2023ལོའི་ཟླ་11ཚེས་27ནས་ཟླ་12ཚེས་3ཉིན་བར་གྱི་གནམ་གཤིས།

རང་སྐྱོང་ལྗོངས་གནམ་གཤིས་ལས་ཁུངས་ཀྱིས་སྤེལ་བའི་གནམ་གཤིས་སྔོན་བརྡར་གཞིགས་ན། གཟའ་འཁོར་འདིའི་དུས་འགོར། མངའ་རིས་ཀྱི་ལྷོ་རྒྱུད་དང་གཞིས་རྩེའི་ལྷོ་རྒྱུད་དུ་གངས་འབབ་རྒྱུ་དང་། གཟའ་འཁོར་འདིའི་ནང་ལྷགས་པ་ཆེན་པོ་རྒྱག་རྒྱུ་མ་ཟད། དྲོད་ཚད་འཕར་ཆག་ཆེན་པོ་ཡོད་པ་རེད།

གནམ་གཤིས་ཀྱི་འགྱུར་བ།

ཟླ་11ཚེས་27དང་ཚེས་28ཉིན་ལ། མངའ་རིས་ཀྱི་ལྷོ་རྒྱུད་དང་གཞིས་རྩེའི་ནུབ་རྒྱུད་དང་ལྷོ་རྒྱུད་དུ་གངས་ཆུང་བ་འབབ་རྒྱུ་དང་། ས་ཆ་ཁག་གཅིག་ལ་གངས་འབྲིང་བ་ནས་ཆེ་བའི་བར་འབབ་རྒྱུ། སྤུ་ཧྲེང་རྫོང་གི་ཤང་དང་གྲོང་རྡལ་ཁག་གཅིག་ཏུ་གངས་ཆེ་བ་ནས་དྲག་པོ་འབབ་རྒྱུ་རེད། མངའ་རིས་ཀྱི་ནུབ་རྒྱུད་དང་། ནག་ཆུ། ཉིང་ཁྲི། གཞིས་རྩེའི་བྱང་རྒྱུད་དུ་སྤྲིན་པ་མང་པོ་འཁོར་རྒྱུ་དང་ས་ཆ་ཁག་གཅིག་ལ་གངས་སིམ་སིམ་འབབ་རྒྱུ་རེད། 

ཟླ་11ཚེས་29དང་ཚེས་30ཉིན་ལ། ཉིང་ཁྲི་དང་། ནག་ཆུའི་དབུས་རྒྱུད་དང་ཤར་རྒྱུད། མངའ་རིས། གཞིས་རྩེའི་ལྷོ་རྒྱུད་བཅས་སུ་གནམ་འཐིབས་ནས་གངས(ཆར་པ)འབབ་རྒྱུ་རེད། 

ཟླ་12ཚེས་1དང་ཚེས་2ཉིན་ལ། ཉིང་ཁྲི་དང་། ནག་ཆུའི་ཤར་རྒྱུད། ཆབ་མདོའི་བྱང་རྒྱུད་བཅས་སུ་སྤྲིན་པ་མང་པོ་འཁོར་ནས་གངས(ཆར་པ)འབབ་རྒྱུ་དང་། ས་ཆ་ཁག་གཅིག་ལ་གངས་འབྲིང་བ་འབབ་རྒྱུ། མངའ་རིས་དང་གཞིས་རྩེའི་ལྷོ་རྒྱུད་དུ་སྤྲིན་པ་མང་པོ་འཁོར་རྒྱུ་དང་ས་ཆ་ཁག་གཅིག་ལ་གངས་སིམ་སིམ་འབབ་རྒྱུ་རེད། 

ཟླ་12ཚེས་3ཉིན། ཉིང་ཁྲི་དང་། ཆབ་མདོའི་བྱང་རྒྱུད། ནག་ཆུའི་ཤར་རྒྱུད་བཅས་སུ་སྤྲིན་པ་མང་པོ་འཁོར་རྒྱུ་དང་། ས་ཆ་ཁག་གཅིག་ལ་གངས་ཆུང་བ(ཆར་པ)འབབ་རྒྱུ་རེད། 

གཟའ་འཁོར་འདིའི་ནང་། ནག་ཆུ་དང་། མངའ་རིས་ཀྱི་ཤར་རྒྱུད། གཞིས་རྩེའི་ལྷོ་རྒྱུད་ཀྱི་ས་བབ་མཐོ་ས་བཅས་སུ་ལྷགས་པ་རིམ་པ་7ཡས་མས་རྒྱག་རྒྱུ་དང་། མངའ་རིས་ཀྱི་ལྷོ་རྒྱུད་དང་། གཞིས་རྩེའི་ནུབ་རྒྱུད་དང་བྱང་རྒྱུད། ལྷ་ས། ལྷོ་ཁ་བཅས་ལ་ལྷགས་པ་རིམ་པ་5ཡས་མས་རྒྱག་རྒྱུ་རེད།