ཤིན་ཧྭ་གསར་འགྱུར་ཁང་པེ་ཅིང་ནས་ཟླ་11ཚེས་1ཉིན་གློག་འཕྲིན་འབྱོར་གསལ། ཚོང་གཉེར་ཁོར་ཡུག་སྔར་བས་ལེགས་སུ་གཏོང་ཆེད། ཉེ་ཆར་རྒྱལ་སྲིད་སྤྱི་ཁྱབ་ཁང་གིས《དངུལ་ཆད་གཏོང་བའི་དོན་ཚན་ཁག་གཅིག་མེད་པར་བཟོ་བ་དང་ལེགས་སྒྲིག་བྱ་རྒྱུའི་སྐོར་གྱི་གཏན་འབེབས》(གཤམ་དུ《གཏན་འབེབས》ཞེས་བསྡུ་རྒྱུ)བཀྲམ་ནས་བཟོ་ལས་དང་ཆ་འཕྲིན་ཅན་དང་། སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན་སོགས་ཁྱབ་ཁོངས་ཀྱི་དངུལ་ཆད་གཏོང་བའི་དོན་ཚན་16མེད་པར་བཟོས་པ་དང་དངུལ་ཆད་གཏོང་བའི་དོན་ཚན་17ལེགས་སྒྲིག་བྱས་ཡོད། དངུལ་ཆད་གཏོང་བའི་དོན་ཚན་མེད་པར་བཟོ་རིགས《གཏན་འབེབས》བཀྲམ་ཉིན་ནས་བཟུང་འབྲེལ་ཡོད་སྲིད་འཛིན་ཁྲིམས་སྲོལ་དང་སྡེ་ཚན་གྱི་སྒྲིག་སྲོལ་གྱི་འབྲེལ་ཡོད་དངུལ་ཆད་གཏོང་བའི་གཏན་འབེབས་གནས་སྐབས་ལག་བསྟར་བྱེད་མཚམས་འཇོག་དགོས་པ་དང་། དངུལ་ཆད་ལེགས་སྒྲིག་བྱེད་རིགས་བཟོ་བཅོས་བརྒྱབ་རྗེས་ཀྱི་འབྲེལ་ཡོད་སྲིད་ཇུས་ཁྲིམས་སྲོལ་དང་སྡེ་ཚན་གྱི་འབྲེལ་ཡོད་གཏན་འབེབས་གཞིར་བཟུང་ལག་ལེན་བསྟར་གྱི་ཡོད་པ་རེད།

《གཏན་འབེབས》ནང་མེད་པར་བཟོས་པའི་དངུལ་ཆད་གཏོང་བའི་དོན་ཚན་16གི་གྲས་སུ་བཟོ་ལས་དང་ཆ་འཕྲིན་ཅན་པུའི་དོན་ཚན་2དང་། སློབ་གསོ་པུའི་དོན་ཚན་2 སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན་པུའི་དོན་ཚན་5 ཀྲུང་གོ་མི་དམངས་དངུལ་ཁང་གི་དོན་ཚན་3 རྒྱལ་ཁབ་ནགས་ཚལ་རྩྭ་ཐང་ཅུས་ཀྱི་དོན་ཚན་1 རྒྱལ་ཁབ་སྦྲག་སྲིད་ཅུས་ཀྱི་དོན་ཚན་1 རྒྱལ་ཁབ་ནད་ཡམས་ཚོད་འཛིན་ཅུས་ཀྱི་དོན་ཚན་2བཅས་ཚུད་ཡོད་པ་དང་། ལེགས་སྒྲིག་བྱས་པའི་དངུལ་ཆད་གཏོང་བའི་དོན་ཚན་17གྱི་ནང་དུ་བཟོ་ལས་དང་ཆ་འཕྲིན་ཅན་པུའི་དོན་ཚན་1 འཕྲལ་སྡོམ་པུའི་དོན་ཚན་1 རྒྱལ་ཁབ་གསར་འགྱུར་དཔེ་སྐྲུན་ཧྲུའུ་ཡི་དོན་ཚན་13 རྒྱལ་ཁབ་ནད་ཡམས་ཚོད་འཛིན་ཅུས་ཀྱི་དོན་ཚན་2བཅས་ཚུད་ཡོད། དངུལ་ཆད་གཏོང་བའི་དོན་ཚན་འདི་དག་གཙོ་བོ་ཁེ་ལས་དང་མང་ཚོགས་ཀྱི་ཐོན་སྐྱེད་འཚོ་བ་དང་འབྲེལ་བ་ཟབ་པའི་ཁྱབ་ཁོངས་སུ་གཅིག་སྡུད་བྱས་ཡོད་པས། དོན་ཚན་འདི་དག་མེད་པར་བཟོ་བ་དང་ལེགས་སྒྲིག་བྱེད་པའི་དམིགས་ཡུལ་ནི་ཁེ་ལས་དང་མང་ཚོགས་ཀྱི་ཁུར་པོ་ཡང་དུ་གཏོང་ཆེད་རེད།

མེད་པར་བཟོས་པ་དང་ལེགས་སྒྲིག་བྱས་པའི་དངུལ་ཆད་གཏོང་བའི་དོན་ཚན་ཁྱོན་སྲིད་འཛིན་ཁྲིམས་སྲོལ་ཁག་7དང་སྡེ་ཚན་གྱི་སྒྲིག་སྲོལ་ཁག་6དང་འབྲེལ་བ་ཡོད་ཅིང་། 《གཏན་འབེབས》ནང་དངུལ་ཆད་གཏོང་བའི་དོན་ཚན་མེད་པར་བཟོ་བ་དང་ལེགས་སྒྲིག་བྱས་རྗེས་ཀྱི་ཁྲིམས་འཛུགས་ལས་དོན་སྐོར་ལ་བླང་བྱ་གསལ་པོ་བཏོན་ཡོད། རྒྱལ་སྲིད་སྤྱི་ཁྱབ་ཁང་གི་འབྲེལ་ཡོད་སྡེ་ཚན་གྱིས《གཏན་འབེབས》བཀྲམ་ཉིན་ནས་བཟུང་གི་ཉིན་60ཡི་ནང་རྒྱལ་སྲིད་སྤྱི་ཁྱབ་ཁང་ལ་འབྲེལ་ཡོད་སྲིད་འཛིན་ཁྲིམས་སྲོལ་བཟོ་བཅོས་ཇུས་གཞི་འབུལ་དགོས་པ་མ་ཟད། འབྲེལ་ཡོད་སྡེ་ཚན་གྱི་སྒྲིག་སྲོལ་བཟོ་བཅོས་དང་མེད་པར་བཟོ་བའི་ལས་དོན་ལེགས་སྒྲུབ་བྱེད་དགོས། སྡེ་ཚན་གྱི་སྒྲིག་སྲོལ་བཟོ་བཅོས་བརྒྱབ་རྗེས་ཀྱི་སྲིད་འཛིན་ཁྲིམས་སྲོལ་གཞིར་བཟུང་ལེགས་སྒྲིག་བྱེད་དགོས་རིགས་འབྲེལ་ཡོད་སྲིད་འཛིན་ཁྲིམས་སྲོལ་ཁྱབ་བསྒྲགས་བྱས་ཉིན་ནས་བཟུང་གི་ཉིན་60ཡི་ནང་བཟོ་བཅོས་དང་མེད་པར་བཟོ་བའི་ལས་དོན་ལེགས་སྒྲུབ་བྱེད་དགོས། སྡེ་ཚན་གྱི་སྒྲིག་སྲོལ་ལ་བཟོ་བཅོས་དང་མེད་པར་བཟོ་བའི་ཐད་ཉིན་30ཡི་བསམ་འཆར་བསྡུ་བའི་དུས་བཀག་ཡོད་པར་བསམ་གཞིག་བྱས་ནས་དམིགས་བསལ་རྒྱུ་རྐྱེན་གྱིས་རྐྱེན་པས་གོང་གསལ་གྱི་དུས་བཀག་ནང་སྡེ་ཚན་གྱི་སྒྲིག་སྲོལ་ལ་བཟོ་བཅོས་དང་མེད་པར་བཟོ་བའི་ལས་དོན་ལེགས་སྒྲུབ་ཐུབ་མེད་རིགས་དུས་ཚོད་འོས་འཚམ་ནར་འགྱངས་བྱ་ཆོག་མོད། འོན་ཀྱང་ནར་འགྱངས་བྱེད་ཚད་ཉིན་30ལས་བརྒལ་མི་ཆོག་པའི་གཏན་འབེབས་བྱས་ཡོད།

《གཏན་འབེབས》ནང་། དངུལ་ཆད་གཏོང་བའི་དོན་ཚན་མེད་པར་བཟོས་རྗེས། འབྲེལ་ཡོད་སྡེ་ཚན་གྱིས་ཁྲིམས་ལྟར་ཞིབ་འཇུག་ནན་ཏན་བྱས་ནས་ལྟ་འདོམས་ཀྱི་འགན་འཁྲི་དོན་འཁྱོལ་ནན་པོ་དང་། ལས་དོན་སྒྲུབ་རིང་དང་བསྒྲུབས་རྗེས་ཀྱི་ལྟ་འདོམས་ལ་ཤུགས་སྣོན། ལྟ་འདོམས་ཀྱི་བྱེད་ཐབས་འཐུས་སྒོ་ཚང་དུ་གཏོང་བ། ལྟ་འདོམས་ཀྱི་གོ་རིམ་ཚད་ལྡན་དུ་གཏོང་བ། ལྟ་འདོམས་ཀྱི་ཚན་རིག་གི་རང་བཞིན་དང་། སྟབས་བསྡུས་ཀྱི་རང་བཞིན། གནད་སྨིན་གྱི་རང་བཞིན་ཆེ་རུ་གཏོང་བ། ལྟ་འདོམས་ཀྱི་ནུས་ཕྱོད་སྔར་བས་ཆེ་རུ་གཏོང་བ་བཅས་བྱས་ནས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད་འདེགས་སྐྱོར་ནུས་ལྡན་བྱེད་དགོས་པའི་ནན་བཤད་བྱས་ཡོད།