ཟླ་10ཚེས་30ཉིན། གསར་འགོད་པས་མཚོ་སྔོན་ཞིང་ཆེན་མི་སྤྱི་ཐིང་ནས་ཤེས་རྟོགས་བྱས་པར། ཞིང་ཆེན་ཡོངས་ཀྱི་དབུལ་སྒྲོལ་མི་འབོར་གྱི་རྩལ་ནུས་གསོ་སྦྱོང་གི་སྤུས་ཚད་མཐོ་རུ་དང་ཕན་འབྲས་ཆེ་རུ་གཏོང་བར་ཤུགས་སྣོན་རྒྱག་པ་དང་གསོ་སྦྱོང་ལས་ཞུགས་ཐུབ་ཚད་དང་ལག་ཁྱེར་རག་ཚད་སྔར་བས་མཐོ་རུ་གཏོང་ཆེད། ཐིང་དེས་གསོ་སྦྱོང་རྣམ་གྲངས་ལ་སྤྱི་འདོམས་བསྡུ་སྒྲིལ་ཡག་པོ་བྱེད་པ་དང་། གསོ་སྦྱོང་གི་དགོས་མཁོར་བརྟག་དཔྱད་གཏིང་ཟབ་བྱེད་པ། དགོས་མཁོ་དང་སྦྲེལ་མཐུད་ཀྱིས་སྟབས་བསྟུན་ངང་གསོ་སྦྱོང་སྒྲིག་འཛུགས་བྱེད་པ། གསོ་སྦྱོང་དང་གདེང་འཇོག་འབྲེལ་མཐུད་ནུས་ལྡན་བྱེད་པར་སྐུལ་འདེད་གཏོང་བ། དྲིལ་བསྒྲགས་ཞབས་ཞུ་འགན་ལེན་ལ་ཤུགས་སྣོན་ཏན་ཏིག་རྒྱག་པ་བཅས་ཀྱི་བྱ་ཐབས་ལྔ་ཞིབ་ཕྲ་བཟོས་ནས་བཏོན་པ་མ་ཟད། 《དབུལ་སྒྲོལ་མི་འབོར་གྱི་ལས་རིགས་རྩལ་ནུས་གསོ་སྦྱོང་རྣམ་གྲངས་ཀྱི་རྩིས་ཁྲ(རྫོང་རེར་རེའུ་མིག་རེ)》ཡོངས་བསྒྲགས་བྱས་ཏེ་འགན་འཁྲི་ནན་དུ་བཏང་ནས་དབུལ་སྒྲོལ་མི་འབོར་གྱི་ལས་རིགས་རྩལ་ནུས་གསོ་སྦྱོང་ལས་དོན་ལ་སྤྱི་འདོམས་སྐུལ་འདེད་བཏང་བ་རེད།

ཤེས་རྟོགས་བྱུང་བར་གཞིགས་ན། དབུལ་སྒྲོལ་མི་འབོར་གྱི་ལས་རིགས་རྩལ་ནུས་གསོ་སྦྱོང་ལས་དོན་དེ་ལོ་ལྟར་གྱི་ལོ་འགོར་མི་སྤྱི་སྡེ་ཚན་གྱིས་སྣེ་ཁྲིད་ནས་འབྲེལ་ཡོད་སྡེ་ཚན་གྱི་དབུལ་སྒྲོལ་མི་འབོར་གྱི་གསོ་སྦྱོང་རྣམ་གྲངས་བསྡུ་སྒྲིལ་བྱས་ཏེ“རྫོང་རེར་རེའུ་མིག་རེའི”བླང་བྱ་ལྟར་དབུལ་སྒྲོལ་མི་འབོར་གྱི་ལས་རིགས་རྩལ་ནུས་གསོ་སྦྱོང་རྣམ་གྲངས་ཀྱི་རྩིས་ཁྲ་གཅིག་གྱུར་ཐོག་བཟོ་བ་དང་ཁྱབ་བསྒྲགས་བྱེད་པ་དང་། ས་གནས་ཁག་གི་གསོ་སྦྱོང་ལས་འགན་ཁག་བགོས་ཞིབ་ཕྲ་བྱས་ཏེ་ལས་ཞུགས་གསོ་སྦྱོང་གི་འདུན་པ་ཡོད་པའི་དབུལ་སྒྲོལ་མི་འབོར་གྱི་ལས་རིགས་རྩལ་ནུས་གསོ་སྦྱོང་ཁྱོན་ཡོངས་ལ་ཁྱབ་པར་བྱེད་ཀྱི་ཡོད་པ་རེད། ལོ་མཇུག་ཏུ་བྱེད་ཐབས་སྣ་མང་སྤྱད་ནས་དབུལ་སྒྲོལ་མི་འབོར་གྱི་ད་ཡོད་རྩལ་ནུས་དང་། ལས་ཞུགས་གནས་ཚུལ། གསོ་སྦྱོང་གི་འདུན་པ་སོགས་ཀྱི་ཆ་འཕྲིན་དང་དགོས་མཁོ་ཕྱོགས་ཡོངས་ནས་མཐིལ་རྟོགས་བྱས་ཏེ་འབྲེལ་ཡོད་ཡིག་ཚགས་དཔྱད་ཡིག་འཛུགས་པ་དང་འཐུས་སྒོ་ཚང་དུ་གཏོང་བ་མ་ཟད། གཞི་གྲངས་མཐིལ་རྟོགས་བརྟག་དཔྱད་ཀྱི་ཆ་འཕྲིན་བདེན་པ་དང་ཡང་དག་ཡིན་པ་དང་། དགོས་མཁོ་དང་འདུན་པ་དོན་དངོས་དང་མཐུན་ལ་ཞིབ་ཕྲ་ཡོང་བའི་འགན་ལེན་བྱས་ཏེ“མངགས་ཐོ་རྣམ་པ”དང“ཁ་ཕྱོགས་གཏན་འཁེལ་རྣམ་པའི”གསོ་སྦྱོང་ལ་རྨང་གཞི་བརྟན་པོ་ཞིག་འདིང་རྒྱུ་རེད།

དེ་དང་ཆབས་ཅིག དབུལ་སྒྲོལ་མི་འབོར་གསོ་སྦྱོང་གི་འདུན་པ་དང་ཐོན་ལས་ཁྲོམ་རའི་དགོས་མཁོ་དང་ཟུང་འབྲེལ་གྱིས་ཞིང་འབྲོག་ཁུལ་གྱི་འཕེལ་རྒྱས་དང་འཚམ་པ་དང་དབུལ་སྒྲོལ་མི་འབོར་གྱི་རང་སོའི་ཁྱད་ཆོས་ལྡན་པ་དང་ཁྱད་པར་ཅན་གྱི་གསོ་སྦྱོང་དགོས་མཁོ་སྐོང་ཐུབ་པའི་གསོ་སྦྱོང་རྣམ་གྲངས་རྩེ་གྲ་ཧུར་ཐག་བཏོད་དེ། རེབ་གོང་གི“ཐང་གའི”སྒྱུ་རྩལ་དང“མཚོ་སྔོན་གྱི་འཚེམ་དྲུབ”སོགས་དམངས་ཁྲོད་བཟོ་རྩལ་དང་། མཚོ་སྔོན་གྱི་འཐེན་ཐུག་དང་འདྲེ་ཚེར་མ་འཐུ་བ་སོགས་ངལ་ནུས་སྤུས་རྟགས་མངོན་གསལ་དོད་པོ་ཡོང་བར་བྱས་ནས་རྩལ་ནུས་གསོ་སྦྱོང་བྱེད་ཤུགས་ཆེ་རུ་གཏོང་བ་དང་འབྲེལ་མཚོ་སྔོན་ཞིང་ཆེན་གྱི་གསར་དར་ཐོན་ལས་དང་ས་གནས་ཀྱི་ཁྱད་ལྡན་ཐོན་ལས་འཕེལ་རྒྱས་ཀྱི་དགོས་མཁོ་དང་ལས་ཞུགས་ལས་གཏོད་ཀྱི་དགོས་མཁོ་དང་ཟུང་འབྲེལ་བྱས་ཏེ། ཆེད་དོན་ལས་རིགས་འཇོན་ཐང་གི་དཔྱད་ཞིབ་ཚད་ལྡན་ཧུར་ཐག་བཟོས་ནས་ཕྱི་ཕྱོགས་སུ་མཚོ་སྔོན་ཞིང་ཆེན་གྱི་ཆེད་དོན་ལས་རིགས་འཇོན་ཐང་གི་དཔྱད་ཞིབ་རྣམ་གྲངས་ཀྱི་དཀར་ཆག་ཡོངས་བསྒྲགས་དང་སྟབས་བསྟུན་ལེགས་སྒྲིག་བྱ་རྒྱུ་མ་ཟད། དབུལ་སྒྲོལ་མི་འབོར་གསོ་སྦྱོང་བྱས་རྗེས་ལས་རིགས་རྩལ་ནུས་གདེང་འཇོག་ལ་ཞུགས་པ་དང་། ཆེད་དོན་ལས་རིགས་འཇོན་ཐང་ལ་དཔྱད་ཞིབ་བྱེད་པ། ལས་རིགས་ལས་གཉེར་ཐོབ་ཐང་ལག་ཁྱེར་ལེན་པ་བཅས་བྱ་རྒྱུའི་སྒྲིག་འཛུགས་ཧུར་ཐག་དང་ལྕག་སྐུལ་བྱས་ནས་དབུལ་སྒྲོལ་མི་འབོར་ལ་གསོ་སྦྱོང་བྱས་རྗེས་ལག་ཁྱེར་རག་ཚད་40%ཡན་ཟིན་ཐུབ་པ་བྱ་རྒྱུ་རེད།

གཞན་ཡང་། དབུལ་སྒྲོལ་མི་འབོར་གྱི་ལས་རིགས་རྩལ་ནུས་གསོ་སྦྱོང་གི་སྲིད་ཇུས་དྲིལ་བསྒྲགས་དང་འགྲེལ་བཤད་ཧུར་ཐག་བྱེད་པ་དང་། རྩལ་ནུས་ལ་བརྟེན་ནས་ལས་ཞུགས་དང་། རྩལ་ནུས་ལ་བརྟེན་ནས་དབུལ་སྒྲོལ། རྩལ་ནུས་ལ་བརྟེན་ནས་འཇོན་ཐང་ཅན་དུ་གྱུར་པ་བཅས་ཀྱི་སྔོན་ཐོན་དཔེ་མཚོན་དང་བཟོ་བོའི་སྙིང་སྟོབས་དྲིལ་བསྒྲགས་ཤུགས་ཆེན་བྱེད་པ། རིམ་ཁག་དང་རིགས་ཁག་གི་ལས་རིགས་རྩལ་ནུས་འགྲན་བསྡུར་བྱེད་སྒོ་སྤེལ་བ། རྩལ་ནུས་ཤེས་ལྡན་པར་སྐུལ་ལྕག་དང་གཟེངས་བསྟོད་བྱ་རྒྱུར་ཤུགས་སྣོན་རྒྱག་པ་བཅས་བྱས་ཏེ། དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་རྒྱུ་དེ་གྲོང་གསེབ་དར་རྒྱས་དང་འབྲེལ་མཐུད་ནུས་ལྡན་བྱེད་པའི་སྤྱི་ཚོགས་ཀྱི་རྣམ་པ་བཟང་པོ་སྔར་བས་གཏོད་རྒྱུ་རེད།