ཀྲུང་གུང་ཀྲུང་དབྱང་གཞུང་དོན་ཐིང་དང་རྒྱལ་སྲིད་སྤྱི་ཁྱབ་ཁང་གཞུང་དོན་ཐིང་གིས《མཉམ་སྡེབ་ནགས་དབང་ལམ་ལུགས་སྒྱུར་བཅོས་གཏིང་ཟབ་བྱེད་པའི་ཇུས་གཞི》བཀྲམ་པ།
ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་གསལ། ཉེ་ཆར། ཀྲུང་གུང་ཀྲུང་དབྱང་གཞུང་དོན་ཐིང་དང་རྒྱལ་སྲིད་སྤྱི་ཁྱབ་ཁང་གཞུང་དོན་ཐིང་གིས《མཉམ་སྡེབ་ནགས་དབང་ལམ་ལུགས་སྒྱུར་བཅོས་གཏིང་ཟབ་བྱེད་པའི་ཇུས་གཞི》བཀྲམ་པ་དང་འབྲེལ་བརྡ་ཐོ་བཏང་ནས། ས་ཁུལ་ཁག་དང་སྡེ་ཚན་ཁག་ལ་དོན་དངོས་དང་ཟུང་འབྲེལ་གྱིས་ལག་བསྟར་དོན་འཁྱོལ་ནན་ཏན་བྱེད་དགོས་པའི་བླང་བྱ་བཏོན་པ་རེད།
《མཉམ་སྡེབ་ནགས་དབང་ལམ་ལུགས་སྒྱུར་བཅོས་གཏིང་ཟབ་བྱེད་པའི་ཇུས་གཞིའི》ནང་བསྟན་དོན། མཉམ་སྡེབ་ནགས་ཚལ་ནི་ཐཱན་བསྡུའི་ནུས་པ་ཆེ་རུ་གཏོང་བའི་གཞི་རྟེན་གལ་ཆེན་ཞིག་དང་། སྐྱེ་ཁམས་བདེ་འཇགས་སྲུང་སྐྱོང་བྱེད་པའི་རྨང་གཞི་གལ་ཆེན་ཞིག གྲོང་གསེབ་དར་རྒྱས་གཏོང་བའི་ཐོན་ཁུངས་གལ་ཆེན་ཞིག་བཅས་རེད། མཉམ་སྡེབ་ནགས་དབང་ལམ་ལུགས་སྒྱུར་བཅོས་བྱེད་པ་དེ་གྲོང་གསེབ་ཀྱི་གཞི་རྩའི་གཉེར་སྐྱོང་ལམ་ལུགས་སྲ་བརྟན་དང་འཐུས་སྒོ་ཚང་དུ་གཏོང་བ་དང་། ཞིང་པའི་ལས་ཞུགས་འབབ་འཕར་ལ་སྐུལ་འདེད་གཏོང་བ། སྐྱེ་ཁམས་ཤེས་དཔལ་འཛུགས་སྐྱོང་བྱེད་པ། ལྗང་མདོག་འཕེལ་རྒྱས་ལ་སྐུལ་འདེད་གཏོང་བ་བཅས་ལ་དོན་སྙིང་གལ་ཆེན་ལྡན་ཡོད། མཉམ་སྡེབ་ནགས་དབང་ལམ་ལུགས་སྒྱུར་བཅོས་གཏིང་ཟབ་བྱས་ནས་སྒྱུར་བཅོས་ཀྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་ཆེད་ཇུས་གཞི་འདི་བཟོས་པ་ཡིན།
མཉམ་སྡེབ་ནགས་དབང་ལམ་ལུགས་སྒྱུར་བཅོས་གཏིང་ཟབ་བྱེད་པར། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱས་ནས། ཏང་གི་ཚོགས་ཆེན་ཉི་ཤུ་པའི་དགོངས་དོན་ལག་བསྟར་གཏིང་ཟབ་བྱེད་པ་དང་། ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་ཕྱོགས་ཡོངས་ནས་ལག་བསྟར་བྱེད་པ། རི་སྔོན་ཆུ་དྭངས་གསེར་དངུལ་རི་ལས་ལྷག་པའི་འདུ་ཤེས་བརྟན་པོར་འཛུགས་པ་དང་ལག་ལེན་བསྟར་བ། མཉམ་སྡེབ་ནགས་དབང་ལམ་ལུགས་གསར་གཏོད་ལ་སྐུལ་འདེད་བརྟན་པོ་ཧུར་ཐག་གཏོང་བ། ཞིང་པ་དང་ནགས་ལས་གཉེར་སྐྱོང་བའི་མཉམ་སྡེབ་ནགས་ཚལ་ཁེ་དབང་ཁྲིམས་ལྟར་སྲུང་སྐྱོང་བྱེད་པ། སྐྱེ་ཁམས་སྲུང་སྐྱོང་དང་ནགས་ལས་འཕེལ་རྒྱས་ཀྱི་ནང་གནས་སྒུལ་ཤུགས་ཆེ་རུ་གཏོང་བ། སྐྱེ་ཁམས་ཐོན་རྫས་ཀྱི་རིན་ཐང་མངོན་འགྱུར་ལམ་སྲོལ་དང་སྐྱེ་ཁམས་ཁ་གསབ་ལམ་ལུགས་ཟམ་མི་ཆད་པར་འཐུས་སྒོ་ཚང་དུ་གཏོང་བ། ནགས་ཚལ་གྱི་བྱེད་ནུས་སྣ་ཚོགས་གང་ལེགས་འདོན་པ། ནགས་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ། ཞིང་པ་དང་གྲོང་གསེབ་ཐུན་མོང་ཕྱུག་འགྱུར་ལ་སྐུལ་འདེད་གཏོང་བ། མི་དང་རང་བྱུང་ཁམས་ཞི་མཐུན་མཉམ་གནས་ལ་སྐུལ་འདེད་གཏོང་བ་བཅས་བྱས་ཏེ་སྐྱེ་ཁམས་མཛེས་པ་དང་མི་སེར་ཕྱུག་པོ་ཆགས་པ་གཉིས་གཅིག་གྱུར་དམ་ཟབ་ཡོང་བ་བྱེད་དགོས།
—— སྒྱུར་བཅོས་ཀྱི་ཁ་ཕྱོགས་མཐའ་འཁྱོངས་ཀྱིས་འཚོལ་ཞིབ་བརྟན་པོ་དང་གཏིང་ཟབ་ཏུ་གཏོང་དགོས། མཉམ་སྡེབ་ནགས་ཁོངས་ས་ཆ་འགན་གཙང་ལེན་པའི་འབྲེལ་བ་ཡུན་རིང་བརྟན་པོ་ཡོང་བའི་འགན་ལེན་བྱས་ནས། ནགས་ཁོངས་ས་ཆ་གཉེར་སྐྱོང་གི་དབང་ཆ་ལྷུག་ཏུ་གཏོང་བ་དང་ནགས་ཤིང་གི་བདག་དབང་འགན་ལེན་བྱེད་དགོས། མང་ཚོགས་ཀྱི་གསར་གཏོད་ཀྱི་སྙིང་སྟོབས་ལ་བརྩི་འཇོག་བྱས་ནས། ཉམས་མྱོང་ཕྱོགས་སྡོམ་དང་བྱེད་སྟངས་དུས་ཐོག་ཏུ་བསྡུ་ལེན་བྱེད་པ་དང་། ཁུལ་དབྱེ་རིགས་དབྱེའི་ངང་སྲིད་ཇུས་ལག་ལེན་བསྟར་བ། གནད་དོན་གྱི་སྟོན་ཕྱོགས་འབུར་དུ་ཐོན་པ། མཐའ་ཚད་ཀྱི་བསམ་གཞིག་མཐའ་འཁྱོངས་བྱེད་པ། རྒྱུག་པ་ལེབ་རྡུང་དང་བཙན་ཤེད་ཀྱིས་བཀའ་མི་གཏོང་བ་བཅས་བྱས་ཏེ། སྒྱུར་བཅོས་ཐོག་མཐའ་བར་གསུམ་དུ་ཡང་དག་པའི་ཁ་ཕྱོགས་བརྒྱུད་བྱེད་ཐུབ་པའི་འགན་ལེན་བྱེད་དགོས།
—— སྐྱེ་ཁམས་སྔོན་ལ་འཇོག་རྒྱུ་མཐའ་འཁྱོངས་ཀྱིས་ལྗང་མདོག་འཕེལ་རྒྱས་གཏོང་དགོས། སྐྱེ་ཁམས་སྲུང་སྐྱོང་བྱ་རྒྱུ་ཨང་དང་པོར་བཞག་ནས། ནགས་ཚལ་ཐོན་ཁུངས་གྲོན་ཆུང་དང་ལེགས་བསྡུས་ཞིབ་གཉེར་རྒྱུན་འཁོར་བེད་སྤྱོད་ལ་སྐུལ་འདེད་གཏོང་བ་དང་། སྲུང་སྐྱོང་དང་འཕེལ་རྒྱས་ལ་སྤྱི་འདོམས་བྱེད་པ། ཚན་རིག་དང་མཐུན་པའི་ངང་ནགས་ཚལ་གཉེར་སྐྱོང་བྱེད་པ། ནགས་ཚལ་གྱི་སྤུས་ཚད་མཐོ་རུ་གཏོང་བ། སྐྱེ་ཁམས་ཐོན་རྫས་མཁོ་སྤྲོད་བྱེད་མང་དུ་གཏོང་བ་བཅས་བྱས་ཏེ་ནགས་ཚལ་གྱི་སྐྱེ་ཁམས་ཀྱི་ཕན་འབྲས་དང་། དཔལ་འབྱོར་གྱི་ཕན་འབྲས། སྤྱི་ཚོགས་ཀྱི་ཕན་འབྲས་བཅས་ཆེ་རུ་གཏོང་དགོས།
—— ཞིང་པའི་རེ་འདོད་ལ་བརྩི་འཇོག་བྱ་རྒྱུ་མཐའ་འཁྱོངས་ཀྱིས་ཞིང་པའི་ཁེ་དབང་ལ་སྲུང་སྐྱོང་བྱེད་དགོས། ཐོན་ཁུངས་བཀོད་སྒྲིག་ཁྲོད་ཀྱི་ཁྲོམ་རའི་ཐག་གཅོད་རང་བཞིན་གྱི་ནུས་པ་གང་ལེགས་བཏོན་ནས། སྲིད་གཞུང་གི་ནུས་པ་དེ་བས་ལེགས་པར་འདོན་པ་དང་། འཕེལ་རྒྱས་ལ་མཁོ་བ་དང་། གཞི་རིམ་གྱི་རེ་སྒུག དམངས་སེམས་གཏད་ཕྱོགས་བཅས་ཀྱི་སྒྱུར་བཅོས་བྱེད་ཐབས་ཁག་གཅིག་ལག་ལེན་བསྟར་ཏེ་མང་ཚོགས་ལ་ཐོབ་སྣང་དང་། སྐྱིད་སྣང་། བདེ་སྣང་བཅས་དེ་བས་མང་བ་ཡོད་པ་བྱེད་དགོས།
2025ལོར་སླེབས་སྐབས། བདག་དབང་ཁ་གསལ་དང་། འགན་དབང་ཁེ་གསུམ་གཅིག་གྱུར། སྲུང་སྐྱོང་ནན་པོ། འཁོར་རྒྱུག་གོ་རིམ་ལྡན་པ། ལྟ་འདོམས་ནུས་ལྡན་བཅས་ཀྱི་མཉམ་སྡེབ་ནགས་དབང་ལམ་ལུགས་གཞི་རྩའི་ཆ་ནས་ཆགས་པ་བྱ་རྒྱུ་རེད། དེའི་རྨང་གཞིའི་ཐོག་སྒྱུར་བཅོས་མུ་མཐུད་གཏིང་ཟབ་བྱེད་པ་བརྒྱུད། ནགས་ལས་ཀྱི་གཞི་ཁྱོན་འོས་འཚམ་ངང་གཉེར་སྐྱོང་བྱེད་ཕྱོགས་སྔར་བས་འཕེལ་རྒྱས་བཏང་ནས། ནགས་ཚལ་གཉེར་སྐྱོང་དེ་བས་ཚན་རིག་དང་མཐུན་ལ་ཕན་འབྲས་ཆེ་བ་དང་། རྒྱབ་སྐྱོར་སྲུང་སྐྱོང་ལམ་ལུགས་དེ་བས་འཐུས་སྒོ་ཚང་བ། ནགས་དབང་རིན་ཐང་འཕར་ཐབས་དེ་བས་སྣ་མང་བཅས་ལ་སྐུལ་འདེད་གཏོང་བ་བཅས་བྱས་ཏེ། ནགས་ཚལ་ཐོན་ཁུངས་རྒྱུན་མཐུད་འཕར་བ་དང་། ནགས་ཚལ་སྐྱེ་ཁམས་ཀྱི་སྤུས་ཚད་རྒྱུན་མཐུད་མཐོ་རུ་འགྲོ་བ། ནགས་ཁུལ་འཕེལ་རྒྱས་ཀྱི་ཆ་རྐྱེན་རྒྱུན་མཐུད་ལེགས་སུ་འགྲོ་བ། ཞིང་པའི་ཡོང་འབབ་རྒྱུན་མཐུད་མང་དུ་འགྲོ་བ་བཅས་ལ་ཟམ་མི་ཆད་པར་སྐུལ་འདེད་གཏོང་རྒྱུ་རེད།