ཤིན་ཧྭ་གསར་འགྱུར་ཁང་མཉམ་འབྲེལ་རྒྱལ་ཚོགས་ནས་ཟླ་11ཚེས་13ཉིན་གློག་འཕྲིན་འབྱོར་གསལ། ཚེས་13ཉིན་མཉམ་འབྲེལ་རྒྱལ་ཚོགས་སུ་རྒྱུན་སྡོད་ཀྲུང་གོའི་འཐུས་ཚབ་གཞོན་པ་ཀེང་ཧྲོང་གིས། འཛམ་གླིང་དབུས་ཤར་ས་ཁུལ་དུ་ཉིང་རྡུལ་མཚོན་ཆ་དང་གཞི་ཁྱོན་ཆེ་བའི་འཆི་རྨས་རང་བཞིན་གྱི་གོ་མཚོན་མེད་པའི་ཁུལ་འཛུགས་པའི་ཚོགས་འདུ་སྐབས་བཞི་པར་གཏམ་བཤད་སྤེལ་སྐབས། འཛམ་གླིང་དབུས་ཤར་ས་ཁུལ་གྱི་ཞི་བའི་ལམ་སྲོལ་འཛུགས་པའི་གལ་ཆེའི་ལྷུ་ཚིགས་ཤིག་གི་ངོས་ནས། མིག་སྔའི་གནས་ཚུལ་འོག་རྒྱལ་སྤྱིའི་སྤྱི་ཚོགས་ཀྱིས་འཛམ་གླིང་དབུས་ཤར་ས་ཁུལ་དུ་ཉིང་རྡུལ་མཚོན་ཆ་དང་གཞི་ཁྱོན་ཆེ་བའི་འཆི་རྨས་རང་བཞིན་གྱི་གོ་མཚོན་མེད་པའི་ཁུལ་འཛུགས་པར་རྒྱབ་སྐྱོར་བྱེད་ཤུགས་ཆེ་རུ་གཏོང་བར། འཛམ་གླིང་དབུས་ཤར་ས་ཁུལ་གྱི་རྒྱལ་ཁབ་འདུམ་འགྲིག་དང་མཉམ་ལས་སམ་འཛམ་གླིང་དབུས་ཤར་ས་ཁུལ་གྱི་ཞི་བའི་འཕེལ་རིམ་ལ་སྐུལ་འདེད་གཏོང་བའི་ཐད་ཁ་ཚ་དགོས་གཏུགས་ཀྱི་རང་བཞིན་དང་གལ་ཆེའི་རང་བཞིན་དེ་བས་མངོན་གསལ་དོད་པོ་ཡོད་ཅེས་བརྗོད་པ་རེད།

ཀེང་ཧྲོང་གིས་ཉིང་རྡུལ་མཚོན་ཆ་སོགས་གཞི་ཁྱོན་ཆེ་བའི་འཆི་རྨས་རང་བཞིན་གྱི་གོ་མཚོན་གྱི་གནད་དོན་ནི་ཐོག་མཐའ་བར་གསུམ་དུ་འཛམ་གླིང་དབུས་ཤར་ས་ཁུལ་གྱི་ཕན་ཚུན་ཡིད་ཆེས་མེད་པ་དང་ས་ཁུལ་གྱི་ཞི་བདེ་དང་བརྟན་ལྷིང་ལ་ཤུགས་རྐྱེན་ཐེབས་པའི་རྒྱུ་རྐྱེན་གལ་ཆེན་ཞིག་རེད། ཀྲུང་གོ་ཕྱོགས་ཀྱིས་འཛམ་གླིང་དབུས་ཤར་ས་ཁུལ་དུ་ཉིང་རྡུལ་མཚོན་ཆ་དང་གཞི་ཁྱོན་ཆེ་བའི་འཆི་རྨས་རང་བཞིན་གྱི་གོ་མཚོན་མེད་པའི་ཁུལ་འཛུགས་པར་རྒྱབ་སྐྱོར་བྱེད་ལ་བྱ་སྤྱོད་དེས་གཞི་ཁྱོན་ཆེ་བའི་འཆི་རྨས་རང་བཞིན་གྱི་གོ་མཚོན་ཁྱབ་འགྱེད་བཀག་འགོག་དང་། རྒྱལ་སྤྱིར་ཁྱབ་འགྱེད་སྔོན་འགོག་བྱེད་པའི་མ་ལག་གི་དབང་གྲགས་རང་བཞིན་དང་ནུས་ལྡན་རང་བཞིན་སྲུང་སྐྱོང་། དམག་ཤུགས་འགྲན་བསྡུར་དང་གདོང་ཐུག་གི་ཉེན་ཁ་ཆུང་དུ་གཏོང་བ་བཅས་བྱས་ནས་ས་ཁུལ་ཡུན་རིང་བདེ་འཁོད་ཡོང་ཆེད་ལམ་སྲོལ་གྱི་འགན་སྲུང་གལ་ཆེན་མཁོ་འདོན་བྱེད་ཀྱི་ཡོད་ཅེས་བརྗོད།

ཀེང་ཧྲོང་གིས་སྐབས་འདིའི་ཚོགས་འདུ་ནི་ཕ་ལེ་སི་ཐན་དང་དབྱི་སི་རལ་དབར་གྱི་གདོང་ཐུག་ཛ་དྲག་ཏུ་འགྲོ་བའི་དུས་སུ་འཁེལ་ཡོད། འཛམ་གླིང་དབུས་ཤར་ས་ཁུལ་གྱི་ཞི་བདེ་དང་བདེ་འཇགས་ནི་ས་ཁུལ་དང་རྒྱལ་ཁབ་ཀྱི་ཁེ་ཕན་དང་འབྲེལ་བ་ཡོད་ལ་གོ་ལ་ཧྲིལ་པོའི་བརྟན་ལྷིང་དང་ཡང་འབྲེལ་བ་ཡོད། མིག་སྔའི་གོ་ལ་ཧྲིལ་པོ་དང་ས་ཁུལ་གྱི་བདེ་འཇགས་ཀྱི་དཀའ་གནད་ལ་དམིགས་ཏེ་ཀྲུང་གོ་ཕྱོགས་ཀྱིས་རྒྱལ་སྤྱིའི་སྤྱི་ཚོགས་ཀྱིས་ཐུན་མོང་དང་། ཕྱོགས་བསྡུས། མཉམ་ལས། རྒྱུན་མཐུད་ཆོག་པ་བཅས་ཀྱི་བདེ་འཇགས་ལྟ་བ་མཐའ་འཁྱོངས་དང་། དོ་སྙོམས། ནུས་ལྡན། རྒྱུན་མཐུད་བཅས་ཀྱི་རྒྱལ་སྤྱིའི་བདེ་འཇགས་སྒྲོམ་གཞི་མཐའ་འཁྱོངས་བཙུགས་ནས་སྐད་ཆ་ཤོད་རེས་བྱེད་པ་ལས་ཁ་གཏད་དུ་མི་ལང་བ་དང་། རོགས་པ་སྒྲིག་པ་ལས་མནའ་འབྲེལ་དུ་མི་ཞུགས་པ། གཉིས་ཁེ་ཡོང་ཐབས་བྱེད་པ་ལས་རྒྱལ་ཕམ་མེད་པ་བཅས་ཀྱི་བདེ་འཇགས་ཀྱི་ལམ་གསར་པ་ཞིག་གཏོད་དགོས་པའི་འདོད་ཚུལ་འཛིན་གྱི་ཡོད། འདི་ནི་ཀྲུང་གོ་ཕྱོགས་ཀྱིས་རྒྱལ་སྤྱིའི་གདོང་ཐུག་གི་འབྱུང་རྩ་མེད་པར་བཟོ་བ་དང་ས་ཁུལ་ཡུན་རིང་བདེ་འཁོད་ཡོང་ཆེད་མཁོ་འདོན་བྱས་པའི་ཀྲུང་གོའི་བློ་གྲོས་དང་ཀྲུང་གོའི་ཇུས་གཞི་རེད་ཅེས་བརྗོད།

ཀེང་ཧྲོང་གིས་འཛམ་གླིང་དབུས་ཤར་ས་ཁུལ་གྱི་གནད་དོན་ཐད་ལོ་རྒྱུས་དང་དངོས་ཡོད་འགལ་ཟླ་མཉམ་དུ་འདྲེས་ཡོད་ཅིང་། ཐག་གཅོད་བྱེད་པ་ནི་དུས་ཐུང་ཞིག་གཏན་ནས་མིན་པས་ཕྱོགས་ཁག་གིས་ཐུན་མོང་གི་བདེ་འཇགས་འདུ་ཤེས་རྒྱུན་འཁྱོངས་དང་བདེ་འཇགས་དང་ཁ་འབྲལ་ཐབས་མེད་པའི་རྩ་དོན་མཐའ་འཁྱོངས་བྱས་ནས་དགེ་མཚན་ལྡན་པའི་ཆབ་སྲིད་ཕྱི་འབྲེལ་གྱི་རྣམ་པ་རིམ་བཞིན་གཏོད་དགོས། ས་ཁུལ་དང་རྒྱལ་ཁབ་ཀྱིས་མཐུན་སྒྲིལ་མཉམ་ལས་ལ་ཤུགས་སྣོན་བརྒྱབ་ནས་ཕན་ཚུན་ཡིད་ཆེས་དང་ངོས་འཛིན་གཅིག་མཐུན་ཡོང་བར་བྱེད་དགོས། ས་ཁོངས་ཕྱི་རོལ་གྱི་རྒྱལ་ཁབ་ཁ་ཤས་ཀྱིས་གུ་དོག་པའི་ས་འབྲེལ་ཆབ་སྲིད་ཀྱི་སྒེར་ཕན་དང་ཆབ་སྲིད་ཅན་གྱི་བྱེད་སྤྱོད་དོར་བ་དང་ས་ཁུལ་དུ་རྐང་བཙུགས་ནས་ཁ་གཏད་དུ་ལང་བ་དང་འགྲན་རྒོལ་བྱེད་པའི་ངན་སྐུལ་བྱེད་མཚམས་བཞག་ནས་ས་ཁུལ་གྱི་བདེ་འཇགས་སྲུང་སྐྱོང་ལ་ལེགས་སྐྱེས་ཏན་ཏིག་འབུལ་དགོས་ཞེས་བརྗོད།

ཀེང་ཧྲོང་གིས་ཉེ་ཆར་ཅ་ཧྲ་ཁུལ་དུ་ཉིང་རྡུལ་མཚོན་ཆ་སྤྱོད་རྒྱུའི་སྐོར་གྱི་དབྱི་སི་རལ་གྱི་དཔོན་རིགས་ཀྱི་གཏམ་བརྗོད་ལ་རྩོད་གཞི་ཆེན་པོ་བྱུང་བ་དང་ཀྲུང་གོ་ཕྱོགས་ཀྱིས་གཏམ་བརྗོད་དེ་རིགས་ལ་ཧང་སངས་པ་དང་དོ་ཁུར་ཆེན་པོ་བྱེད་ཀྱི་ཡོད། གཏམ་བརྗོད་དེ་རིགས་ཀྱིས་ཉེས་མིང་ཆེན་པོ་འཁུར་བར་མི་འཛེམ་ཞིང་། འགན་གཏན་ནས་མི་འཁུར་བ་ཞིག་ཡིན་པས་མི་སེམས་ཧ་ཅང་མི་བདེ་བ་ཞིག་བཟོས་ཡོད། གཏམ་བརྗོད་དེ་རིགས་ནི་ཉིང་རྡུལ་དམག་འཁྲུག་ལ་རྒྱལ་ཁ་འཐོབ་མི་ཐུབ་ལ་དམག་འཐབ་རྒྱག་ཀྱང་མི་རུང་བའི་རྒྱལ་སྤྱིའི་ཐུན་མོང་གི་ངོས་འཛིན་དང་རྒྱབ་འགལ་ཡིན་ལ་འཛམ་གླིང་དབུས་ཤར་ས་ཁུལ་གྱི་ཉིང་རྡུལ་མཚོན་ཆ་མེད་པའི་ཁུལ་འཛུགས་པའི་རྒྱལ་སྤྱིའི་དགོངས་དོན་དང་རྒྱབ་འགལ་ཡིན་པ་མ་ཟད། མིག་སྔའི་དུས་བབ་ཞི་ལྷོད་དུ་གཏོང་བ་དང་། དམག་མཚམས་འཇོག་པ། མི་སེར་སྲུང་སྐྱོབ་བཅས་ཀྱི་རྒྱལ་སྤྱིའི་འབོད་སྒྲ་དང་ཡང་དེ་བས་རྒྱབ་འགལ་སོང་ཡོད། ཀྲུང་གོ་ཕྱོགས་ཀྱིས་དབྱི་སི་རལ་ཕྱོགས་ཀྱི་དཔོན་རིགས་ཀྱིས་གཏམ་བཤད་དེ་དག་སྤེལ་མཚམས་འཇོག་པ་དང་དབྱི་སི་རལ་ཕྱོགས་ཀྱིས་ཉིང་རྡུལ་མཚོན་ཆ་མེད་པའི་རྒྱལ་ཁབ་ཀྱི་ཐོབ་ཐང་ནས《ཉིང་རྡུལ་མཚོན་ཆ་ཁྱབ་འགྱེད་མི་འགྲོ་བའི་ཆིངས་ཡིག》ཏུ་གང་མགྱོགས་ཞུགས་པའི་སྐུལ་འདེབས་དང་འབྲེལ་ཉིང་རྡུལ་སྒྲིག་བཀོད་ཚང་མར་རྒྱལ་སྤྱིའི་རྡུལ་ཕྲན་ནུས་པའི་སྒྲིག་གཞིའི་འགན་ལེན་ལྟ་སྐུལ་བྱེད་དགོས་ཞེས་བརྗོད་པ་རེད།

ཀེང་ཧྲོང་གིས་ཀྲུང་གོས་ཐོག་མཐའ་བར་གསུམ་དུ་ཉིང་རྡུལ་མཚོན་ཆ་མེད་པའི་ཁུལ་འཛུགས་པའི་རྒྱལ་སྤྱིའི་འབད་བརྩོན་ལ་རྒྱབ་སྐྱོར་དང་ཉིང་རྡུལ་མཚོན་ཆ་མེད་པའི་ཁུལ་གྱི་ཆིངས་ཡིག་གྲོས་ཆོད་ཡི་གེར་མིང་རྟགས་བཀོད་པ་དང་འབྲེལ་ཆོག་མཆན་སྤྲད་པའི་འབྲེལ་ཡོད་འོས་འགན་ལག་བསྟར་ནན་པོ་བྱེད་ཀྱི་ཡོད། ཀྲུང་གོས་མུ་མཐུད་བྱ་སྤྱོད་དངོས་ལ་བརྟེན་ནས་འཛམ་གླིང་དབུས་ཤར་ས་ཁུལ་གྱི་ཞི་བདེ་དང་། བདེ་འཇགས། བརྟན་ལྷིང་བཅས་སྲུང་སྐྱོང་བྱ་ཆེད་རང་ཉིད་ཀྱི་ལེགས་སྐྱེས་འབུལ་འདོད་ཡོད་ལ། འབྲེལ་ཡོད་ཕྱོགས་ཁག་དང་མཉམ་དུ་ད་ཐེངས་ཀྱི་ཚོགས་འདུར་ཐུན་མོང་གི་ངོས་འཛིན་གཅིག་ཏུ་སྒྲིལ་བར་སྐུལ་འདེད་བཏང་ནས་འཛམ་གླིང་དབུས་ཤར་ས་ཁུལ་གྱི་ཉིང་རྡུལ་མཚོན་ཆ་མེད་པའི་ཁུལ་སྐྲུན་པར་སྒུལ་ཤུགས་གསར་པ་སྣོན་འདོད་ཡོད་ཅེས་བརྗོད་པ་རེད།