བརྗོད་དོན་གཙོ་བོའི་སློབ་གསོའི་ལས་དོན་ཏན་ཏིག་དང་ཕན་འབྲས་ཐོན་རྒྱུར་སྔར་བས་སྐུལ་འདེད་གཏོང་ཆེད། ལྷོ་ཁ་གྲོང་ཁྱེར་ལྷོ་བྲག་རྫོང་གིས“གཞི་གྲངས་གསལ་པོ་དང་། རྣམ་པ་ཡག་པོ། ཕན་འབྲས་དངོས་ཐོན་པ”བཅས་གཞི་རྩའི་རྩ་དོན་མཐའ་འཁྱོངས་ཀྱིས་ཕྱོགས་མི་ཏང་ཡོན་དང་ཕན་ཚུན་འབྲེལ་གཏུག་དང་རྒྱུན་གཏན་གྱི་དོ་དམ་ལ་ཤུགས་སྣོན་བརྒྱབ་ནས་ཕྱོགས་མི་ཏང་ཡོན་གྱི་འབྲེལ་གཏུག་བྱེད་དཀའ་བ་དང་། དོ་དམ་བྱེད་དཀའ་བ། སློབ་སྦྱོང་བྱེད་དཀའ་བ་བཅས་ཀྱི་གནད་དོན་ཐག་གཅོད་ཧུར་ཐག་བྱས་ཏེ། ཕྱོགས་མི་ཏང་ཡོན་གྱི་བརྗོད་དོན་གཙོ་བོའི་སློབ་གསོ་མངོན་གསལ་དོད་པ་དང་། རྗེས་ལུས་མི་ཐེབས་པ། ཚང་མར་ཁྱབ་པ་བཅས་བྱས་ཡོད།

ཕྱོགས་མི་ཏང་ཡོན་ཁྱབ་རྒྱ་ཆེ་བ་དང་སྐོར་སྐྱོད་རང་བཞིན་ཆེ་བ་སོགས་ཀྱི་ཁྱད་ཆོས་ལ་དམིགས་ཏེ། ལྷོ་བྲག་རྫོང་རིམ་ཁག་ཏང་རྩ་འཛུགས་ཀྱིས་གྲོང་ཚོ་དང་དུད་ཚང་དུ་སྐྱོད་པ་དང་། གཅིག་སྡུད་གྲལ་བཤེར་བྱེད་པ། ཆ་འཕྲིན་གྲངས་གཞིའི་མཛོད་ཞིབ་བཤེར། སྐད་འཕྲིན་ནས་འབྲེལ་གཏུག་བྱེད་པ། ཁ་པར་ནས་བརྟག་དཔྱད་བྱེད་པ་སོགས་ཀྱི་བྱེད་ཐབས་བརྒྱུད། རྫོང་ཡོངས་ཀྱི་ཕྱིར་སྐྱོད་ཏང་ཡོན་97དང་ཕྱི་ནས་ཡོང་བའི་ཏང་ཡོན་19ཡི་གཞི་རྩའི་གནས་ཚུལ་དང་། དེ་བཞིན་བརྗོད་དོན་གཙོ་བོའི་སློབ་གསོར་ཞུགས་ཚུལ་ཁོང་དུ་ཆུད་པ་བྱས་ནས་བརྗོད་དོན་གཙོ་བོའི་སློབ་གསོའི་འབྲེལ་ཡོད་བླང་བྱ་བརྒྱུད་བསྒྲགས་གནད་སྨིན་བྱས་པ་རེད། ཕྱིར་སྐྱོད་ཏང་ཡོན་50ཐག་ཉེ་སར་བརྗོད་དོན་གཙོ་བོའི་སློབ་གསོར་ཞུགས་རྒྱུར་འབྲེལ་གཏུག་མཐུན་སྦྱོར་ཧུར་ཐག་བྱས་ནས་རྫོང་གྲོང་གི“ཁེ་ལས་ཆུང་གྲས་དང་། སྒེར་གཉེར་བཟོ་ཚོང་དུད་ཚང་། ཆེད་ལས་ཁྲོམ་ར་བཅས་ཀྱི”དཔལ་འབྱོར་རྩ་འཛུགས་ཀྱི་ཏང་ཡོན་17ལས་གྲུབ་པའི་ཕྱི་ནས་ཡོང་བའི་ཏང་ཡོན་གྱི་བརྗོད་དོན་གཙོ་བོའི་སློབ་གསོའི་གནས་སྐབས་ཏང་ཀྲི་པུའུ་བཙུགས་པ་དང་། “ཁེ་ལས་ཆུང་གྲས་དང་། སྒེར་གཉེར་བཟོ་ཚོང་དུད་ཚང་། ཆེད་ལས་ཁྲོམ་ར་བཅས་ཀྱི”ཏང་ཡོན་གྱི་བྱེད་སྒོ་སྤེལ་ཡུལ་སྤྱད་ནས་ཕྱོགས་མི་ཏང་ཡོན་གཅིག་སྡུད་སློབ་སྦྱོང་ཐེངས་3ལ་ཞུགས་རྒྱུའི་སྒྲིག་འཛུགས་བྱས་ཏེ་དུས་བཀག་ལྟར་སྤེལ་རེས་མཉམ་སྤྱོད་བྱེད་སྒོ་སྤེལ་ཏེ“ཡུལ་ནས་བྲལ་ཡང་ཏང་དང་མི་འབྲལ་བ་དང་། སྐོར་སྐྱོད་བྱས་ཀྱང་གར་སོང་ཆ་མེད་དུ་མི་འགྱུར་བ། སློབ་སྦྱོང་ལ་འཐུས་ཤོར་མི་འགྲོ་བ”བཅས་གང་ཐུབ་བྱས་པ་རེད།