མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། ཟླ་9ཚེས་15ཉིན་གསར་འགོད་པར་མཚོ་སྔོན་ཞིང་ཆེན་ཐུམ་འབུའི་ནད་ཕྱོགས་བསྡུས་འགོག་བཅོས་བྱ་ཡུལ་གྱི་སྐུལ་སྤེལ་ཚོགས་འདུའི་ཐོག་ནས་ཤེས་རྟོགས་བྱུང་བར། ཞིང་ཆེན་ཡོངས་ཀྱི་ས་གནས་ཁག་དང་སྡེ་ཚན་ཁག་གིས་ཐུམ་འབུའི་ནད་སྔོན་འགོག་དང་ཚོད་འཛིན་གྱི་བྱེད་ཐབས་ཁག་ནུས་ལྡན་ངང་དོན་འཁྱོལ་བྱ་རྒྱུར་ནུས་ཤུགས་ཡོད་རྒུས་སྐུལ་འདེད་བཏང་སྟེ། 2022ལོའི་ལོ་མཇུག་བར་ཞིང་ཆེན་ཡོངས་ཀྱིས་རིམ་རྩིས་བྱས་ན་མི་ཁྲི་488.83ལ་ཐུམ་འབུའི་ནད་གྲལ་བཤེར་བྱས་པ་དང་། ཞིང་ཆེན་ནང་ཁུལ་གྱི་དར་ཁྱབ་ཁུལ་གྱི་རྒྱུན་སྡོད་མི་འབོར་ཚང་མར་གྲལ་བཤེར་བྱས་པས། ནད་རྟགས་དེ་ཡོད་པའི་ནད་པ་སྐྱོབ་བཅོས་ཐུབ་ཚད་100%ཟིན་པ་དང་། མི་ཚོགས་ཀྱི་ཐུམ་འབུའི་ནད་ཕོག་ཚད་0.14%བར་ཆག་པ། གཤགས་བཅོས་བྱ་རྒྱུར་འཚམ་པ་མ་ཟད། གཤགས་བཅོས་བྱེད་འདོད་མཁན་གྱི་ནད་པར་སྐབས་བསྟུན་གཤགས་བཅོས་ཐུབ་ནས། ཞིང་ཆེན་ཡོངས་ཀྱི་ཐུམ་འབུའི་ནད་ཚབས་ཆེན་ཁྱབ་པའི་རྣམ་པར་ཚོད་འཛིན་ནུས་ལྡན་ཐུབ་ཡོད་པ་རེད།

ཟླ་9ཚེས་1ཉིན《མཚོ་སྔོན་ཞིང་ཆེན་གྱི་ཐུམ་འབུའི་ནད་འགོག་བཅོས་སྲོལ་ཡིག》དངོས་སུ་ཁྱབ་བསྒྲགས་བྱས་ནས་ལག་བསྟར་བྱས་ཤིང་། ཞིང་ཆེན་ཡོངས་ཀྱིས་སྲོལ་ཡིག་བཏོན་ནས་ལག་ལེན་བསྟར་བ་དེ་གོ་སྐབས་སུ་བྱས་ཏེ་ཐོག་མཐའ་བར་གསུམ་དུ་འགག་སྒོ་མདུན་སྤོ་དང་སྔོན་འགོག་གཙོ་བོར་བྱེད་པའི་སྤྱི་ཡོངས་ཀྱི་འགོག་བཅོས་ཐབས་ཇུས་མཐའ་འཁྱོངས་བྱེད་པ་དང་། འགོ་ཁུངས་ཚོད་འཛིན་དང་བདེ་ཐང་དྲིལ་བསྒྲགས་དང་སློབ་གསོ་གཙོ་བོར་བྱེད་པའི་ཕྱོགས་བསྡུས་འགོག་བཅོས་བྱེད་ཐབས་ཕྱོགས་ཡོངས་ནས་ལག་ལེན་བསྟར་བ། ས་གནས་སྲིད་གཞུང་གི་བྱེད་པོའི་འགན་འཁྲི་བརྟན་དུ་གཏོང་བ། རྒྱུན་རྣམ་ཅན་གྱི་ལྟ་ཞིབ་ཚད་ལེན་མ་ལག་འཛུགས་པ་དང་འཐུས་སྒོ་ཚང་དུ་གཏོང་བ། ཚན་རྩལ་གསར་གཏོད་དང་གྲུབ་འབྲས་གཞན་སྒྱུར་བེད་སྤྱོད་བྱ་རྒྱུར་ཤུགས་སྣོན་རྒྱག་པ། གཞི་རིམ་གྱི་འགོག་བཅོས་ནུས་པ་དང་ཤེས་ལྡན་མི་སྣའི་དཔུང་ཁག་འཛུགས་སྐྱོང་སྲ་བརྟན་དང་སྟོབས་ཆེར་གཏོང་བ། ནད་པ་སྐྱོབ་བཅོས་དང་དུས་བཀག་འདྲི་རྩད་དོ་དམ་ལ་ཤུགས་སྣོན་རྒྱག་པ། ཞིང་ཆེན་རིམ་པའི་སྨན་བཅོས་ལྟེ་གནས་དང་ཀྲོའུ(གྲོང་ཁྱེར)རིམ་པའི་སྨན་བཅོས་རྟེན་གཞི་དང་རྫོང་རིམ་པའི་སྨན་བཅོས་སྐྱོབ་བཅོས་ས་ཚིགས་དང་ཤང(གྲོང་རྡལ)སྨན་བཅོས་དོ་དམ་ས་ཚིགས་བཅས་ཀྱི“རིམ་བཞིའི”རིགས་དབྱེའི་སྨན་བཅོས་མཉམ་སྒུལ་ལམ་སྲོལ་ལ་ཤུགས་སྣོན་རྒྱག་པ། ཀྲོའུ་དང་རྫོང་རིམ་པའི་སྨན་བཅོས་སྒྲིག་གཞིའི་ཐུམ་འབུའི་ནད་ཀྱི་ནད་ཐོག་སྐྱོབ་བཅོས་ནུས་པ་དང་ཆུ་ཚད་ཕྱོགས་ཡོངས་ནས་མཐོ་རུ་གཏོང་བ་བཅས་བྱས་ནས། ཐུམ་འབུའི་ནད་ཁྱབ་རྒྱུར་རྒྱུན་མཐུད་ངང་ཚོད་འཛིན་ནུས་ལྡན་བྱ་རྒྱུ་རེད།