ཉེ་ཆར། གཞིས་རྩེའི་སྲོལ་རྒྱུན་ལག་ཤེས་བཟོ་རྩལ་བསྐྱར་དར་དང་རྒྱལ་སྤྱི་ཅན་གྱི་ཐབས་ལམ་གླེང་སྟེགས་རྒྱལ་རྩེ་རྫོང་དུ་གཉེར་བ་རེད། གླེང་སྟེགས་དེ་ཧྲང་ཧའེ་གྲོང་ཁྱེར་བོད་སྐྱོར་ལས་བྱེད་པའི་འབྲེལ་གཏུག་ཚོགས་ཆུང་དང་རྒྱལ་རྩེ་རྫོང་མི་དམངས་སྲིད་གཞུང་གིས་གཙོ་གཉེར་བྱས་པ་ཞིག་ཡིན་ཞིང་། ཧྲང་ཧའེ་དང་། ཀོང་ཏུང་། བོད་ལྗོངས་སོགས་ནས་ཡོང་བའི་ལས་རིགས་ཀྱི་ཕུལ་བྱུང་མི་སྣ་དང་། བསླབ་པ་རྒན་གྲས། གདན་ཞུས་སྐུ་མགྲོན་དང་གྲོགས་པོ་བཅས་དང་གཞིས་རྩེ་གྲོང་ཁྱེར་གྱི་རིམ་ཁག་འབྲེལ་ཡོད་འགན་འཁུར་བས་ཕན་ཚུན་སྤེལ་རེས་གཏིང་ཟབ་བྱས་པ་རེད།

རྒྱལ་རྩེ་རྫོང་ནི་རྒྱལ་ཁབ་ཀྱི་ལོ་རྒྱུས་རིག་གནས་གྲོང་ཁྱེར་གྲགས་ཅན་ཞིག་ཡིན་ཞིང་། རྫོང་ཡོངས་སུ་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྣམ་གྲངས་3དང་། རང་སྐྱོང་ལྗོངས་རིམ་པའི་རྣམ་གྲངས་6 གཞིས་རྩེ་གྲོང་ཁྱེར་རིམ་པའི་རྣམ་གྲངས་12 རྫོང་རིམ་པའི་རྣམ་གྲངས་45 རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་ཐོན་སྐྱེད་རང་བཞིན་གྱི་སྲུང་སྐྱོང་དཔེ་སྟོན་རྟེན་གཞི(རྒྱལ་རྩེ་རྫོང་ཁ་གདན་བཟོ་གྲྭ)1བཅས་ཡོད་པ་རེད།

ཧྲང་ཧའེ་གྲོང་ཁྱེར་བུད་མེད་ཁེ་ལས་མཁས་ཅན་མཐུན་ཚོགས་ཀྱི་ལས་འཛིན་དང་ཧྲང་ཧའེ་ཞང་ཧྲང་རིག་གནས་འཕེལ་རྒྱས་ཚད་ཡོད་ཀུང་སིའི་ཡུས་ལིང་ཞུའེ་ཡིས་གཙོ་དོན་གཏམ་བཤད་གནང་སྐབས་གྲངས་འཛིན་ཅན་གྱི་ཕྱོགས་སྒྱུར་ཚོང་གཉེར་གྱི་རྣམ་པ་གསར་པ་དང་། གསར་གཏོད་རང་བཞིན་གྱི་གཞན་སྒྱུར། ལས་རིགས་སྒྲོལ་ནས་མཉམ་འདྲེས་དང་མཐུན་སྦྱོར་གསར་གཏོད། རྒྱལ་སྤྱིའི་ཁྲོམ་ར་དང་མཉམ་ལས་ཀྱི་བར་མཐོངས་རྒྱ་སྐྱེད་བཅས་རིག་གནས་གསར་གཏོད་དང་ཐོན་ལས་གསར་གཏོད་འཕེལ་རྒྱས་ཀྱི་ཐབས་ལམ་གྱི་ཁྱད་ཆོས་བཞི་རྒྱས་བཤད་བྱས་པ་རེད།

རྒྱལ་རྩེ་རྫོང་གཙང་ཁ་ཤང་རྩའོ་མདའ་གྲོང་ཚོའི་ཚེ་སྒྲོལ་གྱིས་གསར་འགོད་པར། ད་ཐེངས་ཀྱི་གླེང་སྟེགས་ལ་ཞུགས་རྗེས་ང་ཚོས་གྲོང་མིའི་འབབ་འཕར་ཕྱུག་འགྱུར་གྱི་ཐབས་ལམ་ཡངས་སུ་གཏོང་བ་དང་ཕུལ་བྱུང་གི་སྲོལ་རྒྱུན་རིག་གནས་ཀྱི་གསོན་ཤུགས་དང་རྒྱུན་འཛིན་གྱི་གསོན་ཤུགས་སྔར་བས་ཆེ་རུ་གཏོང་ཐུབ་པའི་ཡིད་ཆེས་བརྟན་དུ་ཕྱིན་སོང་ཞེས་བཤད།