བོད་ལྗོངས་འཕྱོངས་རྒྱས་རྫོང་འཕྱོངས་རྒྱས་གྲོང་རྡལ་གྱིས་བརྗོད་དོན་གཙོ་བོའི་ཏང་གི་ཉིན་མོའི་བྱེད་སྒོ་སྤེལ་བ།
ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་དང་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱ་ཆེད། འཕྱོངས་རྒྱས་རྫོང་འཕྱོངས་རྒྱས་གྲོང་རྡལ་ཏང་ཨུད་ཀྱིས་རྫོང་རིག་གནས་ཅུས་དང་མཉམ་དུ་ཞོལ་ཁང་སྡེ་ཁུལ་དུ“བློ་སྒྲིལ་སེམས་སྐྱེད་ཀྱིས་ཏང་གི་རྗེས་སུ་འབྲང་བ་དང་མཐུན་སྒྲིལ་འབད་འཐབ་ཀྱིས་རྒྱང་ལམ་གསར་པར་སྐྱོད”ཅེས་པའི་བརྗོད་དོན་གཙོ་བོའི་ཏང་གི་ཉིན་མོའི་བྱེད་སྒོ་སྤེལ་བ་རེད།
བྱེད་སྒོ་སྤེལ་རིང་ཚང་མས་གངས་ལྗོངས་ས་མཐོའི་དུས་རབས་གཉིས་ཀྱི་ལོ་ཟླའི་ནང་ཞོལ་ཁང་ཐུབ་བསྟན་ཉི་མ་བཟའ་ཚོས་བླ་ན་མེད་པའི་རྒྱལ་གཅེས་བརྩེ་སེམས་དང་མི་དམངས་ལ་ལྷག་བསམ་ཟོལ་མེད་ཀྱི་དགའ་ཞེན་བཅངས་ནས་སྤྱིར་བཏང་མིན་པའི་མི་ཚེ་ཞིག་བསྐྱལ་བ་དང་། བོད་ཀྱི་གནའ་བོའི་བཟོ་བཀོད་ཀྱི་ལོ་རྒྱུས་རིག་གནས་ཀྱི་ཉམས་འགྱུར་ཉམས་སུ་མྱངས་ཏེ་འཕྱོངས་རྒྱས་ཀྱི་ལོ་རྒྱུས་རིག་གནས་ཀྱི་ཡིད་དབང་འཕྲོག་ཤུགས་དང་མང་ཚོགས་ཀྱི་འཚོ་བའི་འགྱུར་ལྡོག་ཚོར་བ་བྱས་ཡོད། དེ་རྗེས་ཏང་ཡོན་ལས་བྱེད་པ་ཚང་མས་ཞོལ་ཁང་གཞིས་ཀའི་ཐང་ཆེན་དུ་ཏང་ཞུགས་དམ་བཅའ་བསྐྱར་དྲན་བྱས་པ་མ་ཟད། ཞོལ་ཁང་སྡེ་ཁུལ་གྱི་ཏང་ཡོན་རྒན་གྲས་གཉིས་ལ“གཟི་བརྗིད་ལྡན་པའི་ཏང་ཞུགས་ལོ་50”ཡི་དྲན་གསོའི་རྟགས་མ་སྤྲད་པ་རེད། ཏང་ཡོན་རྒན་གྲས་གཉིས་ཀྱིས་རང་ཉིད་ཀྱི་མྱོང་བ་དངོས་ལ་བརྟེན་ནས་དེ་གར་ཡོད་པའི་ཏང་ཡོན་མང་ཚོགས་ལ་ཏང་ནང་ཞུགས་སྐབས་ཀྱི་རང་ཉིད་ཀྱི་ཐོག་མའི་བསམ་འདུན་དང་ཏང་ཞུགས་ལོ་50ཡི་རིང་གི་སྡེ་ཁུལ་དུ་བྱུང་བའི་འཕོ་འགྱུར་ཆེན་པོའི་སྐོར་གླེང་བ་རེད།