རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གི་གདན་ཞུས་ལྟར་ཁམ་ཕུ་ཁྲེའི་དབུ་བཞུགས་བློན་ཆེན་ཧུང་མ་ནའེ་ཟླ་9ཚེས་14ནས་16ཉིན་བར་ཀྲུང་གོར་དངོས་སུ་འཚམས་འདྲིར་ཕེབས་རྒྱུ་ཡིན་ཞིང་། ཕྱི་འབྲེལ་པུའི་མགྲིན་ཚབ་པ་མའོ་ཉིང་གིས་ཚེས་11ཉིན་གསར་འགོད་པའི་འཆར་ཅན་ཚོགས་འདུར་འབྲེལ་ཡོད་ཀྱི་གནས་ཚུལ་ངོ་སྤྲོད་བྱས་པ་རེད།

མའོ་ཉིང་གིས། ཀྲུའུ་ཞི་ཞི་ཅིན་ཕིང་གིས་དབུ་བཞུགས་བློན་ཆེན་ཧུང་མ་ནའེ་དང་མཇལ་འཛོམས་གནང་རྒྱུ་མ་ཟད། ཙུང་ལི་ལི་ཆང་དང་། ཨུ་ཡོན་ཀྲང་ཀྲའོ་ལེ་ཅི་སོ་སོས་ཧུང་མ་ནའེ་དང་གྲོས་མོལ་མཇལ་འཛོམས་ཀྱང་གནང་རྒྱུ་རེད་ཅེས་བརྗོད།

“ད་རེས་ཧུང་མ་ནའེ་ཡིས་དབུ་བཞུགས་བློན་ཆེན་གྱི་འགན་བཞེས་རྗེས་དངོས་གཞིའི་འཚམས་འདྲིར་ཕེབས་ཐེངས་དང་པོ་ཡིན་པ་ལས་ཁམ་ཕུ་ཁྲེའི་སྐབས་གསར་པའི་སྲིད་གཞུང་གིས་ཀྲུང་གོ་དང་ཁམ་ཕུ་ཁྲེའི་དབར་གྱི་འབྲེལ་བར་མཐོང་ཆེན་པོ་གནང་ལུགས་མཚོན་ཡོད”ཅེས་མའོ་ཉིང་གིས་བརྗོད་པ་དང་། ཁོང་གིས། འདི་ལོར་ཀྲུང་གོ་དང་ཁམ་ཕུ་ཁྲེའི་དབར་ཕྱི་འབྲེལ་བཙུགས་ནས་ལོ་65འཁོར་བ་དང“ཀྲུང་གོ་དང་ཁམ་ཕུ་ཁྲེའི་མཛའ་མཐུན་ལོ”འཁེལ་བས། ཀྲུང་གོ་ཕྱོགས་ཀྱིས་ད་རེས་ཀྱི་འཚམས་འདྲི་བརྒྱུད་སླད་ཕྱིན་དུས་སྐབས་ཤིག་རིང་གི་ཀྲུང་གོ་དང་ཁམ་ཕུ་ཁྲེའི་དབར་གྱི་ཕྱོགས་ཡོངས་ཀྱི་འཐབ་ཇུས་མཉམ་ལས་ལ་ཁྱོན་ཡོངས་ནས་འཆར་གཞི་འགོད་པ་དང་། ལྷག་པར་དུ“བཟོ་ལས་འཕེལ་རྒྱས་ཀྱི་བར་ཁྱམས”དང“ཉ་དང་འབྲས་ཀྱི་བར་ཁྱམས”སོགས་ཀྱི་མཉམ་ལས་གྲོས་འགོ་གང་མགྱོགས་དོན་འཁྱོལ་གནད་སྨིན་ཡོང་བར་སྐུལ་འདེད་བཏང་ནས་སྤུས་ཚད་དང་། ཆུ་ཚད། ཚད་གཞི་བཅས་མཐོ་བའི་སྒོ་ནས་དུས་རབས་གསར་པར་ཀྲུང་གོ་དང་ཁམ་ཕུ་ཁྲེའི་དབར་གྱི་ལས་དབང་གཅིག་མཐུན་འདུས་གྲུབ་གཏོད་རྒྱུའི་རེ་བ་ཡོད་ཅེས་བརྗོད།