ཉེ་ཆར། པེ་ཅིང་དུ་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་མཐོ་རིམ་དཔོན་རིགས་ཀྱི་ཚོགས་འདུ་སྐབས་བཅུ་དྲུག་པ་འཚོགས་པ་རེད། ཚོགས་འདུའི་ཐོག་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་སྐབས་བརྒྱད་པའི་པུའུ་ཀྲང་རིམ་པའི་ཚོགས་འདུའི་གྲུབ་འབྲས་དོན་འཁྱོལ་བྱས་ཚུལ་སྐོར་གྱི་ཀྲུང་གོ་ཕྱོགས་ཀྱི་སྙན་ཞུ་ཉན་པ་དང་འབྲེལ་གྲོས་ཞིབ་བྱས་པ་མ་ཟད། 2024ལོའི་གླེང་སྟེགས་་སྐབས་གསར་པའི་ཚོགས་འདུའི་གྲ་སྒྲིག་ལས་དོན་ཐད་བསམ་འཆར་བརྗེ་རེས་ཀྱང་བྱས་པ་རེད།

ཕྱི་འབྲེལ་པུའི་པུའུ་ཀྲང་གཞོན་པ་ཏེང་ལི་ཡིས་འགོ་ཚུགས་མཛད་སྒོའི་ཐོག་ཤིས་ཚིག་བསྒྲོན་སྐབས། 2021ལོའི་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་སྐབས་བརྒྱད་པའི་པུའུ་ཀྲང་རིམ་པའི་ཚོགས་འདུ་འཚོགས་ཚུན། ཀྲུང་གོ་དང་ཨ་ཧྥེ་རི་ཁ་ཕྱོགས་གཉིས་ཀྱིས་ཀྲུའུ་ཞི་ཞི་ཅིན་ཕིང་གིས་བཏོན་གནང་བའི་ཀྲུང་གོ་དང་ཨ་ཧྥེ་རི་ཁའི་མཛའ་གྲོགས་མཉམ་ལས་ཀྱི་སྙིང་སྟོབས་ཐུན་མོང་ཐོག་ལག་ལེན་བསྟར་ནས“འདུ་འགོད་ཁག་དགུའི”གཙོ་རྐང་ལ་དམིགས་ཏེ་རྗེས་མཐུད་གྲུབ་འབྲས་དོན་འཁྱོལ་ལ་འཕེལ་རིམ་གལ་ཆེན་ཐོབ་རྒྱུར་སྐུལ་འདེད་བཏང་ཡོད་ཅེས་བརྗོད་པ་རེད།

ཨ་ཧྥེ་རི་ཁ་ཕྱོགས་ཀྱི་ཚོགས་ཞུགས་མཐོ་རིམ་དཔོན་རིགས་དང་འཐུས་མིས་ཀྲུང་གོ་དང་ཨ་ཧྥེ་རི་ཁའི་འབྲེལ་བ་དང་དེ་བཞིན་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ལ་ཐོབ་པའི་གྲུབ་འབྲས་ཐད་གདེང་འཇོག་གང་ལེགས་བྱས་པ་དང་། “རྒྱུད་གཅིག་ལམ་གཅིག”རྒྱལ་སྤྱིའི་མཉམ་ལས་མཐོ་རིམ་གླེང་སྟེགས་སྐབས་གསུམ་པ་གྲུབ་འབྲས་ཐོབ་པའི་ངང་འཚོགས་པར་སྤྲོ་སེམས་འཁོལ་བའི་རྟེན་འབྲེལ་ཞུས་ཤིང་། ཀུན་གྱིས“རྒྱུད་གཅིག་ལམ་གཅིག”གི་གྲོས་འགོ་བཏོན་ནས་ལོ་10ཡི་རིང་ཀྲུང་གོ་ཕྱོགས་ཀྱིས་ཐོག་མཐའ་བར་གསུམ་དུ་ཕན་ཚུན་བརྩི་འཇོག་དང་གཉིས་ཁེ་གཉིས་ཕན་གྱི་སྙིང་སྟོབས་ལ་བརྟེན་པ་དང་དངོས་སྒྲུབ་ཀྱི་བྱ་ཐབས་ལ་བརྟེན་ནས་ཨ་ཧྥེ་རི་ཁ་རྒྱུན་མཐུད་ཆོག་པའི་འཕེལ་རྒྱས་འགྲོ་རྒྱུར་རྒྱབ་སྐྱོར་ནུས་ལྡན་བྱས་པའི་ངོས་འཛིན་གཅིག་མཐུན་བྱས་ཡོད། ཀྲུའུ་ཞི་ཞི་ཅིན་ཕིང་གིས་ཁྱབ་བསྒྲགས་གནང་བའི“ཨ་ཧྥེ་རི་ཁའི་བཟོ་ལས་ཅན་ལ་རྒྱབ་སྐྱོར་བྱ་རྒྱུའི་གྲོས་འགོ”དང་། “ཀྲུང་གོས་ཨ་ཧྥེ་རི་ཁའི་ཞིང་ལས་དེང་རབས་ཅན་ལ་སྐུལ་འདེད་གཏོང་བའི་འཆར་གཞི”“ཀྲུང་གོ་དང་ཨ་ཧྥེ་རི་ཁའི་ཤེས་ལྡན་མི་སྣ་གསོ་སྐྱོང་གི་མཉམ་ལས་འཆར་གཞི”བཅས་ནི་ཨ་ཧྥེ་རི་ཁའི་གཙོ་གནད་དོ་ཁུར་བྱེད་ས་དང་མཐུན་ཡོད། ཨ་ཧྥེ་རི་ཁ་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་འབད་བརྩོན་བྱས་ཏེ་ཨ་ཧྥེ་རི་ཁ་དང་ཀྲུང་གོའི་འགོ་ཁྲིད་པས་འཆར་འགོད་བྱས་པའི་མཉམ་ལས་འཆར་གཞི་དོན་འཁྱོལ་ཡག་པོ་བྱས་ནས་ཨ་ཧྥེ་རི་ཁ་དང་ཀྲུང་གོའི་མཉམ་ལས་དེ་བས་མཐོ་བའི་སྐས་རིམ་ཐོག་སླེབས་རྒྱུར་སྐུལ་འདེད་གཏོང་བ་དང་། ལག་གདང་སྦྲེལ་ནས་ཨ་ཧྥེ་རི་ཁ་དང་ཀྲུང་གོའི་མི་དམངས་དུང་ཕྱུར་27ཐུན་མོང་འཕེལ་རྒྱས་དང་དར་རྒྱས་ཡོང་བར་འབད་བརྩོན་བྱེད་འདོད་ཡོད་ཅེས་བརྗོད་པ་རེད།