ཤིན་ཧྭ་གསར་འགྱུར་ཁང་པེ་ཅིང་ནས་ཟླ་11ཚེས་3ཉིན་གློག་འཕྲིན་འབྱོར་གསལ། ཉེ་ཆར། རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱིས་མཚམས་སྦྱོར་རང་བཞིན་གྱི་འཕྲོད་བསྟེན་ལས་རིགས་ཀྱི་ཚད་གཞི་སྟེ《བུ་བཅོལ་སྒྲིག་གཞིའི་སྤུས་ཚད་དཔྱད་དཔོག་གི་ཚད་གཞི》ཡོངས་བསྒྲགས་བྱས་ཏེ། བུ་བཅོལ་སྒྲིག་གཞིའི་བུ་བཅོལ་གཉེར་བའི་ཆ་རྐྱེན་དང་། བུ་བཅོལ་དཔུང་ཁག གསོ་སྐྱོང་ལྟ་རྟོག འཕྲོད་བསྟེན་བདེ་སྲུང་། གསོ་སྐྱོང་རོགས་སྐྱོར། བདེ་འཇགས་འགན་ལེན། སྒྲིག་གཞི་དོ་དམ་སོགས་ཀྱི་དཔྱད་དཔོག་ནང་དོན་གཏན་འཁེལ་བྱས་པ་རེད།

ཚད་གཞིའི་ནང་། བུ་བཅོལ་སྒྲིག་གཞི་ནི་ཚན་པའམ(བྱ་གཞག་ཚན་པ་དང་། སྤྱི་ཚོགས་རྩ་འཛུགས། ཁེ་ལས་སོགས)ཡང་ན་མི་སྒེར་གྱིས་གཉེར་བ་ཞིག་ཡིན་ཞིང་། ཆེད་ལས་མི་སྣས་ལོ་3མན་གྱི་དམར་འབྱར་དང་བྱིས་པ་ཉིན་གང་བཅོལ་བ་དང་། ཉིན་ཕྱེད་བཅོལ་བ། ཆུ་ཚོད་རྩིས་བརྒྱབ་ནས་བཅོལ་བ། གནས་སྐབས་བཅོལ་བ་སོགས་ཀྱི་ལྟ་སྐྱོང་ཞབས་ཞུ་བྱེད་མཁན་གྱི་སྒྲིག་གཞི་ཞིག་ཡིན་པར་གཏན་འཁེལ་ཁ་གསལ་བྱས་ཡོད།

བུ་བཅོལ་གཉེར་བའི་ཆ་རྐྱེན་ལ་དམིགས་ཏེ། ཚད་གཞི་དེ་བུ་བཅོལ་སྒྲིག་གཞིའི་ཐོབ་ཐང་དང་། ཁོར་ཡུག་བར་མཐོངས། སྒྲིག་ཆས་སྒྲིག་བཀོད། རྩེད་ཆས་རྒྱུ་ཆ་སོགས་ཐད་ནས་གཏན་འཁེལ་བྱས་ཡོད། དེའི་ནང་བུ་བཅོལ་སྒྲིག་གཞིར་བུ་བཅོལ་ཞབས་ཞུའི་ལས་གཉེར་ལག་ཁྱེར་ཡོད་དགོས་པ་དང་ལས་གཉེར་ཁྱབ་ཁོངས་སུ“བུ་བཅོལ་ཞབས་ཞུ”འམ་ཡང་ན“ལོ་གསུམ་མན་གྱི་དམར་འབྱར་དང་བྱིས་པ་ལྟ་སྐྱོང་ཞབས་ཞུ”ཞེས་ཁ་གསལ་པོར་འགོད་དགོས་པ་དང་། དམར་འབྱར་དང་བྱིས་པའི་འཚོ་བ་དང་རོལ་རྩེད་ཀྱི་དགོས་མཁོ་སྐོང་བའི་འཚོ་བའི་ཐད་སྤྱོད་པའི་ཁང་པ་དང་འོས་འཚམ་གྱི་གཞོགས་འདེགས་ཁང་པ་བཀོད་སྒྲིག་བྱེད་དགོས་པ། དམར་འབྱར་དང་བྱིས་པའི་འཚོ་བའི་ཐད་སྤྱོད་པའི་ཁང་པ་ཐོག་སོ་3པ་དང་དེ་མན་དུ་བཀོད་སྒྲིག་བྱེད་དགོས་པ་དང་ས་འོག་ཁང་པའམ་ཡང་ན་ཕྱེད་ས་འོག་ཁང་པར་བཀོད་སྒྲིག་བྱེད་མི་རུང་བ། དམར་འབྱར་དང་བྱིས་པའི་ཁང་པ་དཀར་ཆ་དོད་ཅིང་ཉི་འོད་ཡག་པོ་འཕྲོ་ཐུབ་པ་ཞིག་དགོས་པ་དང་འཚོ་བའི་ཐད་སྤྱོད་པའི་ཁང་པའི་སྒེའུ་ཁུང་གི་རྒྱ་ཁྱོན་དེ་ཁང་པ་དེའི་རྒྱ་ཁྱོན་གྱི་20%ལས་ཆུང་མི་རུང་བ། འཚོ་བའི་ཐད་སྤྱོད་པའི་ཁང་པ་ཁ་ནུབ་ལ་ཕྱོགས་མི་འོས་པ་དང་གལ་སྲིད་ཁ་ནུབ་ལ་མི་ཕྱོགས་ཀ་མེད་ཡིན་ཚེ་ཉི་སྒྲིབ་བྱེད་ཐབས་ཡག་པོ་སྤྱོད་དགོས་པ་བཅས་བསྟན་ཡོད།