རྒྱ་ཆེའི་གྲོང་མི་རྣམ་པར་ཕུལ་བའི་འཕྲིན་ཡིག

རྒྱ་ཆེའི་གྲོང་མི་དང་ཁ་ལོ་བ་རྣམ་པ།

མིག་སྔར། གྲོང་ཁྱེར་ཡོངས་སུ་ཁོར་ཡུག་ཕྱོགས་བསྡུས་བཅོས་སྒྲིག་ཆེན་པོ་བྱེད་པའི་བྱ་སྤྱོད་སྤེལ་དང་སྤེལ་བཞིན་ཡོད། རྒྱ་ཆེའི་གྲོང་མི་རྣམ་པར་བདེ་འཇགས་དང་། ཡ་རབས། གོ་རིམ་ལྡན་པ། ཤར་བགྲོད། ཞི་མཐུན་བཅས་ཀྱི་འགྲོ་ལམ་འགྲིམ་འགྲུལ་གྱི་ཁོར་ཡུག་ཅིག་གཏོད་ཆེད། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་འགྲོ་ལམ་འགྲིམ་འགྲུལ་བདེ་འཇགས་བཅའ་ཁྲིམས》སོགས་འབྲེལ་ཡོད་བཅའ་ཁྲིམས་དང་ཁྲིམས་སྲོལ་གཞིར་བཟུང་། འགྲིམ་འགྲུལ་དོ་དམ་གྱི་དོན་དངོས་དང་ཟུང་འབྲེལ་བྱས་ཏེ། ཟླ་11ཚེས་17ཉིན་ནས་བཟུང་། ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་གིས་གྲོང་ཁུལ་དུ་འགྲོ་ལམ་འགྲིམ་འགྲུལ་བཅོས་སྒྲིག་བྱེད་པའི་བྱ་སྤྱོད་སྤེལ་བཞིན་ཡོད། འབྲེལ་ཡོད་དོན་ཚན་གསལ་བཤད་བྱ་རྒྱུ་གཤམ་གསལ།

དང་པོ། བཅོས་སྒྲིག་གི་དུས་ཚོད།

2023ལོའི་ཟླ་11ཚེས་17ཉིན་ནས་འགོ་བཙུགས་པ།

གཉིས། བཅོས་སྒྲིག་གི་ཁྱབ་ཁོངས།

ལྷ་ས་གྲོང་ཁྱེར་གྱི་གྲོང་ཁུལ་གྱི་དཀྱིལ་དང་། གླིང་ཁུལ་ཁག གྲོང་ཚོ་དང་གྲོང་རྡལ་གྱི་འགྲོ་ལམ་སོགས་ཚུད་ཡོད།

གསུམ། བཅོས་སྒྲིག་བྱ་ཡུལ་གཙོ་བོ།

གཅིག འཕྲུལ་སྒུལ་འཁོར་རིགས། འཁོར་རིགས་གང་བྱུང་དུ་འཇོག་པ་དང་། འཁོར་རྟགས་དང་ལག་ཁྱེར(ཁ་ལོ་བའི་ལག་ཁྱེར་དང་འགྲོ་སྐྱོད་ལག་ཁྱེར)མེད་པ། ཁྲིམས་འགལ་ངང་བཟོ་བཅོས་རྒྱག་པ། གློག་དམར་ལས་བརྒལ་བ། ཅ་ལག་དང་མི་ཚད་ལས་བརྒལ་ནས་བླུག་པ། མྱུར་ཚད་ལས་བརྒལ་ནས་གཏོང་བ། རྒྱ་ལམ་འགྲུལ་པ་སྔོན་ལ་མི་གཏོང་བ། ཁ་ཕྱོགས་ལྡོག་ནས་སྐྱོད་པ། འཕྲུལ་སྒུལ་མིན་པའི་འཁོར་རིགས་ཀྱི་འགྲོ་ལམ་འགོག་པ། སྲུང་ཐག་མི་འཆིང་བ། ཆང་རག་བཏུངས་ནས་རླངས་འཁོར་གཏོང་བ། ར་བཟི་ནས་རླངས་འཁོར་གཏོང་བ། དུག་འཐེན་ནས་རླངས་འཁོར་གཏོང་བ་སོགས་ཀྱི་ཁྲིམས་འགལ་བྱེད་སྤྱོད་དང་། དེ་བཞིན། ཞིང་སྤྱོད་རླངས་འཁོར་དང་ཨར་སྐྲུན་གྱི་རླངས་འཁོར་ཆེ་གྲས་སྒྲིག་འགལ་ངང་གྲོང་ཁྱེར་དུ་གཏོང་ཡོང་བ། རྨོག་ཞྭ་མི་གྱོན་པ་དང་། རང་སྣང་གང་ཤར་གྱིས་གཏོང་བ། སྨྱོ་འཁོར་གཏོང་བ་བཅས་དང་།

གཉིས། འཕྲུལ་སྒུལ་མིན་པའི་འཁོར་རིགས། འཁོར་རིགས(གློག་སྒུལ་སྦག་སྦག་དང་མཉམ་སྤྱོད་གློག་སྒུལ་སྦག་སྦག་ཚུད་པ)གང་བྱུང་དུ་འཇོག་པ་དང་། བདེ་འཇགས་ཀྱི་རྨོག་ཞྭ་མི་གྱོན་པ། གློག་དམར་ལས་བརྒལ་བ། འཁོར་རྟགས་དང་ལག་ཁྱེར་མེད་པ། ཁྲིམས་འགལ་ངང་བཟོ་བཅོས་རྒྱག་པ། འཕྲུལ་སྒུལ་འཁོར་རིགས་ཀྱི་ལམ་འགོག་པ། ཁ་ཕྱོགས་ལྡོག་ནས་སྐྱོད་པ། ཅ་ལག་དང་མི་ཚད་ལས་བརྒལ་ཏེ་བླུག་པ་སོགས།

གསུམ། རྒྱ་ལམ་འགྲུལ་པ། གློག་དམར་ལས་བརྒལ་བ་དང་། མི་བགྲོད་ལམ་དུ་མི་འགྲོ་བ། ལན་ཀན་ལས་མཆོངས་འགྲོ་བ་སོགས་ཡིན།

བཅོས་སྒྲིག་བྱེད་རིང་འཕྲུལ་སྒུལ་འཁོར་རིགས་དང་འཕྲུལ་སྒུལ་མིན་པའི་འཁོར་རིགས་གྲལ་སྟར་འགྲིག་པོ་དང་ཁ་ཕྱོགས་གཅིག་མཚུངས་ཀྱིས་འཇོག་དགོས།

ཡ་རབས་ངང་འགྲོ་སྐྱོད་བྱེད་པ་ནི་མི་ཚང་མར་འགན་འཁྲི་ཡོད། ང་ཚོ་ཚང་མས་ལྷ་ས་འདི་ཉིད་ཞི་མཐུན་དང་། མཛེས་སྡུག གནས་འཕྲོད་བཅས་ཀྱི་གྲོང་ཁྱེར་ཞིག་ཏུ་དངོས་འབྲེལ་འགྱུར་བ་བྱེད་དགོས། འདི་གར་སྐུ་ཉིད་ཀྱིས་རྒྱབ་སྐྱོར་དང་བསམ་ཤེས་གནང་བར་ཐུགས་རྗེ་ཆེ་ཞུ་རྒྱུ་མ་ཟད། སྤྱི་ཚོགས་ལས་རིགས་ཁག་གི་མི་སྣས་ལྟ་སྐུལ་ནང་ཞུགས་པར་དགའ་བསུ་ཞུ་རྒྱུ་ཡིན་ལ། འགྲིམ་འགྲུལ་ཁྲིམས་འགལ་གྱི་བྱེད་སྤྱོད་སྣ་ཚོགས(ཐེར་འདོན་ཁ་པར་ཨང་གྲངས། 0891-6324629)ཐེར་འདོན་གནང་རྒྱུའི་རེ་བ་ཡང་ཡོད། ཞིབ་བཤེར་བྱས་ནས་གནས་ཚུལ་བདེན་པ་ཡིན་རིགས་ལ་སྤྱི་བདེ་འགྲིམ་འགྲུལ་དོ་དམ་སྡེ་ཚན་གྱིས་ཁྲིམས་ལྟར་ཐག་གཅོད་བྱ་རྒྱུ་ཡིན།

ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་ནས།

2023ལོའི་ཟླ་11ཚེས་18ཉིན།