ཚེས་6ཉིན་རང་སྐྱོང་ལྗོངས་ཀྱི་བརྗོད་དོན་གཙོ་བོའི་སློབ་གསོའི“6+1”གི་ཆེད་དོན་བཅོས་སྒྲིག་ལས་དོན་གྱི་བཀོད་གཏོང་ཚོགས་འདུ་འཚོགས་ཤིང་། ཚོགས་འདུའི་ཐོག་བརྗོད་དོན་གཙོ་བོའི་སློབ་གསོ་དང་། ལྷག་དོན་དུ་དག་ཐེར་བཅོས་སྒྲིག་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་ལག་བསྟར་གཏིང་ཟབ་བྱས་པ་དང་། ཚའེ་ཆི་དང་ལི་ཀན་ཅེ་ཡིས་ཀྲུང་དབྱང་གི་བརྗོད་དོན་གཙོ་བོའི་སློབ་གསོའི་འགོ་ཁྲིད་ཚོགས་ཆུང་གི་ཚོགས་འདུ་དང་འབྲེལ་ཡོད་ལས་དོན་ཚོགས་འདུའི་ཐོག་གནང་བའི་གསུང་བཤད་ཀྱི་དགོངས་དོན་སློབ་སྦྱོང་ལག་བསྟར་བྱས་པ་དང་ཆབས་ཅིག གོམ་སྟབས་རྗེས་མའི་ལས་དོན་བཀོད་སྒྲིག་བྱས་པ་རེད། ལྗོངས་ཏང་ཨུད་ཀྱི་རྒྱུན་ཨུ་དང་། རྩ་འཛུགས་པུའི་པུའུ་ཀྲང་། ལྗོངས་ཏང་ཨུད་ཀྱི་བརྗོད་དོན་གཙོ་བོའི་སློབ་གསོའི་འགོ་ཁྲིད་ཚོགས་ཆུང་གི་ཙུའུ་ཀྲང་གཞོན་པ་དང་གཞུང་དོན་ཁང་གི་ཀྲུའུ་རེན་བཅས་ཡིན་པའི་ལའེ་ཅའོ་ཚོགས་འདུར་ཞུགས་པ་དང་འབྲེལ་གསུང་བཤད་ཀྱང་གནང་བ་རེད།

ལའེ་ཅའོ་ཡིས་དུས་མཚམས་གོང་མའི་ལས་དོན་ལ་ཐོབ་པའི་ཕན་འབྲས་ལ་ཁས་ལེན་གང་ལེགས་གནང་རྗེས། ཆེད་དོན་བཅོས་སྒྲིག་ཁག་6དང་གོང་འོག་མཉམ་འགུལ་གྱིས་དག་ཐེར་དང་བཅོས་སྒྲིག་ལ་དམ་འཛིན་བྱེད་པ་ནི་བརྗོད་དོན་གཙོ་བོའི་སློབ་གསོ་ཁག་གཉིས་པའི་ནང་དོན་གལ་ཆེན་ཞིག་ཡིན་པས། རིམ་ཁག་སྡེ་ཚན་ཁག་གིས་འགན་འཁྲི་གསལ་རྟོགས་དང་འགན་འཁྲི་ཡག་པོ་འཁུར་བ་དང་གནད་དོན་དངོས་ཐག་གཅོད་བྱས་ནས་བརྗོད་དོན་གཙོ་བོའི་སློབ་གསོ་བརྟན་བགྲོད་རྒྱང་འཁྱོལ་ཡོང་བར་སྐུལ་འདེད་གཏོང་དགོས་ཞེས་གསུངས་པ་རེད།

ལའེ་ཅའོ་ཡིས། ཆབ་སྲིད་ཀྱི་ཚུགས་གནས་མཐོ་རུ་བཏང་སྟེ། “6+1”གི་ཆེད་དོན་བཅོས་སྒྲིག་ལ་དམ་འཛིན་ཏན་ཏིག་བྱ་རྒྱུ་དེ“གཏན་འཁེལ་གཉིས”མཐའ་གཅིག་ཏུ་བརྟན་པོར་སྲུང་བ་དང“སྲུང་སྐྱོང་གཉིས”མཐའ་གཅིག་ཏུ་ཐུབ་པའི་ཞིབ་ཕྲའི་ལག་ལེན་ལ་བརྩིས་ནས། མཉམ་འགུལ་བྱེད་ཤུགས་ཆེ་རུ་གཏོང་བ་དང་མཉམ་ཤུགས་གཅིག་ཏུ་བསྒྲིལ་ཏེ“6+1”གི་ཆེད་དོན་བཅོས་སྒྲིག་ལས་དོན་ཡག་པོ་སྒྲུབ་པའི་འགན་འཁྲི་འཁུར་སེམས་དང་ལས་འགན་སྒྲུབ་སེམས་ཆེ་རུ་གཏོང་དགོས། རྗེས་ལུས་རྫོང་གི་ཆེད་དོན་བཅོས་སྒྲིག་ལ་སྐུལ་འདེད་ཏན་ཏིག་གཏོང་བ་དང་། སྤུས་ཚད་མཐོན་པོས་གཞི་རིམ་བཅོས་སྐྱོང་གི་ཆེད་དོན་བཅོས་སྒྲིག་ལ་སྐུལ་འདེད་གཏོང་བ། ནན་པོ་དང་ཏན་ཏིག་ངང་ལས་བྱེད་པའི་སྤྱོད་ཚུལ་ཆེད་དོན་བཅོས་སྒྲིག་ལས་དོན་སྤེལ་བ། ལས་བྱེད་པ་གྲོང་སྡོད་དང་དགོན་སྡོད་ལས་དོན་གྱི་ཆེད་དོན་བཅོས་སྒྲིག་གི་ལས་དོན་ཏན་ཏིག་ངང་ཡག་པོ་སྒྲུབ་པ། ནུས་མེད་ཟབ་ཟོབ་ཀྱི་གཞི་རིམ་ཏང་རྩ་འཛུགས་ཀྱི་ཆེད་དོན་བཅོས་སྒྲིག་ལ་སྤྱི་འདོམས་སྐུལ་འདེད་གཏོང་བ། ཡིག་འབུལ་ཞུ་བཅར་ཁྱབ་ཁོངས་ཀྱི་ཆེད་དོན་བཅོས་སྒྲིག་གི་ལས་དོན་གཏིང་ཟབ་སྤེལ་བ། གོང་འོག་མཉམ་འགུལ་གྱིས་དག་ཐེར་བཅོས་སྒྲིག་ལ་དམ་འཛིན་ཡག་པོ་མཐའ་འཁྱོངས་བྱེད་པ། “6+1”གི་ཆེད་དོན་བཅོས་སྒྲིག་ལས་དོན་གཏིང་ཟབ་དང་ཏན་ཏིག་སྤེལ་བར་སྐུལ་འདེད་གཏོང་བ་བཅས་བྱེད་དགོས། རྩ་འཛུགས་ཀྱི་འགོ་ཁྲིད་ལ་ཤུགས་སྣོན་རྒྱག་པ་དང་། ལས་དོན་གྱི་འགན་འཁྲི་ནན་དུ་གཏོང་བ། ལྟ་སྐུལ་ཞིབ་བཤེར་ལ་ཤུགས་སྣོན་རྒྱག་པ། དྲིལ་བསྒྲགས་ཁྲིད་སྟོན་ལ་ཤུགས་སྣོན་རྒྱག་པ་བཅས་བྱས་ནས“6+1”གི་ཆེད་དོན་བཅོས་སྒྲིག་གཏིང་ཟབ་བྱེད་པར་འགན་ལེན་ནུས་ལྡན་བྱེད་དགོས་པའི་ནན་བཤད་གནང་བ་རེད།