ཉེ་ཆར། གསར་འགོད་པར་རང་སྐྱོང་ལྗོངས་འཕེལ་སྒྱུར་ཨུ་ལྷན་ཚོང་འགུགས་མ་འདྲེན་ཅུས་ནས་ཤེས་རྟོགས་བྱུང་བར། འདི་ལོའི་ཟླ་བ་དང་པོ་ནས་བདུན་པའི་བར་ལྗོངས་ཡོངས་སུ་རིམ་རྩིས་བྱས་ན་ཚོང་འགུགས་མ་འདྲེན་རྣམ་གྲངས་ཁག་740ལག་བསྟར་བྱས་པ་དང་། མ་དངུལ་སྒོར་དུང་ཕྱུར་343.24དངོས་སུ་དམིགས་སར་འབྱོར་ནས་ལོ་འཁོར་མོའི་དམིགས་ཚད་ལས་འགན་གྱི་68.64%ལེགས་གྲུབ་ཐུབ་ཡོད། གཏན་འཇགས་རྒྱུ་ནོར་ལ་མ་དངུལ་སྒོར་དུང་ཕྱུར་197.18བཏང་ཞིང་། ལྗོངས་ནང་ཁུལ་དུ་མི་7997ལས་ཞུགས་ཐུབ་ནས་ངལ་ནུས་ཡོང་འབབ་སྒོར་ཁྲི་8890.69ཟིན་ཡོད་པ་རེད།

འདི་ལོ་ཚུན་དུ། རང་ལྗོངས་ཀྱིས་ཚོང་འགུགས་མ་འདྲེན“ལས་གཞི་ཨང་དང་པོར”བརྩིས་ནས་སྐུལ་འདེད་བཏང་སྟེ། ལྗོངས་ཡོངས་ཀྱི་ཚོང་གཉེར་ཁོར་ཡུག་ལེགས་གཏོང་དང་ཚོང་འགུགས་མ་འདྲེན་ལས་དོན་ཚོགས་འདུ་འཚོགས་ནས་རང་སྐྱོང་ལྗོངས་ཚོང་འགུགས་མ་འདྲེན་མ་འཇོག་སྐུལ་སྤེལ་ལས་དོན་འགོ་ཁྲིད་ཚོགས་ཆུང་དང་ཐོན་ལས་ཚོང་འགུགས་ཆེད་དོན་ཚོགས་ཆུང་6བཙུགས་ཡོད། ཐོན་ལས་དབྱེ་ནས་ཚོང་འགུགས་མ་འདྲེན་གྱི་རྣམ་གྲངས་གལ་ཆེན་ཇུས་འགོད་བྱས་ཏེ་མཁའ་ལམ་ཤར་གཏོང་དང་རིག་གནས་ཡུལ་སྐོར་སོགས་ཀྱི་ཐོན་ལས་ཚོང་འགུགས་བྱེད་སྒོ་ཐེངས་6སྤེལ་ཡོད། འགྲེམས་ཚོགས་གཉེར་ནས་ཚོང་འགུགས་ཧུར་ཐག་བྱས་ཏེ་བོད་ལྗོངས་འགྲེམས་ཚོགས་སྐབས་ལྔ་པའི་ཚོང་འགུགས་མ་འདྲེན་དང་དཔལ་འབྱོར་ཚོང་དོན་ངོ་འཕྲད་གྲོས་མོལ་བྱེད་སྒོ་སྤེལ་ནས་རྣམ་གྲངས་ཁག་60ལ་གན་རྒྱ་བཞག་པ་དང་མ་དངུལ་སྒོར་དུང་ཕྱུར་500ལྷག་ཙམ་གཏོང་རྒྱུའི་གྲོས་མོལ་བྱས་ཤིང་། ད་ཆ་རྣམ་གྲངས་27སྐྲུན་འགོ་ཚུགས་ཡོད་པ་རེད།