ཀྲུང་དབྱང་བསམ་པའི་དཔལ་ཡོན་སྲོལ་གཏོད་གཞུང་དོན་ཁང་དང་། སློབ་གསོ་པུའུ། གུང་གཞོན་སྡེ་ཚོགས་ཀྲུང་དབྱང་། རྒྱལ་ཡོངས་བུད་མེད་མཉམ་འབྲེལ་ལྷན་ཚོགས། ཀྲུང་གོ་མི་རབས་རྗེས་མར་དོ་ཁུར་ལས་དོན་ཨུ་ལྷན་བཅས་ཀྱིས་ཧུའུ་ནན་ཁྲང་ཧྲ་རུ་2023ལོའི་རྒྱལ་ཡོངས་ཀྱི“དུས་རབས་གསར་པའི་ལོ་ཆུང་བཟང་པོའི”སྔོན་ཐོན་བྱས་རྗེས་ཡོངས་བསྒྲགས་མཛད་སྒོ་མཉམ་དུ་གཉེར་ནས་སྤྱི་ཚོགས་ལ་ཕུལ་བྱུང་ལོ་ཆུང་50ཡི་སྔོན་ཐོན་བྱས་རྗེས་ཡོངས་བསྒྲགས་བྱས་པ་རེད།

ཡོངས་བསྒྲགས་མཛད་སྒོ་དེ་བརྙན་ལམ་ནས་སྟོན་པ་དང་། ས་གནས་ས་ཐོག་ཏུ་བཅར་འདྲི་བྱེད་པ། སྐུ་མགྲོན་གྱིས་མངགས་བཅོལ་བྱེད་པ་སོགས་ཀྱི་རྣམ་པ་བརྒྱུད་ལོ་ཆུང་ཡག་པོ་8ཀྱི་བྱས་རྗེས་གཙོ་གནད་ཐོག་ངོ་སྤྲོད་བྱས་པ་དང་འབྲེལ། དེ་མིན་གྱི་ལོ་ཆུང་ཡག་པོ་42ཀྱི་བྱས་རྗེས་གཅིག་སྡུད་ཐོག་ཁྱབ་བསྒྲགས་བྱས་པ་རེད། ཕུལ་བྱུང་གི་ལོ་ཆུང་དཔེ་མཚོན་50དེ་དག་ནི་ས་གནས་ཁག་ཏུ“དུས་རབས་གསར་པའི་ལོ་ཆུང་བཟང་པོར”སློབ་སྦྱོང་དང་དྲིལ་བསྒྲགས་བྱེད་སྒོ་རྒྱ་ཁྱབ་ངང་སྤེལ་བའི་རྨང་གཞིའི་ཐོག་རིམ་པ་བཞིན་འོས་སྦྱོར་དང་ལེགས་ཁྲོད་ཕུལ་བྱུང་བདམས་ནས་ཐོན་པ་ཞིག་རེད། ཁོང་ཚོ་སྤྱོད་ཡོན་གཉིས་ལྡན་དང་སྐྱེ་སྟོབས་ཀྱི་དཔལ་འབར་ཞིང་། གསར་བརྗེའི་ས་བོན་རྒྱུན་འཛིན་དང་། ཀྲུང་ཧྭའི་རིག་གནས་དར་སྤེལ། ཚན་རིག་དང་ལྐོག་གྱུར་ལ་འཚོལ་ཞིབ། སྐྱེ་ཁམས་ཀྱི་འདུ་ཤེས་ལག་བསྟར། སྤྱི་ཕན་བྱེད་སྒོར་དགའ་ཞེན། མི་རིགས་མཐུན་སྒྲིལ་ལ་སྐུལ་འདེད་སོགས་ཀྱི་ཐད་མཚོན་ཚུལ་མངོན་གསལ་དོད་པོ་ཞིག་ཡོད་ལ། དུས་རབས་གསར་པའི་གཞོན་ནུ་ལོ་ཆུང་གི་ཉམས་འགྱུར་གསར་པ་ཡང་མངོན་ཡོད།

བྱེད་སྒོ་སྤེལ་ཡུལ་དུ“དུས་རབས་ཀྱི་མིག་དཔེ”དབན་པུའུ་ཡན་དང“རྒྱལ་ཡོངས་ཀྱི་ཕུལ་བྱུང་གུང་ཁྲན་ཏང་ཡོན”ཧྲི་ཅིན་ཐུང་སོགས་སྐུ་མགྲོན་གྱིས་ལོ་ཆུང་བཟང་པོ་ཚོ་དང་ངོ་ཐུག་གདོང་འཕྲད་ངང་སྤེལ་རེས་བྱས་ཏེ་ཁོང་ཚོར་ཕུགས་བསམ་ཡོད་པ་བྱས་ནས་རང་ཉིད་འཇོན་ཐང་ཅན་དུ་འགྱུར་རྒྱུར་འབད་བརྩོན་བྱེད་པ་དང་། ནར་སོན་རྗེས་རྒྱལ་ཁབ་དང་སྤྱི་ཚོགས་ལ་ཕན་ཐོགས་པའི་ཤེས་ལྡན་པ་ཞིག་བྱེད་དགོས་པའི་སྐུལ་ལྕག་ཡང་ཡང་བྱས་པ་རེད།

ཡོངས་བསྒྲགས་མཛད་སྒོའི་ཐོག་ལོ་ཆུང་བཟང་པོའི་འཐུས་མིས་རྒྱལ་ཡོངས་ཀྱི་གཞོན་ནུ་ལོ་ཆུང་ལ་གྲོས་འགོ་བཏོན་པ་སྟེ། ང་ནི་དུས་རབས་གསར་པའི་ལོ་ཆུང་བཟང་པོ་ཡིན། ངས་རྒྱལ་ཡོངས་ཀྱི་ལོ་ཆུང་བྱིས་པར་འདོད་ཕྱོགས་དང་ཕུགས་བསམ་ཡོད་པ་དང་། སློབ་སྦྱོང་དང་ངལ་རྩོལ་ལ་དགའ་ཞེན། དྲིན་ཚོར་དང་མཛའ་མཐུན་ཤེས་པ། གསར་གཏོད་དང་འབད་འཐབ་བྱེད་ཕོད་པ་བཅས་ཀྱི་ཀུན་སྤྱོད་དང་། ཤེས་རིག ལུས་རྩལ། མཛེས་རྩལ། ངལ་རྩོལ་བཅས་ཕྱོགས་ཡོངས་ནས་འཕེལ་རྒྱས་ཀྱི་དུས་རབས་གསར་པའི་ལོ་ཆུང་བཟང་པོ་ཞིག་ལ་བརྩོན་ལེན་བྱེད་དགོས་པ་དེ་རེད།