ཉིན་ཤས་གོང་། ཧོ་པེ་ཞིང་ཆེན་སློབ་གསོ་ཐིང་གིས་2024ནས་2026བར་གྱི་ཆེད་ལས་ཞིང་པ་གསར་པ་གསོ་སྐྱོང་གི་བྱ་སྤྱོད་འཆར་གཞི་བཟོས་པའི་ནང་དུ། རྒྱལ་ཁབ་དང་ཞིང་ཆེན་གྱི་གྲོང་གསེབ་དར་རྒྱས་གཙོ་གནད་རོགས་སྐྱོར་རྫོང་གི་རྫོང(ཆུས)རིམ་པའི་ལས་རིགས་ལག་རྩལ་སློབ་གསོ་ལྟེ་གནས་20ལ་ལོ་ལྟར་རོགས་སྐྱོར་བྱེད་པ་སྟེ། སློབ་གྲྭ་རེས་ལོ་རེར་ཉུང་མཐར་ཡང་མི་300གསོ་སྐྱོང་གསོ་སྦྱོང་བྱེད་པའི་འཆར་གཞི་ལྟར་ཆེད་ལས་ཞིང་པ་གསར་པ་དང་གྲོང་གསེབ་དར་རྒྱས་གྱི་སྣེ་ཁྲིད་པ་ཁག་གཅིག་གསོ་སྐྱོང་བྱེད་དགོས་པ་ཁ་གསལ་བཏོན་ཡོད་པ་རེད།

གསོ་སྐྱོང་བྱ་སྤྱོད་འཆར་གཞིའི་གཙོ་གནད་ནི་ས་གནས་དཔལ་འབྱོར་འཕེལ་རྒྱས་ལ་ཞབས་འདེགས་ཞུ་བ་དང་ཞིང་པའི་འབབ་འཕར་ཕྱུག་འགྱུར་ལ་མཁོ་གལ་ཆེ་བའི་འབྲིང་རིམ་ལས་རིགས་སློབ་གྲྭའི་ཆེད་ལས་འཛུགས་སྐྱོང་དང་རིམ་པ་སྤོར་བ་དང་། དེའི་རྨང་གཞིའི་ཐོག གསོ་སྦྱོང་རིགས་གཉིས་བྱེད་པ་སྟེ། གཅིག་ནས་ལས་རིགས་སློབ་གསོའི་སློབ་རྒྱུས་སློབ་གསོའི་འགན་ནུས་ཤུགས་ཆེར་བཏང་སྟེ་དམའ་འབྲིང་སློབ་ཐོན་སློབ་མར་ཕྱོགས་ནས་ཉིན་གང་ལམ་ལུགས་ཀྱི་སློབ་རྒྱུས་སློབ་གསོ་སྤེལ་བ་དང་། གཉིས་ནས་ལས་རིགས་སློབ་གྲྭའི་རྒྱུན་མཐུད་སློབ་གསོའི་ཕན་ནུས་ཤུགས་ཆེར་བཏང་སྟེ་གྲོང་གསེབ་ཏུ་ལས་ཀ་བྱེད་མཁན་ལ་ཕྱོགས་ནས་དུས་ཐུང་གསོ་སྦྱོང་བྱེད་ཀྱི་ཡོད་པ་རེད།

ཞིབ་ཕྲ་བཤད་ན། ས་ཁོངས་དཔལ་འབྱོར་འཕེལ་རྒྱས་གཏོང་བའི་དགོས་མཁོ་དང་ཞིང་པའི་བུ་ཕྲུག་ཚོས་སློབ་གསོ་དང་ལེན་བྱེད་པའི་དགོས་མཁོར་དམ་པོར་དམིགས་ནས། འབྲིང་རིམ་ལས་རིགས་སློབ་གྲྭས་ས་གནས་ཀྱི་ཁྱད་ལྡན་ཐོན་ལས་དང་། སྣེ་ཁྲིད་ཁེ་ལས། ཐོན་ལས་དུད་ཆེན་བཅས་ཀྱི་ཐོན་སྐྱེད་འཕེལ་རྒྱས་ལ་ཞབས་འདེགས་ཞུ་བར་མཁོ་གལ་ཆེ་བའི་ལག་རྩལ་རྩལ་ནུས་ཤེས་ལྡན་པ་མང་པོ་བསྡུ་བ་དང་ཐོན་ལས་ལས་བཟོའི་འཇོན་ཐང་ཆེ་རུ་གཏོང་བ། རྫོང་ཁོངས་ཀྱི་ཁྱད་ལྡན་ཐོན་ལས་ཁྱུ་ཚོགས་ཀྱི“སྣེ་ཁྲིད་པའི”ཁེ་ལས་སྐྱེད་སྲིང་ལ་ཞབས་འདེགས་ཞུ་བའི་ཆེད་ལས། ས་གནས་ཀྱི་སྲོལ་རྒྱུན་བཟོ་རྩལ་དང་སྲོལ་རྒྱུན་རིག་གནས་ཐོན་རྫས་རྒྱུན་འཛིན་བྱེད་པའི་ཆེད་ལས། ས་ཁོངས་ཀྱི་ཁྱད་ཆོས་ལྡན་པའི་གྲོང་གསེབ་ཀྱི་ཐོན་ལས་དང་པོ་དང་གཉིས་པ་གསུམ་པ་བཅས་མཉམ་དུ་འཕེལ་རྒྱས་གཏོང་བའི་ཆེད་ལས། གྲོང་གསེབ་ཀྱི་ངལ་ནུས་སྒྱུར་བ་དང་འཚམ་པའི་རྒན་གསོ་གཞོན་སྐྱོང་སོགས་ཀྱི་ཆེད་ལས། གྲོང་གསེབ་ཐོན་ལས་འཕེལ་རྒྱས་དང་ཞིང་པའི་གཉེར་སྐྱོང་ནུས་པ་ཆེ་རུ་གཏོང་བར་རམ་འདེགས་ཐུབ་པའི་ཆེད་ལས་གཞན་དག་བཅས་ཚུད་པའི་འབྲིང་རིམ་ལས་རིགས་ཆེད་ལས་འཛུགས་སྐྱོང་དང་རིམ་སྤོར་གསོ་སྐྱོང་ལ་རྒྱབ་སྐྱོར་བྱེད་ཀྱི་ཡོད་པ་རེད།

ལག་རྩལ་རྩལ་ནུས་གསོ་སྦྱོང་སྤྱི་འདོམས་རྣམ་གྲངས་ནི་ལོ་དེའི་དམའ་འབྲིང་སློབ་ཐོན་སློབ་མ་དང་གྲོང་གསེབ་ཀྱི་ལོ་ཚད་ལོན་པའི་ངལ་ནུས་ལ་གཙོ་བོར་ཕྱོགས་ཡོད་པ་དང་། དེ་དག་ལས་གྲོང་གསེབ་ཀྱི་ལོ་ཚད་ལོན་པའི་ངལ་ནུས་ཀྱི་ཐོན་སྐྱེད་དང་གཉེར་སྐྱོང་གི་གཞི་ཁྱོན་རྨང་གཞི་ངེས་ཅན་ལྡན་པའི་འདེབས་གསོ་དུད་ཆེན་དང་། ཁྱིམ་ཚང་ཞིང་ར་གཉེར་སྐྱོང་བ། ཞིང་པའི་མཉམ་ལས་ཁང་གི་རྐང་འཛིན་པ། ཕ་ཡུལ་དུ་ལོག་ནས་ལས་གཏོད་བྱེད་མཁན་སློབ་གྲྭ་ཆེ་མོ་བ། འབྲིང་རིམ་དང་མཐོ་རིམ་ལས་རིགས་སློབ་གྲྭའི་སློབ་ཐོན་སློབ་མ། ཕ་ཡུལ་དུ་ལོག་པའི་ཞིང་པ་ལས་མི། དམག་ཞབས་ཐིམ་པའི་དམག་མི་སོགས་སྤྱི་ཚོགས་ཀྱི་ཚོགས་སྤྱི་ཚུད་ཡོད་པ་རེད།