2022ལོའི་ཟླ་7པ་ཚུན་དུ། ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའུ་སྨན་ཁང་གིས“ནད་པ་གཙོ་བོར་བྱེད་པའི”འདུ་ཤེས་སྨན་བཅོས་ཞབས་ཞུའི་ལྷུ་ཚིགས་ཁག་ལ་ཁྱབ་པར་བྱས་ནས་སྨན་བཅོས་ཀྱི་ཉམས་ལེན(Improve Medical Experienceགཤམ་དུ“IME”ཞེས་བསྡུ་རྒྱུ)རྣམ་གྲངས་ལག་བསྟར་བྱ་རྒྱུ་དེ་གཞི་རྟེན་དུ་བྱས་ཏེ་སྨན་བཅོས་ཞབས་ཞུ་བློ་བདེ་ཅན་དང་། རིག་ལྡན་ཅན། གྲངས་འཛིན་ཅན་བཅས་ཀྱི་ཆུ་ཚད་ཕྱོགས་ཡོངས་ནས་མཐོ་རུ་བཏང་སྟེ་སྨན་པ་བསྟེན་པ་དང་སྨན་བཅོས་བྱེད་པའི་མང་ཚོགས་ཀྱི་དཀའ་གནད་བསལ་ནས་སྨན་པ་བསྟེན་སྐབས་མང་ཚོགས་བློ་ཡིད་ཚིམ་ཚད་སྔར་བས་མཐོ་རུ་བཏང་ཡོད།

ཚད་གཞི་མཐོ་པོས་ཇུས་འགོད་བྱས་ཏེ་ནད་པ་བློ་ཡིད་ཚིམ་ཚད་མཐོ་རུ་བཏང་བ།

2023ལོའི་ཟླ་2པར་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའུ་སྨན་ཁང་གི་སྒོ་བསྟེན་སྨན་བཅོས་པུའི་ཀྲུའུ་རེན་ཁྲེང་ཧུའེ“IME”ཡན་ལག་རྣམ་གྲངས་ཏེ། སྒོ་བསྟེན་དྲ་མིག་ཅན་གྱི་དོ་དམ་དང་འགྲོ་འོང་ཟུང་འབྲེལ་གྱི་ཞབས་ཞུའི་རྣམ་པ་གསར་པའི་འགན་འཁུར་བར་གྱུར་ཡོད།

“སྒོ་བསྟེན་སྨན་བཅོས་ཀྱི་ཐོག་སོ་དང་པོའི་ཚོམས་ཆེན་གྱི་བཀོད་སྒྲིག་ལ་གཞིགས་ནས་ནད་པ་སྒོ་བསྟེན་སྨན་ཁང་ནས་འགྲོ་འོང་བྱ་ཡུལ་དང་སྒོ་བསྟེན་སྨན་ཁང་གི་ནད་པའི་གྲངས་འབོར་འཕར་ཆག་དང་འགྲོ་འོང་གི་ཆོས་ཉིད་ལ་ལྟ་ཞིབ་བྱས་ཏེ་སྒོ་བསྟེན་དྲ་མིག་ཅན་གྱི་དོ་དམ་དང་འགྲོ་འོང་ཟུང་འབྲེལ་ཞབས་ཞུའི་རྣམ་པ་གསར་པའི་རྣམ་གྲངས་ཀྱིས་ལས་སྟེགས་ནང་ཁུལ་གྱི་སྨན་བཅོས་སྣེ་ཤན་པའི་ལས་གནས་དང་། རང་འགུལ་སྒྲིག་ཆས་ཀྱི་སྣེ་ཤན་པའི་ལས་གནས། སྐོར་སྐྱོད་སྣེ་ཤན་པའི་ལས་གནས་སོགས་ལས་གནས་མི་འདྲ་བ་ཇུས་འགོད་བྱས་ནས་སྒོ་བསྟེན་སྨན་ཁང་ཚོམས་ཆེན་གྱི་ཁྱབ་ཁོངས་དྲ་མིག་ཅན་དུ་ཁྱབ་པར་བྱེད་པ་དང་ཆབས་ཅིག་འགྲོ་སྐྱོད་ཞབས་ཞུའི་ཚད་གཞི་དང་བྱ་ཐབས་ཀྱང་མཉམ་དུ་བཟོས་ཡོད”ཁྲེང་ཧུའེ་ཡིས་བྱེད་ཐབས་དེས་བར་ཐག་ཉེ་ཤོས་དང་དུས་ཐུང་ནང་ནད་པའི་དགོས་མཁོ་བསྐངས་ནས་སྒོ་བསྟེན་སྨན་ཁང་གི་སྣེ་ཤན་སྨན་པའི་ཞབས་ཞུའི་ནུས་པ་ཆེ་རུ་དང་ལས་ཕྱོད་ཆེ་རུ་ཕྱིན་ཡོད། ཞབས་ཞུའི་རྣམ་པ་གསར་པ་ལག་བསྟར་བྱས་ཚུན། སྒོ་བསྟེན་སྨན་ཁང་ཚོམས་ཆེན་གྱི་རང་འདེམས་སྒྲིག་ཆས་སྤྱོད་ཚད་27%མང་དུ་ཕྱིན་ནས་སྐར་ཁུང་དུ་སྨན་ཡོན་སྐྱེལ་བའི་སྒུག་ཡུན་ཆ་སྙོམས་བྱས་ན་དེ་སྔའི་སྐར་མ་12ནས་སྐར་མ་5ཡི་ནང་ཚུན་དུ་ཐུང་དུ་ཕྱིན་པ་དང་། ཁ་ཆད་སྨན་བཅོས་བྱེད་ཚད་དེ་སྔའི་55%ནས་62.4%བར་མཐོ་རུ་ཕྱིན་པ། ཁ་ཆད་བྱས་རྗེས་ཀྱི་སྨན་བཅོས་སྒུག་ཡུན་ཡང་ཆ་སྙོམས་བྱས་ན་དེ་སྔའི་སྐར་མ་47ནས་སྐར་མ་21བར་ཐུང་དུ་ཕྱིན་ཡོད་ཅེས་བཤད་པ་རེད།

2022ལོ་ཚུན། ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའུ་སྨན་ཁང་གིས་མང་ཚོགས་ཀྱི་སྨན་བཅོས་ཉམས་ལེན་ཟབ་ཏུ་གཏོང་རྒྱུ་དེ་སྨན་ཁང་གི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་ཕྱོགས་ཡོངས་ཀྱི་བཀོད་སྒྲིག་ལ་བཞག་ནས་རྣམ་གྲངས་དོ་དམ་པུའུ་དང“IME”ཆེད་དོན་ཚོགས་ཆུང་བཙུགས་ནས་གསོ་སྦྱོང་ལམ་སྲོལ་ཟམ་མི་ཆད་པར་འཐུས་སྒོ་ཚང་དུ་གཏོང་བ་དང་། རྣམ་གྲངས་ལ་སྐུལ་འདེད་གཏོང་བའི་ལམ་སྲོལ་འཐུས་སྒོ་ཚང་དུ་གཏོང་བ། ལས་བཟོར་སྨན་བཅོས་ཉམས་ལེན་གྱི་ལས་ཀའི་ནང་ཧུར་ཐག་ཞུགས་རྒྱུའི་ལྕག་སྐུལ་བཅས་བྱས་ཏེ་ལས་ཕྱོད་ཆེ་བ་དང་དམིགས་ཚད་མཐོ་བའི་ཕུལ་བྱུང་དོ་དམ་ཚོགས་པ་ཁག་གཅིག་བཙུགས་ཡོད་པ་རེད།

མིག་སྔའི་བར་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའུ་སྨན་ཁང་གིས་འཕྲལ་མཁོ་དང་ཉེན་ཆེའི་གནད་དོན་ཐག་གཅོད་ཚད་ལྡན་དང་མི་སྒེར་གྱི་གནད་དོན་དོ་དམ་བྱེད་སྟངས་གསར་པ་སོགས་ཡན་ལག་རྣམ་གྲངས་9བཙུགས་ནས་ལག་ལེན་བསྟར་བས་སྨན་པ་བསྟེན་སྐབས་མང་ཚོགས་བློ་ཡིད་ཚིམ་ཚད་མཐོ་རུ་ནུས་ལྡན་ཕྱིན་ཡོད་པ་རེད།

བརྒྱུད་རིམ་སྟབས་བདེ་རུ་བཏང་སྟེ་ནད་པ་ཕར་འགྲོ་ཚུར་འོང་བྱེད་ཉུང་དུ་བཏང་བ།

མི་རིང་བའི་གོང་ཉིང་ཁྲི་གྲོང་ཁྱེར་སྤོ་བོ་རྫོང་ཁྲབ་རྨོག་གྲོང་རྡལ་སྲས་གྲོང་ཚོའི་གྲོང་མི་རིན་ཆེན་ཚེ་རིང(འགྱུར་མིང)གཟུགས་པོ་བདེ་པོ་མེད་པའི་དབང་གིས་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའུ་སྨན་ཁང་དུ་སྨན་བཅོས་བྱེད་པར་བསྐྱོད།

རིན་ཆེན་ཚེ་རིང་གིས་མྱོང་ཚོར་ཟབ་མོའི་ངང“དེ་སྔོན་སྨན་ཁང་དུ་སྡོད་སྐབས་ལྟོ་ཕད་ཆེ་ཆུང་སྣ་ཚོགས་ཁྱེར་ནས་བང་སྒྲིག་དགོས་པ་དང་སྐབས་འགར་ད་དུང་སྐར་ཁུང་ཁ་ཤས་ཀྱི་དབར་ཕར་འགྲོ་ཚུར་འོང་ཐེངས་མང་བྱེད་དགོས་པས་འགྲོ་ལུགས་གཉེར་བར་དཀའ་ལས་ཧ་ཅང་ཁག་པོ་ཡོད། ད་ཆ་སྒོ་བསྟེན་སྨན་ཁང་དུ་བརྟག་དཔྱད་བྱས་རྗེས་སྨན་ཁང་དུ་སྡོད་པའི་ཞབས་ཞུའི་ལྟེ་གནས་ཀྱིས་རང་འགུལ་ངང་ང་དང་འབྲེལ་གཏུག་བྱས་ནས་སྨན་ཁང་དུ་ཇི་ལྟར་སྐྱོད་དགོས་མིན་དང་སྨན་ཁང་དུ་སྡོད་པར་ཅ་ལག་གང་དག་འཁྱེར་དགོས་མིན་གསལ་པོར་ཤོད་པ་ཙམ་མ་ཟད། ད་དུང་སྨན་ཁང་དུ་ཞག་སྡོད་བྱེད་རིང་སྨན་ཁང་གིས་སྨན་པའི་བཀའ་བཞིན་ང་ལ་བཟའ་བཏུང་མཁོ་འདོན་བྱས་བྱུང་བས་བློ་ཡིད་ཧ་ཅང་ཚིམ་པོ་བྱུང”ཞེས་བཤད།

སྨན་ཁང་དུ་སྡོད་པའི“གཅིག་འཐུས་རྣམ་པའི”ཞབས་འདེགས་ཀྱི་རིམ་པ་སྤར་བ་དང་དུས་མཚུངས་སྨན་ཁང་གིས་ད་དུང་ཆ་འཕྲིན་ཅན་གྱི་བྱ་ཐབས་ལ་བརྟེན་ནས་སྐར་ཁུང་ཞབས་ཞུའི་ནུས་པ་ནད་ཁུལ་ཚང་མར་ཁྱབ་པར་བྱས་ཡོད། ཟླ་བ་གཉིས་ལྷག་ཙམ་རིང་ལེགས་སྒྲིག་བྱས་པ་བརྒྱུད་ནད་ཁུལ་དུ“གཅིག་འཐུས་རྣམ་པའི”སྨན་རིན་རྩིས་རྒྱག་ཞབས་ཞུ་དངོས་སུ་འཁོར་སྐྱོད་ཐུབ་ནས་ནད་པའམ་ཡང་ན་ནང་མི་ནད་ཁུལ་ནས་དོན་མི་དགོས་པར་སྨན་ཁང་དུ་བསྡད་པའི་སྨན་རིན་རྩིས་རྒྱག་ཐུབ་པ་དང་བརྒྱུད་རིམ་ཧྲིལ་པོར་སྐར་མ་3ནས་5བར་ལས་འགོར་གྱི་མེད་པ་རེད། “ནད་ཁུལ་དུ་སྨན་ཁང་དུ་བསྡད་པའི་སྨན་རིན་རྩིས་རྒྱག་ཐུབ་སྟབས་དུས་ཚོད་དང་ནུས་ཤུགས་གཉིས་ཀ་གྲོན་ཆུང་ཐུབ་ཀྱི་འདུག་པས་བསམ་ཡུལ་ལས་འདས་སོང”ཞེས་ནད་པས་གཅིག་རྗེས་གཉིས་མཐུད་ངང་བསྔགས་བརྗོད་བྱེད་ཀྱི་ཡོད།

བློ་བདེའི་ངང་སྨན་བཅོས་བྱེད་པ་དང་ཞབས་ཞུའི་སྤུས་ཚད་ལེགས་སུ་བཏང་བ།

“བརྟག་དཔྱད་ཀྱི་བརྒྱུད་རིམ་ཧྲིལ་པོ་ཚོར་སྣང་གང་ཡང་མེད་པའི་ངང་ཚར་བ་དང་ན་ཟུག་གང་ཡང་གཏོང་གི་མི་འདུག་པས་དངོས་གནས་ཡག་པོ་འདུག”ཅེས་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའུ་སྨན་ཁང་དུ་ཕོ་ཤེལ་དང་རྒྱུ་ཤེལ་བརྟག་དཔྱད་བྱེད་མཁན་སྐལ་བཟང་སྒྲོལ་མས(འགྱུར་མིང)སེམས་འགུལ་ཐེབས་བཞིན་བཤད།

ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའུ་སྨན་ཁང་གི་བློ་བདེའི་སྨན་བཅོས་དང་དེ་བཞིན་གནད་སྨིན་སྦྲིད་སྨན་རྣམ་གྲངས་ཀྱི་འགན་འཁུར་བ་སྦྲིད་སྨན་ཚན་ཁག་གི་ཀྲུའུ་རེན་གཞོན་པ་ཐང་ཏུང་གིས་གཤགས་བཅོས་བྱེད་དགོས་པའི་ནད་པའི་ཁ་ཚ་དགོས་གཏུགས་ཀྱི་རེ་བ་ནི་བདེ་འཇགས་ལྡན་པ་དང་ན་ཟུག་མེད་པ་བྱ་རྒྱུ་དེ་རེད། ང་ཚོའི་མཐའ་མའི་དམིགས་ཡུལ་ནི་ནད་པ་མི་རེ་ངོ་རེར་བློ་བདེའི་ངང་སྨན་བཅོས་བྱས་ཏེ་ནད་བརྟག་སྨན་བཅོས་བྱེད་རིང་གི་དཀའ་ངལ་དང་གཟུགས་པོ་མི་བདེ་བའི་རིགས་ཉུང་དུ་བཏང་སྟེ་དངངས་སྐྲག་དང་དཀའ་སྡུག་ཆེ་བའི་དབང་གིས་ཁྲག་ཤེད་མཐོ་རུ་འགྲོ་བ་དང་སྙིང་ཁ་འཕར་ཚད་མགྱོགས་སུ་འགྲོ་བ་སོགས་ཀྱི་ཉེན་ཁ་མི་ཐོན་པ་བྱ་རྒྱུ་དེ་རེད་ཅེས་བཤད།

མིག་སྔར་སྨན་ཁང་གིས་བློ་བདེའི་སྨན་བཅོས་དང་གནད་སྨིན་སྦྲིད་སྨན་གྱི་རྣམ་གྲངས་ལ་སྐུལ་འདེད་བཏང་བ་དང་བསྟུན་ནས་བློ་བདེའི་སྨན་བཅོས་ཀྱི་བཀོལ་སྤྱོད་ཁྱབ་ཁོངས་དེ་གཤགས་བཅོས་དང་གཤགས་བཅོས་བྱས་རྗེས་ཀྱི་ན་ཟུག་སྣ་ཚོགས་ཀྱི་སྨན་བཅོས་ཁོ་ནར་སྤྱོད་པ་ཙམ་མ་ཡིན་པར་ད་དུང་ན་ཟུག་མེད་པར་གློ་ཤེལ་བརྟག་དཔྱད་དང་སྨན་བཅོས་དང་བྱིས་པའི་ཁ་སྦུག་སྨན་བཅོས་དང་དེ་བཞིན་དོས་དྲག་རང་བཞིན་གྱི་ན་ཟུག་སོགས་ཁྱབ་ཁོངས་ལའང་སྤྱོད་ཀྱི་ཡོད། “ནད་གཞི་བརྟག་དཔྱད་དང་སྨན་བཅོས་བྱེད་པ་དང་ཆབས་ཅིག་ནད་པའི་དངངས་སྐྲག་དང་སེམས་ཁྲལ་སེལ་བ་དང་བཀོལ་སྤྱོད་བྱེད་རིང་གི་མི་བདེ་བའི་ཚོར་སྣང་ཆུང་དུ་བཏང་སྟེ་ནད་པར་གཤགས་བཅོས་བྱེད་རིང་བདེ་འཇགས་འགན་ལེན་བྱེད་རྒྱུ་ནི་ང་ཚོས་འབད་བརྩོན་བྱེད་པའི་ཁ་ཕྱོགས་རེད”ཅེས་ཐང་ཏུང་གིས་བཤད།