འདི་ནི་ཅི་ཆིང་མྱུར་བགྲོད་གཞུང་ལམ་གྱི་ཅི་ཝུའེ་དུམ་བུ་ཡིན་པ།

 ཟླ་9ཚེས་24ཉིན་རླངས་འཁོར་ཐོག་མ་མྱུར་བགྲོད་གཞུང་ལམ་བརྒྱུད་ནས་བསྐྱོད་དེ། ཧྲན་ཏུང་མྱུར་བགྲོད་ཚོགས་པས་མ་དངུལ་བཏང་ནས་བསྐྲུན་པའི་ཅི་ཆིང་མྱུར་བགྲོད་གཞུང་ལམ་གྱི་ཅི་ཝུའེ་དུམ་བུར་རླངས་འཁོར་དངོས་སུ་ཤར་གཏོང་ཐུབ་ཡོད། ངོ་སྤྲོད་བྱས་པར་གཞིགས་ན། ཅི་ཆིང་མྱུར་བགྲོད་གཞུང་ལམ་གྱི་ཅི་ཝུའེ་དུམ་བུ་ནི་རྒྱལ་ཡོངས་ཀྱི་ཐཱན་མེད་རིག་ལྡན་གྱི་མྱུར་བགྲོད་གཞུང་ལམ་ཐོག་མ་ཡིན་ཞིང་། རྒྱལ་ནང་དུ“རྨང་གཞིའི་སྒྲིག་བཀོད་དྲ་བ་དང་། སྐྱེལ་འདྲེན་ཞབས་ཞུའི་དྲ་བ། ཚོར་ཆས་འཕྲིན་གཏོང་དྲ་བ། ལྗང་མདོག་ནུས་རྒྱུའི་དྲ་བ”བཅས་ཀྱི་མཉམ་འདྲེས་བྱེད་སྟངས་སྔོན་ལ་བཏོད་པ་དང་། རིགས་གཅིག་མཁས་ཅན་ཚོགས་ཆུང་གིས་དཔྱད་ཞིབ་བྱས་པ་བརྒྱུད། “ཐཱན་མེད་རིག་ལྡན་གྱི་འགག་རྩའི་ལག་རྩལ་དང་དེ་བཞིན་ལས་གྲྭའི་དཔེ་སྟོན”གྲུབ་འབྲས་སྤྱིའི་ཆ་ནས་རྒྱལ་སྤྱིའི་སྔོན་ཐོན་གྱི་ཆུ་ཚད་དུ་སླེབས་ཏེ། རང་རྒྱལ་གྱི་མྱུར་བགྲོད་གཞུང་ལམ་འཕེལ་རྒྱས་ཀྱི་དུས་རབས་གསར་པ་བརྩམས་ཡོད།

“ཐཱན་མེད་མྱུར་བགྲོད་གཞུང་ལམ”བསྐྲུན་པའི་ཐད་ཅི་ཆིང་མྱུར་བགྲོད་གཞུང་ལམ་གྱི་ཅི་ཝུའེ་དུམ་བུར་གྱེན་ཐུར་གྱི་འོད་ཧྥུའུ་དང་རིག་ནུས་གློག་དྲ་ཆུང་ངུ་སོགས་ཀྱི་ལག་རྩལ་ཚད་བརྒལ་ཐུབ་ལ། ནུས་རྒྱུ་གསར་པའི་དོ་དམ་ཚོད་འཛིན་གྱི་ལས་སྟེགས་ཞིབ་སྤེལ་བྱས་ཏེ། རྒྱལ་ཡོངས་ཀྱི་འོད་ཧྥུའུ་གྱེན་ཐུར་གཞི་གཅིག་ཅན་གྱི་ཚོད་ལྟའི་ལམ་དུམ་ཐོག་མ་དང་ཐཱན་མེད་ཚད་ལྡན་ལམ་དུམ་ཐོག་མ་བཏོད་པ་དང་། གཉེར་སྐྱོང་བྱེད་རིང་མྱུར་བགྲོད་གཞུང་ལམ་ཐོག་བཙོག་འབུད་ཁྱོན་ནས་མེད་པ་བཟོས་ཡོད། “རིག་ལྡན་མྱུར་བགྲོད”བསྐྲུན་རིང་། ཅི་ཆིང་མྱུར་བགྲོད་གཞུང་ལམ་གྱི་ཅི་ཝུའེ་དུམ་བུས་དྲ་སྤྲིན་དོ་དམ་ཞབས་ཞུ་གསར་གཏོད་དང་གྲངས་གཞི་ཆེ་མོ་བེད་སྤྱོད་གང་ལེགས་ཀྱིས་གྲངས་འཛིན་ཅན་དང་ཆ་འཕྲིན་ཅན་ལ་བརྟེན་ནས་འཆར་འགོད་ལས་སྒྲུབ་དང་གཉེར་སྐྱོང་བདག་སྐྱོང་ལ་ཕྱོགས་ཡོངས་ནས་ནུས་པ་སྦྱིན་པས། སྤྱོད་ཡུན་ཧྲིལ་པོའི་དུས་འཁོར་གྱི་གྲངས་འཛིན་ཅན་གྱི་རྩིས་སྤྲོད་དང་། ཞིང་ཆེན་རིམ་པའི་འཁོར་ལམ་མཐུན་སྦྱོར་གྱི་དྲ་སྤྲིན་ལས་སྟེགས། རིག་ལྡན་ལམ་དྲའི་དོ་དམ་ཚོད་འཛིན་ལས་སྟེགས། མྱུར་བགྲོད་གཞུང་ལམ་གྱི་ཕུག་ལམ་གྱི་མྱུར་ཚད་མི་གཅོག་པའི་འཁོར་སྐྱོད་སོགས་རྒྱལ་ཡོངས་ཀྱི་ཐོག་མ་མང་པོ་བཏོད་ཡོད།

ཅི་ཆིང་མྱུར་བགྲོད་གཞུང་ལམ་གྱི་ཅི་ཝུའེ་དུམ་བུ་ནི་ཧྲན་ཏུང་ཞིང་ཆེན་གྱི“འཕྲེད་དགུ་གཞུང་ལྔ་འཁོར་གཅིག་ཁྱབ་བདུན་སྦྲེལ་མང”བཅས་ཀྱི་མྱུར་བགྲོད་གཞུང་ལམ་དྲ་བའི་ཁྲོད་ཀྱི“ཁྱབ་གསུམ”ལམ་ཐིག་དེ་ཡིན་པ་དང་། སྤྱིའི་རིང་ཚད་སྤྱི་ལེ་161.86ཟིན་པ་དང་མྱུར་ཚད་ཆུ་ཚོད་རེར་སྤྱི་ལེ་120ཟིན་པ་མ་ཟད། ཕྱོགས་གཉིས་ཀར་སྐྱོད་ཆོག་གི་ཡོད་པ་རེད།