“ལོ་20ལྷག་ཙམ་རིང་ས་སྟོང་དུ་ལུས་པའི་ཐང་རྒོད་ད་ཆ་ང་ཚོའི་གྲོང་ཚོའི་གུང་ལ་ཕུག་འདེབས་འཛུགས་རྟེན་གཞིར་གྱུར་ཡོང་སྙམ་པ་སུ་ལ་ཡོང་སྲིད”ནང་སོག་ཧུའུ་ཧོ་ཧའོ་ཐེ་གྲོང་ཁྱེར་སའེ་ཧན་ཆུས་ཧོང་ཧོ་ཧྲའོ་གྲོང་རྡལ་ཧོའུ་ཡའོ་ཙེ་གྲོང་ཚོའི་དེ་སྔའི་ས་སྟོང་ད་ཆ་མུའུ་1600ལྷག་ཙམ་གྱི་གུང་ལ་ཕུག་ཐོན་སྐྱེད་རྟེན་གཞིར་གྱུར་ཡོད། ཧོའུ་ཡའོ་ཙེ་གྲོང་ཚོའི་ཏང་ཀྲི་པུའི་ཧྲུའུ་ཅི་ཀྲའོ་ལི་ཅུན་ལ་དེའི་ཐད་མྱོང་ཚོར་ཟབ་མོ་བྱུང་ཡོད་པ་རེད།

ཀྲའོ་ལི་ཅུན་གྱིས་ཁ་པར་གྱི་པར་མཛོད་ནས་གསར་འགོད་པར་ལོ་གསུམ་གོང་གི་རི་ལྡེབས་དེའི་རྣམ་པ་བསྟན་པ་དང་པར་ནང་གི་ས་སྟོང་དེར་རྩྭ་ངན་རིང་པོ་སྐྱེས་པ་དང་སྡོང་ཐུང་ལ་ལ་མིའི་གཟུགས་པོའི་ཕྱེད་ཀ་ལྷག་ཙམ་ཟིན་འདུག “ང་ཚོའི་གྲོང་ཚོ་རི་ལྡེབས་སུ་ཆགས་ཡོད་པས་གསར་སྦོལ་དང་བསྐྱར་སྦོལ་བྱེད་ཐུབ་པ་ཕལ་ཆེ་བ་རི་ལྡེབས་ཀྱི་བྱེ་ས་ཡིན་པ་མ་ཟད། ས་ཆ་ཉུང་བ་དང་རྩྭ་ངན་མང་བའི་ཁར་ང་ཚོའི་གྲོང་ཚོ་གྲོང་ཁུལ་དང་བར་ཐག་རིང་ཞིང་། གཞོན་ནུ་དང་དར་མ་ཚང་མ་གྲོང་ཁྱེར་དུ་གླ་པར་སྐྱོད་ཀྱི་ཡོད་པས་གཞིས་ལུས་རྒན་རྒོན་ཚོས་རྨོ་འདེབས་སླར་གསོ་བྱེད་པ་ནི་དོན་དངོས་དང་གཏན་ནས་མི་མཐུན་སྟབས་རི་ལྡེབས་དེ་དག་ཐོག་མཐའ་བར་གསུམ་དུ་བེད་མེད་དུ་འཇོག་དགོས་བྱུང་ཡོད”ཅེས་ཀྲའོ་ལི་ཅུན་གྱིས་ཕྱིར་དྲན་བྱེད་བཞིན་བཤད།

2021ལོར་ཀྲའོ་ལི་ཅུན་སློབ་སྦྱོང་བྱེད་པར་བསྐྱོད་རྗེས་བྱེ་སར་འདེབས་པར་འཚམ་པའི་གུང་ལ་ཕུག་གི་རིགས་ཡོད་པ་ཤེས་པའི་ཁར་ས་གནས་དེ་གར་ཉིན་མཚན་གྱི་དྲོད་ཚད་ཧེ་བག་ཆེ་བའི་ལེགས་ཆ་ལྡན་པས་ལ་ཕུག་གི་མངར་ཆ་དེ་བས་མང་བ་དང་། ཚོན་མདོག་ཡག་པ། བཟོ་ལྟ་ཡག་པ་བཅས་ལས་ཁྲོམ་རའི་དགོས་མཁོ་དང་ཧ་ཅང་འཚམ་པོ་ཡོད། “སྐབས་དེ་དུས་ས་སྟོང་དེར་གུང་ལ་ཕུག་འདེབས་ཐུབ་པའི་ཐད་ཡིད་ཆེས་བྱེད་མཁན་དེ་ཙམ་མང་པོ་མེད། དེར་བརྟེན་ང་ཚོའི་གྲོང་ཚོའི‘ཨུ་ལྷན་གཉིས’ཀྱི་ལས་བྱེད་པས་གྲོས་བསྡུར་བྱས་ཏེ་ཚོད་ལྟ་བྱས་ནས་བཏབ་པར་གྲུབ་འབྲས་ཐོབ་པས་གྲོང་མི་ཚོས་གཞི་ནས་མཉམ་དུ་གུང་ལ་ཕུག་འདེབས་པའི་ལས་ལ་ཞུགས་ཡོད”ཅེས་ཀྲའོ་ལི་ཅུན་གྱིས་བཤད།

“གྲོང་ཚོའི་ཏང་ཀྲི་པུས་འགྲོ་ལུགས་གཉེར་ཏེ་མཉམ་ལས་ཁང་བཙུགས་པ་དང་། གྲོང་མི་ཚོའི་སྣེ་ཁྲིད་དེ་གཞི་ཁྱོན་ལྡན་པའི་གུང་ལ་ཕུག་བཏབ་པ་དང་ཆབས་ཅིག་ད་དུང་ཞིང་འབྲོག་སྡེ་ཚན་ནས་ཆེད་སྤྱོད་མ་དངུལ་བརྩོན་ལེན་བྱས་ཁར། གུང་ལ་ཕུག་ཐོན་སྐྱེད་ལས་སྣོན་དང་ལབ་མཛོད་རྟེན་གཞི་བསྐྲུན་ནས་སྐྱེ་ལྡན་ཚོང་རྟགས་ཁས་ལེན་རེ་འདུན་ཞུས་པས་ཐོན་མཐོ་ཕན་ཆེའི་ཟུར་སྣོན་རིན་ཐང་མངོན་འགྱུར་བྱུང་སྟེ་ཚང་མར་གུང་ལ་ཕུག་ཐོན་ལས་འཕེལ་རྒྱས་ནས་ཕན་པ་དངོས་ཐོབ་ཡོད”ཅེས་གྲོང་ཚོའི་འདེབས་འཛུགས་མཁས་ཅན་ལི་གཡོད་ཀྲེས་གྲོང་ཚོའི་གུང་ལ་ཕུག་ཐོན་ལས་ཀྱི་འབྱུང་འགྱུར་འཕེལ་རྒྱས་སྐོར་གླེང་སྐབས་དགའ་ཚོར་ཆེན་པོས་བཤད།

ད་ཆ་ལོ་3ཙམ་རིང་འབད་བརྩོན་ལྷོད་མེད་བྱས་པ་བརྒྱུད། གུང་ལ་ཕུག་གི་འདེབས་འཛུགས་རྟེན་གཞི་མུའུ་1600བར་འཕེལ་རྒྱས་ཕྱིན་པ་དང་། གྲོང་མིས་ནང་ཤུགས་བྱས་པའི་ས་ཞིང་གི་ཡོང་འབབ་མུའུ་རེར་སྒོར་500ཟིན་པ། གྲོང་ཚོའི་མཉམ་སྡེབ་དཔལ་འབྱོར་གྱི་ཡོང་འབབ་ལོ་གསུམ་གོང་གི་སྒོར་ཁྲི་8ནས་ད་ཆའི་སྒོར་ཁྲི་480བར་འཕར་ཡོད་པ་རེད།

སའེ་ཧན་ཆུས་ཨུད་ཀྱི་རྒྱུན་ཨུ་དང་རྩ་འཛུགས་པུའི་པུའུ་ཀྲང་ཧྲེ་ལེས“ཧོའུ་ཡའོ་ཙེ་གྲོང་ཚོ་ནི་སའེ་ཧན་ཆུས་ཏང་ཀྲི་པུས་གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་ལ་སྣེ་ཁྲིད་བྱེད་པའི་མཚོན་ཚུལ་ཞིག་ཡིན་ལ་གྲོང་ཚོ་ཁག་གིས་ཡུལ་བབ་དང་བསྟུན་ནས་ཐོན་ལས་འཕེལ་རྒྱས་གཏོང་བར་བསམ་ཕྱོགས་བཏོན་ཡོད། གོམ་སྟབས་རྗེས་མར་ང་ཚོས་གྲོང་ཚོའི་ཏང་ཀྲི་པུའི་སྐར་རིམ་ཅན་གྱི་འཛུགས་སྐྲུན་བྱ་སྤྱོད་ལ་བརྟེན་ནས་གྲོང་ཚོའི་ཏང་རྩ་འཛུགས་ཀྱིས་ཐོན་ལས་འཕེལ་རྒྱས་ལ་སྣེ་ཁྲིད་བྱེད་པའི་ནུས་པ་མུ་མཐུད་ཆེ་རུ་བཏང་སྟེ་གྲོང་གསེབ་ཀྱི་ཞན་ཆ་དེ་བས་མང་བ་ལེགས་ཆར་བསྒྱུར་ནས་ཐོན་ལས་འཕེལ་རྒྱས་ལ་ཚད་བརྒལ་དེ་བས་ཆེ་བ་ཡོང་བར་བྱེད་ཀྱི་ཡིན”ཞེས་བཤད་པ་རེད།