ཟླ་12ཚེས་11དང་12ཉིན། ཀྲུང་དབྱང་གི་དཔལ་འབྱོར་ལས་དོན་ཚོགས་འདུ་འཚོགས་ཤིང་། 2023ལོའི་དཔལ་འབྱོར་གྱི་ལས་དོན་ལ་ཕྱོགས་ཡོངས་ནས་ཕྱོགས་སྡོམ་དང་། མིག་སྔའི་དཔལ་འབྱོར་གྱི་དུས་བབ་ལ་དབྱེ་ཞིབ་གཏིང་ཟབ། 2024ལོའི་དཔལ་འབྱོར་གྱི་ལས་དོན་ལ་བརྒྱུད་རིམ་ལྡན་པའི་ངང་བཀོད་སྒྲིག་བཅས་བྱས་ནས། ཀྲུང་གོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་ཕྱོགས་སྟོན་སྣེ་ཁྲིད་བྱས་ཡོད། རང་ལྗོངས་ཀྱི་རྒྱ་ཆེའི་ཏང་ཡོན་དང་ལས་བྱེད་པས་ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་དགོངས་དོན་སློབ་སྦྱོང་དང་དེར་གོ་བ་ནན་ཏན་བླངས་ནས། ཚང་མས་ཀྲུང་དབྱང་གི་དཔལ་འབྱོར་ལས་དོན་ཚོགས་འདུ་འཚོགས་པས། ང་ཚོའི་གདེང་ཚོད་དང་གདིང་ཤུགས་འཕེལ་བ་དང་སང་ལོའི་དཔལ་འབྱོར་གྱི་ལས་དོན་ཡག་པོ་ཏན་ཏིག་སྒྲུབ་པར་བསམ་བློ་དང་བྱ་སྤྱོད་ཀྱི་སྟོབས་ཤུགས་ཆེན་པོ་བསྣན་ཡོད། བསམ་བློ་དང་བྱ་སྤྱོད་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ཐོག་གཅིག་གྱུར་ཏན་ཏིག་བྱས་ནས། བརྟན་ཐོག་ཡར་འཕེལ་དང་། ཡར་འཕེལ་བརྟན་སྐུལ། སྔོན་འཛུགས་རྗེས་གཏོར། གདེང་ཚོད་བརྟན་པོ། སེམས་ཤུགས་གཅིག་སྒྲིལ་བཅས་མཐའ་འཁྱོངས་ཀྱིས་ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་མགྱོགས་པོ་བཏང་སྟེ། སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་ལ་སྐུལ་འདེད་ཧུར་ཐག་གཏོང་གི་ཡིན་ཞེས་བཤད་པ་རེད།

ཀྲུང་དབྱང་གི་དཔལ་འབྱོར་ལས་དོན་ཚོགས་འདུར་གྲོང་གསེབ་ཀྱི་ཐོན་ལས་འཕེལ་རྒྱས་གཏོང་བའི་ཆུ་ཚད་མཐོ་རུ་གཏོང་བ་དང་། གྲོང་གསེབ་འཛུགས་སྐྲུན་གྱི་ཆུ་ཚད་མཐོ་རུ་གཏོང་བ། གྲོང་གསེབ་བཅོས་སྐྱོང་གི་ཆུ་ཚད་མཐོ་རུ་གཏོང་བ་བཅས་གཙོ་གནད་དུ་བྱས་ཏེ། ཚན་རྩལ་དང་སྒྱུར་བཅོས་ཕྱོགས་གཉིས་ལ་སྐུལ་འདེད་གཏོང་ཤུགས་ཆེ་རུ་གཏོང་བ་དང་། ཞིང་པའི་འབབ་འཕར་ཐབས་ལམ་ལ་ཤུགས་སྣོན། སྟོབས་ཤུགས་གཅིག་སྒྲིལ་གྱིས་མང་ཚོགས་ཀྱི་བློ་ལ་བབས་པ་དང་ཁ་ཡོད་ལག་ཡོད་ཀྱི་བྱ་བ་དངོས་ཁག་གཅིག་སྒྲུབ་པར་དམ་འཛིན་ཡག་པོ་བཅས་བྱས་ནས། གནས་འཕྲོད་ལས་འཚམ་དང་ཞི་མཐུན་མཛེས་སྡུག་ལྡན་པའི་གྲོང་གསེབ་འཛུགས་སྐྲུན་བྱེད་དགོས་པ་བསྟན་ཡོད།

“ཀྲུང་དབྱང་གི་དཔལ་འབྱོར་ལས་དོན་ཚོགས་འདུ་འཚོགས་རྗེས་རང་སྐྱོང་ལྗོངས་ཞིང་ལས་དང་གྲོང་གསེབ་ཐིང་ཏང་ཙུའུ་ཡིས་ཚད་མཐོའི་མཐོང་ཆེན་བྱས་ནས་ཚོགས་འདུའི་དགོངས་དོན་དུས་ཐོག་ཏུ་སློབ་སྦྱོང་ནན་ཏན་བྱ་རྒྱུ་སྒྲིག་འཛུགས་བྱས་ཡོད”རང་སྐྱོང་ལྗོངས་ཏང་ཨུད་ཞིང་ལས་གཞུང་དོན་ཁང་གི་ཀྲུའུ་རེན་གཞོན་པ་དང་། ལྗོངས་ཞིང་ལས་དང་གྲོང་གསེབ་ཐིང་ཏང་ཙུའི་ཧྲུའུ་ཅི་གཞོན་པ་དང་ཐིང་ཀྲང་ཀྲང་ཧའེ་པོ་ཡིས། ང་ཚོས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ལས་དོན་བཀོད་སྒྲིག་ལག་བསྟར་དོན་འཁྱོལ་ནན་ཏན་གྱིས་ཞིང་ལས་དང་གྲོང་གསེབ་པུའི་མཛུབ་ཁྲིད་འོག་མཐའ་ཚད་སྲུང་བ་དང་། མཁོ་སྤྲོད་འགན་ལེན། འབབ་འཕར་ལ་སྐུལ་འདེད། ཁྱད་ལྡན་སྟོབས་ཆེར་གཏོང་བ། མཉམ་འདྲེས་གཏིང་ཟབ། དར་རྒྱས་ལ་སྐུལ་འདེད་བཅས་བཏང་སྟེ་རེས་སྐོར་གསར་པའི་ལས་ཁུངས་སྒྱུར་བཅོས་ལེགས་སྒྲུབ་བྱས་ནས“1235”ཡི་ལས་ཀའི་བསམ་ཕྱོགས་ལྟར་ཞིང་འབྲོག་མང་ཚོགས་ཀྱི་འབབ་འཕར་གྱི་ལྟེ་བའི་ལས་འགན་ལ་དམིགས་པ་དང་། གཞི་ཁྱོན་ལྡན་པའི་དབུལ་ལོག་མི་ཐེབས་པ་དང་འབྲུ་རིགས་བདེ་འཇགས་ཀྱི་མཐའ་ཚད་གཉིས་བརྟན་པོར་སྲུང་བ། གྲོང་གསེབ་འཕེལ་རྒྱས་དང་། གྲོང་གསེབ་འཛུགས་སྐྲུན། གྲོང་གསེབ་བཅོས་སྐྱོང་བཅས་ཀྱི་གཙོ་གནད་ལས་འགན་ཁག་གསུམ་ལ་སྐུལ་འདེད་གཏོང་བ། ཏང་གི་འགོ་ཁྲིད་དང་། ཚན་རྩལ་གྱི་འདེགས་སྐྱོར། ཞིང་འབྲོག་ཁུལ་གྱི་སྒྱུར་བཅོས། དཔྱད་ཞིབ་གདེང་འཇོག མ་དངུལ་གཏོང་བ་བཅས་འགན་ལེན་བྱེད་ཐབས་ལྔར་ཤུགས་སྣོན་རྒྱག་པ། གྲོང་གསེབ་དར་རྒྱས་ལ་སྤྱི་འདོམས་སྐུལ་འདེད་གཏོང་བ་བཅས་བྱས་ཏེ་རང་ལྗོངས་ཀྱི་ཞིང་ལས་དང་གྲོང་གསེབ་དེང་རབས་ཅན་འཛུགས་སྐྲུན་ལ་སྐུལ་འདེད་མགྱོགས་པོ་གཏོང་གི་ཡིན་ཞེས་བཤད་པ་རེད།

ཁྲེང་ཀོན་ཆུས་འདི་ཉིད་ལྷ་ས་གྲོང་ཁྱེར་གྱི་ལྟེ་བའི་ཁུལ་ཞིག་ཡིན་པའི་ངོས་ནས་གྲོང་ཁྱེར་ཡོངས་ཀྱི་དཔལ་འབྱོར་འཕེལ་རྒྱས་དང་། སྐྱེ་ཁམས་ཁོར་ཡུག་སྲུང་སྐྱོང་། བརྟན་ལྷིང་སྲུང་སྐྱོང་། གྲོང་ཁྱེར་བཅོས་སྐྱོང་ཞིབ་ཚགས་སོགས་ཀྱི་ལས་འགན་གཙོ་བོ་ཁུར་ཡོད། ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་དགོངས་དོན་སློབ་སྦྱོང་ནན་ཏན་བྱས་རྗེས་ཁྲེང་ཀོན་ཆུས་འཕེལ་སྒྱུར་ཨུ་ལྷན་གྱི་ཀྲུའུ་རེན་ཝང་རུའེ་ཡིས། ད་ཐེངས་ཀྱི་ཚོགས་འདུར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་དམིགས་ཏེ་སང་ལོའི་དཔལ་འབྱོར་ལས་དོན་ལ་གཙོ་གནད་ལས་འགན་ཁག་དགུ་བཀོད་སྒྲིག་བྱས་ཡོད། ང་ཚོས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་རང་སྐྱོང་ལྗོངས་ཏང་ཨུད་ཀྱི་ལས་ཀའི་བླང་བྱ་ལག་བསྟར་དོན་འཁྱོལ་གཏིང་ཟབ་བྱས་ཏེ་གཙོ་གནད་ལས་དོན་ལ་ཞིབ་བསྡུར་དང་དམ་འཛིན་ཡག་པོ་བྱེད་པ་དང་། ཁྲེང་ཀོན་ཆུས་ཀྱི་དོན་དངོས་དང་ཟུང་འབྲེལ་བྱས་ཏེ་ཞིབ་ཚགས་དང་། གཞན་སྒྱུར། ཞིབ་ཕྲ་བཅས་ལ་བརྟེན་ནས་མ་འཇོག་འཛད་སྤྱོད་དང་། གྲོང་ཁྱེར་དོ་དམ། ཐོན་ལས་འཕེལ་རྒྱས། དམངས་འཚོ་འགན་ལེན། སྐྱེ་ཁམས་སྲུང་སྐྱོང་སོགས་གཙོ་གནད་ལས་དོན་ལ་གསར་གཏོད་རང་བཞིན་གྱི་དམ་འཛིན་ཡག་པོ་བྱས་ཏེ་ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་ལེགས་སྐྱེས་གསར་པ་འབུལ་གྱི་ཡིན་ཞེས་བཤད་པ་རེད།

ཀྲུང་དབྱང་གི་དཔལ་འབྱོར་ལས་དོན་ཚོགས་འདུར་གཞུང་ཁོངས་ཁེ་ལས་སྒྱུར་བཅོས་དང་རིམ་སྤོར་གཏིང་ཟབ་བྱས་ནས་ལྟེ་བའི་ནུས་པ་དང་ལྟེ་བའི་འགྲན་རྩོད་ནུས་པ་ཆེ་རུ་གཏོང་དགོས་ལུགས་བཏོན་ཡོད། ཆབ་མདོ་གྲོང་ཁྱེར་སྲིད་གཞུང་གཞུང་རྒྱུ་ཨུ་ལྷན་ཏང་ཨུད་ཀྱི་ཧྲུའུ་ཅི་དང་ཀྲུའུ་རེན་གཞོན་པ་ལུའོ་ཀོང་ཆན་གྱིས། ཕྱོགས་ཡོངས་ནས་སྒྱུར་བཅོས་ཟབ་གཏོང་གི་བྱེད་ཐབས་གལ་ཆེན་སྔར་བས་ཇུས་འགོད་བྱས་ཏེ་གཏན་འཁེལ་བྱས་པའི་དམིགས་ཚད་ལས་འགན་གཞིར་བཟུང་། ཆབ་མདོ་གྲོང་ཁྱེར་ཁོངས་གཏོགས་ཀྱི་གཞུང་ཁོངས་ཁེ་ལས་བསྡུ་སྒྲིལ་བསྐྱར་འཛུགས་བྱེད་མགྱོགས་སུ་བཏང་ནས་གཉེར་སྐྱོང་རང་བཞིན་གྱི་གཞུང་རྒྱུར་གཅིག་སྡུད་གཅིག་གྱུར་གྱིས་ལྟ་འདོམས་བྱེད་པ་དང་། གྲོང་ཁྱེར་ཁོངས་གཏོགས་ཀྱི་གཞུང་ཁོངས་ཁེ་ལས་དང་ཀུང་སིའི་བཅོས་སྐྱོང་ཆུ་ཚད་མཐོ་རུ་གཏོང་བ། གྲོང་ཁྱེར་ཁོངས་གཏོགས་ཀྱི་གཞུང་ཁོངས་ཁེ་ལས་ཚོགས་པ་ཅན་དུ་འཕེལ་རྒྱས་འགྲོ་བར་སྐུལ་འདེད་གཏོང་བ་བཅས་བྱས་ཏེ་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་དང་ཀྲུང་གོའི་ལུགས་ཀྱི་དེང་རབས་ཅན་སྐྲུན་མགྱོགས་སུ་གཏོང་བར་ལེགས་སྐྱེས་འབུལ་གྱི་ཡིན་ཞེས་བཤད་པ་རེད།