ཉིན་ཤས་གོང་། ཆུ་བེད་པུའི་བོད་སྐྱོར་ལས་དོན་ཚོགས་འདུ་ཐེངས་བཅུ་གཅིག་པ་ལྷ་སར་འཚོགས་ཤིང་། གྲངས་གཞི་མང་པོ་དང་བྱེད་ཐབས་མང་པོ་ནི་བོད་ཀྱི་ཆུ་བེད་སྤུས་ཚད་མཐོ་བའི་འཕེལ་རྒྱས་ཕྱིན་པའི་གསོན་ཉམས་དོད་པའི་དཔེ་མཚོན་ཡིན་ལ། དེ་དག་རེ་རེ་ལས“ལོ་ལྔ་ཚན་བཅུ་བཞི་པའི”རྒྱལ་ཁབ་ཀྱི་ཆུ་བེད་བོད་སྐྱོར་ལས་དོན་ལ་ཐོབ་པའི་དུས་མཚམས་རང་བཞིན་གྱི་གྲུབ་འབྲས་ཀྱི་དཔང་པོ་བྱས་ཡོད།

བོད་སྐྱོར་འཛུགས་སྐྲུན་གྱི་ཀྲུང་དབྱང་ཁེ་ལས་ཀྱི་གཙོ་ཤུགས་དམག་ཅིག་ཡིན་པའི་ཀྲུང་གོ་ཆུ་བེད་ཆུ་གློག་ལས་གྲྭ་ཅུས་དགུ་པ་ཚད་ཡོད་ཀུང་སིས(གཤམ་དུ“ཀྲུང་གོ་ཆུ་གློག་ཅུས་དགུ་པ”ཞེས་བསྡུ་རྒྱུ)ལས་རིགས་ཀྱི་ལེགས་ཆ་དང་། ཆེད་ལས་ཀྱི་ལེགས་ཆ། འཛུགས་སྐྲུན་གྱི་ལེགས་ཆ་བཅས་གང་ལེགས་བཏོན་ཞིང་། བོད་སྐྱོད་པ་རྒན་གྲས་ཀྱི་སྙིང་སྟོབས་དར་སྤེལ་བཏང་སྟེ་ལོ་5ཡི་རིང་འབད་འབུངས་ལྷོད་མེད་བྱས་པ་བརྒྱུད། དུས་རབས་གསར་པའི་ཆུ་བེད་བོད་སྐྱོར་ལས་དོན་གྱི་རྨང་གཞི་ཇེ་བརྟན་དང་མདུན་ལམ་ཇེ་ཡངས་སུ་བཏང་བ་རེད།

ཁྱིམ་ཚང་ཁྲི་སྟོང་མང་པོས་གློག་སྤྱོད་ཐུབ་པར་བྱས་པ།

ལྷོ་ཁ་གྲོང་ཁྱེར་ཡར་ཀླུང་གཙང་པོའི་དབུས་རྒྱུད་ཀྱི་རོང་ཆེན་དུ། འཛམ་གླིང་ཐོག་ས་བབ་མཐོ་ཤོས་ཀྱི་ཨར་འདམ་གྱི་ལུགས་བརྒྱབ་པའི་ཆུ་རགས་དང་བོད་ཀྱིས་ཐོན་སྐྱེད་བྱས་པའི་ནང་མཁོ་ཆེ་ཤོས་ཀྱི་ཆུ་གློག་རྣམ་གྲངས་ཏེ། བོད་ལྗོངས་DGཆུ་ཤུགས་གློག་ཁང་འགྱིང་ངེར་གནས་ཤིང་། གློག་འདོན་འཕྲུལ་འཁོར་གྱི་སྤྱིའི་གློག་འདོན་ཚད་ཆན་ཝ་ཁྲི་66ཟིན་པ་དང་། ལོ་མང་རིང་ཆ་སྙོམས་གློག་གཏོང་ཚད་ཆུ་ཚོད་ཆན་ཝ་དུང་ཕྱུར་32ཙམ་ཟིན་ཡོད།

2017ལོའི་ཟླ་12པར། ཀྲུང་གོ་ཆུ་གློག་ཅུས་དགུ་པས་DGཆུ་ཤུགས་གློག་ཁང་དངོས་སུ་སྐྲུན་འགོ་ཚུགས་པ་དང་། ལོ་4ལྷག་ཙམ་རིང་སྒྲིག་འཛུགས་ཞིབ་ཚགས་དང་དཀའ་སྤྱད་འབད་འཐབ་བྱས་པ་བརྒྱུད། ས་བབ་ཧ་ཅང་མཐོ་བ་དང་། རླུང་གནོན་དམའ་བ། དྲོད་ཚད་ཧེ་བག་ཧ་ཅང་ཆེ་བ། སྐྱེ་ཁམས་ཞན་པ། གསོ་རླུང་འདུས་ཚད་དམའ་བ་སོགས་ཀྱི་གནད་དོན་རབ་དང་རིམ་པ་ཁྱད་བསད་ནུས་ལྡན་བྱས་པ་དང་འབྲེལ། ཨར་འདམ་གྱི་ལུགས་བརྒྱབ་པའི་རགས་རྒྱག་པའི་ལག་རྩལ་དང་། ལྗང་མདོག་བཟོ་སྐྲུན། རིག་ནུས་འཛུགས་སྐྲུན་དོ་དམ་མ་ལག་བཅས་ལ་ཆེད་དོན་ཞིབ་འཇུག་བྱས་པ་བརྒྱུད། ས་བབ་མཐོ་ཞིང་རྙོག་འཛིང་ཆེ་བའི་ཆ་རྐྱེན་འོག་ཨར་འདམ་གྱི་ལུགས་རྒྱག་པ་དང་། དྲོད་ཚད་ཚོད་འཛིན་དང་གས་འགོག བརྩེགས་རིམ་ཟུང་འབྲེལ་སོགས་ཀྱི་ཆུ་རགས་རྒྱག་པའི་འགག་རྩའི་ལག་རྩལ་གྱི་དཀའ་གནད་རབ་དང་རིམ་པ་བདེ་བླག་ངང་བསལ་ནས། ཡར་ཀླུང་གཙང་པོའི་སྨི་བརྒྱ་རིམ་པའི་ཨར་འདམ་གྱི་ལུགས་བརྒྱབ་པའི་ཆུ་རགས་དང་པོ་བསྐྲུན་པ་རེད།

2021ལོར་DGཆུ་ཤུགས་གློག་ཁང་གིས“ལོ་གཅིག་ལ་ཐེངས་བཞི་སྤྱད་པ་དང་ལོ་དེ་རང་ལ་ཚང་མ་སྤྱད་པའི”ས་བབ་མཐོ་བའི་ཆུ་ཤུགས་གློག་ཁང་ཆེ་གྲས་ཐོན་སྐྱེད་བྱེད་འགོ་ཚུགས་པའི་མྱུར་ཚད་གསར་པ་བཏོད་ཡོད། ལོ་དེའི་ཟླ་གསུམ་པར། ཆུ་རགས་གཡས་ངོགས་ཀྱི་ཆུ་འགོག་རགས་དུམ་ནས་རིང་ཚད་སྨི་26.2ཟིན་པའི་རིམ་གསུམ་ཨར་འདམ་ལུགས་རྒྱག་གི་མ་དཔེ་བླངས་ཏེ་འཛམ་གླིང་གི་ཟིན་ཐོ་བཏོད་ཡོད། ད་ལོའི་ཟླ་ལྔ་པར། ཀྲུང་གོ་རྒྱལ་ཁབ་རྟེན་མཛོད་ཁང་གིས་མ་དཔེ་དངོས་སུ་ཉར་ཚགས་བྱས་པ་རེད།

བོད་དབུས་ཀྱི“སྔོ་ལྗང་མཛེས་ལྗོངས་ཁུལ”བསྐྲུན་པ།

ཤངས་ཆུ་ནི་གཞིས་རྩེ་གྲོང་ཁྱེར་རྣམ་གླིང་རྫོང་གི་མི་དམངས་ཚོའི་སེམས་ནང་གི་མ་ཡུམ་ཆུ་བོ་ཡིན་ལ། ལྗང་མདོག་གི་གཡང་ཊི་རིང་མོ་ཞིག་དང་འདྲ་བར་ཡར་ཀླུང་གཙང་པོའི་ཕྱོགས་སུ་རྒྱུག་བཞིན་ཡོད། རྫོང་གྲོང་གི་སྟོད་རྒྱུད་དུ་ཡོད་པའི་ཤངས་ཆུ་ཆུ་མཛོད་ནི་རིན་ཆེན་སྔོན་པོ་ཞིག་དང་འདྲ་བར། ལྷ་ཕུ་གཙང་པོ་དང་རྒྱ་མཚོ་གཙང་པོའི་འབྲེལ་མཚམས་སུ་གནས་ཤིང་། སྔོ་ཞིང་དྭངས་པའི་མཚོ་ལས་རླབས་ཕྲེང་ཆལ་ཆིལ་དུ་འཕྱུར།

2018ལོར། ཀྲུང་གོ་ཆུ་གློག་ཅུས་དགུ་པའི་ལས་གྲྭའི་ལག་རྩལ་དང་རྣམ་གྲངས་དོ་དམ་པ་བརྒྱ་ལྷག་ཙམ་གྱིས་འཛུགས་སྐྲུན་པ་སྟོང་ཙམ་གྱི་སྣེ་ཁྲིད་དེ་ཁ་བ་བུ་ཡུག་ལ་མི་སྐྲག་པ་དང་ལ་དུག་ཚབས་ཆེན་ཁྱད་བསད་བྱས་ཤིང་། ས་བབ་མཐོ་ཚད་སྨི་4000ལྷག་ཙམ་ཟིན་པའི་རི་སྟོང་ལ་རྒོད་དུ་སྒར་བཏབ་སྟེ། “ཆུ་ནུས་ལ་བརྟེན་ནས་རྒྱལ་ཁབ་དར་རྒྱས་གཏོང་བ་དང་། གཞི་རྩའི་འཛུགས་སྐྲུན་ལ་བརྟེན་ནས་རྒྱལ་ཁབ་ཀྱི་དྲིན་ལན་འཇལ་བའི”སྤྱི་ཡོངས་ཀྱི་ཉམས་འགྱུར་ལ་བརྟེན་ནས“རྒྱལ་མཚོན་མིང་ཅན”གྱི་དམངས་འཚོའི་ལས་གྲྭ་དེ་སྐྲུན་འགོ་ཚུགས་པ་རེད། ཏང་དབུ་བརྙེས་ནས་ལོ་102འཁོར་བར་རྟེན་འབྲེལ་ཞུ་བའི་མཚམས་ཏེ། 2023ལོའི་ཟླ་6ཚེས་30ཉིན་ཀྲུང་གོ་ཆུ་གློག་ཅུས་དགུ་པས་སྐྲུན་འགན་ཁུར་བའི་རྒྱལ་ཁབ་ཀྱི་ཆུ་བེད་ཀྱི་གཙོ་གནད་ལས་གྲྭ་བོད་ལྗོངས་ཤངས་ཆུ་ཆུ་བེད་ལྟེ་བའི་ལས་གྲྭ་བསྐྲུན་ཟིན་ནས་དངོས་སུ་སྤྱོད་འགོ་ཚུགས་པ་རེད།

ལྗང་མདོག་གི“བདེ་སྐྱིད་ལྡན་པའི་ཆུ་བོའི་ཁོར་ཡུག”བསྐྲུན་པ།

རི་སྔོན་ཆུ་དྭངས་གསེར་དངུལ་རི་ལས་ལྷག་པ་དང་སྐྱེ་ཁམས་ཁོར་ཡུག་ལེགས་བཅོས་བྱེད་པ་ནི་ཐོན་སྐྱེད་ནུས་ཤུགས་འཕེལ་རྒྱས་གཏོང་བའི་བྱ་གཞག་ཅིག་རེད། 2021ལོའི་ཟླ་11པར་བོད་ལྗོངས་ལྷ་ས་སྐྱིད་ཆུའི་དཔལ་འབྱོར་གསར་སྤེལ་ཁུལ་དུམ་བུའི་སྐྱེ་ཁམས་ཆུ་རགས་ལས་གྲྭ་སྐྲུན་འགོ་ཚུགས་ཚུན། ཀྲུང་གོ་ཆུ་གློག་ཅུས་དགུ་པས་ལྷ་ས་གྲོང་ཨུད་དང་གྲོང་ཁྱེར་སྲིད་གཞུང་གི“ལྟེ་བ་སྟོབས་ཆེར་གཏོང་བའི”འཐབ་ཇུས་དང“གྲོང་ཁྱེར་ཆུ་བོས་སྐོར་བའི”ལས་དོན་བཀོད་སྒྲིག་ལ་དམ་པོར་དམིགས་ནས། འགོ་འཛུགས་ས་མཐོ་བ་དང་། ཚད་གཞི་མཐོ་བ། སྤུས་ཚད་མཐོ་བ། ཕན་འབྲས་ཆེ་བ་བཅས་ཀྱི་སྒོ་ནས་འཁོར་སྐྱོད་ལས་དོན་ལ་དམ་འཛིན་ནན་པོ་བྱས་ཡོད། ས་ཡུལ་དངོས་ཀྱི་བདེ་འཇགས་དང་། སྤུས་ཚད། མྱུར་ཚད། ཁོར་ཡུག་སྲུང་སྐྱོང་སོགས་ཀྱི་ལས་དོན་ཁག་ལ་ཤུགས་སྣོན་བརྒྱབ་ནས་ས་བབ་མཐོ་བ་དང་དྲོད་ཚད་དམའ་བའི་འཁྱགས་ས་སོགས་ཀྱི་གནད་དོན་རབ་དང་རིམ་པ་ཁྱད་བསད་བྱས་ཏེ། ལྷ་ས་གྲོང་ཁྱེར་གྱིས“ཁོར་ཡུག་ལ་བརྟེན་ནས་གྲོང་ཁྱེར་གཏོད་པའི”འཕེལ་རྒྱས་ཀྱི་འཐབ་ཇུས་ལག་བསྟར་ཤུགས་ཆེན་བྱས་ནས། སྐྱེ་ཁམས་མཛེས་ལྗོངས་འདུ་འགོད་འཛུགས་སྐྲུན་ལ་སྐུལ་འདེད་མགྱོགས་པོ་གཏོང་བར་སྒུལ་ཤུགས་ཆེན་པོ་མཁོ་འདོན་བྱས་པ་རེད།

2022ལོའི་ཟླ་12པར། ལས་གྲྭ་ཞིབ་བཤེར་རྩིས་ལེན་བདེ་བླག་ཐུབ་ནས་ལྷ་ས་གྲོང་ཁྱེར་ལྟེ་བའི་གྲོང་ཁུལ་གྱི་ཆུ་རྒྱུད་བཅོས་སྐྱོང་དང་། སྐྱེ་ཁམས་སླར་གསོའི་འཆར་འགོད་ལག་བསྟར། ལྗང་མདོག་རྒྱུན་མཐུད་འཕེལ་རྒྱས་བཅས་ལ་སྔར་བས་སྐུལ་འདེད་ཐེབས་ཡོད།