ཉེ་ཆར། བོད་རང་སྐྱོང་ལྗོངས་མི་དམངས་སྲིད་གཞུང་གཞུང་དོན་ཐིང་གིས《ལྗོངས་ཡོངས་ཀྱི་གློག་རིན་སྔར་བས་ལེགས་སྒྲིག་བྱས་ཏེ་གློག་སྤྱོད་མ་གནས་དམའ་རུ་གཏོང་རྒྱུའི་སྐོར་གྱི་བརྡ་ཐོ》བཀྲམ་ནས། གློག་རིན་དང་ཚད་གཞི་ཚད་ལྡན་དུ་བཏང་འདུག དེའི་ནང་།

གྲོང་མིའི་འཚོ་བའི་གློག་རིན་གྱི་ཚད་གཞི་ནི། 

ལྗོངས་ཡོངས་སུ་ཏུའུ་རེར་གློག་རིན་སྒོར་0.49གཅིག་གྱུར་བྱེད་རྒྱུ་རེད་འདུག 

ཞིང་འབྲོག་ལས་ཐོན་སྐྱེད་ཀྱི་གློག་རིན་ནི། 

ལྷ་ས་གྲོང་ཁྱེར་དང་། གཞིས་རྩེ་གྲོང་ཁྱེར། ལྷོ་ཁ་གྲོང་ཁྱེར། ཉིང་ཁྲི་གྲོང་ཁྱེར། ནག་ཆུ་གྲོང་ཁྱེར། མངའ་རིས་ས་ཁུལ་བཅས་སུ་གློག་ཏུའུ་རེར་སྒོར་0.20བྱེད་རྒྱུ་དང་། ཆབ་མདོ་གྲོང་ཁྱེར་དུ་གོམ་སྟབས་གཉིས་སུ་ཕྱེ་ནས་ལྗོངས་ཡོངས་ཀྱི་གློག་རིན་དང་གཅིག་མཚུངས་ཡོང་བ་བྱེད་རྒྱུ་རེད་འདུག དེ་ཡང་། ཡིག་ཆ་ལག་བསྟར་བྱེད་པའི་ཉིན་ནས་2024ལོའི་ཟླ་12ཚེས་31ཉིན་བར་གློག་ཏུའུ་རེར་སྒོར་0.17ཡིན་པ་དང་2025ལོའི་ཟླ་1ཚེས་1ཉིན་ནས་བཟུང་ཏུའུ་རེར་སྒོར་0.20བྱེད་རྒྱུ་རེད་འདུག

གཞི་ཁྱོན་ཆེ་བའི་བཟོ་ལས་ཀྱི་གློག་རིན་ཚད་གཞི་ནི། 

ལྷ་ས་གྲོང་ཁྱེར་དང་། གཞིས་རྩེ་གྲོང་ཁྱེར། ལྷོ་ཁ་གྲོང་ཁྱེར། ཉིང་ཁྲི་གྲོང་ཁྱེར། ནག་ཆུ་གྲོང་ཁྱེར། མངའ་རིས་ས་ཁུལ་བཅས་ལ་གློག་ཏུའུ་རེར་སྒོར་0.66བྱེད་རྒྱུ་དང་། གཙོ་གཉེར་སྡེ་ཚན་གྱིས་གཏན་འཁེལ་བྱས་པའི་ཚོད་འཛིན་དང་གྲལ་འབུད་བྱེད་རིགས་ཀྱི་གཞི་ཁྱོན་ཆེ་བའི་བཟོ་ལས་ཀྱི་གློག་རིན་མུ་མཐུད་ཏུའུ་རེར་སྒོར་0.72བྱེད་རྒྱུ་རེད་འདུག ཆབ་མདོ་གྲོང་ཁྱེར་དུ་གོམ་སྟབས་གཉིས་སུ་ཕྱེ་ནས་ལྗོངས་ཡོངས་ཀྱི་གློག་རིན་དང་གཅིག་མཚུངས་བྱེད་རྒྱུ་རེད་འདུག དེ་ཡང་ཡིག་ཆ་ལག་བསྟར་བྱེད་པའི་ཉིན་ནས་2024ལོའི་ཟླ་12ཚེས་31ཉིན་བར་གློག་ཏུའུ་རེར་སྒོར་0.63ཡིན་པ་དང་། 2025ལོའི་ཟླ་1ཚེས་1ཉིན་ནས་བཟུང་གཞི་ཁྱོན་ཆེ་བའི་བཟོ་ལས་ཚང་མར་ཏུའུ་རེར་སྒོར་0.66གཅིག་གྱུར་བྱེད་རྒྱུ་རེད་འདུག   

སྤྱིར་བཏང་གི་བཟོ་ཚོང་ལས་རིགས་ཀྱི་གློག་རིན་ཚད་གཞི་ནི། 

ལྷ་ས་གྲོང་ཁྱེར་དང་། གཞིས་རྩེ་གྲོང་ཁྱེར། ལྷོ་ཁ་གྲོང་ཁྱེར། ཉིང་ཁྲི་གྲོང་ཁྱེར། ནག་ཆུ་གྲོང་ཁྱེར། མངའ་རིས་ས་ཁུལ་བཅས་ལ་གློག་ཏུའུ་རེར་སྒོར་0.72བྱེད་རྒྱུ། ཆབ་མདོ་གྲོང་ཁྱེར་དུ་གོམ་སྟབས་གཉིས་སུ་ཕྱེ་ནས་ལྗོངས་ཡོངས་ཀྱི་གློག་རིན་དང་གཅིག་མཚུངས་བྱེད་རྒྱུ་རེད་འདུག དེ་ཡང་ཡིག་ཆ་ལག་བསྟར་བྱེད་པའི་ཉིན་ནས་2024ལོའི་ཟླ་12ཚེས་31ཉིན་བར། གློག་ཏུའུ་རེར་སྒོར་0.65ཡིན་པ་དང་། 2025ལོའི་ཟླ་1ཚེས་1ཉིན་ནས་བཟུང་སྤྱིར་བཏང་བཟོ་ཚོང་ལས་རིགས་ལ་ཏུའུ་རེར་སྒོར་0.72བྱེད་རྒྱུ་རེད་འདུག   

བརྡ་ཐོ་དེ་2023ལོའི་ཟླ་12ཚེས་1ཉིན་ནས་ལག་བསྟར་བྱ་རྒྱུ་དང་། དེ་གོང་གི་འབྲེལ་ཡོད་ཀྱི་སྲིད་ཇུས་དང་ཡིག་ཆ་བརྡ་ཐོ་འདིའི་དགོངས་དོན་དང་མི་མཐུན་པའི་རིགས་ཚང་མ་བརྡ་ཐོ་འདིར་གཞི་འཛིན་དགོས། དེའི་རིང་རྒྱལ་ཁབ་ཀྱི་སྲིད་ཇུས་ལེགས་སྒྲིག་བྱས་ཚེ། དུས་ཐོག་ཏུ་རང་ལྗོངས་ཀྱི་ལག་བསྟར་བྱ་ཐབས་བཟོས་ནས་ཁྱབ་བསྒྲགས་བྱེད་ཀྱི་ཡིན།