འདི་ག་ཚགས་པར་གྱི་གསར་འགོད་པ། ཞུས་ཡུས་ཡའོ་དང་། ཆུང་བདག་སྒྲོལ་དཀར། ཤན་ཀན།

ཉིང་ཁྲི་གྲོང་ཁྱེར་བྲག་ཡིབ་ཆུས་ལ་སྟེང་ཁ་གྲོང་ཚོའི་ནགས་སྲུང་བ་བསོད་ནམས་ཚེ་རིང་གིས་ལྟོ་ཕད་ནང་ལག་ཐོགས་ཁ་པར་བླུགས་རྗེས་སླར་ཡང་ནགས་ཚལ་སྲུང་སྐྱོང་གི་ལམ་ལ་བཞུད།

ལ་སྟེང་ཁ་གྲོང་ཚོ་ནི་བྲག་ཡིབ་ཆུས་ཀྱི་ནུབ་བྱང་རྒྱུད་དུ་ཆགས་ཤིང་། ཉེ་འཁོར་ནི་གདོད་མའི་ནགས་ཚལ་སྟུག་པོ་ཡིན། ནགས་ཁྲོད་ཀྱི་ལམ་ཆུང་བརྒྱུད་དེ་ཐག་རིང་གི་ཕྱོགས་སུ་སྐྱོད་སྐབས། ཁོང་གིས་ཉེ་འགྲམ་གྱི་ནགས་ཤིང་ཡང་ཡང་པར་དུ་བླངས་ནས་ཟིན་ཐོར་བཀོད་དེ་ཤེས་རྟོགས་བྱུང་བའི་གནད་དོན་དུས་ཐོག་ཏུ་མ་ལག་གི་རྒྱབ་སྟེགས་སུ་བརྒྱུད་སྤྲོད་བྱེད་ཀྱི་ཡོད། མ་ལག་དེ་ནི་ཉིང་ཁྲི་གྲོང་ཁྱེར་གྱིས་ནགས་སྲུང་བ་ཚོར་ཆེད་མངགས་བཟོས་པའི་APPཞིག་ཡིན་པ་དང་། དེས་སྐོར་སྲུང་ཁྲོད་ནས་ཤེས་རྟོགས་བྱུང་བའི་གནད་དོན་ཟིན་ཐོར་འགོད་ཐུབ་པ་མ་ཟད། ད་དུང་ནགས་སྲུང་བའི་རྗེས་ཤུལ་ཡང་ཟིན་ཐོར་བཀོད་དེ་ནགས་སྲུང་ལས་དོན་གྱི་ཚན་རིག་རང་བཞིན་དང་གནད་འཁེལ་རང་བཞིན་ལ་འགན་ལེན་གང་ཐུབ་བྱེད་ཀྱི་ཡོད།

ནགས་ཁྲོད་དུ་གནས་པའི་ལ་སྟེང་ཁ་གྲོང་ཚོར་ནགས་སྲུང་བྱ་རྒྱུ་ནི་གྲོང་ཚོའི་དོན་ཆེན་ཞིག་རེད། ནགས་ཤིང་ལ་སྲུང་སྐྱོང་དེ་བས་ཡག་པ་བྱ་ཆེད། སྲིད་གཞུང་གིས་དེ་གའི་ནགས་ཚལ་གྱི་མཐའ་འཁོར་དུ་གློག་རྡུལ་ར་བ་བསྐོར་བ་དང་། ནགས་རིར་འཛུལ་སའི་འགྲོ་ལམ་དུ་ངོ་རིས་དབྱེ་འབྱེད་བཀོད་སྒྲིག་བྱས་པ། ལ་སྟེང་ཁ་གྲོང་ཚོ་དང་དེ་བཞིན་ཉེ་འཁོར་གྲོང་ཚོའི་ནགས་སྲུང་བར་སྒྲིག་ཆས་སྒྲིག་སྦྱོར་བྱས་པ། སྐོར་སྲུང་གི་བརྒྱུད་རིམ་ཐོ་འགོད་བྱས་པ་སོགས་ཚན་རྩལ་སྒྲིག་ཆས་སྣ་ཚོགས་བཀོད་སྒྲིག་བྱས་ཏེ་ནགས་རིའི་བདེ་འཇགས་ཆེ་རུ་བཏང་ཡོད།

འོན་ཀྱང་དེ་དག་དྲ་རྒྱའི་རྒྱབ་སྐྱོར་ཤུགས་ཆེན་དང་ཁ་འབྲལ་ཐབས་མེད། “གྲོང་ཚོར་5Gདྲ་རྒྱ་ཁྲིད་པ་ནས་བཟུང་ང་ཚོས་སྤྱོད་ཐུབ་པའི་སྒྲིག་ཆས་ཇེ་མང་དུ་སོང་བ་དང་དེ་དག་ལས་ཐོན་པའི་ནུས་པ་ཡང་ཆེ་རུ་འགྲོ་བཞིན་ཡོད”ཅེས་བསོད་ནམས་ཚེ་རིང་གིས་གསར་འགོད་པར་བཤད།

གྲོང་ཚོ་ཨུ་ལྷན་གྱི་ཀྲུའུ་རེན་སྐལ་བཟང་ཚེ་བརྟན་གྱི་ངོས་ནས་བརྗོད་ན། དྲ་ངོས་གཅིག་ཀྱང་ཁ་ཕྱེ་མི་ཐུབ་པ་ནས་ད་ཆ་བརྙན་ལམ་དང་དྲ་ཚིགས་སྣ་ཚོགས་ཁ་ཕྱེ་ཐུབ་པའི་བར་ཁོང་གིས་གྲོང་ཚོའི་དྲ་རྒྱ་གསར་བརྗེས་རིམ་འཕར་གྱི་དཔང་པོ་བྱས་ཡོད།

2021ལོའི་ཟླ་བདུན་པར། བོད་ལྗོངས་སྒུལ་བདེ་ཉིང་ཁྲི་ཀུང་སིའི་ལས་དོན་པ་ལ་སྟེང་ཁ་གྲོང་ཚོར་ཡོང་ཞིང་། “གྲོང་ཚོའི་ཀྲུའུ་རེན་ལགས་ཁམས་བཟང་། ང་ཚོ་5Gསྦྲེལ་ཚུགས་སྒྲིག་སྦྱོར་བྱེད་པར་ཡོང་བ་ཡིན”ཞེས་ལས་དོན་མི་སྣས་སྐལ་བཟང་ཚེ་བརྟན་ལ་བཤད།

“5Gམགྱོགས་པོ་དེ་འདྲ་ཁྲིད་སོང་། གྲོང་ཚོར་3Gནས་4Gཁྲིད་པར་དུས་ཡུན་རིང་པོ་འགོར་བ་རེད། བསམ་ཡུལ་ལས་འདས་པར་4Gསྤྱད་ནས་ཡུན་རིང་མ་སོང་བར་5Gསྤྱོད་རྒྱུ་བྱུང་སོང”ཞེས་ཁོང་གིས་ཧ་ལས་པའི་རྣམ་འགྱུར་སྟོན་བཞིན་བཤད།

ད་ཆ་གྲོང་མི་མང་པོས་གྲོང་ཁྱེར་གྱི་གྲོང་མི་དང་འདྲ་བར་ཐད་གཏོང་བྱས་ནས་ཟོག་འཚོང་བ་དང་། སྤྱི་ཚོགས་འབྲེལ་བའི་སྨྱན་སྦྱོར་གྱི་བརྙན་ཐུང་ལྟ་ཡི་ཡོད། ལག་ཐོགས་ཁ་པར་གྱི་དྲ་བའི་བཞུར་ཚད་ལ་བལྟས་ཚེ་དེ་ནི་ཉིང་ཁྲིའི་རི་ཁུལ་དུ་གནས་པའི་གྲོང་ཚོ་དཀྱུས་མ་ཞིག་ཡིན་པ་ཡིད་ལ་གཏན་ནས་འཁོར་མི་སྲིད།

དེ་བས་བསམ་ཡུལ་ལས་འདས་པ་ཞིག་ལ་ཐག་རིང་གི་ཡུལ་སྐོར་བ་མི་ཉུང་བ་ཞིག་དེ་གར་ཡོང་གི་ཡོད། གྲོང་ཚོར་སྐྱོད་སའི་ལམ་ཁ་ནས་སྐལ་བཟང་ཚེ་བརྟན་གྱིས་གྲོང་ཚོའི་ནང་ཐད་གཏོང་བྱེད་མཁན་གྱི་ཡུལ་སྐོར་བ་རྟག་ཏུ་མཐོང་གི་ཡོད། གང་ལགས་ཤེ་ན། ཉེ་འཁོར་དུ་སྐད་གྲགས་ཆེ་བའི་ནགས་ཚལ་སྤྱི་གླིང་ཡོད་པར་བརྟེན་ཡུལ་སྐོར་བ་མི་ཉུང་བ་ཞིག་ཡུལ་སྐོར་བྱེད་སྐབས་གྲོང་ཚོ་དེ་བརྒྱུད་དགོས་ཀྱི་ཡོད། ལག་ཐོགས་ཁ་པར་བརྒྱུད་ཐད་གཏོང་བྱེད་པ་དང་བརྙན་ལམ་སྟོན་པ་ནི་ཡུལ་སྐོར་བ་མི་ཉུང་བ་ཞིག་ཕྱིར་ལྟ་སྐོར་བྱེད་པའི་མཚོན་ཚུལ་ཞིག་རེད། ལ་སྟེང་ཁ་གྲོང་ཚོར་ཁྲིད་པའི་5Gཡི་དྲ་རྒྱས་ཡུལ་སྐོར་བ་དེ་དག་གི་མཉམ་སྤྱོད་ལ་སྔར་བས་སྟབས་བདེ་བསྐྲུན་ཡོད།

“5Gདྲ་རྒྱ་ཁྲིད་པ་ལས་ང་ཚོའི་གྲོང་ཚོ་དེ་བས་སྐད་གྲགས་ཆོད་ཡོད། གྲོང་ཚོར་སྤྱི་ཚོགས་འབྲེལ་བའི་སྨྱན་སྦྱོར་གྱི་བརྙན་ཐུང་བསྐུར་སྐབས་རྟག་ཏུ་གྲོང་ཚོའི་གནས་ཡུལ་བསྐུར་གྱི་ཡོད། ཕྱིས་སུ་ཡུལ་སྐོར་བ་མང་པོ་ཞིག་གིས་ཀྱང་གྲོང་ཚོའི་གནས་ཡུལ་ལ་གཞིགས་ནས་འདི་གར་ཡོང་གི་ཡོད་ལ། ང་ཚོའི་གྲོང་ཚོ་ཡུལ་སྐོར་དམིགས་སར་ཡང་བྱེད་ཀྱི་ཡོད། མ་གཞི་ང་ཚོའི་གྲོང་ཚོར་ཞག་སྡོད་བྱེད་ཀྱི་མེད་མོད། འོན་ཀྱང་ཚ་ཕོགས་རྒྱག་པ་དང་ཚོང་ཁང་ནས་ཅ་ལག་ཙག་ཙིག་ཉོ་གི་ཡོད་པས་གྲོང་ཚོ་འཕེལ་རྒྱས་འགྲོ་བར་ཕན་ཐོགས་ཡོད”ཅེས་སྐལ་བཟང་ཚེ་བརྟན་གྱིས་བཤད།

དེ་བས་སྤུས་ལེགས་ཀྱི་དྲ་རྒྱ་ལས་ཕྱི་ཕྱོགས་ཀྱིས་ཉིང་ཁྲིར་རྒྱུས་ལོན་བྱེད་བདེ་རུ་ཕྱིན་ཡོད། ལོ་རེའི་ཟླ་3པ་དང་4པར། ཉིང་ཁྲིའི་ས་ཆ་མང་པོར་ཁམ་བུའི་མེ་ཏོག་དུས་ཆེན་གཏོང་གི་ཡོད་ཅིང་། ཉིང་ཁྲི་གྲོང་ཁྱེར་བྲག་ཡིབ་ཆུས་ཀ་ལ་ཁམ་བུའི་མེ་ཏོག་གྲོང་ཚོ་དང་། རྡོ་སྟེང་ཁམ་བུའི་མེ་ཏོག་གྲོང་ཚོ། སྤོ་བོ་རྫོང་གི་ཁམ་བུའི་མེ་ཏོག་དུས་ཆེན། སྨན་གླིང་གི་ཁམ་བུའི་མེ་ཏོག་དུས་ཆེན་བཅས་ལ་ཡུལ་སྐོར་བ་མང་པོ་ཡོང་གི་ཡོད། ཡུལ་དེ་དག་གིས་5Gདྲ་རྒྱའི་དྲ་ཆེན་ལ་བརྟེན་ནས་ཡིད་ཀྱི་བརྟན་པ་དབང་མེད་དུ་འཕྲོག་པའི་ཁམ་བུའི་མེ་ཏོག་གི་མཛེས་ལྗོངས་ཐད་གཏོང་བྱས་ཏེ་རྒྱལ་ཡོངས་ཀྱི་ལྟད་མོ་བ་ཚོར་རང་ཁྱིམ་གྱི་སྒོ་དོན་མི་དགོས་པར་ཁམ་བུའི་མེ་ཏོག་གི་མཛེས་ལྗོངས་ལ་ལྟ་རྒྱུ་ཡོང་བར་བྱེད་ཀྱི་ཡོད། གཞན་ཡང་། སྨན་གླིང་རྫོང་གི་ཞིང་རའི་ཀུ་ཤུ་དང་རྒུན་འབྲུམ་དང་། རྫ་ཡུལ་རྫོང་གི་སྤྲེལ་ཁམ། མེ་ཏོག་རྫོང་གི་རྡོ་ཁོག་དང་ཇ་ལོ། སྤོ་བོ་རྫོང་གི་ཡིད་འོང་ཇ་སོགས་ཚང་མ་5Gདྲ་རྒྱ་བརྒྱུད་ཡུལ་དངོས་ནས་དྲ་ཐོག་ཐད་གཏོང་བྱས་ཏེ་ཞིང་པ་ཕྱུག་འགྱུར་དང་ཞིང་ལས་དར་རྒྱས་ཡོང་བར་བྱས་ཡོད།

“5Gདྲ་རྒྱར་རྒྱུན་མཐུད་ངང་སྐུལ་འདེད་གཏོང་བ་དང་རྒྱ་ཁྱབ་ངང་སྤྱོད་པ་དང་ཆབས་ཅིག ཉིང་ཁྲིར་5Gདྲ་རྒྱས་VRགྲོང་གསེབ་ཡུལ་སྐོར་དང་། རིག་ལྡན་ཞིང་ལས། ཞིང་ལས་ཐོན་རྫས་ཕྱིར་ཚོང་། རྒྱང་ཁྲིད་སློབ་གསོ། རྒྱང་བསྟེན་སྨན་བཅོས། དུས་བདེའི་གྲོང་གསེབ་སོགས“5G+རྣམ་པར”རྒྱབ་སྐྱོར་ཐུབ་རྒྱུ་རེད། 5Gདྲ་རྒྱ་གྲོང་གསེབ་འཛུགས་སྐྲུན་དང་གྲོང་གསེབ་བཅོས་སྐྱོང་དང་དེ་བཞིན་གྲོང་གསེབ་ཀྱི་གཞི་རིམ་རྩ་འཛུགས་འཛུགས་སྐྱོང་གི་ཕྱོགས་གང་ས་ཅི་ཐད་ལ་ཁྱབ་པ་དང་། གྲོང་གསེབ་ཀྱི་གྲངས་འཛིན་ཅན་བཅོས་སྐྱོང་ནུས་པ་དང་དེ་བཞིན་གྲོང་གསེབ་ཀྱི་བསམ་པའི་དཔལ་ཡོན་འཛུགས་སྐྱོང་ལ་ཤུགས་སྣོན་བརྒྱབ་ནས་དེང་རབས་ཞིང་ལས་ལ་ཆ་འཕྲིན་ཅན་གྱི་འདེགས་སྐྱོར་བྱེད་པ་དེ་ནི་གྲོང་གསེབ་དར་རྒྱས་གཏོང་བའི་འདེགས་སྐྱོར་གལ་ཆེན་ཞིག་རེད”ཅེས་བོད་ལྗོངས་སྒུལ་བདེ་ཉིང་ཁྲི་ཡན་ལག་ཀུང་སིའི་ཏང་ཨུད་ཀྱི་ཧྲུའུ་ཅི་སྤྱི་ཁྱབ་ཅིང་ལི་ཝུའུ་ཁྲུན་གྱིས་བཤད།

5Gདྲ་རྒྱ་ཁྲིད་པ་དེས་ཐོན་ལས་འཕེལ་རྒྱས་ལ་བསམ་ཕྱོགས་གསར་པ་བྱུང་ཡོད། ལྷོ་ཁ་གྲོང་ཁྱེར་ཡར་ཀླུང་སྐྱེ་ཁམས་ཞིང་འབྲོག་ལས་ཚད་ཡོད་ཀུང་སི་ནི་ཞིང་ལས་ཐོན་རྫས་ཐོན་སྐྱེད་དང་། བྲིན་ཚོང་། ལས་སྣོན། སྐྱེལ་འདྲེན། གསོག་ཉར་བཅས་དང་། དེ་བཞིན་ཞིང་ལས་ཐོན་སྐྱེད་ཚབ་གཉེར་ཞབས་ཞུ་གཞི་གཅིག་ཅན་གྱི་ཚན་རྩལ་ཞིང་ལས་ཀུང་སི་ཞིག་ཡིན་ཞིང་། ཆ་འཕྲིན་ཅན་གྱི་ལག་རྩལ་དང་སྲོལ་རྒྱུན་ཞིང་ལས་ཟུང་འབྲེལ་དེ་བས་ཡག་པོ་བྱ་ཆེད། ཁེ་ལས་ཀྱིས་རིག་ལྡན་དྲོད་ཁང་ཆེ་མོའི་རྣམ་གྲངས་འཛུགས་སྐྲུན་བྱས་པ་དང་། 5G+ཟོག་འབྲེལ་དྲ་རྒྱའི་ལག་རྩལ་སྤྱད་པས་ཞིང་ལས་དྲོད་ཁང་ཆེ་མོའི་འདེབས་འཛུགས་ཐོན་སྐྱེད་རང་འགུལ་ཅན་དང་དོ་དམ་རིག་ནུས་ཅན་མངོན་འགྱུར་བྱུང་ཡོད། བརྒྱུད་རིམ་ཧྲིལ་པོར་དོ་དམ་ཚོད་འཛིན་བྱས་པ་བརྒྱུད་ལོ་ལྟར་མི་ཐབས་ལ་བརྟེན་པའི་མ་གནས་སྒོར་ཁྲི་650གྲོན་ཆུང་ཐུབ་པ་དང་། མ་རྨོས་ལོ་ཏོག་གི་ཐོན་འབབ་15%མང་དུ་ཕྱིན་པ། ཀྲོ་མ་ཀྲུའི་ཐོན་འབབ་29%མང་དུ་ཕྱིན་པ། ཉམས་གསོའི་མ་གནས་དེ་སྔ་ལས་50%དམའ་རུ་ཕྱིན་ཡོད།

ལྷ་ས་གྲོང་ཁྱེར་མལ་གྲོ་གུང་དཀར་རྫོང་རྒྱ་མ་ཤང་དུ་གནས་པའི་ཅུས་ལུང་ཟངས་གཏེར་གྱི་གཏེར་རིའི་ཆ་སྙོམས་ས་བབ་མཐོ་ཚད་སྨི་4000ལས་བརྒལ་ཡོད། ལས་སྒྲུབ་ཀྱི་ཁོར་ཡུག་ཞན་པའི་མདུན་དུ་བོད་ལྗོངས་ཅུས་ལུང་ཟངས་ལས་ཀྱིས་ཐོག་མེད་གཏེར་ལས་ཀྱི“5G+མི་མེད་འཁོར་གཏོང”གི་ཉེར་སྤྱོད་རྣམ་གྲངས་བཏོད་དེ། “འཁོར་རིགས་དང་། ལམ། དྲ་རྒྱ”བཅས་ཚུད་པའི་མི་མེད་འཁོར་གཏོང་གི་སྐྱེལ་འདྲེན་མ་ལག་ཆ་ཚང་ཞིག་བཙུགས་པས། མི་གཏོང་ཚད་ཉུང་དུ་ཕྱིན་པ་དང་ལས་གྲྭའི་ལས་སྒྲུབ་ཁོར་ཡུག་ལེགས་སུ་ཕྱིན་ནས་བོད་ཀྱི་བཟོ་ལས་དྲ་སྦྲེལ་ཁྱབ་ཁོངས་ཀྱི་རིམ་སྤོར་ཕྱོགས་སྒྱུར་ལ་ཚད་ལྡན་གྱི་ནུས་པ་ཐོན་ཡོད།

བོད་རང་སྐྱོང་ལྗོངས་འཕྲིན་གཏོང་དོ་དམ་ཅུས་ཀྱིས་ངོ་སྤྲོད་བྱས་པར་གཞིགས་ན། བོད་ཡོངས་ཀྱི་ཆ་འཕྲིན་འཕྲིན་གཏོང་ལས་རིགས་ཀྱིས་5Gའཛུགས་སྐྲུན་ཐད་མ་དངུལ་སྒོར་དུང་ཕྱུར་32བཏང་བ་དང་། རིམ་རྩིས་བྱས་ན་5Gསྦྲེལ་ཚུགས་8710བསྐྲུན་པ། 5Gསྤྱོད་མཁན་དུད་ཚང་ཁྲི་184འཕེལ་རྒྱས་བཏང་བ། ལྗོངས་ཡོངས་ཀྱི་མི་ཁྲི་རེར་5Gསྦྲེལ་ཚུགས་23ཡོད་པ་དེ་རྒྱལ་ཡོངས་ཀྱི་ཆ་སྙོམས་ཆུ་ཚད་དུ་སླེབས་ཡོད་པ་རེད།