འདི་ནི་ཟླ་11ཚེས་3ཉིན་གྱི་ཕྱི་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་འཇར་མན་གྱི་ཙུང་ལི་ཧྲོར་ཚེ་དང་བརྙན་ལམ་ནས་ཞལ་འཛོམས་གནང་བ།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་11ཚེས་3ཉིན་གློག་འཕྲིན་འབྱོར་པ་གཞིར་བཟུང་། ཟླ་11ཚེས་3ཉིན་གྱི་ཕྱི་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་འཇར་མན་གྱི་ཙུང་ལི་ཧྲོར་ཚེ་དང་བརྙན་ལམ་ནས་ཞལ་འཛོམས་གནང་བ་རེད།

ཞི་ཅིན་ཕིང་གིས་གསུངས་དོན། ཀྲུང་གོ་དང་འཇར་མན་གྱི་འབྲེལ་བ་ལོ་50གཉིས་པར་སླེབས་ཡོད། ཕྱོགས་ཡོངས་ཀྱི་འཐབ་ཇུས་རོགས་ཟླ་ཞིག་ཡིན་པའི་ངོས་ནས་ཀྲུང་འཇར་རྒྱལ་ཁབ་གཉིས་པོས་གཉིས་ཁེ་གཉིས་ཕན་དང་ཕན་ཚུན་གྲུབ་འབྲས་ཐོབ་རོགས་བྱེད་པའི་སྙིང་སྟོབས་ཐོག་ནས་མཉམ་དུ་མདུན་སྐྱོད་བྱེད་པ་དང་དགེ་ལེན་སྐྱོན་སེལ་དང་སྤེལ་རེས་དང་ཕན་ཚུན་དཔྱད་གཞིར་འཛིན་པའི་རྣམ་འགྱུར་ཐོག་ནས་མཉམ་དུ་འཚར་ལོངས་ཡོང་བ་བྱེད་པ་དེ་ནི་འདས་ཟིན་པའི་ལོ་བཅུ་ཕྲག་ཁ་ཤས་ནང་ཀྲུང་འཇར་འབྲེལ་བ་བདེ་བླག་ངང་འཕེལ་རྒྱས་འགྲོ་བའི་རྩ་ཆེའི་ཉམས་མྱོང་ཞིག་ཡིན་པས། ཕྱོགས་གཉིས་པོས་གཅེས་སྤྲས་དང་རྒྱུན་འཛིན་བྱེད་རིན་ཡོད་པ་ཞིག་རེད། ཀྲུང་འཇར་མཉམ་ལས་ནི་སྒོ་དབྱེ་དངོས་སྒྲུབ་ཅིག་ཡིན་ལ་རྒྱུན་ཆད་མེད་པར་ཕུན་སུམ་ཚོགས་སུ་དང་འཕེལ་རྒྱས་འགྲོ་བཞིན་ཡོད། མིག་སྔར། ཀྲུང་འཇར་གྱི་ཚོང་དོན་བརྟན་པོའི་ངང་འཕེལ་རྒྱས་ཕྱིན་པ་དང་། ཕྱོགས་གཉིས་པོའི་ཕན་ཚུན་མ་འཇོག་གི་སྤྲོ་སེམས་ཆེ་བ། རྒྱལ་ཁབ་གཉིས་པོའི་མཉམ་ལས་དེ་བས་བརྟན་པོ་དང་། དེ་བས་ཏན་ཏིག དེ་བས་གསོན་ཤུགས་ལྡན་པ་བཅས་སུ་འགྱུར་བཞིན་ཡོད། རྒྱལ་ཁབ་གཉིས་པོས་གནམ་གཤིས་འགྱུར་ལྡོག་དང་ལྗང་མདོག་ཕྱོགས་སྒྱུར་གྱི་སྐད་ཆ་ཤོད་རེས་ཀྱི་མཉམ་ལས་ལམ་སྲོལ་བཙུགས་ཟིན་པས་སྐད་ཆ་ཤོད་རེས་ཐེངས་དང་པོ་གང་མགྱོགས་བྱས་ཏེ་ཕྱོགས་གཉིས་པོས་གནམ་གཤིས་སྲུང་སྐྱོང་དང་། ལྗང་མདོག་ཕྱོགས་སྒྱུར། ཁོར་ཡུག་བཅོས་སྐྱོང་། སྐྱེ་དངོས་སྣ་མང་རང་བཞིན་སྲུང་སྐྱོང་སོགས་ཁྱབ་ཁོངས་ཀྱི་མཉམ་ལས་གཏིང་ཟབ་ཏུ་གཏོང་བར་སྐུལ་འདེད་གཏོང་བ་དང་གཞོན་ནུ་དང་། ས་གནས། མཛའ་གྲོགས་གྲོང་ཁྱེར་བཅས་ཀྱི་འགྲོ་འོང་ལ་ཤུགས་སྣོན་བརྒྱབ་ནས་མི་སྣ་འགྲོ་འོང་ལ་དེ་བས་མང་བའི་སྟབས་བདེ་སྐྲུན་ཆོག་གི་ཡོད། ཀྲུང་གོས་སྤུས་ཚད་མཐོ་བའི་འཕེལ་རྒྱས་ལ་བརྟེན་ནས་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བ་དང་ཆུ་ཚད་མཐོ་བའི་ཕྱི་ཕྱོགས་སྒོ་དབྱེར་བརྟེན་ནས་འཛམ་གླིང་ཐུན་མོང་ཐོག་འཕེལ་རྒྱས་འགྲོ་བར་སྐུལ་འདེད་གཏོང་བཞིན་ཡོད།

ཞི་ཅིན་ཕིང་གིས་ནན་བཤད་གནང་དོན། མིག་སྔར་རྒྱལ་སྤྱིའི་དུས་བབ་ལ་འགྱུར་ལྡོག་ཆེན་པོ་འགྲོ་བཞིན་ཡོད་པ་དང་། ས་འབྲེལ་དབར་གྱི་གདོང་གཏུག་ཛ་དྲག་ཏུ་ཕྱིན་པ། དཔལ་འབྱོར་སླར་གསོ་ཡོང་ཤུགས་ཆུང་བ། འཇམ་འཐབ་ཀྱི་བསམ་བློ་བསྐྱར་དུ་ཐོན་བཞིན་པ་རེད། ཀྲུང་གོ་དང་འཇར་མན་ནི་འགན་འཁྲི་འཁུར་མཁན་གྱི་རྒྱལ་ཁབ་ཆེན་པོ་ཞིག་ཡིན་པས། ཕྱོགས་གཉིས་པོའི་འབྲེལ་བ་འཕེལ་རྒྱས་ཡག་པོ་གཏོང་བ་དང་མཉམ་ལས་གཉིས་ཕན་གྱི་མིག་དཔེ་ཡག་པོ་སྟོན་དགོས་ལ་རྒྱལ་སྤྱིའི་སྒྲིག་ལམ་དང་ཕྱོགས་མང་རིང་ལུགས་དེ་བས་སྲུང་སྐྱོང་བྱས་ནས་གོ་ལ་ཧྲིལ་པོའི་རང་བཞིན་གྱི་འགྲན་སློང་ལ་ལག་གདང་སྦྲེལ་ནས་ཁ་གཏད་གཅོག་དགོས། ཀྲུང་གོ་དང་ཡོ་རོབ་དབར་གྱི་འབྲེལ་བ་དེ་འཛམ་གླིང་གི་རྣམ་པ་བརྟན་ལྷིང་དང་ཨེ་ཤེ་ཡ་དང་ཡོ་རོབ་སྐམ་ས་ཆེ་མོའི་དར་རྒྱས་དང་འབྲེལ་བ་ཡོད་པས། ཕྱོགས་གཉིས་པོས་ནུས་ཤུགས་ཡོད་རྒུས་སྲུང་སྐྱོང་དང་འཕེལ་རྒྱས་ཡག་པོ་གཏོང་རིན་ཡོད། ཀྲུང་གོས་ཡོ་རོབ་ནི་ཕྱོགས་ཡོངས་ཀྱི་འཐབ་ཇུས་རོགས་ཟླ་དང་སྣེ་མང་ཅན་ཁྲོད་ཀྱི་སྣེ་མོ་གལ་ཆེན་ཞིག་ཏུ་བརྩི་གི་ཡོད། འཇར་མན་གྱིས་ཡོ་རོབ་མནའ་འབྲེལ་གྱིས་ཁྲོམ་ར་ཅན་དང་དྲང་གཞག་གི་རྩ་དོན་འཛིན་པ་མཐའ་འཁྱོངས་བྱ་རྒྱུར་སྐུལ་འདེད་བཏང་ནས་ཀྲུང་གོ་ཕྱོགས་དང་མཉམ་དུ་དྲང་གཞག་ཁྲོམ་རའི་འགྲན་རྩོད་དང་རང་མོས་ཚོང་དོན་ལ་སྲུང་སྐྱོང་བྱས་ཏེ་གོ་ལ་ཧྲིལ་པོའི་ཐོན་ལས་འཁོར་འབྲེལ་དང་མཁོ་སྤྲོད་འཁོར་འབྲེལ་བརྟན་པོ་ཡོང་རྒྱུར་སྲུང་སྐྱོང་བྱ་རྒྱུའི་རེ་བ་ཡོད།

ཧྲོར་ཚེ་ཡིས་ཕ་ལེ་སི་ཐན་དང་དབྱི་སི་རལ་དབར་གྱི་གདོང་གཏུག་དང་ཡུག་རེན་གྱི་ཉམས་ཉེན་ལ་འཛིན་པའི་འཇར་མན་གྱི་ལྟ་སྟངས་ངོ་སྤྲོད་གནང་བ་དང་འབྲེལ་ཀྲུང་གོ་ཕྱོགས་དང་འབྲེལ་གཏུག་དམ་ཟབ་རྒྱུན་འཁྱོངས་བྱ་རྒྱུའི་རེ་བ་ཡོད་ཅེས་གསུངས་པ་རེད། ཞི་ཅིན་ཕིང་གིས་ཕ་ལེ་སི་ཐན་དང་དབྱི་སི་རལ་དབར་གྱི་གདོང་གཏུག་ཡིན་ནའང་འདྲ་ཡང་ན་ཡུག་རེན་གྱི་ཉམས་ཉེན་གང་ཡིན་ཡང་རུང་རྩ་བ་ནས་ཐག་གཅོད་བྱེད་པར་བདེ་འཇགས་ཀྱི་གནད་དོན་ལ་བསམ་གཞིག་དེ་བས་གཏིང་ཟབ་བྱེད་དགོས་པ་དང་ཐུན་མོང་དང་། ཕྱོགས་བསྡུས། མཉམ་ལས། རྒྱུན་མཐུད་ཆོག་པ་བཅས་ཀྱི་བདེ་འཇགས་ལྟ་བ་མཐའ་འཁྱོངས་ཀྱིས་དོ་སྙོམས་དང་། ནུས་ལྡན། རྒྱུན་མཐུད་ཆོག་པ་བཅས་ཀྱི་བདེ་འཇགས་སྒྲོམ་གཞི་འཛུགས་རྒྱུར་སྐུལ་འདེད་གཏོང་དགོས། རྒྱལ་ཁབ་གཞན་གྱི་བདེ་འཇགས་བར་མཐོངས་བཙན་བཟུང་བྱེད་པ་དང་། ཕྱོགས་གཅིག་ལ་ཕྱོགས་རེས་ཕྱོགས་ཞེན་བྱས་ཏེ་ཕྱོགས་གཞན་གྱི་ཚུལ་མཐུན་གྱི་རེ་འདུན་སྣང་མེད་དུ་བཞག་པ་ལས་ས་ཁུལ་དོ་མི་མཉམ་པ་དང་གདོང་གཏུག་བྱེད་ཁྱོན་ཆེ་རུ་དང་ཚབས་ལྕི་རུ་འགྲོ་སྲིད། ཀྲུང་གོ་དང་ཡོ་རོབ་ཀྱིས་གདོང་གཏུག་འདུམ་སྒྲིག་དང་ཛ་དྲག་ཞི་ལྷོད་དུ་གཏོང་རྒྱུར་གཞོལ་ནས་ས་ཁུལ་གྱི་ཞི་བདེ་དང་འཕེལ་རྒྱས་ལ་སྐུལ་འདེད་གཏོང་ཆེད་དགེ་མཚན་ལྡན་པའི་ནུས་པ་འདོན་དགོས་ཞེས་གསུངས་པ་རེད།