རང་རྒྱལ་གྱི་ཡངས་ཤིང་རྒྱ་ཆེ་བའི་ས་ཁོངས་ནི་མི་རིགས་ཁག་གིས་མཉམ་དུ་གསར་སྤེལ་བྱས་པ་དང་། ལོ་རྒྱུས་ཡུན་རིང་ནི་མི་རིགས་ཁག་གིས་མཉམ་དུ་བརྩམས་པ། འོད་སྟོང་འཕྲོ་བའི་རིག་གནས་ནི་མི་རིགས་ཁག་གིས་མཉམ་དུ་གསར་གཏོད་བྱས་པ། མི་རིགས་ཀྱི་སྙིང་སྟོབས་རླབས་པོ་ཆེ་ནི་མི་རིགས་ཁག་གིས་མཉམ་དུ་སྐྱེད་སྲིང་བྱས་པ་བཅས་རེད། ལོ་ངོ་སྟོང་ཕྲག་མང་པོའི་སྔོན་དུ། རང་རྒྱལ་གྱི་མི་རིགས་ཁག་གི་མེས་པོ་རྣམས་ཀྲུང་ཧྭའི་ས་གཞི་ཆེན་པོར་འཚོ་གནས་འཕེལ་རྒྱས་དང་ངལ་རྩོལ་གསར་རྩོམ་བྱས་ཏེ་མཉམ་དུ་མེས་རྒྱལ་གྱི་མཛེས་སྡུག་ལྡན་པའི་རི་ཀླུང་དང་ཡངས་ཤིང་རྒྱ་ཆེ་བའི་ས་ཁོངས་མཉམ་དུ་གསར་སྤེལ་བྱས་ཡོད། ད་ཆ་རང་རྒྱལ་གྱི་སྤྱི་ལེ་ངོས་གྲུ་ཁྲི་960ལྷག་ཙམ་གྱི་རྒྱལ་ཁབ་ས་ཆའི་རྒྱ་ཁྱོན་ནི་ཀྲུང་ཧྭ་མི་རིགས་འཚོ་གནས་དང་འཕེལ་རྒྱས་ཀྱི་མཛེས་སྡུག་ལྡན་པའི་ཁྱིམ་གཞིས་ཤིག་རེད།

ལོ་རྒྱུས་སུ་རང་རྒྱལ་གྱི་མི་རིགས་56ཁྲོད་ཀྱི་རྒྱ་རིགས་དང་། བོད་རིགས། ཏའེ་རིགས། དབྱིས་རིགས། པའེ་རིགས། པུའུ་དབྱི་རིགས། ལི་སུའུ་རིགས་སོགས་མི་རིགས་ཀྱིས་མེས་རྒྱལ་གྱི་ལྷོ་ནུབ་ས་ཁུལ་གསར་སྤེལ་བྱས་པ་དང་། རྒྱ་རིགས་དང་། ཐུའུ་ཅ་རིགས། མེའོ་རིགས། ཡའོ་རིགས། ཀྲོང་རིགས། ལི་རིགས་སོགས་མི་རིགས་ཀྱིས་མེས་རྒྱལ་གྱི་དབུས་ལྷོའི་ས་ཁུལ་གསར་སྤེལ་བྱས་པ། རྒྱ་རིགས་དང་། ཧུད་རིགས། ཡུ་གུར་རིགས། ཧ་སག་རིགས། ཁོར་ཁེ་ཙི་རིགས། ཏུང་ཤང་རིགས། ཧོར་རིགས་སོགས་མི་རིགས་ཀྱིས་མེས་རྒྱལ་གྱི་བྱང་ཤར་ས་ཁུལ་གསར་སྤེལ་བྱས་པ། རྒྱ་རིགས་དང་། སོག་རིགས། མན་ཇུ་རིགས། ཞི་པོ་རིགས་སོགས་མི་རིགས་ཀྱིས་མེས་རྒྱལ་གྱི་བྱང་ཤར་དང་དེ་བཞིན་བྱང་ཕྱོགས་ས་ཁུལ་གསར་སྤེལ་བྱས་ཡོད། མི་རིགས་ཚང་མས་ཀྲུང་ཧྭ་མི་རིགས་ཀྱི་ས་ཁོངས་རྒྱ་སྐྱེད་གཏོང་བར་སུབ་ཐབས་བྲལ་བའི་ལེགས་སྐྱེས་ཕུལ་བ་དང་། གཅིག་གྱུར་གྱི་མི་རིགས་མང་བའི་རྒྱལ་ཁབ་འཛུགས་སྐྲུན་དང་འཕེལ་རྒྱས་གཏོང་བར་རྨང་གཞི་བརྟན་པོ་བཏིངས་པ། མེས་རྒྱལ་གྱི་ས་ཆ་ཚང་མར་མི་རིགས་ཁག་གི་རྔུལ་ཆུ་འདུས་ཡོད།

བོད་ལྗོངས་རང་རྒྱལ་གྱི་ལྷོ་ནུབ་མཐའ་མཚམས་ས་ཁུལ་དུ་གནས་ཤིང་། གནའ་སྔ་མོ་ནས་བཟུང་རང་རྒྱལ་མངའ་ཁོངས་ཀྱི་ཁ་བྲལ་དུ་མི་རུང་བའི་གྲུབ་ཆ་ཞིག་རེད། མཚོ་བོད་ས་མཐོར་འཚོ་བ་སྐྱེལ་བཞིན་པའི་མི་རིགས་ཁག་གི་མི་དམངས་ཀྱིས་མེས་རྒྱལ་གྱི་ལྷོ་ནུབ་མཐའ་མཚམས་གསར་སྤེལ་དང་། འཛུགས་སྐྲུན། སྲུང་སྐྱོང་བཅས་བྱ་ཆེད་ལེགས་སྐྱེས་གཟེངས་སུ་ཐོན་པ་ཕུལ་ཡོད། དུས་རབས་20པའི་དུས་འགོར་བཙན་རྒྱལ་རིང་ལུགས་ཀྱི་བཙན་འཛུལ་ཕོག་པས་བོད་ཀྱི་མི་རིགས་ཁག་གི་མི་དམངས་ཚོས་མཐུན་སྒྲིལ་རྡོག་རྩ་གཅིག་སྒྲིལ་གྱིས་དཔའ་ངར་ཆེན་པོས་འགོག་རྒོལ་བྱས་ཏེ་རྒྱལ་རྩེའི་སྲུང་སྐྱོབ་དམག་འཐབ་སོགས་དཔའ་བོའི་བྱས་རྗེས་བརྩམས་ཡོད། ད་ཆ། སྒྲོལ་དཀར་དང་གཡང་འཛོམས་གཅེན་གཅུང་གཉིས་ཀྱིས་མཚོན་པའི་བོད་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ཀྱིས“ཁྱིམ་གཞིས་ནི་ཡུལ་སྨད་དང་རྒྱལ་ཁོངས་ནི་ཀྲུང་གོ་ཡིན་པས་མེས་རྒྱལ་གྱི་ས་ཆ་སྦར་མཐིལ་ཙམ་ཡང་ཉུང་དུ་མི་གཏོང་བའི”བློ་བརྟན་འགྱུར་མེད་ཀྱི་དད་སེམས་བློ་ལ་བརྟན་པོར་ངེས་ནས་གངས་ལྗོངས་ས་མཐོར་མེས་རྒྱལ་གྱི་ས་ཆ་སྲུང་སྐྱོང་དང་འཛུགས་སྐྲུན་བྱེད་བཞིན་ཡོད་པ་རེད།

ཁྱིམ་ཆུང་ཚང་མ་ཡག་པོ་སྲུང་ཐུབ་ན་མེས་རྒྱལ་ཞེས་པའི་ཁྱིམ་ཚང་ཆེན་པོ་འདི་གཞི་ནས་ཡག་པོ་ཡོང་ཐུབ། རྐང་འོག་གི་ས་ཆ་སྲུང་སྐྱོང་ཡག་པོ་ཐུབ་ན་ད་གཟོད་རྒྱལ་ཁབ་ཀྱི་མངའ་ཁོངས་ཆ་ཚང་པོ་ཡོང་ཐུབ། ཕུགས་འདུན་རླབས་པོ་ཆེ་སྒྲུབ་པའི་རྒྱང་ལམ་དུ་བོད་ཀྱི་མི་རིགས་ཁག་གི་མི་དམངས་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བཀའ་མངགས་ཟབ་མོ་ཐོག་མཐའ་བར་གསུམ་དུ་བློ་ལ་བརྟན་པོར་ངེས་པ་དང་། རྒྱལ་གཅེས་མཐའ་སྲུང་གི་ལས་འགན་རྒྱུན་འཛིན། སྔོན་བྱོན་པའི་ཕུགས་རེ་རྒྱུན་འཛིན། མཐའ་བརྟན་མཐའ་སྲུང་གི་དཔའ་བོ་ཁྲི་སྟོང་མང་པོར་སློབ་སྦྱོང་བཅས་བྱས་ནས་བླ་ན་མེད་པའི་རྒྱལ་ཁབ་ཀྱི་ས་ཆ་སྲུང་མཁན་དང་བདེ་སྐྱིད་ལྡན་པའི་ཁྱིམ་གཞིས་སྐྲུན་མཁན་ཡག་པོ་ཞིག་བྱེད་དགོས།