“‘རྒྱུད་གཅིག་ལམ་གཅིག’མཉམ་སྐྲུན་ལ་སྐུལ་འདེད་བཏང་ནས་མི་མངོན་པའི་སྟོབས་ཤུགས་དེ་བས་ཆེ་བ་འདོན་དགོས”
—— མཉམ་འབྲེལ་རྒྱལ་ཚོགས་བཟོ་ལས་འཕེལ་རྒྱས་རྩ་འཛུགས་ཀྱི་སྤྱི་ཁྱབ་ཀན་ཧྲི་ཀེར་ཏེ·མུའུ་ལེར་བཅར་འདྲི་བྱས་པ།
ཀྲུང་གོར“རྒྱུད་གཅིག་ལམ་གཅིག”རྒྱལ་སྤྱིའི་མཉམ་ལས་མཐོ་རིམ་གླེང་སྟེགས་སྐབས་གསུམ་པར་ཞུགས་མཁན་མཉམ་འབྲེལ་རྒྱལ་ཚོགས་བཟོ་ལས་འཕེལ་རྒྱས་རྩ་འཛུགས་ཀྱི་སྤྱི་ཁྱབ་ཀན་ཧྲི་ཀེར་ཏེ·མུའུ་ལེས་ཉེ་ཆར་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས། “རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་བཏོན་ནས་ལོ་བཅུ་སོང་རིང་ཐོབ་པའི་གྲུབ་འབྲས་ལ་ཚད་མཐོའི་གདེང་འཇོག་བྱས་ཤིང་། ཁོང་གིས། གྲོས་འགོ་དེ་དོན་འཁྱོལ་བྱས་པས་ས་ཁོངས་གཞི་གཅིག་ཅན་གྱི་ཆུ་ཚད་མངོན་གསལ་དོད་པོས་མཐོ་རུ་སོང་བ་དང་། ཚོང་དོན་འགྲོ་འོང་ལ་སྐུལ་འདེད་ཐེབས་པ། དཔལ་འབྱོར་འཕར་རྒྱུར་སྐུལ་འདེད་ཐེབས་པ་བཅས་བྱུང་ཡོད། མཉམ་འབྲེལ་རྒྱལ་ཚོགས་བཟོ་ལས་འཕེལ་རྒྱས་རྩ་འཛུགས་ཀྱིས་ཀྲུང་གོ་དང་མཉམ་ལས་བྱ་རྒྱུར་ཤུགས་སྣོན་བརྒྱབ་ནས་གོ་ལ་ཧྲིལ་པོའི་རྒྱུན་མཐུད་ཆོག་པའི་འཕེལ་རྒྱས་ལ་ཐུན་མོང་ཐོག་སྐུལ་འདེད་གཏོང་རེ་བྱེད་ཀྱི་ཡོད་ཅེས་བརྗོད་པ་རེད།
མུའུ་ལེས། དེང་སྐབས་ཀྱི་འཛམ་གླིང་ལ་རྒྱང་ལྟ་བྱེད་སྐབས་མིའི་རིགས་ལ་ཉམས་ཉེན་དང་འགྲན་སློང་མི་ཉུང་བ་ཞིག་འཕྲད་པ་དཔེར་ན། འབྲུ་རིགས་ཀྱི་ཉམས་ཉེན་དང་། ཆུའི་ཐོན་ཁུངས་དཀོན་པ། གནམ་གཤིས་འགྱུར་ལྡོག་སོགས་ལས་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ཀྱི་མི་དམངས་ལ་རྡབ་རྡེག་ཚབས་ཆེན་བྱུང་ཡོད། “ངེས་པར་དུ་ངོས་འཛིན་ཐུབ་དགོས་པ་ཞིག་ལ། ང་ཚོར་དབང་བའི་འཛམ་གླིང་དང་། སྐར་མའི་གོ་ལ། འབྱུང་འགྱུར་བཅས་ནི་གཅིག་པ་ཡིན་པ་དང་། མིའི་རིགས་ནི་ལས་དབང་གཅིག་མཐུན་འདུས་གྲུབ་ཅིག་ཡིན་པས་ཕན་ཚུན་གཅིག་ལ་གཅིག་བརྟེན་དང་ཁ་འབྲལ་ཐབས་མེད་པ་ཞིག་ཡིན། དེར་བརྟེན་གོ་ལ་ཧྲིལ་པོའི་འཕེལ་རྒྱས་ལ་ང་ཚོ་ཚང་མར་འགན་འཁྲི་ཡོད”ཅེས་བརྗོད་པ་དང་ཁོང་གིས། ཕྱོགས་ཁག་གིས་མཉམ་འབྲེལ་རྒྱལ་ཚོགས་ཀྱི་2030ལོའི་རྒྱུན་མཐུད་ཆོག་པའི་འཕེལ་རྒྱས་གྲོས་རིམ་གྱི་ཁས་ལེན་ལག་ལེན་བསྟར་དགོས། “ང་ཚོར་རྒྱལ་ཁབ་ཚང་མ་དང་། ཁེ་ཕན་འབྲེལ་བའི་ཕྱོགས་ཁག་ཚང་མ། མི་ཚང་མ་བཅས་ཞུགས་ནས་གོ་ལ་ཧྲིལ་པོའི་མཐུན་སྒྲིལ་ལ་ཤུགས་སྣོན་རྒྱག་པའི་སྙིང་སྟོབས་ཤིག་དགོས་པའི”ངོས་འཛིན་བྱས་པ་རེད།
མུའུ་ལེས་མཉམ་འབྲེལ་རྒྱལ་ཚོགས་བཟོ་ལས་འཕེལ་རྒྱས་རྩ་འཛུགས་དང་ཀྲུང་གོའི་དབར་གྱི་ཕན་འབྲས་ལྡན་པའི་མཉམ་ལས་ལ་ཚད་མཐོའི་གདེང་འཇོག་བྱས་པ་རེད། “ང་ཚོས་ཀྲུང་གོ་དང་མཉམ་ལས་དམ་ཟབ་བྱས་ནས་ལོ་50ལྷག་ཙམ་སོང་ཞིང་། ལག་རྩལ་མཉམ་ལས་རྣམ་གྲངས་བརྒྱ་ཕྲག་ཐུན་མོང་ཐོག་ལག་ལེན་བསྟར་ནས་ཀྲུང་གོའི་ལག་རྩལ་མི་སྣ་སྟོང་ཕྲག་ཁ་ཤས་ལ་ཆེད་ལས་རྩལ་ནུས་མཐོ་རུ་གཏོང་རོགས་བྱས་པ་མ་ཟད། ད་དུང་ལག་རྩལ་ལྟེ་གནས་དང་སྒྲིག་གཞི་བརྒྱ་ཕྲག་གི་ཆུ་ཚད་མཐོ་རུ་གཏོང་རོགས་བྱས་ཡོད” མུའུ་ལེས་ཀྲུང་གོའི་དཔལ་འབྱོར་གྲུབ་ཆ་ཕྱོགས་སྒྱུར་རིམ་སྤོར་དང་བཟོ་ལས་འཕེལ་རྒྱས་ཀྱིས་དཔལ་འབྱོར་མགྱོགས་མྱུར་འཕར་རྒྱུར་སྐུལ་འདེད་ཐེབས་པ་དང་ཀྲུང་གོ་བ་དུང་ཕྱུར་ཁ་ཤས་དབུལ་པོའི་གནས་ལས་སྒྲོལ་ཞིང་། མཉམ་འབྲེལ་རྒྱལ་ཚོགས་བཟོ་ལས་འཕེལ་རྒྱས་རྩ་འཛུགས་ཀྱིས་དེའི་ཁྲོད་ནུས་པ་འདོན་སྤེལ་ཧུར་ཐག་ཐུབ་པར་ཧ་ཅང་དགའ་པོ་བྱུང་ཞེས་བརྗོད་པ་རེད།
མུའུ་ལེས། མཉམ་འབྲེལ་རྒྱལ་ཚོགས་བཟོ་ལས་འཕེལ་རྒྱས་རྩ་འཛུགས་ཀྱིས་ད་དུང་ཀྲུང་གོ་དང་མཉམ་དུ་འཕེལ་རྒྱས་འགྲོ་བཞིན་པའི་རྒྱལ་ཁབ་གཞན་དག་གི་བཟོ་ལས་འཕེལ་རྒྱས་ལ་སྐུལ་འདེད་གཏོང་གི་ཡོད། འཛམ་གླིང་ཐོག་འཕེལ་རྒྱས་འགྲོ་བཞིན་པའི་རྒྱལ་ཁབ་ཆེ་ཤོས་ཤིག་ཡིན་པའི་ངོས་ནས་ཀྲུང་གོ་ནི་རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་སྟོབས་དང་ལྡན་པའི་མཉམ་ལས་རོགས་ཟླ་ཞིག་ཡིན་པས“རྒྱུད་གཅིག་ལམ་གཅིག”མཉམ་སྐྲུན་གྱིས་རོགས་ཟླའི་འབྲེལ་བ་དེ་གཏིང་ཟབ་དང་རྒྱ་ཆེར་གཏོང་བཞིན་ཡོད། “ལག་རྩལ་ཤེས་བྱ་ནང་བཤུག་དང་མ་འཇོག་མཉམ་ལས་ཀྱི་འབྲེལ་ཟམ་ལྟ་བུ་ཞིག་ཡིན་པའི་མཉམ་འབྲེལ་རྒྱལ་ཚོགས་བཟོ་ལས་འཕེལ་རྒྱས་རྩ་འཛུགས་ཀྱིས‘རྒྱུད་གཅིག་ལམ་གཅིག’མཉམ་སྐྲུན་ནང་མུ་མཐུད་ཧུར་ཐག་ཞུགས་ནས་འབྲེལ་ཡོད་མཉམ་ལས་ཀྱིས་འཕེལ་རྒྱས་འགྲོ་བཞིན་པའི་རྒྱལ་ཁབ་ཁྲོད་ནུས་པ་ཐོན་རྒྱུར་རྒྱབ་སྐྱོར་བྱས་ཏེ་མཉམ་སྐྲུན་རྒྱལ་ཁབ་ལ་ལས་ཞུགས་གསར་གཏོད་དང་དབུལ་པོ་ཉུང་གཏོང་ཐད་རོགས་རམ་བྱེད་པ་དང་དུས་མཚུངས་མ་འཇོག་རྣམ་གྲངས་རྒྱུན་མཐུད་ཆོག་པའི་འཕེལ་རྒྱས་ཡོང་བར་འགན་ལེན་བྱ་རྒྱུ་ཡིན”ཞེས་བརྗོད།