ཤིན་ཧྭ་གསར་འགྱུར་ཁང་གྲོང་ཁྱེར་ཅིའུ་ཅིན་ཧྲན་ནས་ཟླ་11ཚེས་16ཉིན་གློག་འཕྲིན་འབྱོར་གསལ། ས་གནས་དེ་གའི་དུས་ཚོད་ཟླ་11ཚེས་16ཉིན་གྱི་སྔ་དྲོར། ཅིའུ་ཅིན་ཧྲན་དུ་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་མོ་ཞི་ཁོའི་ཙུང་ཐུང་ལུའོ་ཕེ་སི་དང་མཇལ་འཛོམས་གནང་བ་རེད།

ཞི་ཅིན་ཕིང་གིས་གསུངས་དོན། ཀྲུང་མོ་རྒྱལ་ཁབ་གཉིས་པོའི་མཛའ་གྲོགས་ཐད་དཀའ་སྡུག་མཉམ་མྱོང་བྱས་པ་དང་ལོ་རྒྱུས་ཡུན་རིང་ལྡན་ཡོད། ན་ནིང་རྒྱལ་ཁབ་གཉིས་པོས་ཕྱི་འབྲེལ་བཙུགས་ནས་ལོ་50འཁོར་བར་རྟེན་འབྲེལ་གཟབ་རྒྱས་ཞུས་པ་དང་འདི་ལོ་སླར་ཡང་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་བཙུགས་ནས་ལོ་10འཁོར་བར་བསུ་བ་ཞུས་ཡོད། མིག་སྔར་ཀྲུང་མོ་རྒྱལ་ཁབ་གཉིས་པོའི་འབྲེལ་བའི་འཐབ་ཇུས་རང་བཞིན་དང་། གསབ་རེས་རང་བཞིན། གཉིས་ཕན་རང་བཞིན་བཅས་ཟམ་མི་ཆད་པར་མངོན་གསལ་དོད་དུ་ཕྱིན་ནས་ཕན་ཚུན་གྱི་ལྟེ་བའི་ཁེ་ཕན་དང་འབྲེལ་བ་ཡོད་པ་དང་དོ་ཁུར་བྱེད་པའི་གནད་དོན་གལ་ཆེན་ཐད་ཕན་ཚུན་བསམ་ཤེས་དང་རྒྱབ་སྐྱོར་བྱེད་ཚད་དེ་བས་བརྟན་དུ་ཕྱིན་ཡོད། ཀྲུང་གོ་ཕྱོགས་ཀྱིས་ཀྲུང་མོའི་དབར་གྱི་འབྲེལ་བར་ཚད་མཐོའི་མཐོང་ཆེན་བྱས་ནས་མོ་ཞི་ཁོ་ཕྱོགས་དང་མཉམ་དུ་འཐབ་ཇུས་སྦྲེལ་མཐུད་ལ་ཤུགས་སྣོན་རྒྱག་པ་དང་། མཉམ་ལས་ཀྱི་མི་མངོན་པའི་སྟོབས་ཤུགས་སྔོག་འདོན་བྱེད་པ། ལེགས་ཆ་འདོན་སྤེལ་བཅས་བྱས་ནས་རྒྱལ་ཁབ་གཉིས་པོའི་འབྲེལ་བ་སླར་ཡང་སྐས་རིམ་གསར་པ་ཞིག་ཏུ་སླེབས་པར་སྐུལ་འདེད་གཏོང་འདོད་ཡོད།

ཞི་ཅིན་ཕིང་གིས་ནན་བཤད་གནང་དོན། ཀྲུང་གོ་ཕྱོགས་ཀྱིས་མོ་ཞི་ཁོ་རང་བཙན་རང་བདག་ངང་རང་ངོས་རྒྱལ་བབ་དང་འཚམ་པའི་འཕེལ་རྒྱས་ཀྱི་ལམ་བུར་སྐྱོད་པར་རྒྱབ་སྐྱོར་བྱེད་པ་དང་མོ་ཞི་ཁོ་ཕྱོགས་དང་རྒྱལ་སྲིད་སྐྱོང་ལུགས་ཀྱི་སྤེལ་རེས་ལ་ཤུགས་སྣོན་རྒྱག་འདོད་ཡོད། ཀྲུང་མོ་རྒྱལ་ཁབ་གཉིས་ཀྱི་ཕྱོགས་གཉིས་པོའི་ཚོང་དོན་དངུལ་འབོར་དེ་ཕྱི་འབྲེལ་འཛུགས་སྐབས་དང་བསྡུར་ན་ལྡབ་7000ལྷག་ཙམ་འཕར་ནས་ལྕགས་ལམ་དང་། རླངས་འཁོར། ནུས་རྒྱུ་གསར་པ་སོགས་ཁྱབ་ཁོངས་ཀྱི་མཉམ་ལས་ཐད་བཀྲག་མདངས་འཚེར་ས་མང་པོ་ཐོན་ཡོད། ཕྱོགས་གཉིས་པོས་རྒྱལ་ཁབ་གཉིས་ཀྱི་སྲིད་གཞུང་དབར་གྱི་ལས་ཀའི་ལམ་སྲོལ་ཡག་པོ་སྤྱོད་པ་དང་། རྨང་གཞིའི་སྒྲིག་བཀོད་འཛུགས་སྐྲུན་སོགས་སྲོལ་རྒྱུན་ཁྱབ་ཁོངས་ཀྱི་མཉམ་ལས་གཏིང་ཟབ་ཏུ་གཏོང་བ། དངུལ་རྩ་དང་གློག་སྒུལ་རླངས་འཁོར་སོགས་གསར་དར་ཐོན་ལས་ཀྱི་མཉམ་ལས་རྒྱ་ཆེར་གཏོང་བ། དུག་འགོག་གི་ཁྲིམས་སྒྱུར་མཉམ་ལས་གཏིང་ཟབ་ཏུ་གཏོང་བ་བཅས་བྱེད་དགོས། ཕྱོགས་གཉིས་པོས་ཕན་ཚུན་རིག་རྩལ་འཁྲབ་སྟོན་དང་རིག་གནས་འགྲེམས་སྟོན་སོགས་མི་ཆོས་རིག་གནས་ཀྱི་སྤེལ་རེས་བྱེད་སྒོར་རྒྱབ་སྐྱོར་ཧུར་ཐག་བྱེད་པ་དང་། ཕྱོགས་མང་མཉམ་ལས་དམ་ཟབ་བྱེད་པ། ཕྱོགས་མང་རིང་ལུགས་དང་རྒྱལ་སྤྱིའི་འབྲེལ་བ་དམངས་གཙོ་ཅན་ལ་འགྱུར་བར་སྲུང་སྐྱོང་མཐའ་གཅིག་ཏུ་བྱས་ནས། རྒྱལ་སྤྱིའི་དྲང་གཞག་དྲང་བདེན་དང་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་ལུགས་མཐུན་ཁེ་དབང་སྲུང་སྐྱོང་བྱེད་དགོས། སང་ལོ་ནི་ཀྲུང་གོ་དང་ལ་ཏིང་མེ་གླིང་གི་གླེང་སྟེགས་གཉེར་ནས་ལོ་10འཁོར་བའི་ལོ་ཞིག་རེད། ཀྲུང་གོ་ཕྱོགས་ཀྱིས་མོ་ཞི་ཁོ་ཕྱོགས་དང་མཉམ་དུ་དུས་རབས་གསར་པར་ཀྲུང་ལའི་འབྲེལ་བ་བརྟན་བགྲོད་རྒྱང་འཁྱོལ་ཡོང་བར་སྐུལ་འདེད་གཏོང་འདོད་ཡོད།

ཞི་ཅིན་ཕིང་གིས་ད་དུང་ཡུན་རིང་མ་སོང་གོང་མོ་ཞི་ཁོར་ཞི་བདེ་རྒྱ་མཚོ་ཆེན་པོའི་ངོགས་ཀྱི་རྒྱ་མཚོའི་རླུང་འཚུབ་ཀྱི་གནོད་འཚེ་ཕོག་པར་སླར་ཡང་སེམས་གསོ་འཚམས་འདྲི་ཞུས་ནས། ཀྲུང་གོ་ཕྱོགས་ཀྱིས་མོ་ཞི་ཁོ་ཕྱོགས་ལ་གེགས་སེལ་དངོས་ཟོག་ཉོ་སྒྲུབ་ཐད་རོགས་རམ་ཤུགས་ཆེན་བྱེད་ཀྱི་ཡིན་ཞེས་གསུངས་པ་རེད།

ལུའོ་ཕེ་སི་ཡིས་གསུངས་དོན། མོ་ཀྲུང་རྒྱལ་ཁབ་གཉིས་ལ་འོད་སྟོང་འབར་བའི་ཤེས་དཔལ་ཡོད་པ་དང་རྒྱལ་ཁབ་གཉིས་པོའི་མི་དམངས་དབར་ཕན་ཚུན་རྒྱུས་མངའ་དང་འཆམ་མཐུན་ལྡན་པས་སྤུན་ཟླ་ལྟར་གྱི་བརྩེ་བ་ཟབ་མོ་ཡོད། ཏོག་གསར་རིམས་ནད་ཚབས་ཆེ་ཤོས་ཀྱི་དུས་སུ་ཀྲུང་གོས་རོགས་སྐྱོར་སྔ་ཤོས་བྱས་ནས་མོ་ཞི་ཁོ་ཕྱོགས་ལ་རྩ་ཆེའི་རིམས་འགོག་དངོས་ཟོག་འབོར་ཆེན་མཁོ་འདོན་བྱས་ཏེ་མོ་ཞི་ཁོ་དཀའ་གནད་ལས་སྒྲོལ་རོགས་བྱས་ཡོད། ཉེ་དུས་མོ་ཞི་ཁོ་ཕྱོགས་ལ་ཞི་བདེ་རྒྱ་མཚོ་ཆེན་པོའི་རྒྱ་མཚོའི་རླུང་འཚུབ་ཀྱི་གནོད་འཚེ་ཚབས་ཆེན་ཕོག་རྗེས། ཀྲུང་གོ་ཕྱོགས་ཀྱིས་འཕྲལ་དུ་སེམས་གསོ་འཚམས་འདྲི་དང་རྒྱབ་སྐྱོར་བྱས་པར་མོ་ཞི་ཁོ་ཕྱོགས་ཀྱིས་ཐུགས་རྗེ་ཆེ་ཞུ་གི་ཡིན། མོ་ཞི་ཁོ་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་ཕྱོགས་མང་ལས་དོན་ཁྲོད་མཉམ་ལས་དམ་ཟབ་བྱས་ནས། ལ་ཏིང་མེ་གླིང་དང་ཀྲུང་གོའི་འབྲེལ་བར་སྐུལ་འདེད་ཧུར་ཐག་གཏོང་འདོད་ཡོད།