ཉིན་ཤས་གོང་གསར་འགོད་པར་ཉིང་ཁྲི་གྲོང་ཁྱེར་གྱི་འབྲེལ་ཡོད་སྡེ་ཚན་ནས་ཤེས་རྟོགས་བྱུང་བར། ཟླ་8ཚེས་30ཉིན་ཉིང་ཁྲི་གྲོང་ཁྱེར་གྱི་12345སྲིད་དོན་ཞབས་ཞུའི་དམངས་ཕན་ཐད་སྦྲེལ་ཁ་པར་ཚོད་སྤྱོད་བྱས་ཚུན། ཁེ་ལས་དང་མང་ཚོགས་ཀྱི་དགའ་བསུ་རྒྱ་ཁྱབ་ཏུ་ཐོབ་ལ་སྤྱི་ཚོགས་ཀྱི་ཕན་འབྲས་ཡག་པོའང་ཐོབ་ཡོད།

“ཚོད་སྤྱོད་བྱས་ཚུན། ཉིང་ཁྲི་གྲོང་ཁྱེར་གྱི་12345སྲིད་དོན་ཞབས་ཞུའི་དམངས་ཕན་ཐད་སྦྲེལ་ཁ་པར་ཐེངས་1669འབྱོར་བ་དང་། རིམ་རྩིས་བརྒྱབ་ན་ཁེ་ལས་དང་མང་ཚོགས་ཀྱི་དཀའ་ངལ་དང་། འཕྲལ་མཁོ། སེམས་ཁྲལ། རེ་སྒུག་བཅས་ཀྱི་གནད་དོན་115ཐག་གཅོད་བྱས་པ། དཔལ་འབྱོར་གྱི་གྱོང་གུན་སྒོར་ཁྲི་171མི་ཕོག་པར་བྱས་ཡོད་པས། མང་ཚོགས་ཀྱི་བློ་ལ་བབ་པ་དང་། སྤྱི་ཚོགས་ཀྱི་ཁས་ལེན་ཐོབ་པ། ཞབས་འདེགས་ཞུ་ནུས་ཆེ་བ་བཅས་ཀྱི་དམངས་ལ་ཞབས་འདེགས་ཞུ་བའི‘སེམས་འབྲེལ་ཟམ་པ’ལྟ་བུར་གྱུར་ཡོད”ཅེས་ཉིང་ཁྲི་གྲོང་ཁྱེར་གྱི་འབྲེལ་ཡོད་སྡེ་ཚན་གྱི་འགན་འཁུར་བས་ངོ་སྤྲོད་བྱས་པ་རེད།

ཤེས་རྟོགས་བྱུང་བར་གཞིགས་ན། ཉིང་ཁྲི་གྲོང་ཁྱེར་གྱི་12345སྲིད་དོན་ཞབས་ཞུའི་དམངས་ཕན་ཐད་སྦྲེལ་ཁ་པར་གྱིས་གཙོ་བོ་ཁེ་ལས་དང་མང་ཚོགས་ལ་སྲིད་དོན་ཞབས་འདེགས་དང་། དམངས་འཚོ་འགན་ལེན། སྨན་བཅོས་འཕྲོད་བསྟེན། གྲོང་ཁྱེར་དོ་དམ། འགྲིམ་འགྲུལ་ཕྱིར་སྐྱོད། སྤྱི་པའི་ཞབས་འདེགས་སོགས་ཐད་ཀྱི་བློ་འདྲི་དང་། ཞུ་གཏུག གྲོས་འདོན། རོགས་སྐྱོར་བཅས་ཀྱི་ཞབས་འདེགས་ཞུ་བ་དང་། སྤྱི་ཚོགས་བཅོས་སྐྱོང་དང་ཚོང་གཉེར་ཁོར་ཡུག་ལེགས་སུ་གཏོང་བ་སོགས་ཀྱི་ཁྱབ་ཁོངས་སུ་ཕན་འབྲས་རགས་ཙམ་ཐོབ་པ།“ཆུ་ཚོད་24ངལ་གསོ་མི་རྒྱག་པའི”ཞབས་འདེགས་རྣམ་པའི་སྲིད་གཞུང་གཏོད་པར་རོགས་སྐྱོར་བྱེད་བཞིན་ཡོད།

དཔུང་ཁག་གི་ཆེད་ལས་ཅན་དང་། ཚད་ལྡན་ཅན། ཆ་འཕྲིན་ཅན་བཅས་ཀྱི་ཆུ་ཚད་ཕྱོགས་ཡོངས་ནས་མཐོ་རུ་གཏོང་ཆེད། ཉིང་ཁྲི་གྲོང་ཁྱེར་གྱིས་འབྲེལ་ཡོད་ཁྱབ་ཁོངས་ཀྱི་རིགས་གཅིག་མཁས་ཅན་གདན་དྲངས་ནས་ཐད་སྦྲེལ་ཁ་པར་ལས་སྟེགས་ཀྱི་ལས་སྒོ་སྒྲུབ་པ་དང་འཚམས་ལན་བྱ་རིམ་སོགས་ཀྱི་ཐད་ཆེད་དོན་སློབ་ཁྲིད་དང་གཅིག་གིས་གཅིག་ལ་མཛུབ་ཁྲིད་བྱས་པ་དང་། ཐད་སྦྲེལ་ཁ་པར་ལེན་མཁན་ལྷ་ས་གྲོང་ཁྱེར་དུ་སློབ་སྦྱོང་བྱེད་པར་བཏང་བ། 12345ཐད་སྦྲེལ་ཁ་པར་གྱི་ཤེས་མཛོད་ཀྱི་ཚིག་3000ལྷག་ཙམ་ལེགས་སྒྲིག་དང་ཕྱོགས་སྡོམ་བྱས་ནས་ཐད་སྦྲེལ་ཁ་པར་གྱི་ཞབས་འདེགས་སྤུས་ཚད་མཐོ་རུ་ཧུར་ཐག་བཏང་ཡོད།