ཉེ་ཆར། གཞིས་རྩེ་གྲོང་ཁྱེར་གྱིས་ཆོས་ལོག་ངོ་རྒོལ་མཐུན་ཚོགས་ཀྱི་ཚོགས་མིའི་འཐུས་མི་ཚོགས་ཆེན་ཐེངས་དང་པོ་འཚོགས་ནས《གཞིས་རྩེ་གྲོང་ཁྱེར་གྱི་ཆོས་ལོག་ངོ་རྒོལ་མཐུན་ཚོགས་ཀྱི་སྒྲིག་ཡིག》ལ་གྲོས་ཞིབ་བྱས་ནས་གྲོས་འཆམ་བྱུང་བ་དང་། ལས་འཛིན་ལྷན་ཚོགས་སྐབས་དང་པོའི་ཁོངས་མི་དང་འགོ་ཁྲིད་སྒྲིག་གཞིའི་ཁོངས་མི་བདམས་ཐོན་བྱུང་བ་རེད། མཐུན་ཚོགས་དེས་གྲོང་ཁྱེར་ཡོངས་ཀྱི་མང་ཚོགས་རང་བཞིན་གྱི་ཆོས་ལོག་ལ་ངོ་རྒོལ་གྱི་འཐབ་རྩོད་ཀྱི་བྱེད་སྒོར་ཕན་ཚུན་སྤེལ་རེས་དང་མཉམ་ལས་ལ་ཤུགས་སྣོན་རྒྱག་པའི་ལས་སྟེགས་བསྐྲུན་ནས། ཆོས་ལོག་ལ་ངོ་རྒོལ་ལས་དོན་གྱི་མཉམ་ཤུགས་ཆེན་པོ་གཅིག་ཏུ་བསྒྲིལ་རྒྱུ་རེད།

ཤེས་རྟོགས་བྱུང་བར་གཞིགས་ན། གཞིས་རྩེ་གྲོང་ཁྱེར་གྱི་ཆོས་ལོག་ངོ་རྒོལ་མཐུན་ཚོགས་ནི་གྲོང་ཁྱེར་ཡོངས་ཀྱི་ཚན་རྩལ་ལས་རིགས་དང་། བཅའ་ཁྲིམས་ལས་རིགས། སློབ་གསོའི་ལས་རིགས། ཆོས་ལུགས་ལས་རིགས། གསར་འགྱུར་ལས་རིགས་སོགས་སྤྱི་ཚོགས་ལས་རིགས་ཁག་གི་ཆོས་ལོག་རྩ་འཛུགས་ལ་ངོ་རྒོལ་བྱེད་འདོད་ཡོད་པའི་མི་སྣས་རང་མོས་ངང་བཙུགས་པ་དང་འབྲེལ། ཁྲིམས་ལྟར་ཐོ་འགོད་བྱས་ནས་བཙུགས་པའི་སྤྱི་ཕན་རང་བཞིན་དང་ཁེ་གཉེར་རང་བཞིན་མིན་པའི་ཁྲིམས་མིའི་སྤྱི་ཚོགས་ཀྱི་ཚོགས་པ་ཞིག་ཡིན་ལ། རྒྱ་ཆེའི་ཚོགས་མི་དང་སྤྱི་ཚོགས་ལས་རིགས་ཁག་གི་མི་སྣར་མཐུན་སྒྲིལ་དང་འབྲེལ་གཏུག་དང་། ཚན་རིག་གི་སྙིང་སྟོབས་དང་མི་ཆོས་རིག་གནས་ཀྱི་སྙིང་སྟོབས་དར་སྤེལ་གཏོང་བ། བཅའ་ཁྲིམས་ཀྱི་ལ་རྒྱ་སྲུང་སྐྱོང་། ཆོས་དད་རང་མོས་ལ་བརྩི་འཇོག ཆོས་ལོག་རྩ་འཛུགས་དང་འཐབ་རྩོད་ཧུར་ཐག་བཅས་བྱེད་པའི་དམངས་ཁྲོད་ཀྱི་རྩ་འཛུགས་ཤིག་རེད། གོམ་སྟབས་རྗེས་མར། མཐུན་ཚོགས་དེས་འབྲེལ་ཟམ་དང་འབྲེལ་ཐག་གི་ནུས་པ་གང་ལེགས་འདོན་པ་དང་། མི་དམངས་མང་ཚོགས་ཀྱི་སྟོབས་ཤུགས་སྒྲིག་འཛུགས་དང་སྐུལ་སློང་། ཆོས་ལོག་ལ་ངོ་རྒོལ་བྱེད་པའི་ལས་དོན་ཁག་ཏན་ཏིག་སྤེལ་བ་བཅས་བྱས་ཏེ་གྲོང་ཁྱེར་ཡོངས་ཀྱི་ཆོས་ལོག་ལ་ངོ་རྒོལ་བྱེད་པའི་ལས་དོན་གཏིང་ཟབ་ཕྱོགས་སུ་འཕེལ་རྒྱས་འགྲོ་རྒྱུར་སྐུལ་འདེད་གཏོང་རྒྱུ་རེད།