ཤིན་ཧྭ་གསར་འགྱུར་ཁང་པེ་ཅིང་ནས་ཟླ་9ཚེས་5ཉིན་གློག་འཕྲིན་འབྱོར་གསལ། ཟླ་9ཚེས་5ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཧྲང་ཧའེ་མཉམ་ལས་རྩ་འཛུགས་ཀྱི་ཁོངས་མིའི་རྒྱལ་ཁབ་ཀྱི་ཁྲིམས་འཛིན་པུའུ་ཀྲང་གི་ཚོགས་འདུ་ཐེངས་བཅུ་པར་རྟེན་འབྲེལ་འཕྲིན་ཡིག་སྤྲིངས་པ་རེད།

ཞི་ཅིན་ཕིང་གིས། 2013ལོར་ཧྲང་ཧའེ་མཉམ་ལས་རྩ་འཛུགས་ཀྱི་ཁོངས་མིའི་རྒྱལ་ཁབ་ཀྱི་ཁྲིམས་འཛིན་པུའུ་ཀྲང་གི་ཚོགས་འདུའི་ལམ་སྲོལ་ལག་ལེན་བསྟར་བ་ནས་བཟུང་། ཁོངས་མིའི་རྒྱལ་ཁབ་ཁག་གིས“ཧྲང་ཧའེ་ཡི་སྙིང་སྟོབས”རྒྱུན་འཁྱོངས་དང་དར་སྤེལ་བཏང་སྟེ། ཕན་ཚུན་རྒྱབ་སྐྱོར་དང་ལྷག་བསམ་རྣམ་དག་གིས་མཉམ་ལས་བྱས་པ་དང་། རྒྱལ་ཁབ་ཁག་གི་ཁྲིམས་ལུགས་འཛུགས་སྐྱོང་ལ་རྒྱུན་ཆད་མེད་པར་སྐུལ་འདེད་བཏང་བ། སྲིད་གཞུང་དབར་གྱི་ཁྲིམས་འཛིན་ཁྱབ་ཁོངས་སུ་ཕན་ཚུན་སྤེལ་རེས་དང་ཕན་ཚུན་དཔྱད་གཞིར་འཛིན་རྒྱུར་ཤུགས་སྣོན་བརྒྱབ་པ། བཅའ་ཁྲིམས་ཞབས་ཞུའི་ཁྱབ་ཁོངས་ཀྱི་དངོས་སྒྲུབ་མཉམ་ལས་མུ་མཐུད་བྱས་པ། མཉམ་འབྲེལ་རྒྱལ་ཚོགས་ལྟེ་བར་བྱས་པའི་རྒྱལ་སྤྱིའི་མ་ལག་དང་རྒྱལ་སྤྱིའི་བཅའ་ཁྲིམས་རྨང་གཞིར་བྱས་པའི་རྒྱལ་སྤྱིའི་སྒྲིག་ལམ་ལ་བློ་བརྟན་འགྱུར་མེད་ངང་སྲུང་སྐྱོང་གིས་ནུས་པ་གལ་ཆེན་བཏོན་ཡོད་ཅེས་བསྟན་གནང་ཡོད།

ཞི་ཅིན་ཕིང་གིས། ཀྲུང་གོས་རྩ་བ་བརྟན་འཛུགས་དང་། སྔོན་དཔག་བརྟན་གཏོང་། ཕུགས་ལ་ཕན་པ་འདོགས་པ་བཅས་ཀྱི་ཁྲིམས་སྐྱོང་གི་འགན་ལེན་ནུས་པར་ཚད་མཐོའི་མཐོང་ཆེན་བྱས་ཏེ། གོ་ལ་ཧྲིལ་པོའི་བཅོས་སྐྱོང་མ་ལག་སྒྱུར་བཅོས་དང་འཛུགས་སྐྱོང་ནང་ཧུར་ཐག་ཞུགས་ཡོད། ཀྲུང་གོས་ཧྲང་ཧའེ་མཉམ་ལས་རྩ་འཛུགས་ཀྱི་ཁོངས་མིའི་རྒྱལ་ཁབ་གཞན་དག་ཁག་དང་མཉམ་དུ་དུས་རབས་གསར་པའི་རྒྱལ་ཁབ་ཁག་གི་བཅའ་ཁྲིམས་དང་ཁྲིམས་འཛིན་སྲིད་འཛིན་ཁྱབ་ཁོངས་ཀྱི་སྤེལ་རེས་དང་མཉམ་ལས་ཟམ་མི་ཆད་པར་གཏིང་ཟབ་ཏུ་གཏོང་བ་དང་། ཁྲིམས་སྐྱོང་རྣམ་པའི་ཐོག་ནས་རྒྱལ་ཁབ་ཁག་གི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་འགྲོ་བར་སྐུལ་འདེད་གཏོང་བ། ས་ཁུལ་གྱི་ཞི་བདེ་བརྟན་ལྷིང་ལ་སྲུང་སྐྱོང་བྱེད་པ། མིའི་རིགས་ཀྱི་ལས་དབང་གཅིག་མཐུན་འདུས་གྲུབ་གཏོད་པར་སྐུལ་འདེད་གཏོང་བ་བཅས་བྱེད་འདོད་ཡོད་ཅེས་ནན་བཤད་གནང་ཡོད།

ཧྲང་ཧའེ་མཉམ་ལས་རྩ་འཛུགས་ཀྱི་ཁོངས་མིའི་རྒྱལ་ཁབ་ཀྱི་ཁྲིམས་འཛིན་པུའུ་ཀྲང་གི་ཚོགས་འདུ་ཐེངས་བཅུ་པ་ཁྲིམས་འཛིན་པུས་གཙོ་གཉེར་བྱས་པ་དང་ཚེས་5ཉིན་ཧྲང་ཧའེ་རུ་འཚོགས་པ་རེད།