གཞི་རིམ་གྱི་གཞུང་ལས་པ་ནས་ཕ་ཡུལ་དུ་ལོག་སྟེ་ལས་གཏོད་ཀྱི་ཕྱུག་འགྱུར་སྣེ་ཁྲིད་པ་དང་། སློབ་ཆེན་སློབ་མ་ནས་ཏང་གི་ཚོགས་ཆེན་ཉི་ཤུ་པའི་འཐུས་མི་བྱས་པའི་ཁོང་གིས་ལོ་བཅུ་ལྷག་ཙམ་རིང་ཉིན་གཅིག་ལྟར་ཕ་ཡུལ་གྱི་མང་ཚོགས་ཕྱུག་པོ་ཆགས་རྒྱུར་སྣེ་ཁྲིད་བྱས་ཤིང་། ཁོང་ནི་བོད་ཤར་གཅེས་ནོར་ཆང་ལས་ཚད་ཡོད་ཀུང་སིའི་སྤྱི་ཁྱབ་ཅིང་ལི་ཆོས་མཚོ་རེད།

ཆོས་མཚོའི་ཕ་ཡུལ་ནི་ཟླ་ཆུའི་འགྲམ་དུ་ཡོད་པའི་ཆབ་མདོ་གྲོང་ཁྱེར་སྨར་ཁམས་རྫོང་ཚྭ་ཁ་ལྷོའི་འཇང་མི་རིགས་ཤང་ཡིན། དེ་གའི་ཆ་སྙོམས་ས་བབ་མཐོ་ཚད་སྨི་2600ཟིན་གྱི་ཡོད་ལ་དུད་ཁྱིམ་ཀུན་གྱིས་རྒུན་འབྲུམ་འདེབས་པ་དང་རྒུན་ཆང་བསྙལ་ནས་སྐད་གྲགས་ཆོད་ཡོད། དེའི་ཁྲོད་ནས་མི་ཚང་མས་ཤེས་པ་ཞིག་ནི་བོད་ཤར་གཅེས་ནོར་ཆང་ལས་ཚད་ཡོད་ཀུང་སིའི་རྒུན་ཆང་གི་སྤུས་རྟགས་ཡིན་པའི་བདག་དམར་གཡང་ཡིན་ཞིང་། སྤུས་རྟགས་དེའི་རྒུན་ཆང་ལ་རྒྱ་ཆེའི་འཛད་སྤྱོད་པས་དགའ་པོ་བྱེད་ཀྱི་ཡོད་པར་བརྟེན་འཇང་མི་རིགས་ཤང་གི་ཁྱད་ལྡན་ཐོན་ལས་ཀྱི“མིང་བྱང་གྲགས་ཅན”ཞིག་ཏུ་གྱུར་ཡོད་པ་རེད།

ཉེ་བའི་ལོ་ཤས་རིང་། འཇང་མི་རིགས་ཤང་གིས་ས་བབ་ཀྱི་ལེགས་ཆར་གཞི་ཚུགས་ནས་མང་ཚོགས་ལ་རྒུན་འབྲུམ་སྡོང་པོ་འཛུགས་ཁྱོན་ཆེ་རུ་གཏོང་རྒྱུའི་ཁྲིད་སྟོན་བྱས་ཏེ་རྒུན་ཆང་ཐོན་ལས་དེ་ཀ་རྟེན་ཐོན་ལས་ལ་བརྩིས་ནས་སྐྱེད་སྲིང་བྱས་པ་དང་འབྲེལ་གཟིགས་སྐྱོང་སྲིད་ཇུས་དང་དེ་བཞིན་རོགས་སྐྱོར་སྲིད་ཇུས་ཀྱང་བཏོན་པ་རེད། འོན་ཀྱང་ཐོག་མའི་དུས་སུ་མི་སེར་མི་ཉུང་བ་ཞིག་ལ་སེམས་ཁྲལ་ཡོད་པས་རྒུན་འབྲུམ་སྡོང་པོ་འཛུགས་བསམ་ཡང་ལམ་སེང་འཛུགས་མི་ཕོད་པར་གྱུར།

2016ལོར་ཆོས་མཚོས་སྣེ་ཁྲིད་དེ་དབུལ་སྐྱོར་བྱ་གཞག་ལ་རྒྱབ་སྐྱོར་བྱས་ཤིང་། “ཁེ་ལས་དང་། མཐུན་ཚོགས། རྟེན་གཞི། ཞིང་དུད་བཅས་ཟུང་འབྲེལ”གྱི་རྣམ་པ་བརྒྱུད་སྨར་ཁམས་རྫོང་གི་ལྷོ་རྒྱུད་ཤང་གསུམ་གྱི་མང་ཚོགས་ལ་རྒུན་འབྲུམ་མུའུ་1000ལྷག་ཙམ་འདེབས་པའི་སྐུལ་ཁྲིད་བྱས་པ་དང་། རྒུན་འབྲུམ་ཉོ་སྒྲུབ་ཀྱི་ཕྱོགས་གསུམ་གྱི་གྲོས་མཐུན་ལ་མིང་རྟགས་བཀོད་ནས་ལག་རྩལ་གྱི་རོགས་སྐྱོར་བྱས་པའི་ཁར་ཁྲོམ་རའི་རིན་གོང་ལས་མཐོ་བའི་ཐོག་ནས་རྒུན་འབྲུམ་ཉོ་སྒྲུབ་བྱས་པས། མི་སེར་གྱིས་རྒུན་འབྲུམ་སྡོང་པོ་འཛུགས་བསམས་ཀྱང་འཛུགས་མི་ཕོད་པའི་སེམས་ཁྲལ་བསལ་ནས་མང་ཚོགས་ཀྱི་ཡོང་འབབ་ལྡབ་འཕར་བྱུང་ཡོད། ཞིང་དུད་མི་ཉུང་བ་ཞིག་གིས་ད་དུང་ས་ཞིང་ཐད་ཀར་བོད་ཤར་གཅེས་ནོར་ཆང་ལས་ཚད་ཡོད་ཀུང་སིར་བོགས་མར་བཏང་བ་དང་བསོད་ནམས་ཆོས་འཛོམས་ནི་དེའི་གྲས་ཡིན་པ་རེད།

བསོད་ནམས་ཆོས་འཛོམས་ནི་བོད་ཤར་གཅེས་ནོར་ཆང་ལས་ཚད་ཡོད་ཀུང་སི་བཙུགས་མ་ཐག་ནས་ད་བར་དེ་གར་ལས་ཀ་བྱེད་མཁན་གྱི་ལས་བཟོ་ཞིག་རེད། ཁོང་གིས་གསར་འགོད་པར“ཁེ་ལས་འཕེལ་རྒྱས་ཕྱིན་པ་དང་ཆབས་ཅིག་ངའི་གླ་ཕོགས་ཀྱང་ལོ་རེ་བཞིན་མང་དུ་ཕྱིན་སོང་། ཁྱིམ་དུ་ཁང་པ་གསར་པ་བརྒྱབ་པ་མ་ཟད་ཕྲུ་གུ་གཉིས་ཀྱང་གྲོང་གསེབ་ནས་ཕྱིར་ཐོན་ཡོད། ན་ནིང་ངས་ད་དུང་མུའུ་གསུམ་གྱི་རྒུན་འབྲུམ་ར་བ་དེ་ཀུང་སིར་བོགས་མར་བཏང་བ་ཡིན་པས་ལོ་ལྟར་ཡོང་འབབ་སྒོར་6000ལྷག་ཙམ་མང་དུ་ཕྱིན་སོང”ཞེས་བཤད་བྱུང་།

ལོ་ཁ་ཤས་རིང་། བོད་ཤར་གཅེས་ནོར་ཆང་ལས་ཚད་ཡོད་ཀུང་སིས་ཉེ་འཁོར་གྱི་མི་རིགས་ཁག་གི་མང་ཚོགས་བསྡུས་པས་ཡུལ་མི་རྣམས་ལས་ཞུགས་ཡག་པོ་ཐུབ་ཡོད་ཅིང་། ད་ཆ་ཀུང་སིའི་ནང་མི་རིགས་མཐུན་སྒྲིལ་གྱི་རྣམ་པ་ཟབ་མོ་ལྡན་པའི་ཁར་བོད་རིགས་དང་། རྒྱ་རིགས། འཇང་རིགས། དབྱི་རིགས། ཅིང་ཕོ་རིགས། པའེ་རིགས། མན་ཇུ་རིགས། ལི་སུའུ་རིགས་སོགས་མི་རིགས་ཀྱི་ལས་བཟོ་སུམ་ཅུ་ལྷག་ཙམ་ལ་དེ་གར་ཡོང་འབབ་རག་གི་ཡོད། 2020ལོར་ཀུང་སི་དེ་ཆབ་མདོ་གྲོང་ཁྱེར་གྱི་མི་རིགས་མཐུན་སྒྲིལ་དཔེ་སྟོན་ཁེ་ལས་ལ་བདམས་ཐོན་བྱུང་བ་རེད།

གཞན་ཡང་ཆོས་མཚོས་ད་དུང“བདག་དམར་གཡང”སྐུལ་ལྕག་སྦྱངས་འབྲས་ལེགས་ཐོན་གྱི་བྱ་དགའ་བཟོས་ནས་ལོ་རེ་བཞིན་ཁྱིམ་ཚང་ལ་དཀའ་ངལ་ཡོད་པའི་ཕུལ་བྱུང་སློབ་མར་སྦྱངས་འབྲས་ལེགས་ཐོན་གྱི་བྱ་དགའ་སྤྲོད་ཀྱི་ཡོད། དགའ་ལྡན་ལྷ་མོ་ནི་སྦྱངས་འབྲས་ལེགས་ཐོན་གྱི་བྱ་དགའ་དེའི་རོགས་རམ་འོག་སློབ་སྦྱོང་བདེ་བླག་ངང་མཐའ་འཁྱོལ་ནས་རྒྱལ་སའི་དགེ་འོས་སློབ་ཆེན་དུ་རྒྱུགས་འཕྲོད་པ་ཞིག་རེད། “ང་རང་གིས་མ་འོངས་པར་ཨ་ཅག་ཆོས་མཚོ་བཞིན་ཕ་ཡུལ་དུ་ལོག་ནས་ཕ་ཡུལ་འཛུགས་སྐྲུན་གྱི་དོན་དུ་འབད་བརྩོན་བྱ་རྒྱུའི་རེ་བ་ཡོད”ཅེས་དགའ་ལྡན་ལྷ་མོས་བཤད།

“ལས་ཞུགས་ཐག་གཅོད་དང་འབབ་འཕར་ལ་སྐུལ་ཁྲིད་བྱ་རྒྱུ་ནི་ཁེ་ལས་ཀྱིས་འཁུར་དགོས་ངེས་ཀྱི་འགན་འཁྲི་ཞིག་རེད། ང་ཚོས་ལས་དོན་བསྒྲུབས་པ་ཇི་ཙམ་རྒྱ་ཆེ་ལ་ཕུན་སུམ་ཚོགས་པོར་གྱུར་ཀྱང་རང་ཡུལ་ལུང་པ་དང་ཁ་འབྲལ་ཐབས་མེད་ལ་རང་ཅག་གི་མི་སེར་དང་ཁ་འབྲལ་ཐབས་མེད། དུས་སྐབས་རླབས་པོ་ཆེ་འདིའི་ནང་སྐྱེས་ནས་རྒྱལ་ཁབ་ཀྱི་སྲིད་ཇུས་ལས་ཕན་པ་ཐོབ་མཁན་དུ་གྱུར་པས། འདི་དག་ཐམས་ཅད་ལ་ང་རང་གིས་བཀའ་དྲིན་ཚད་མེད་ཞུ་རྒྱུ་ཡིན” བོད་ཤར་གཅེས་ནོར་ཆང་ལས་ཀུང་སིས་འཕེལ་རྒྱས་གཏོང་སྟངས་དང་། ཚན་རྩལ་གསར་གཏོད། འཐབ་ཇུས་བསམ་ཕྱོགས་བཅས་ཀྱི་ཐད་མུ་མཐུད་འཚོལ་ཞིབ་བྱས་ནས་ས་མཐོའི་ཁྱད་ཆོས་ལྡན་པའི“ཆང་ཁང་ཡུལ་སྐོར”འཕེལ་རྒྱས་བཏང་སྟེ་ཡུལ་སྐོར་བ་དེ་བས་མང་བའི་ཡིད་དབང་བཀུག་ནས་རྫོང་ཁོངས་ཀྱི་དཔལ་འབྱོར་རྒྱ་སྟོབས་ཆེ་རུ་གཏོང་རྒྱུ་ཡིན་ཞེས་ཆོས་མཚོས་བརྗོད་པ་རེད།