ཤིན་ཧྭ་གསར་འགྱུར་ཁང་ཧྲང་ཧའེ་ནས་ཟླ་11ཚེས་5ཉིན་གློག་འཕྲིན་འབྱོར་གསལ། ཟླ་11ཚེས་5ཉིན་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་ཧྲང་ཧའེ་རུ་ཀྲུང་གོ་རྒྱལ་སྤྱིའི་ནང་འདྲེན་དངོས་མང་སྟོན་ཚོགས་སྐབས་དྲུག་པ་དང་ཧུང་ཆའོ་རྒྱལ་སྤྱིའི་དཔལ་འབྱོར་གླེང་སྟེགས་ཀྱི་འགོ་ཚུགས་མཛད་སྒོར་ཞུགས་ནས་བཞེད་དོན་གཙོ་བོའི་གཏམ་བཤད་གནང་བ་རེད།

ལི་ཆང་གིས་གསུངས་དོན། ཀྲུའུ་ཞི་ཞི་ཅིན་ཕིང་གིས་ཆེད་མངགས་སྐབས་འདིའི་དངོས་མང་སྟོན་ཚོགས་ལ་འཕྲིན་ཡིག་སྤྲིངས་ནས་ཀྲུང་གོས་སྤུས་ཚད་མཐོ་བའི་སྒོ་དབྱེར་སྐུལ་འདེད་གཏོང་བ་དང་སྒོ་དབྱེ་རྣམ་པའི་འཛམ་གླིང་དཔལ་འབྱོར་ལ་སྐུལ་འདེད་གཏོང་བའི་ཆོད་སེམས་བརྟན་པོ་ཡང་བསྐྱར་བསྒྲགས་ཡོད། འཛམ་གླིང་གི་ནང་འདྲེན་བརྗོད་དོན་གཙོ་བོར་བྱས་པའི་རྒྱལ་ཁབ་རིམ་པའི་སྟོན་ཚོགས་དང་པོའི་ཆ་ནས་ནང་འདྲེན་དངོས་མང་སྟོན་ཚོགས་གཉེར་འགོ་ཚུགས་པ་ནས་བཟུང་། ཀྲུང་གོ་དང་འཛམ་གླིང་འབྲེལ་མཐུད་ཧུར་ཐག་བྱས་ཏེ་རྒྱལ་སྤྱིའི་ཉོ་སྒྲུབ་དང་། མ་དངུལ་གཏོང་བར་སྐུལ་འདེད། མི་ཆོས་རིག་གནས་སྤེལ་རེས། སྒོ་དབྱེ་མཉམ་ལས་བཅས་ལས་སྟེགས་ཆེན་པོ་བཞིའི་ནུས་པ་ཟམ་མི་ཆད་པར་ཆེ་རུ་ཕྱིན་པ་དང་གོ་ལ་ཧྲིལ་པོའི་མཉམ་སྤྱོད་ཀྱི་རྒྱལ་སྤྱིའི་སྤྱི་པའི་ཐོན་རྫས་ཀྱི་ངོ་བོ་སྔར་བས་མངོན་གྱི་ཡོད།

ལི་ཆང་གིས་ཚང་མར“ནང་འདྲེན་དངོས་མང་སྟོན་ཚོགས་ཀྱི་གཏམ་རྒྱུད”ཞིབ་ཕྲ་ཁག་གཅིག་མཉམ་སྤྱོད་གནང་རྗེས། ཁོང་གིས་དཔལ་འབྱོར་གོ་ལ་ཅན་ནི་ལོ་རྒྱུས་ཀྱི་འཕེལ་ཕྱོགས་ཆེན་པོ་དང་མི་དམངས་ཀྱི་བློ་ཁ་གཏད་ས་ཡིན་པ་དང་། སྒོ་དབྱེ་མཉམ་ལས་དང་གཉིས་ཁེ་གཉིས་ཕན་ནི་བློ་རིག་ལྡན་ཤོས་དང་རང་ཤུགས་ཀྱི་གདམ་ག་ཞིག་རེད། ཀྲུང་གོས་ལྷག་བསམ་ཟོལ་མེད་ངང་རྒྱལ་ཁབ་ཁག་དང་མཉམ་དུ་སྒོ་དབྱེའི་གར་སྟེགས་ཆེན་པོར་ཁ་སྤྲོད་དུ་སྐྱོད་པ་དང་གྲུབ་འབྲས་གཏོད་རེས་བྱས་ནས། དཔལ་འབྱོར་གོ་ལ་ཅན་དེ་བས་སྒོ་དབྱེ་དང་། ཁོང་ཡངས། ཀུན་ཕན། དོ་སྙོམས། གཉིས་ཕན་བཅས་ཀྱི་ཕྱོགས་སུ་འཕེལ་རྒྱས་འགྲོ་བར་སྐུལ་འདེད་བཏང་སྟེ། འཛམ་གླིང་གི་དཔལ་འབྱོར་སླར་གསོ་དང་གོ་ལ་ཧྲིལ་པོའི་འཕེལ་རྒྱས་དང་དར་རྒྱས་ལ་ལེགས་སྐྱེས་དེ་བས་ཆེ་བ་འབུལ་དགོས་ཞེས་གསུངས་པ་རེད།

ལི་ཆང་གིས་ནན་བཤད་གནང་དོན། འདི་ལོ་ནི་ཀྲུང་གོར་སྒྱུར་བཅོས་སྒོ་དབྱེ་བྱས་ནས་ལོ་45འཁོར་བའི་ལོ་རེད། ཀྲུང་གོས“ཁྲོམ་རའི་གོ་སྐབས་དེ་བས་ཆེ་བའི”སྒོ་དབྱེར་མུ་མཐུད་སྐུལ་འདེད་བཏང་སྟེ་ནང་འདྲེན་བྱེད་རྒྱ་ཆེ་རུ་ཧུར་ཐག་གཏོང་བ་དང་རྒྱལ་ཡོངས་ཀྱི་པར་གཞི་དང་རང་མོས་ཚོང་དོན་ཚོད་ལྟའི་ཁུལ་གྱི་པར་གཞིའི་ས་མཚམས་བརྒལ་བའི་ཞབས་ཞུ་ཚོང་དོན་གྱི་བཀག་རྒྱའི་གསལ་ཐོ་ལག་བསྟར་བྱས་ནས། འཛམ་གླིང་ལ་ཁྲོམ་རའི་ཁེ་སྤོགས་ཧ་ཅང་ཆེན་པོ་མུ་མཐུད་གཏོད་ཀྱི་ཡིན། “སྒྲིག་སྲོལ་འབྲེལ་མཐུད་དེ་བས་ལེགས་པའི”སྒོ་དབྱེར་རྒྱུན་མཐུད་སྐུལ་འདེད་བཏང་ནས། རང་མོས་ཚོང་དོན་ཚོད་ལྟ་ཁུལ་དང་ཧའེ་ནན་རང་མོས་ཚོང་དོན་གྲུ་ཁ་སོགས་རིམ་པ་དེ་བས་མཐོ་བའི་སྒོ་དབྱེའི་ལས་སྟེགས་དེ་བས་མང་བ་གཏོད་པ་དང་། 《ཕྱོགས་ཡོངས་དང་ཡར་ཐོན་གྱི་ཞི་བདེ་རྒྱ་མཚོ་ཆེན་པོ་སྒྲོལ་བའི་རོགས་ཟླའི་འབྲེལ་བའི་གྲོས་ཆོད》དང《གྲངས་འཛིན་དཔལ་འབྱོར་རོགས་ཟླའི་འབྲེལ་བའི་གྲོས་ཆོད》ལ་ཞུགས་པར་སྐུལ་འདེད་ཧུར་ཐག་གཏོང་བ། ཁྲོམ་རར་ཞུགས་འཐུས་སྔར་བས་ལྷུག་ཏུ་གཏོང་བ། ཕྱི་རྒྱལ་ཚོང་པའི་མ་དངུལ་གྱི་ཁེ་དབང་ཁྲིམས་ལྟར་སྲུང་སྐྱོང་བཅས་བྱེད་དགོས། “གསར་གཏོད་འགུལ་ནུས་དེ་བས་ཆེ་བའི”སྒོ་དབྱེར་རྒྱུན་མཐུད་སྐུལ་འདེད་བཏང་ནས། ཕྱོགས་ཁག་དང་གསར་གཏོད་མཉམ་ལས་དང་གྲུབ་འབྲས་མཉམ་སྤྱོད་ལ་ཤུགས་སྣོན་དང་། གསར་གཏོད་ཀྱི་རྒྱུ་རྐྱེན་གཙོ་བོའི་འཁོར་རྒྱུག་ལ་ཚོད་འཛིན་བཟོ་བའི་བཀག་རྒྱ་ཧུར་ཐག་སེལ་བ། གྲངས་འཛིན་དཔལ་འབྱོར་ཁྱབ་ཁོངས་ཀྱི་སྒྱུར་བཅོས་ཟབ་ཏུ་གཏོང་བ། གྲངས་གཞི་ཁྲིམས་ལྟར་གོ་རིམ་ལྡན་པ་དང་རང་མོས་འཁོར་སྐྱོད་ལ་སྐུལ་འདེད་གཏོང་བ་བཅས་བྱེད་དགོས། “བསྟུན་མཁས་མཉམ་སྤྱོད་དེ་བས་ལེགས་པའི”སྒོ་དབྱེར་མུ་མཐུད་སྐུལ་འདེད་བཏང་ནས། ཕྱོགས་མང་ཚོང་དོན་སྒྲིག་གཞིའི་དབང་གྲགས་རང་བཞིན་དང་ནུས་ལྡན་རང་བཞིན་ལ་མཐའ་གཅིག་ཏུ་སྲུང་སྐྱོང་དང་། འཛམ་གླིང་ཚོང་དོན་རྩ་འཛུགས་ཀྱི་སྒྱུར་བཅོས་ལ་ཕྱོགས་ཡོངས་དང་གཏིང་ཟབ་ངང་ཞུགས་པ། གོ་ལ་ཧྲིལ་པོའི་ཐོན་ལས་འཁོར་འབྲེལ་གྱི་མཁོ་སྤྲོད་འཁོར་འབྲེལ་བརྟན་པོ་ཡོང་བར་བློ་བརྟན་འགྱུར་མེད་ངང་སྐུལ་འདེད་གཏོང་བ། “རྒྱུད་གཅིག་ལམ་གཅིག”གི་མཉམ་ལས་རོགས་ཟླའི་འབྲེལ་བ་གཏིང་ཟབ་ཏུ་གཏོང་བ། ཕྱོགས་རྐྱང་རིང་ལུགས་དང་སྲུང་སྐྱོང་རིང་ལུགས་ལ་མཐའ་གཅིག་ཏུ་ངོ་རྒོལ་བཅས་བྱེད་དགོས། དེ་དང་དུས་མཚུངས་སུ་ཕྱི་ཕྱོགས་སུ་སྒོ་དབྱེ་བྱེད་རིང་ཧྲང་ཧའེ་ཡི་ནུས་པ་གལ་ཆེན་འདོན་སྤེལ་སྔར་ལས་ལྷག་པར་བྱས་ཏེ། ཧྲང་ཧའེ་རང་མོས་ཚོང་དོན་ཚོད་ལྟ་ཁུལ་གྱི་ཆུ་ཚད་མཐོ་བའི་ལམ་ལུགས་ཅན་གྱི་སྒོ་དབྱེར་སྐུལ་འདེད་གཏོང་བ་མ་ཟད། ཧྲང་ཧའེ་རུ“དར་གོས་ལམ་བུའི་དྲ་ཐོག་ཚོང་དོན”གྱི་མཉམ་ལས་སྔོན་སྤེལ་ཁུལ་ཡང་འཛུགས་སྐྲུན་བྱེད་རྒྱུ་རེད།

ཨོ་སི་ཁྲུ་ལི་ཡའི་ཙུང་ལི་ཨར་པ་ཉི་སི་དང་། ཁུ་པའི་ཙུང་ལི་མ་ལེ་ལུའོ། ཧ་སག་སི་ཐན་གྱི་ཙུང་ལི་སི་མའེ་ལུའོ་ཧྥུའུ། སར་པི་ཡའི་ཙུང་ལི་པུར་ན་པི་ཆི། དབྱི་རན་གྱི་ཙུང་ཐུང་གཞོན་པ་དང་པོ་མུའུ་ཧོ་པེར། ལྷོ་ཨ་ཧྥེ་རི་ཁའི་ཙུང་ཐུང་གཞོན་པ་མཱ་ཧྲ་ཏི་ལའེ། ཝེ་ཐེ་ནམ་གྱི་ཙུང་ལི་གཞོན་པ་ཁྲེན་ཧུང་ཧོ། ཨ་ཟེར་བྷེ་ཇན་གྱི་ཙུང་ལི་གཞོན་པ་མུའུ་སི་ཐ་ཧྥ་ཡེ་ཧྥུའུ། ཧྥི་ཅིའི་ཙུང་ལི་གཞོན་པ་དང་ཚོང་དོན་པུའུ་ཀྲང་གཅིག་ལྕོགས་ཁཱ་སྨི་ཁཱ་སྨི་ཅ། ནི་ཁ་ར་ཀྭ་ཡི་ཙུང་ཐུང་དང་མ་འཇོག་དང་། ཚོང་དོན། རྒྱལ་སྤྱིའི་མཉམ་ལས་བཅས་ཀྱི་བློ་འདྲི་བ་གཅིག་ལྕོགས་ཨའོ་ཨེར་ཐེ་ཅ། ཐེ་ལན་གྱི་ཙུང་ལི་གཞོན་པ་དང་ཚོང་དོན་པུའུ་ཀྲང་གཅིག་ལྕོགས་ཕུའུ་ཏན། མཉམ་འབྲེལ་རྒྱལ་ཚོགས་ཚོང་དོན་དང་འཕེལ་རྒྱས་ཚོགས་འདུའི་དྲུང་ཆེ་ཀེ་ལིན་སི་པོ་བཅས་དང་དེ་བཞིན་འཛམ་གླིང་གི་རྒྱལ་ཁབ་དང་། ས་ཁུལ། རྒྱལ་སྤྱིའི་རྩ་འཛུགས་བཅས་154ནས་ཡོང་བའི་སྲིད་ཚོང་རིག་པ་སོགས་ལས་རིགས་ཁག་གི་འཐུས་མི་1500ལྷག་ཙམ་འགོ་ཚུགས་མཛད་སྒོར་ཞུགས་པ་རེད།