གསར་འགོད་པར་རང་སྐྱོང་ལྗོངས་ཞིང་ལས་གྲོང་གསེབ་ཐིང་ནས་ཤེས་རྟོགས་བྱུང་བར། ཉེ་ཆར། རང་སྐྱོང་ལྗོངས་ཞིང་ལས་གྲོང་གསེབ་ཐིང་དང་། རང་སྐྱོང་ལྗོངས་སྡོད་ཁང་འཛུགས་སྐྲུན་ཐིང་གིས་ཞིང་ལས་གྲོང་གསེབ་པུའུ་དང་། སྡོད་ཁང་འཛུགས་སྐྲུན་པུའུ་ལ་ལྷ་ས་གྲོང་ཁྱེར་ཆུ་ཤུར་རྫོང་ཚལ་སྣེ་ཤང་གི་ཤེལ་གྲོང་གྲོང་ཚོ་སོགས་གྲོང་སྡེ་8འོས་སྦྱོར་འདུན་ཞུ་བྱས་ནས་རྒྱལ་ཡོངས་ཀྱི་མཛེས་སྡུག་གནས་འཕྲོད་དཔེ་སྟོན་གྲོང་སྡེ་འཛུགས་གཏོད་ངོས་འཛིན་གྱི་ལས་དོན་བསྒྲུབས་པ་རེད།

ཤེས་རྟོགས་བྱུང་བར་གཞིགས་ན། ཟླ་8པ་ནས་བཟུང་། རྫོང(ཆུས་དང་གྲོང་ཁྱེར)ཁག་གིས་འོག་ནས་གོང་དང་། རང་མོས་འདུན་ཞུ། ས་ཁུལ(གྲོང་ཁྱེར)ལ་ཐོག་མའི་ཞིབ་བཤེར་བཅས་ཀྱི་ལས་ཀའི་རྨང་གཞིའི་ཐོག རང་སྐྱོང་ལྗོངས་ཞིང་ལས་གྲོང་གསེབ་ཐིང་དང་། སྡོད་ཁང་འཛུགས་སྐྲུན་ཐིང་གིས་ཁོར་ཡུག་མཛེས་པ་དང་། འཚོ་བ་གནས་འཕྲོད། བཅོས་སྐྱོང་ནུས་ལྡན་བཅས་དགོས་པའི་བླང་བྱ་ནན་པོར་གཞིགས་ཏེ། ས་ཁུལ(གྲོང་ཁྱེར)དང་། རྫོང(ཆུས་དང་གྲོང་ཁྱེར)གིས་འདུན་ཞུ་འོས་སྦྱོར་བྱས་པའི་མཛེས་སྡུག་གནས་འཕྲོད་འཛུགས་གཏོད་དཔེ་སྟོན་གྲོང་སྡེ་འོས་སྦྱོར་འདུན་ཞུའི་དཔྱད་གཞིར་ཞིབ་བཤེར་ནན་པོ་དང་ས་གནས་ས་ཐོག་ཏུ་ཞིབ་བཤེར་ལས་དོན་གཏིང་ཟབ་སྤེལ་མཐར། ལྷ་ས་གྲོང་ཁྱེར་ཆུ་ཤུར་རྫོང་ཚལ་སྣེ་ཤང་གི་ཤེལ་གྲོང་གྲོང་ཚོ་དང་། ལྷོ་ཁ་གྲོང་ཁྱེར་སྣེ་གདོང་རྫོང་ཁྲ་འབྲུག་གྲོང་རྡལ་གྱི་ཁེ་གསུམ་གྲོང་ཚོ། ལྷོ་ཁ་གྲོང་ཁྱེར་ཆུ་གསུམ་རྫོང་ཆུ་གསུམ་གྲོང་རྡལ་གྱི་ཆུ་གསུམ་གྲོང་ཚོ། ཉིང་ཁྲི་གྲོང་ཁྱེར་བྲག་ཡིབ་ཆུས་བྲག་ཡིབ་གྲོང་རྡལ་གྱི་བྲག་ཕྱི་གྲོང་ཚོ། ཉིང་ཁྲི་གྲོང་ཁྱེར་ཀོང་པོ་རྒྱ་མདའ་རྫོང་མཚོ་མགོ་ཤང་གི་མཚོ་མགོ་གྲོང་ཚོ། ཉིང་ཁྲི་གྲོང་ཁྱེར་སྨན་གླིང་རྫོང་བཀྲ་ཤིས་རབ་བརྟན་ཤང་གི་ཚལ་མི་གྲོང་ཚོ། ཆབ་མདོ་གྲོང་ཁྱེར་ཁ་རུབ་ཆུས་རུ་བཞི་ཤང་གི་མདའ་རོ་གྲོང་ཚོ། ཆབ་མདོ་གྲོང་ཁྱེར་འཇོ་མདའ་རྫོང་སྐམ་ཐོག་གྲོང་རྡལ་གྱི་སྐམ་ཐོག་གྲོང་ཚོ་བཅས་གྲོང་སྡེ་8ལེགས་འདེམས་འོས་སྦྱོར་བྱས་ནས་རྒྱལ་ཡོངས་ཀྱི་མཛེས་སྡུག་གནས་འཕྲོད་གྲོང་སྡེ་འཛུགས་གཏོད་ངོས་འཛིན་གྱི་ལས་དོན་བསྒྲུབས་པ་རེད།