫོང་གིས“གཞི་རིམ་དུ་སྐྱོད་པ་བཞིའི”ལས་ཀའི་བྱ་ཐབས་དར་སྤེལ་བཏང་ནས་བརྟག་དཔྱད་ཞིབ་འཇུག་གཏིང་ཟབ་བྱས་ཏེ་བདེན་འཚོལ་དང་། གཏིང་ཟབ་པ། ཕན་འབྲས་ཐོན་པ་བཅས་ལ་གནད་སྨིན་ཤུགས་འདོན་བྱས་པ་དང་། རྫོང་གི“ཚན་ཁག་ཆེན་པོ་བཞིའི”འགོ་ཁྲིད་ཀྱིས་རང་ངོས་ཀྱི་དོན་དངོས་དང་ཟུང་འབྲེལ་དང་ཁག་བགོས་དོ་དམ་ཁྱབ་ཁོངས་ཀྱི་ལས་དོན་དང་ཤང་དང་གྲོང་རྡལ་དང་གྲོང་ཚོའི་དོན་དངོས་དང་ཟུང་འབྲེལ་གྱིས“མི་བྱེད་པ་བཞི་དང་ཐད་སྐྱོད་གཉིས”ཀྱི་བྱ་ཐབས་སྤྱད་དེ། ཞིང་འབྲོག་ཁུལ་དང་གཞི་རིམ་གྱི་འཐབ་ས་དང་པོར་བསྐྱོད་ནས་བཞུགས་མོལ་བཅར་འདྲི་དང་། སྐབས་བསྟུན་བཅར་འདྲི། འདྲི་ཤོག་བརྟག་དཔྱད་སོགས་བྱས་ཏེ་འབྲེལ་གཏུག་བྱ་ཡུལ་དང་། གཞི་རིམ་གྱི་ཏང་ཡོན། ཞིང་འབྲོག་མང་ཚོགས། གཞི་རིམ་གྱི་ལས་བྱེད་པའི་བསམ་འཆར་དང་གྲོས་འགོར་ཉན་པ་མ་ཟད། རིམ་པ་མང་པོ་དང་ཕྱོགས་མང་པོའི་སྒོ་ནས་བརྟག་ཞིབ་བྱས་ཏེ་དངོས་ཡོད་དང་། གནད་སྨིན། ཞིབ་གསལ་བཅས་ཀྱིས་གནས་ཚུལ་དངོས་ཁོང་དུ་ཆུད་པར་བྱས་པ་རེད།

“ཕྱིར་བསྐྱོད”དེ་དམངས་ཀྱི་དགོས་མཁོ་འདྲི་རྒྱུ་མཐའ་འཁྱོངས་བྱས་ཤིང་། ཉི་མ་རྫོང་གིས་དྲ་ཐོག་ནས་བསམ་འཆར་དང་གྲོས་འགོ་བསྡུ་ལེན་གྱི་སྤྱི་བསྒྲགས་སྤེལ་ཏེ། རྫོང་ཡོངས་ཀྱི་ཁྱབ་ཁོངས་སུ་བརྗོད་དོན་གཙོ་བོའི་སློབ་གསོའི་བསམ་འཆར་བསྡུ་ལེན་སྒམ་94བཙུགས་པ་རེད། ཉི་མ་རྫོང་གི་བརྗོད་དོན་གཙོ་བོའི་སློབ་གསོའི་གཞུང་ལས་ཁང་གིས་སློབ་གསོ་དང་། སྨན་བཅོས། ཁོར་ཡུག་སྲུང་སྐྱོང་། ཆུ་བེད། སྡོད་ཁང་སོགས་ལ་དམིགས་ནས《ཉི་མ་རྫོང་གི་བརྗོད་དོན་གཙོ་བོའི་སློབ་གསོའི་འདྲི་ཤོག་བརྟག་དཔྱད་རེའུ་མིག》ཞིབ་འཇུག་བྱས་ནས་བཟོས་ཏེ་ཤང་དང་གྲོང་རྡལ་ཁག་ལ་སྤྲད་ནས། ཤང་དང་གྲོང་རྡལ་ཁག་དང་ཚན་པ་ཁག་གིས་འདྲི་ཤོག་བརྟག་དཔྱད་ལས་དོན་སྤེལ་བར་སྐུལ་འདེད་དང་མཛུབ་ཁྲིད་བྱས་པ་རེད། མིག་སྔའི་བར། ཉི་མ་རྫོང་གིས་སྤེལ་བའི་འདྲི་ཤོག་བརྟག་དཔྱད་བྱེད་སྒོ་མི་5400ལྷག་ཙམ་ལ་ཁྱབ་པ་དང་བསམ་འཆར་དང་གྲོས་འགོ་85བསྡུ་ལེན་བྱས་པ་རེད། ཤང་དང་གྲོང་རྡལ་ཁག་དང་ཚན་པ་ཁག་གིས་དོན་དངོས་དང་ཟུང་འབྲེལ་བྱས་ཏེ་འཚོལ་བསྡུ་བྱས་པའི་བསམ་འཆར་དང་གྲོས་འགོར་ལེགས་སྒྲིག་བྱས་ཏེ་དུས་ཐོག་ཏུ་གནད་དོན་གྱི་རྩིས་ཐོར་སྒྱུར་བ་བྱས་ནས་འཕྲལ་སྒྲུབ་འཕྲལ་བཅོས་དང་དུས་བཀག་བཅོས་སྒྲིག་གི་ལས་དོན་ཏན་ཏིག་སྤེལ་བ་རེད།

“གདན་དྲངས”ནས་ཐབས་ཇུས་དམངས་ལ་འདྲི་རྒྱུ་མཐའ་འཁྱོངས་བྱས་ཤིང་། ཉི་མ་རྫོང་གི་ཤང་དང་གྲོང་རྡལ་ཁག་གི་ཏང་ཨུད་ཀྱིས་སྣེ་ཁྲིད་དེ་ཐབས་འདོན་ཇུས་འབུལ་གྱི་བྱེད་སྒོ་སྤེལ་བ་དང་། གྲོང་སྡོད་ལས་དོན་རུ་ཁག་དང་། མི་དམངས་འཐུས་ཚོགས་ཀྱི་འཐུས་མི། སྲིད་གྲོས་ཀྱི་ཨུ་ཡོན། ཡུལ་མིའི་འཐུས་མི་བཅས་གདན་དྲངས་ནས་ཐོན་ལས་འཕེལ་རྒྱས་དང་མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་སོགས་ནང་དོན་ལ་དམིགས་ཏེ། ཐབས་འདོན་ཇུས་འབུལ་གྱི་བྱེད་སྒོ་སྤེལ་བ་དང་ཕྱོགས་ཁག་གི་བསམ་འཆར་དང་གྲོས་འགོ་བསྡུ་ལེན་བྱས་ནས་ཞིང་འབྲོག་མང་ཚོགས་ཀྱི་འདུན་པ་དང་རེ་བ་ཁོང་དུ་གཏིང་ཟབ་ཆུད་པར་བྱས་པ་རེད།