ཉེ་བའི་ལོ་ཤས་རིང་། སྤུས་རྟགས་མ་ལག་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་ནས་བོད་ཀྱི་ཁྱད་ལྡན་ཐོན་རྫས་ཀྱི་གཟུགས་བརྙན་ལེགས་སུ་གཏོང་ཆེད། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཚོང་རྟགས་སྤུས་རྟགས་འཐབ་ཇུས་ལག་བསྟར་ཧུར་ཐག་བྱས་ཏེ། ས་ཁོངས་ཀྱི་སྤྱི་པའི་སྤུས་རྟགས“སའི་གོ་ལའི་སྣེ་གསུམ་པ”ནུས་ཤུགས་ཡོད་རྒུས་བཏོད་པ་རེད།

2022ལོར། ས་ཁོངས་ཀྱི་སྤྱི་པའི་སྤུས་རྟགས“སའི་གོ་ལའི་སྣེ་གསུམ་པ”རྒྱལ་ཁབ་ཤེས་བྱའི་བདག་དབང་ཅུས་ཀྱི་ཚོང་རྟགས་སྤུས་རྟགས་འཛུགས་སྐྱོང་གི་ཕུལ་བྱུང་དཔེ་གཞིར་ཚུད་དེ། རྒྱལ་ཁབ་ཤེས་བྱའི་བདག་དབང་གཙོ་གཉེར་སྡེ་ཚན་གྱི་ཁས་ལེན་ཐོབ་པ་མ་ཟད། ད་དུང་རྒྱལ་ཁབ་ཤེས་བྱའི་བདག་དབང་ཅུས་ཀྱི་གཙོ་ཆེའི་དྲ་ཚུཌ་དང་འབྲེལ་ཡོད་སྨྱན་སྦྱོར་ཐོག་ཡོངས་བསྒྲགས་འོས་སྦྱོར་ཡང་བྱས་པ་རེད།

མིག་སྔར། “སའི་གོ་ལའི་སྣེ་གསུམ་པ”རིགས་ཡོངས་ཀྱི་ཚོང་རྟགས་ཐོ་འགོད་ཟིན་པའི་ནང་རྒྱལ་ནང་གི་ཚོང་རྟགས་རིགས་ཆེ་གྲས་45དང་རིགས་ཆུང་གྲས་600+ཚུད་པ་མ་ཟད། རྒྱལ་ཕྱིར་ཚོང་རྟགས་ཐོ་འགོད་བྱེད་འགོ་ཡང་ཚུགས་ནས་ད་ཆ་ཚོང་རྫས་རིགས་7གྱི་རྒྱལ་སྤྱིའི་ཐོ་འགོད་ལག་ཁྱེར་རག་སྟེ། རིམ་རྩིས་བྱས་ན། རྒྱལ་སྤྱིའི་ཚོང་རྟགས་ཐོ་འགོད་93དང་ཡོ་རོབ་མནའ་འབྲེལ་གྱི་ཞིབ་བཤེར་གཏན་འབེབས་བརྡ་ཐོ་རིགས་4ཐོབ་ཡོད་པ་རེད།

སྤུས་རྟགས་ནི་གཟུགས་མེད་ཀྱི་རྒྱུ་ནོར་གལ་ཆེན་ཞིག་དང་ཤེས་བྱའི་བདག་དབང་ནི་ལྟེ་བའི་འགྲན་རྩོད་ནུས་པ་ཞིག་ཡིན་པས། དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་ཁྲིད་བྱེད་པའི་སྒུལ་ཤུགས་ཆེན་པོ་ལྡན་ཡོད་ལ། སྤུས་ཚད་མཐོ་བའི་འཕེལ་རྒྱས་ཀྱི་འདེགས་སྐྱོར་གཙོ་བོ་དེ་བས་ཀྱང་རེད། བོད་ལྗོངས་སའི་གོ་ལའི་སྣེ་གསུམ་པ་ཐོན་ལས་འཕེལ་རྒྱས་ཚད་ཡོད་ཀུང་སིས་ཁྲོམ་རའི་དགོས་མཁོ་དང་འཛད་སྤྱོད་པའི་དགའ་ཕྱོགས་ལྟར་ཤེས་བྱའི་བདག་དབང་སྲུང་སྐྱོང་ནན་པོ་བྱས་པའི་རྨང་གཞིའི་ཐོག་ལེགས་འདེམས་ཚད་གཞིའི་ལས་སྟེགས་བཙུགས་ཏེ་ཚད་གཞི་དང་མཐུན་པའི་བོད་ཀྱི་ཡུལ་ཟོག་དང་ཁེ་ལས་དག་བརྒྱུད་རིམ་ལྟར་སའི་གོ་ལའི་སྣེ་གསུམ་པའི་ལེགས་འདེམས་ཚད་གཞིའི་ལས་སྟེགས་སུ་བཅུག་སྟེ། ལྗོངས་ཡོངས་ཀྱི་ཁྱད་ལྡན་ཐོན་རྫས་དང་ཐོན་ལས་ཀྱི་ཕྱོགས་བསྡུས་འགྲན་རྩོད་ནུས་པ་ཆེ་རུ་འགྲོ་བར་སྐུལ་ཁྲིད་བྱས་པས། “སའི་གོ་ལའི་སྣེ་གསུམ་པ”ལྟེ་བར་བྱེད་པའི་བོད་ཀྱི་ས་ཁོངས་ཀྱི་སྤྱི་པའི་སྤུས་རྟགས་ཐོན་རྫས་ཀྱི་དཔུང་ཁག་ཀྱང་ཆགས་ཡོད། མིག་སྔར། ལེགས་འདེམས་ཚད་གཞིའི་ལས་སྟེགས་དེར་ཁེ་ལས་30དང་ཞིང་འབྲོག་ཐོན་རྫས་84ཡོད། དེ་དང་ཆབས་ཅིག བོད་ལྗོངས་སའི་གོ་ལའི་སྣེ་གསུམ་པ་ཐོན་ལས་འཕེལ་རྒྱས་ཚད་ཡོད་ཀུང་སི་ས་ཁོངས་ཀྱི་སྤྱི་པའི་སྤུས་རྟགས“སའི་གོ་ལའི་སྣེ་གསུམ་པ”བདག་ཏུ་འཛིན་མཁན་ཡིན་པའི་ཆ་ནས་རང་འགུལ་ངང་གཞུང་ཁོངས་ཁེ་ལས་ཀྱི་ལས་འགན་བསྒྲུབས་ཤིང་། “སའི་གོ་ལའི་སྣེ་གསུམ་པའི”སྐད་གྲགས་ཆོད་ཚད་ཆེ་རུ་གཏོང་རྒྱུ་ཚད་བརྒལ་ཡོང་གཞི་དང་བོད་ཀྱི་ཁྱད་ལྡན་སྤུས་ལེགས་ཀྱི་ལྟེ་བའི་ཐོན་རྫས་གཙོ་གཉེར་ཐོན་རྫས་སུ་བརྩིས་ནས་ཐབས་ལམ་དང་ལས་སྟེགས་མང་པོ་བརྒྱུད་སྤུས་རྟགས་ཀྱི་ཤུགས་རྐྱེན་ཐེབས་ཤུགས་ཆེ་རུ་བཏང་བའི་ཁར་ས་ཁོངས་ཀྱི་སྤུས་རྟགས་ལ་བརྟེན་ནས་ཐོན་རྫས་ཀྱི་ཟུར་སྣོན་རིན་ཐང་ཆེ་རུ་བཏང་སྟེ། བོད་ཀྱི་ཁྱད་ལྡན་ཐོན་རྫས་འཛམ་གླིང་གི་ཁྲོམ་རར་བསྐྱོད་པར་སྐུལ་འདེད་བཏང་ཡོད།

2023ལོར། ཀྲུང་གོ་སྤུས་རྟགས་འཛུགས་སྐྱོང་ཡར་སྐུལ་ཚོགས་པའི་དཔྱད་དཔོག་གྲུབ་འབྲས་ལས་མངོན་པར་གཞིགས་ན། འདས་པའི་ལོ་གསུམ་ནང་། ས་ཁོངས་ཀྱི་སྤྱི་པའི་སྤུས་རྟགས“སའི་གོ་ལའི་སྣེ་གསུམ་པ”མེད་པ་ནས་ཡོད་པའི་བར་རིམ་རྩིས་བརྒྱབ་ན་ཁྱོན་མ་དངུལ་སྒོར་དུང་ཕྱུར་1.7ལྷག་བཏང་བ་དང་སྤུས་རྟགས་ཀྱི་ཚོད་རྩིས་རིན་ཐང་སྒོར་དུང་ཕྱུར་4.22ཟིན་ནས། མ་རྩ་དང་ཕན་འབྲས་ཀྱི་བསྡུར་ཚད་148%ཟིན་ཡོད། སའི་གོ་ལའི་སྣེ་གསུམ་པའི་སྤུས་རྟགས་ཀྱིས་སྤྱི་ཚོགས་ཀྱི་མ་རྩ་བསྡོམས་འབོར་སྒོར་དུང་ཕྱུར་17ཡན་འཇོག་པར་སྐུལ་ཁྲིད་བྱས་ཡོད་པ་རེད།