ཉེ་ཆར། འགག་སྒོ་སྤྱི་ཁྱབ་ཧྲུའུ་དང་། ཆེས་མཐོའི་མི་དམངས་ཁྲིམས་ཁང་། ཆེས་མཐོའི་མི་དམངས་ཞིབ་དཔྱོད་ཁང་བཅས་ཀྱིས་རྒྱལ་ཡོངས་ཀྱི་ཁྱབ་ཁོངས་སུ་ཁྲིམས་འགལ་ངང་བཙན་འཛུལ་སྐྱེ་དངོས་ནང་འདྲེན་བྱེད་པའི་ཉེས་གསོག་བྱེད་སྤྱོད་ལ་དམིགས་ཏེ་དུས་ཡུན་ལོ་གཅིག་གི་ཆེད་དོན་བྱ་སྤྱོད་མཉམ་འབྲེལ་ཐོག་སྤེལ་ནས་བཙན་འཛུལ་སྐྱེ་དངོས་འགག་སྒོ་ནས་ནང་འདྲེན་བྱེད་པར་འགོག་ཟོན་མཐའ་གཅིག་ཏུ་བྱ་རྒྱུའི་གཏན་འབེབས་བྱས་པ་རེད།

ཉེ་བའི་ལོ་ཤས་རིང་རྒྱལ་སྤྱིའི་ཚོང་དོན་འཕེལ་རྒྱས་མྱུར་པོ་དང་མི་སྣ་འགྲོ་འོང་ཉིན་བཞིན་མང་དུ་སོང་བ་དང་བསྟུན་ནས་ཁྲིམས་འགལ་ངང་བཙན་འཛུལ་སྐྱེ་དངོས་ནང་འདྲེན་དང་དེ་བཞིན་ཉོ་ཚོང་བྱེད་མཁན་ཇེ་མང་དུ་ཕྱིན་པ་དང་། མངའ་ཁོངས་ཕྱིའི་སྐྱེ་དངོས་ནང་འདྲེན་གྱི་ཐབས་ལམ་རྒྱུན་ཆད་མེད་པར་མང་དུ་ཕྱིན་པ། ནང་འདྲེན་གྱི་ཉེན་ཁ་མུ་མཐུད་ཆེ་རུ་ཕྱིན་ནས་རང་རྒྱལ་གྱི་སྐྱེ་ཁམས་ཀྱི་བདེ་འཇགས་དང་སྐྱེ་དངོས་ཀྱི་བདེ་འཇགས་ལ་འཇིགས་སྐུལ་ཕོག་ཤུགས་མུ་མཐུད་ཆེ་རུ་ཕྱིན་ཡོད། ཤེས་རྟོགས་བྱུང་བར་གཞིགས་ན། འདི་ལོའི་ཟླ་1པོ་ནས་8པའི་བར་རྒྱལ་ཡོངས་འགག་སྒོ་ལས་ཁུངས་ཀྱིས་རིམ་རྩིས་བྱས་ན་སྲོག་ཆགས་དང་རྩྭ་རྩི་ཤིང་རིགས་1826ནང་འདྲེན་གཏན་འགོག་བྱས་པ་མ་ཟད། ཁྲིམས་འགལ་ངང་སྐྱེ་དངོས་ནང་འདྲེན་བྱེད་མཁན་ཉེས་གསོག་ཚོགས་པ་མང་པོ་ཞིག་རྩ་མེད་བཟོས་པ་རེད།

སྤྱི་ཡོངས་ཀྱི་རྒྱལ་ཁབ་བདེ་འཇགས་ལྟ་བ་ལག་བསྟར་དོན་འཁྱོལ་མཐའ་གཅིག་ཏུ་བྱེད་པ་དང་། བཙན་འཛུལ་སྐྱེ་དངོས་ཀྱི་གནོད་འཚེ་འགོག་བཅོས། སྐྱེ་དངོས་སྣ་མང་རང་བཞིན་སྲུང་སྐྱོང་། སྐྱེ་ཁམས་ཁོར་ཡུག་སྲུང་སྐྱོང་བཅས་བྱ་ཆེད། ཉེས་ཁྲིམས་དང་། ཉེས་དོན་གཏུག་བཤེར་བཅའ་ཁྲིམས། སྐྱེ་དངོས་བདེ་འཇགས་བཅའ་ཁྲིམས་སོགས་བཅའ་ཁྲིམས་ཀྱི་འབྲེལ་ཡོད་གཏན་འབེབས་གཞིར་བཟུང་རྒྱལ་ཡོངས་འགག་སྒོ་ལས་ཁུངས་དང་། རིམ་ཁག་མི་དམངས་ཁྲིམས་ཁང་། རིམ་ཁག་མི་དམངས་ཞིབ་དཔྱོད་ཁང་བཅས་ཀྱིས་མཉམ་འབྲེལ་ཐོག་བྱ་སྤྱོད་སྤེལ་ནས་ཁུངས་སྣེ་འཚོལ་བསྡུ་བྱེད་ཤུགས་ཆེ་རུ་བཏང་སྟེ་ཟོག་འདྲེན་དང་། འཁྱེར་བ། བསྐུར་བ། རྒྱལ་སྒྲོལ་དྲ་ཐོག་ཚོང་དོན། མཐའ་མཚམས་མི་སེར་གྱི་ཁྲོམ་ར་སོགས་བརྒྱུད་པའི་བཙན་འཛུལ་སྐྱེ་དངོས་ལ་ཞིབ་བཤེར་བརྟག་དཔྱད་བྱེད་ཤུགས་ཆེ་རུ་གཏོང་བ་དང་། སྲིད་འཛིན་ཁྲིམས་སྒྱུར་དང་ཉེས་དོན་ཁྲིམས་འཛིན་དབར་འབྲེལ་མཐུད་དང་གཞོགས་འདེགས་བྱེད་ཤུགས་ཆེ་རུ་བཏང་སྟེ། ཁྲིམས་འགལ་ཉེས་གསོག་གི་དོགས་ཡོད་གྱོད་གཞི་དུས་ཐོག་ཏུ་རྩིས་སྤྲོད་དང་། གྱོད་དོན་ཐོ་འགོད། མྱུལ་ཞིབ། ཁྲིམས་ལ་སྦྱོར་བ། འདྲི་གཅོད་བཅས་བྱས་ཏེ། ཁྲིམས་ལྟར་ཉེས་དོན་འགན་འཁྲི་རྩད་གཅོད་དང་དཔེ་མཚོན་གྱོད་གཞི་ཁག་གཅིག་ཞིབ་གཅོད་བྱས་ནས་ཁྲིམས་འཛིན་གྱི་ཟིལ་ཤུགས་ཆགས་པར་བྱེད་པ། གྱོད་དོན་བརྡ་ཁྱབ་དང་གྱོད་གཞི་རྩིས་སྤྲོད་ཀྱི་ལམ་སྲོལ་འཛུགས་པ་དང་འཐུས་སྒོ་ཚང་དུ་བཏང་སྟེ་མཉམ་འབྲེལ་ཐོག་གྱོད་གཞི་ཆེ་གྲས་ལ་ལྟ་བཤེར་དང་སྒྲུབ་སྐུལ་བྱེད་པ། འབྲེལ་ཡོད་ཁྲིམས་སྲོལ་དང་སྲིད་ཇུས་ལ་འགྲེལ་བཤད་ཧུར་ཐག་བརྒྱབ་ནས་སྤྱི་དམངས་ཀྱིས་རང་རྟོགས་ངང་འབྲེལ་ཡོད་ཁྲིམས་འགལ་བྱེད་སྤྱོད་རིང་དུ་སྤོངས་བ་དང་བཀག་འགོག་བྱེད་པར་ཁྲིད་སྟོན་བྱས་ཏེ་ཁྲིམས་འགལ་ངང་བཙན་འཛུལ་སྐྱེ་དངོས་ནང་འདྲེན་བྱེད་པའི་བྱེད་སྤྱོད་ལ་རྡུང་རྡེག་གཏོང་བའི་མཉམ་ཤུགས་ཤིག་ཆགས་པར་བྱས་ཡོད།