ཉེ་ཆར། སློབ་གསོ་པུའུ་དང་། ནོར་སྲིད་པུའུ། ཀྲུང་གོ་མི་དམངས་དངུལ་ཁང་། དངུལ་རྩ་ལྟ་འདོམས་སྤྱི་ཁྱབ་ཅུས་སོགས་སྡེ་ཚན་བཞིས་བརྡ་ཐོ་བཀྲམ་ནས་སློབ་སྐྱོར་དངུལ་བུན་གྱི་འབྲེལ་ཡོད་སྲིད་ཇུས་ལེགས་སྒྲིག་དང་འཐུས་སྒོ་ཚང་དུ་གཏོང་རྒྱུ་ཡིན་པ་རེད།

རྒྱལ་ཁབ་ཀྱི་སློབ་སྐྱོར་དངུལ་བུན་གྱི་དངུལ་གྲངས་མང་དུ་གཏོང་རྒྱུ།

2023ལོའི་སྟོན་དུས་ཀྱི་སློབ་འགོ་ཚུགས་པ་ནས་བཟུང་། ཉིན་གང་ལམ་ལུགས་ཀྱི་དངོས་གཞིའི་ཚན་ཁག་དང་ཆེད་ལས་ཚན་ཁག་དཀྱུས་མའི་སློབ་མ(ཤེས་རམས་པའི་སློབ་གནས་གཉིས་པ་དང་། མཐོ་རིམ་ལས་རིགས་སློབ་གྲྭའི་སློབ་མ། གྲ་སྒྲིག་ཚན་ཁག་གི་སློབ་མ་བཅས་ཚུད་ཡོད)མི་རེར་ལོ་ལྟར་དངུལ་བུན་རེ་ཞུའི་དངུལ་གྲངས་སྒོར་12000ནས་16000བར་མང་དུ་གཏོང་རྒྱུ་དང་། ཉིན་གང་ལམ་ལུགས་ཀྱི་ཞིབ་འཇུག་སློབ་མ་མི་རེར་ལོ་ལྟར་དངུལ་བུན་རེ་ཞུའི་དངུལ་གྲངས་སྒོར་16000ནས་20000བར་མང་དུ་གཏོང་རྒྱུ་རེད། སློབ་མས་རེ་ཞུ་བྱས་པའི་རྒྱལ་ཁབ་ཀྱི་སློབ་སྐྱོར་དངུལ་བུན་དེ་སྔོན་ལ་སློབ་གྲྭར་སྡོད་རིང་གི་སློབ་ཡོན་དང་ཉལ་ཁང་རིན་པར་སྤྱོད་རྒྱུ་དང་ལྷག་འཕྲོ་རྣམས་རྒྱུན་གཏན་གྱི་འཚོ་བའི་གྲོན་དངུལ་ལ་སྤྱོད་རྒྱུ།

རྒྱལ་ཁབ་ཀྱི་སློབ་སྐྱོར་དངུལ་བུན་གྱི་དངུལ་གྲངས་ལེགས་སྒྲིག་བྱས་རྗེས། དམག་ཞབས་ཞུ་བཞིན་པའི་མཐོ་རིམ་སློབ་གྲྭའི་སློབ་མར་སློབ་ཡོན་ཁ་གསབ་དང་། སློབ་ཡོན་ཐད་སྤྱད་པའི་རྒྱལ་ཁབ་ཀྱི་སློབ་སྐྱོར་དངུལ་བུན་ཚབ་འཇལ། སློབ་ཡོན་ཆག་ཡང་དང་རྩ་ཆག་གཏོང་བའི་ཚད་གཞི། དེ་བཞིན་གཞི་རིམ་དུ་ལས་ཞུགས་ཐུབ་པའི་སློབ་ཐོན་སློབ་མའི་སློབ་ཡོན་ཁ་གསབ་དང་སློབ་ཡོན་ཐད་སྤྱད་པའི་རྒྱལ་ཁབ་ཀྱི་སློབ་སྐྱོར་དངུལ་བུན་ཚབ་འཇལ་ཚད་གཞི་བཅས་དངོས་གཞིའི་ཚན་ཁག་དང་ཆེད་ལས་ཚན་ཁག་གི་སློབ་མ་མི་རེར་ལོ་ལྟར་མང་ཤོས་སྒོར་16000ལས་མི་བརྒལ་བ་དང་ཞིབ་འཇུག་སློབ་མ་མི་རེར་ལོ་ལྟར་མང་ཤོས་སྒོར་20000ལས་མི་བརྒལ་བར་ལེགས་སྒྲིག་འོས་འཚམ་བྱེད་རྒྱུ་རེད།

རྒྱལ་ཁབ་ཀྱི་སློབ་སྐྱོར་དངུལ་བུན་གྱི་སྐྱེད་ཚད་ལེགས་སྒྲིག་བྱས་པ།

རྒྱལ་ཁབ་ཀྱི་སློབ་སྐྱོར་དངུལ་བུན་གྱི་སྐྱེད་ཚད་དེ་དུས་མཚུངས་དང་རིམ་པ་གཅིག་པའི་དངུལ་བུན་གྱི་ཁྲོམ་རའི་རིན་ཕབ་སྐྱེད་ཚད(LPR)བཞིན་གཞི་གནས་30ཉུང་དུ་བཏང་བ་ནས། དུས་མཚུངས་དང་རིམ་པ་གཅིག་པའི་LPRབཞིན་གཞི་གནས་60ཉུང་དུ་གཏོང་བའི་བར་ལེགས་སྒྲིག་བྱེད་རྒྱུ། དེ་གོང་མིང་རྟགས་བཀོད་པའི་LPRཡི་འཕར་ཆག་ངེས་མེད་སྐྱེད་ཚད་ཀྱི་རྒྱལ་ཁབ་ཀྱི་སློབ་སྐྱོར་དངུལ་བུན་གྱི་གན་རྒྱ་གཞིར་བཟུང་། གཉེར་འགན་འཁུར་མཁན་དངུལ་ཁང་གིས་དངུལ་བུན་གཡར་མཁན་སློབ་མ་དང་གྲོས་མོལ་བྱས་ནས་དེ་སྔའི་གན་རྒྱའི་སྐྱེད་ཚད་དེ་དུས་མཚུངས་དང་རིམ་པ་གཅིག་པའིLPRབཞིན་གཞི་གནས60ཉུང་དུ་གཏོང་བའི་བར་ལེགས་སྒྲིག་བྱེད་རྒྱུ།

ཞིབ་འཇུག་སློབ་མར་ཚོང་ལས་རང་བཞིན་གྱི་སློབ་སྐྱོར་དངུལ་བུན་གཏོང་བའི་ལས་དོན་སྤེལ་རྒྱུ།

སློབ་གྲྭར་སྡོད་རིང་གི་ཞིབ་འཇུག་སློབ་མའི་ལུགས་མཐུན་གྱི་སློབ་སྦྱོང་དང་འཚོ་བའི་དགོས་མཁོ་སྔར་བས་སྐོང་བ་དང་ཞིབ་འཇུག་སློབ་མའི་ཁྱིམ་ཚང་གི་དཔལ་འབྱོར་ཁུར་པོ་ཡང་དུ་གཏོང་ཆེད། དངུལ་ཁང་ལས་རིགས་དངུལ་རྩའི་སྒྲིག་གཞིས་སློབ་གྲྭར་འགྲོ་མུས་ཀྱི་ཞིབ་འཇུག་སློབ་མར་ཚོང་ལས་རང་བཞིན་གྱི་སློབ་སྐྱོར་དངུལ་བུན་གཏོང་ཆོག་གི་ཡོད། དངུལ་ཁང་ལས་རིགས་ཀྱི་དངུལ་རྩའི་སྒྲིག་གཞིས་དམིགས་ས་ཡོད་པའི་སྒོ་ནས་འགྲོ་ལུགས་སྟབས་བདེ་དང་ཉེན་ཁར་ཚོད་འཛིན་ཐུབ་པའི་ཞིབ་འཇུག་སློབ་མའི་ཡིད་རྟོན་སློབ་སྐྱོར་དངུལ་བུན་ཐོན་རྫས་གསར་སྤེལ་དང་འཐུས་ཚང་དུ་གཏོང་བར་བསྔགས་སྐུལ་བྱེད་པ་དང་སྦྲགས། དངུལ་བུན་གྱི་གྲངས་ཚད་དང་། སྐྱེད་ཚད། དུས་ཚད། དངུལ་བུན་འཇལ་སྟངས་སོགས་ལ་གཟིགས་སྐྱོང་ངེས་ཅན་བྱེད་རྒྱུ་རེད།