ཉིན་ཤས་གོང་། 2023ལོའི་དངུལ་རྩའི་ཁྲོམ་གཞུང་གི་གླེང་སྟེགས་ལོ་ཚོགས་ཐུགས་གྲ་ལེགས་འགྲིག་ངང་གྲོལ་ཞིང་། 2023ལོའི་དངུལ་རྩའི་ཁྲོམ་གཞུང་གི་གླེང་སྟེགས་ལོ་ཚོགས་ཀྱི་མཇུག་འགྲིལ་མཛད་སྒོར་ཞུགས་མཁན་སྐུ་མགྲོན་རྣམ་པས་དངུལ་རྩའི་སྒོ་དབྱེའི་མཉམ་ལས་ལ་ཤུགས་སྣོན་རྒྱག་པ་ནི་དཔལ་འབྱོར་མཉམ་སྤྱོད་གཉིས་ཕན་ལ་སྐུལ་འདེད་གཏོང་བའི་བྱ་ཐབས་གལ་ཆེན་ཞིག་ཡིན་པ་དང་། སྐབས་འདིའི་གླེང་སྟེགས་ལོ་ཚོགས་ཐོག་སྒོ་དབྱེ་མཉམ་ལས་ཀྱི་གདེང་ཚོད་དང་ཆོད་སེམས་རྒྱ་ཁྱབ་ངང་བརྒྱུད་སྤྲོད་བྱས་ནས་ཆེད་ལས་དཔྱད་བསྡུར་གྱི་གཏིང་ཟབ་ཚད་དང་རྒྱ་ཆེ་ཚད་གང་ལེགས་མངོན་པས་གྲུབ་འབྲས་མང་པོ་དོན་འཁྱོལ་དང་གཞན་སྒྱུར་བྱེད་པར་སྐུལ་འདེད་ནུས་ལྡན་ཐེབས་པའི་ངོས་འཛིན་བྱས་པ་རེད།

ཁའེ་ལེ་མ་འཇོག་ཚོགས་པ་སྲོལ་གཏོད་བྱེད་མཁན་ཏ་ཝུའེ·ལུའུ་པིན་སི་ཐན་གྱིས་ལོ་རྒྱུས་ཀྱི་ཉམས་མྱོང་ལས་རྒྱལ་སྤྱིའི་མཉམ་ལས་ལ་ཤུགས་སྣོན་རྒྱག་པ་དང་ལྷག་པར་དུ་ཚོང་དོན་མཉམ་ལས་ནི་དཔལ་འབྱོར་སྡེ་གཞི་ཆེ་གྲས་རྒྱུན་མཐུད་ངང་འཕར་བའི་འགག་རྩའི་རྒྱུ་རྐྱེན་ཞིག་ཡིན་པ་ར་སྤྲོད་བྱུང་ཡོད། 2023ལོའི་དངུལ་རྩའི་ཁྲོམ་གཞུང་གི་གླེང་སྟེགས་ལོ་ཚོགས་ཐོག་ཚོང་དོན་དང་། དཔལ་འབྱོར། དངུལ་རྩའི་མཉམ་ལས་ཀྱི་ཕན་ཡོན་སྐོར་ལ་གྲོས་བསྡུར་མང་པོ་བྱས་པ་དང་། ཕྱོགས་ཁག་ཚང་མས་ཕུགས་ལ་དམིགས་ནས་མཉམ་ལས་བྱས་ཚེ་ཐུན་མོང་ཐོག་དར་རྒྱས་ཡོང་ངེས་ཡིན་པའི་ཡིད་ཆེས་ཡོད་ཅེས་བརྗོད།

འཛམ་གླིང་དངུལ་ཁང་ཨེ་ཤེ་ཡ་ཤར་མ་དང་ཞི་བདེ་རྒྱ་མཚོ་ཆེ་མོའི་ས་ཁུལ་གྱི་ཧང་ཀྲང་གཞོན་པ་མན་ནུའུ་ཨའེ་ལཱ·ཧྥེ་ལུའོ་ཡིས་བརྙན་ལམ་ནས་གཏམ་བཤད་སྤེལ་སྐབས། གོ་ལ་ཧྲིལ་པོའི་དངུལ་རྩའི་ཁྲོམ་རའི་ཕྱོགས་མང་མཉམ་ལས་ལ་སྔར་བས་སྐུལ་འདེད་བཏང་ནས་གཏན་འཇགས་དང་འདང་ངེས་ཀྱི་མ་རྩ་དང་འཁོར་རྒྱུག་རང་བཞིན་རྒྱུན་འཁྱོངས་ཀྱིས་དངོས་ཚན་དཔལ་འབྱོར་གྱི་དགོས་མཁོ་སྐོང་དགོས། དེ་བས་བརྟན་ཞིང་སྐྱོན་བྲལ་གྱི་གོ་ལ་ཧྲིལ་པོའི་བཅོས་སྐྱོང་ལམ་སྲོལ་མ་ལག་བཙུགས་ནས་ཕྱོགས་མང་པོའི་འགྲན་སློང་ལ་ཁ་གཏད་གཅོག་དགོས་ཞེས་བརྗོད།

ལོན་ཏོན་དངུལ་རྩའི་གྲོང་གི་ཧྲི་ཀྲང་ལེང་ཡིའུ་སི་ཡིས་བརྙན་ལམ་ནས་གཏམ་བཤད་སྤེལ་སྐབས། ཀྲུང་གོ་ནི་ལོན་ཏོན་དངུལ་རྩའི་གྲོང་གི་མཉམ་ལས་རོགས་ཟླ་ཡིན་པ་དང་ལོན་ཏོན་ནི་གོ་ལ་ཧྲིལ་པོའི་གྲུ་ཁ་དང་བྲལ་བའི་མི་དམངས་ཤོག་སྒོར་ཉོ་ཚོང་ལྟེ་གནས་ཆེ་ཤོས་ཡིན་པས། ཀྲུང་གོའི་མ་འཇོག་དངུལ་རྩའི་སྒྲིག་གཞིས་དངུལ་རྩའི་གྲོང་གཉེར་སྐྱོང་བྱེད་པའི་ལོ་རྒྱུས་ཡུན་རིང་ལྡན་ཡོད། དངུལ་རྩའི་ཁྲོམ་གཞུང་གི་གླེང་སྟེགས་བརྒྱུད་ཀྲུང་དབྱིན་མཉམ་ལས་སྤེལ་རེས་ལ་སྔར་བས་སྐུལ་འདེད་གཏོང་བ་དང་། ཀྲུང་གོའི་འབྲེལ་ཡོད་སྒྲིག་གཞི་དང་རྒྱུན་མཐུད་ཆོག་པའི་འཕེལ་རྒྱས་དང་ལྗང་མདོག་དངུལ་རྩ་སོགས་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་རྒྱག་འདོད་ཡོད་ཅེས་བརྗོད།

ཆིང་ཧྭ་སློབ་ཆེན་ཀྲུང་གོའི་དཔལ་འབྱོར་བསམ་བློ་དང་ལག་ལེན་ཞིབ་འཇུག་ཁང་གི་ཡོན་ཀྲང་ལི་ཏའོ་ཁུའེ་ཡིས་དངུལ་རྩའི་རྒྱལ་ཁབ་སྟོབས་ཆེན་མགྱོགས་མྱུར་འཛུགས་སྐྲུན་བྱེད་པར་རྒྱལ་བུན་ཁྲོམ་ར་རྒྱ་སྟོབས་ཆེ་རུ་གཏོང་བའི་ཐད་གཙོ་གནད་ཐོག་བསམ་གཞིག་བྱེད་ཆོག་ཅེས་བརྗོད། ཁོང་གིས་དབྱེ་ཞིབ་བྱས་པར་གཞིགས་ན། རྒྱལ་བུན་ལ་དངུལ་རྩའི་ཁྲོམ་རའི་ནང་མ་རྩའི་རིན་གོང་གཏན་འཁེལ་གྱི་ནུས་པ་ལྡན་པས་དངུལ་རྩའི་ཁྲོམ་རའི་རྨང་གཞི་གལ་ཆེན་ཞིག་ཡིན་ལ་རྒྱལ་སྤྱིའི་མ་རྩ་བཀོད་སྒྲིག་གི་རྒྱུ་ནོར་གལ་ཆེན་ཞིག་ཀྱང་ཡིན་པ་རེད།

མཐོ་རིམ་སྐད་ཆ་ཤོད་རེས་ཀྱི་སྐབས་སུ། པོ་ཨའོ་ཨེ་ཤེ་ཡའི་གླེང་སྟེགས་ཀྱི་ལས་འཛིན་གཞོན་པ་ཀྲུང་གོ་མི་དམངས་དངུལ་ཁང་གི་དེ་སྔའི་ཧང་ཀྲང་ཀྲའོ་ཞའོ་ཁྲོན་གྱིས་དཔལ་འབྱོར་མ་ལག་ལ་གཡོ་འགུལ་ཐེབས་སྐབས། ཀྲུང་དབྱང་དངུལ་ཁང་གིས་དཔལ་འབྱོར་མ་ལག་གི་གཡོ་འགུལ་དེ་དུས་འཁོར་རང་བཞིན་གྱི་གནད་དོན་ཡིན་མིན་གཏན་འཁེལ་བྱས་རྗེས་གཞི་ནས་ནད་ཐོག་སྨན་བཅོས་བྱེད་དགོས་ཅེས་བརྗོད། ཁོང་གིས་བརྟག་དཔྱད་གནད་འཁེལ་བྱེད་དགོས་ཤིང་། དཔལ་འབྱོར་མ་ལག་གི་གཡོ་འགུལ་ནི་ཕྱི་རོལ་གྱི་འགལ་རྐྱེན་ཡིན་མིན་དང་སྟངས་འཛིན་གྱི་གནད་དོན་ཡིན་མིན། ཡང་ན་མ་ལག་རང་ཉིད་ལ་གནད་དོན་ཡིན་མིན་བཅས་གསལ་པོར་ཤེས་རྗེས་གཞི་ནས་ནད་ཐོག་སྨན་བཅོས་བྱེད་ཐུབ་ཅེས་གསལ་བཤད་བྱས།

པེ་ཅིང་གྲོང་ཨུད་ཀྱི་ཧྲུའུ་ཅི་གཞོན་པ་ཧྲི་ཀྲང་དབྱིན་ཡུང་གིས་མཇུག་འགྲིལ་གསུང་བཤད་སྤེལ་སྐབས། 2023ལོའི་དངུལ་རྩའི་ཁྲོམ་གཞུང་གི་གླེང་སྟེགས་ལོ་ཚོགས་ཀྱིས་ཀྲུང་དབྱང་གི་དངུལ་རྩའི་ལས་དོན་ཚོགས་འདུའི་དགོངས་དོན་ཕྱོགས་ཡོངས་ནས་ལག་ལེན་བསྟར་ཏེ་དངུལ་རྩས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྤུས་ཚད་མཐོ་བའི་ཞབས་འདེགས་ཞུ་བའི་བླང་བྱར་སྟངས་འཛིན་གཏིང་ཟབ་བྱས་པས་གཡུར་ཟའི་གྲུབ་འབྲས་ཐོབ་ཡོད། གླེང་སྟེགས་ཀྱིས་དངུལ་རྩའི་ལས་རིགས་འཕེལ་རྒྱས་ཀྱི་ཆོས་ཉིད་རང་བཞིན་དང་། འཕེལ་ཕྱོགས་རང་བཞིན། མདུན་གྲལ་རང་བཞིན་བཅས་ཀྱི་གནད་དོན་ལ་དམིགས་ནས་ཆེད་ལས་དཔྱད་བསྡུར་བྱས་ཏེ། འཛམ་གླིང་དངུལ་རྩའི་ཁྱབ་ཁོངས་སུ་ལག་གདང་སྦྲེལ་ནས་མཉམ་ལས་དང་འཕེལ་རྒྱས་གཉིས་ཕན་ཡོང་ཆེད་བློ་གྲོས་དང་ཕན་ཡོད་ཀྱི་དཔྱད་གཞི་གལ་ཆེན་མཁོ་འདོན་བྱས་ཡོད། པེ་ཅིང་གྲོང་ཁྱེར་གྱིས་སྐབས་འདིའི་གླེང་སྟེགས་ལོ་ཚོགས་ཀྱི་གྲུབ་འབྲས་ཡག་པོ་སྤྱད་དེ་དངུལ་རྩའི་ལས་རིགས་ཀྱི་ཆུ་ཚད་མཐོ་བའི་སྒོ་དབྱེའི་མཉམ་ལས་ལ་སྐུལ་འདེད་བརྟན་པོ་གཏོང་བ་དང་། རྒྱལ་སའི་ཁྱད་ཆོས་ལྡན་པའི་དེང་རབས་དངུལ་རྩའི་མ་ལག་མགྱོགས་མྱུར་བཙུགས་ཏེ་དངུལ་རྩའི་རྒྱལ་ཁབ་སྟོབས་ཆེན་སྐྲུན་ཆེད་འབུལ་འོས་པའི་ལེགས་སྐྱེས་འབུལ་གྱི་ཡིན་ཞེས་བརྗོད་པ་རེད།

ཤེས་རྟོགས་བྱུང་བར་གཞིགས་ན། སྐབས་འདིའི་གླེང་སྟེགས་སྐབས་དངུལ་རྩའི་སྒྲིག་སྲོལ་འཐུས་སྒོ་ཚང་དུ་གཏོང་བར་དམིགས་པ་དང་། དངུལ་རྩའི་ཞབས་ཞུ་ལེགས་སུ་གཏོང་བ། དངུལ་རྩའི་ཆུ་ཚད་མཐོ་བའི་སྒོ་དབྱེར་སྐུལ་འདེད་གཏོང་བ། དངུལ་རྩའི་ཉེན་ཁ་འགོག་སེལ་སོགས་གླེང་མང་བའི་གནད་དོན་ལ་དམིགས་ནས་སྲིད་ཇུས་ཚད་ལྡན་དང་། གྲོས་འགོའི་སྤྱི་ཆིངས། ལོ་འཁོར་སྙན་ཞུའི་སྟོན་གྲངས། ལས་སྟེགས་ཀྱི་གྱོད་དཔེ། སྒོ་བྱང་བཀལ་ནས་དཔྱད་འདེམས་སོགས་ཀྱི་ཐད་གྲུབ་འབྲས་གལ་ཆེན་ཁག་30ལྷག་ཙམ་ཐོབ་ཡོད་པ་རེད།