ཚེས་19ཉིན་རྒྱལ་ཁབ་སྦྲག་སྲིད་ཅུས་ཀྱིས་རང་རྒྱལ་གྱི་ཟླ་དང་པོ་ནས་བརྒྱད་པའི་བར་གྱི་སྦྲག་སྲིད་མྱུར་སྐྱེལ་ལས་སྒོའི་འཁོར་རྒྱུག་གནས་ཚུལ་ཁྱབ་བསྒྲགས་བྱས་ཤིང་། གྲངས་གཞི་ལས་མངོན་པར། ཟླ་དང་པོ་ནས་བརྒྱད་པའི་བར། རང་རྒྱལ་སྦྲག་སྲིད་ལས་རིགས་ཀྱི་བསྐུར་སྐྱེལ་ལས་སྒོའི་ཁ་གྲངས་རིམ་རྩིས་ཀྱིས་དུང་ཕྱུར་1009.6ཟིན་པ་དང་དུས་མཚུངས་ལས་13.1%འཕར་ཡོད། དེའི་ནང་མྱུར་སྐྱེལ་ལས་སྒོའི་ཁ་གྲངས་རིམ་རྩིས་བྱས་ན་དུང་ཕྱུར་814.6ཟིན་པ་དང་དུས་མཚུངས་ལས་15.9%འཕར་ཡོད། ཡོང་འབབ་ལ་བལྟས་ཚེ་ཟླ་དང་པོ་ནས་བརྒྱད་པའི་བར། སྦྲག་སྲིད་ལས་རིགས་ཀྱི་ལས་སྒོའི་ཡོང་འབབ་རིམ་རྩིས་བྱས་ན་སྒོར་དུང་ཕྱུར་9708.5ཟིན་པ་དང་དུས་མཚུངས་ལས་10.4%འཕར་ཡོད། དེའི་ནང་མྱུར་སྐྱེལ་ལས་སྒོའི་ཡོང་འབབ་རིམ་རྩིས་བྱས་ན་སྒོར་དུང་ཕྱུར་7488.1ཟིན་པ་དང་དུས་མཚུངས་ལས་10.7%འཕར་ཡོད།

ཟླ་བརྒྱད་པར་སྦྲག་སྲིད་ལས་རིགས་ཀྱི་བསྐུར་སྐྱེལ་ལས་སྒོའི་ཁ་གྲངས་དུང་ཕྱུར་135.9ཟིན་པ་དང་དུས་མཚུངས་ལས་14.8%འཕར་བ་དང་། དེའི་ནང་མྱུར་སྐྱེལ་ལས་སྒོའི་ཁ་གྲངས་དུང་ཕྱུར་111.6ཟིན་པ་དང་དུས་མཚུངས་ལས་18.3%འཕར་ཡོད། འདི་ལོ་ནས་བཟུང་རང་རྒྱལ་གྱི་མྱུར་སྐྱེལ་ལས་འབོར་མུ་མཐུད་ཆེ་རུ་ཕྱིན་ནས་ཟླ་དྲུག་བསྟུད་མར་དུང་ཕྱུར་བརྒྱ་ལྷག་ཙམ་ལས་བརྒལ་ཡོད་པ་རེད། ཟླ་རེར་ཆ་སྙོམས་མྱུར་སྐྱེལ་དུང་ཕྱུར་བརྒྱ་ལྷག་ཙམ་ཟིན་པ་རྒྱུན་རྣམ་ཞིག་ཏུ་ཆགས་པ་དེ་ཐོག་ནས་ལས་རིགས་ཀྱི་འཕེལ་རྒྱས་མདུན་ལམ་བཟང་པོ་མངོན་པ་དང་འཛད་སྤྱོད་ཁྲོམ་ར་མུ་མཐུད་སླར་གསོ་བྱུང་བའི་རྣམ་པ་བཟང་པོ་ཞིག་མངོན་ཡོད།

ལས་སྒོའི་གཞི་ཁྱོན་མུ་མཐུད་ཆེ་རུ་འགྲོ་བ་དང་དུས་མཚུངས་ཁྲོམ་རའི་གྲུབ་ཆའང་མུ་མཐུད་ལེགས་སུ་ཕྱིན་ཞིང་། ཟླ་དང་པོ་ནས་བརྒྱད་པའི་བར་དབུས་ནུབ་རྒྱུད་ཀྱི་མྱུར་སྐྱེལ་ལས་འབོར་གྱིས་རྒྱལ་ཡོངས་ཀྱི་མྱུར་སྐྱེལ་ལས་འབོར་ནང་བཟུང་ཚད་དུས་མཚུངས་ལས་བརྒྱ་ཆའི་གྲངས་1.2འཕར་བ་དང་གྲོང་གསེབ་ཀྱི་མྱུར་སྐྱེལ་ལས་འབོར་འཕར་ཚད་དེ་གྲོང་ཁྱེར་གྱི་མྱུར་སྐྱེལ་ལས་འབོར་འཕར་ཚད་ལས་སྔར་བཞིན་མཐོ་བ་ཡོད་པ་དང་། རྒྱལ་སྤྱི་དང་ཤང་ཀང་དང་། ཨའོ་མོན། ཐའེ་དབན་བཅས་ཀྱི་མྱུར་སྐྱེལ་ལས་འབོར་མགྱོགས་མྱུར་འཕར་ནས་དུས་མཚུངས་ལས་56.3%འཕར་ཡོད་པ་རེད། དུས་མཚུངས་སུ་ཞབས་ཞུའི་སྤུས་ཕན་མུ་མཐུད་ལེགས་སུ་ཕྱིན་ནས་ཟླ་བརྒྱད་པར་མྱུར་སྐྱེལ་ཞབས་ཞུར་སྤྱི་དམངས་ཀྱི་བློ་ཡིད་ཚིམ་ཚད་དང་ཆུ་ཚོད་72ནང་མྱུར་སྐྱེལ་དུས་ཐོག་ཏུ་འབྱོར་ཚད་82.8%དང་84.4%སོ་སོར་ཟིན་ནས་ལོ་རྒྱུས་ཀྱི་ཆུ་ཚད་མཐོ་བའི་གྲས་སུ་སླེབས་ཡོད་པ་རེད།

སྦྲག་སྲིད་མྱུར་སྐྱེལ་ལས་སྒོ་བརྟན་ཐོག་ཡར་བརྩོན་གྱི་འཕེལ་རྒྱས་མྱུར་པོ་བྱུང་བ་དེ་ཕྱོགས་གཅིག་ནས་ཁྲོམ་རའི་དགོས་མཁོ་མུ་མཐུད་ཆེ་རུ་ཕྱིན་པ་ལས་བྱུང་ཞིང་། དྲ་ཐོག་ཟོག་ཉོ་ནི་ལས་རིགས་འཕེལ་རྒྱས་འགྲོ་བའི་སྒུལ་ཤུགས་གཙོ་བོ་ཞིག་རེད། ཟླ་དང་པོ་ནས་བརྒྱད་པའི་བར། དྲ་ཐོག་ནས་ཚོང་ཟོག་སིལ་ཚོང་བྱེད་ཚད་དུས་མཚུངས་ལས་9.5%འཕར་བ་དང་སྤྱི་ཚོགས་ཀྱི་འཛད་རྫས་སིལ་ཚོང་བསྡོམས་འབོར་གྱི་26.4%བཟུང་བ་དང་དུས་མཚུངས་ལས་བརྒྱ་ཆའི་གྲངས་0.8འཕར་ཡོད། གྲོང་གསེབ་ཀྱི་མྱུར་སྐྱེལ་དང་། བཟོ་གྲྭའི་མྱུར་སྐྱེལ། རྒྱལ་སྒྲོལ་མྱུར་སྐྱེལ་མགྱོགས་མྱུར་འཕེལ་རྒྱས་བྱུང་ནས་ལས་རིགས་ཀྱི་བཀྲག་མདངས་འཚེར་ས་ཤིག་ཏུ་གྱུར་ཡོད། ཕྱོགས་གཞན་ཞིག་ནས་མཁོ་སྤྲོད་ནུས་པ་མངོན་གསལ་དོད་པོས་ཆེ་རུ་ཕྱིན་པ་ལས་བྱུང་ཞིང་། འདི་ལོ་ནས་བཟུང་སྦྲག་སྲིད་མྱུར་སྐྱེལ་གྱི་ལྟེ་བའི་དྲ་བ་མགྱོགས་མྱུར་འཛུགས་སྐྲུན་བྱས་ནས་ཞབས་ཞུའི་ཁྱབ་ཁོངས་མུ་མཐུད་རྒྱ་ཆེར་ཕྱིན་ཏེ་ས་ཁོངས་ཀྱི་ཁྱབ་འགྱེད་ནུས་པ་དང་ཐོན་ལས་ཀྱི་ཞབས་ཞུའི་ནུས་པ་རྒྱུན་ཆད་མེད་པར་ཆེ་རུ་ཕྱིན་ཡོད་པ་རེད།