གྲངས་འཛིན་བོད་ལྗོངས་འཛུགས་སྐྲུན་འགོ་ཁྲིད་ཚོགས་ཆུང་གི་མོས་མཐུན་ཐོབ་པ་བརྒྱུད། ཉེ་ཆར། རང་སྐྱོང་ལྗོངས་ཞིང་ལས་གྲོང་གསེབ་ཐིང་གིས《བོད་རང་སྐྱོང་ལྗོངས་ཀྱི་གྲངས་འཛིན་ཞིང་ལས་འཛུགས་སྐྲུན་གྱི་ལག་བསྟར་ཇུས་གཞི(2022ལོ་ནས་2026ལོ)》(གཤམ་དུ《ཇུས་གཞི》ཞེས་བསྡུ་རྒྱུ)བཀྲམ་པ་རེད། 《ཇུས་གཞིའི》ནང་2026ལོར་སླེབས་སྐབས་ཞིང་འབྲོག་ལས་ཐོན་སྐྱེད་དང་། གེགས་འགོག་དང་གནོད་འཚེ་ཉུང་གཏོང་། ཞིང་བབ་ལྟ་ཞིབ། སྲོག་ཆགས་དང་རྩི་ཤིང་གི་རིམས་ནད་སྔོན་འགོག་དང་ཚོད་འཛིན་བཅས་ཀྱི་ཕྱོགས་བསྡུས་ཞིང་བབ་གྲངས་འཛིན་ཅན་གྱི་བཀོད་འདོམས་བཀོད་གཏོང་ཐུབ་པར་བྱས་ནས་གྲོང་གསེབ་ཀྱི་ཆ་འཕྲིན་ཕྱོགས་བསྡུས་ཞབས་ཞུའི“མཐའ་མའི་འགག་གནད”གཞི་རྩའི་ཆ་ནས་བསལ་ཏེ་གྲོང་གསེབ་ཀྱི་ཕྱོགས་བསྡུས་ཆ་འཕྲིན་ཞབས་ཞུའི་ས་ཚིགས་ཁྱབ་ཚད་20%ཟིན་པའི་བརྩོན་ལེན་བྱ་རྒྱུ་ཡིན་ཞེས་བཏོན་ཡོད།

《ཇུས་གཞིའི》ནང་རིག་ནུས་ཞིང་ལས་ཚོད་ལྟའི་ལས་དོན་ལ་མགྱོགས་མྱུར་སྐུལ་འདེད་གཏོང་རྒྱུའི་སྐོར་གྱི་རང་སྐྱོང་ལྗོངས་ཀྱི་བླང་བྱ་དོན་འཁྱོལ་གྱིས་གཙོ་རྒྱུའི་ཐོན་ཁུངས་བསྡུ་སྒྲིལ་འདུས་གྲུབ་དང་མཉམ་སྦྲེལ་མཉམ་མཐུད་ལ་སྣང་ཆེན་བྱས་ནས“སྣེ་གཅིག་དང་། ཁུལ་གསུམ། ཡུག་མང་། གནས་མང”བཅས་ཀྱི་གྲངས་འཛིན་ཞིང་ལས་འཕེལ་རྒྱས་ཀྱི་རྣམ་པ་ཇུས་འགོད་བྱས་པ་དང་། ཞིང་ལས་ཐོན་སྐྱེད་དང་། གཉེར་སྐྱོང་། དོ་དམ་སོགས་ཀྱི་ཞིང་འབྲེལ་ཆ་འཕྲིན་ཐོན་ཁུངས་ཀྱི་ནུས་པ་སྔར་བས་མངོན་གསལ་དོད་པོ་ཡོང་བར་བྱས་ནས་ཞིང་ལས་གྲངས་གཞི་ཆེ་མོའི་ཐོན་ཁུངས་མ་ལག་སྐྲུན་པ་དང་། ཞིང་འབྲོག་ལས་ཀྱི་གཙོ་གནད་ཐོན་ལས་གྲངས་འཛིན་ཅན་གྱི་སྒྱུར་བཀོད་བྱེད་པ། དམངས་ཕན་སྤྱི་པའི་ཆ་འཕྲིན་ཞབས་འདེགས་ལ་ཤུགས་སྣོན་རྒྱག་པ། ཞིང་འབྲོག་ལས་ཀྱི་དོ་དམ་ཞབས་ཞུ་གྲངས་འཛིན་ཅན་ཕྱོགས་སྒྱུར་ལ་སྐུལ་འདེད་གཏོང་བ་སོགས་ཀྱི་དམིགས་ཚད་ལས་འགན་མང་པོ་ཇུས་འགོད་བྱས་ཡོད།

ངོ་སྤྲོད་བྱས་པར་གཞིགས་ན། ཞིང་ལས་གྲོང་གསེབ་ཆ་འཕྲིན་ཅན་དང་གྲངས་འཛིན་ཅན་གྱི་འཛུགས་སྐྲུན་ནི་འཕེལ་རྒྱས་དོ་མི་མཉམ་ཞིང་གང་ལེགས་མ་བྱུང་བའི་གནད་དོན་ཐག་གཅོད་མགྱོགས་པོ་བྱེད་པའི་འཇུག་སྒོ་གལ་ཆེན་ཞིག་དང་། དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ་དང་གྲོང་གསེབ་དར་རྒྱས་དང་འབྲེལ་མཐུད་ནུས་ལྡན་བྱེད་པའི་སྒུལ་ཤུགས་གསར་པ་ཞིག ཞིང་ལས་ཀྱི་རྒྱལ་ཁབ་སྟོབས་ཆེན་འཛུགས་སྐྲུན་བྱེད་པའི་ནང་དོན་གལ་ཆེན་ཞིག་བཅས་རེད་ལ། ལྗོངས་ཡོངས་ཀྱི་གྲངས་འཛིན་དཔལ་འབྱོར་འཛུགས་སྐྲུན་གྱི་གཙོ་གནད་ལས་དོན་ཞིག་ཀྱང་རེད། 《ཇུས་གཞི》བཏོན་པ་དེས་རང་ལྗོངས་སུ“འབྲུ་རིགས་བརྟན་པོ་དང་། འབྲོག་ལས་དར་རྒྱས། ཁྱད་ལྡན་སྟོབས་ཆེན”བཅས་ཡོང་བར་ནང་དོན་གསར་པ་བསྣན་ནས་བོད་ལྗོངས་ས་མཐོའི་ཁྱད་ལྡན་ཞིང་འབྲོག་ཐོན་ལས་ལ་དེ་བས་ནུས་ལྡན་གྱི་འདེགས་སྐྱོར་ཐུབ་ནས་འཕེལ་རྒྱས་ཀྱི་ནུས་ཕྱོད་སྔར་བས་ཆེ་རུ་འགྲོ་རྒྱུ་རེད།