ཉེ་བའི་ལོ་ཤས་རིང་། རང་ལྗོངས་ཀྱི་ཚོང་དོན་སྡེ་ཚན་གྱིས་རྒྱལ་སྤྱིའི་ཚོང་དོན་གྱི“སྐར་ཁུང་རྐྱང་པ”ཁྱབ་གདལ་བེད་སྤྱོད་བཏང་ནས། རྒྱལ་སྒྲོལ་ཚོང་དོན་སྟབས་བདེ་ཅན་གྱི་སྒྱུར་བཅོས་སྔར་བས་གཏིང་ཟབ་ཏུ་གཏོང་བ་དང་འགག་སྒོའི་ཚོང་གཉེར་ཁོར་ཡུག་ལེགས་སུ་བཏང་སྟེ། འགག་སྒོ་ཁག་གི་འགག་སྒོ་སྒྲོལ་བའི་ནུས་པ་ཟམ་མི་ཆད་པར་ཆེ་རུ་བཏང་བ་རེད། འདི་ལོའི་ཟླ་དང་པོ་ནས་དགུ་པའི་བར། སྐྱིད་གྲོང་དང་། འགྲམ། སྤུ་ཧྲེང་བཅས་ཀྱི་འགག་སྒོ་ནས་དངོས་ཟོག་ཕྱིར་གཏོང་ནང་འདྲེན་བྱེད་ཚད་ཏུན་ཁྲི་9.5ཟིན་པ་དེ་དུས་མཚུངས་ལས་31.6%འཕར་བ་དང་། ཕྱིར་གཏོང་ནང་འདྲེན་བྱས་པའི་དངོས་ཟོག་གི་རིན་ཐང་སྒོར་དུང་ཕྱུར་31.95ཟིན་པ་དེ་དུས་མཚུངས་ལས་57.3%འཕར་བ། རྒྱལ་མཚམས་ནས་འཛུལ་སྒྲོལ་བྱེད་མཁན་རླངས་འཁོར་ཐེངས་གྲངས་8085ཟིན་པ་དེ་དུས་མཚུངས་ལས་89.8%འཕར་ཡོད་པ་རེད།

ཉེ་བའི་ལོ་ཤས་རིང་། རྒྱལ་ཁབ་ཀྱི་རྒྱབ་སྐྱོར་ཤུགས་ཆེན་འོག་རང་སྐྱོང་ལྗོངས་ཚོང་དོན་ཐིང་གིས“སྐར་ཁུང་རྐྱང་པའི”མ་ལག་སྐྱེལ་འདྲེན་དང་སྲུང་སྐྱོང་གི་ལས་དོན་ཏན་ཏིག་ངང་སྤེལ་བ་དང་སྤྱོད་མཁན་གྱི་ཞབས་ཞུའི་ཐད་སྦྲེལ་ཁ་པར་95198དང་སྐད་འཕྲིན་ཚོགས་པ་སོགས་བརྒྱུད། ཁེ་ལས་ལ་ལས་སྒོའི་བློ་འདྲིའི་ཞབས་འདེགས་ཞུས་ནས་ཁེ་ལས་ལ“སྐར་ཁུང་རྐྱང་པར”འཕྲད་པའི་མ་ལག་བཀོལ་སྤྱོད་སོགས་ཀྱི་གནད་དོན་དུས་ཐོག་ཏུ་ཐག་གཅོད་བྱས་ཡོད། མིག་སྔར་བོད་ཀྱི་རྒྱལ་སྤྱིའི་ཚོང་དོན་གྱི“སྐར་ཁུང་རྐྱང་པའི”ལས་སྒོ་གཙོ་བོ་དྲ་ཐོག་ནས་གཉེར་ཚད་100%ཟིན་ཡོད། ཟླ་དང་པོ་ནས་དགུ་པའི་བར་ཞབས་ཞུའི་རེ་ཞུ་ཐེངས་267བདག་སྤྲོད་བྱས་པ་དང་ཁེ་ལས་ཀྱི་བློ་ཡིད་ཚིམ་ཚད་99%ཟིན་ཡོད་པ་རེད།

དེ་དང་ཆབས་ཅིག་རང་སྐྱོང་ལྗོངས་ཚོང་དོན་ཐིང་གིས་ཉིན་རེའི་འགག་སྒོའི་འཁོར་རྒྱུག་གནས་ཚུལ་ཤེས་རྟོགས་བྱས་པ་དང་ཟླ་རེའི་ཕྱིར་གཏོང་ནང་འདྲེན་གྱི་གནས་ཚུལ་ལ་དབྱེ་ཞིབ་དང་མཐའ་དཔྱོད་བྱས་ནས། འགག་སྒོའི་འཁོར་རྒྱུག་གནས་ཚུལ་ལ་དུས་ཐོག་ཏུ་སྟངས་འཛིན་བྱས་པ་དང་མངོན་གསལ་དོད་པའི་གནད་དོན་ཤེས་རིགས་དུས་ཐོག་ཏུ་མཐུན་སྦྱོར་ཐག་གཅོད་བྱས་པ་རེད། སྐྱིད་གྲོང་འགག་སྒོར་མཛུབ་ཁྲིད་བྱས་ཏེ་མི་འགྲོ་འོང་སླར་གསོའི་གནས་ཚུལ་དང་ཟུང་འབྲེལ་གྱིས“ལྡོག་འདྲེན”གྱི་ཟོག་འདྲེན་བྱེད་སྟངས་ལེགས་སྒྲིག་དང་ལེགས་སུ་བཏང་སྟེ། ནེ་པ་ལ་ཕྱོགས་ཀྱི་རླངས་འཁོར་རང་རྒྱལ་གྱི་འགག་སྒོའི་དངོས་ཟོག་ཞིབ་བཤེར་བྱ་ཡུལ་དུ་བཏང་ནས་དངོས་ཟོག་འདོན་འཇུག་དང་སྐྱེལ་འདྲེན་བྱས་པས། ཕྱིར་གཏོང་ནང་འདྲེན་གྱི་དངོས་ཟོག་སྐྱེལ་འདྲེན་དང་འདོན་འཇུག་གི་མ་གནས་དམའ་རུ་ནུས་ལྡན་ཕྱིན་པ་དང་འགག་སྒོ་སྒྲོལ་བའི་བརྒྱུད་རིམ་རྒྱུན་ཆད་མེད་པར་ལེགས་སུ་ཕྱིན་ཡོད་པ་རེད།

གཞན་ཡང་རང་ལྗོངས་སུ་འགག་སྒོའི་གྲོན་བསྡུའི་དཀར་ཆག་གསལ་ཐོའི་ལམ་ལུགས་ལག་བསྟར་བྱས་ནས། འགག་སྒོའི་གཉེར་སྐྱོང་ཞབས་འདེགས་ཁེ་ལས་ཀྱི་ཡིད་རྟོན་གཉེར་སྐྱོང་དང་ལུགས་མཐུན་གོང་ཚད་གཏན་འཁེལ་བྱེད་པར་ཁྲིད་སྟོན་བྱས་པ་མ་ཟད། འབྲེལ་ཡོད་བླང་བྱ་གཞིར་བཟུང་ཕྱི་ཕྱོགས་ཚོང་དོན་ཁེ་ལས་ལ་གནས་སྤོའི་ཁ་གསབ་སྤྲད་དེ་ཁེ་ལས་ཀྱི་ཁུར་པོ་ཡང་དུ་ཏན་ཏིག་བཏང་ནས། ཕྱི་ཕྱོགས་ཚོང་དོན་གྱི་བརྟན་ལ་སྐྱོན་བྲལ་གྱི་འཕེལ་རྒྱས་ལ་སྐུལ་འདེད་བཏང་ཡོད་པ་རེད།