“གྲོགས་པོ་ལགས། བོད་ལྗོངས་དང་ཧྥུའུ་ཅན་དབར་ལེ་དབར་སྟོང་གི་བར་ཐག་ཆོད་མོད། འོན་ཀྱང་ང་ཚོ་ཚང་མ་མེས་རྒྱལ་ཁྱིམ་ཚང་ཆེ་མོའི་ཆེས་མཛེས་སྡུག་ལྡན་པའི་མེ་ཏོག་ཡིན་པས། ལྷག་བསམ་ཟོལ་མེད་ངང་ཁྱེད་རང་གདན་འདྲེན་ཞུས་ནས་བོད་དུ་ཡུལ་སྐོར་ལ་ཡོང་བར་དགའ་བསུ་ཞུ་རྒྱུ་ཡིན”ཞེས་པ་སོགས་ཆབ་མདོ་གྲོང་ཁྱེར་སྟེང་ཆེན་རྫོང་སློབ་ཆུང་ལོ་རིམ་གསུམ་པའི་འཛིན་གྲྭ(4)པའི་རུ་འབྲིང་གི་རུ་མི་བདེ་འགྱུར་ཡོངས་གྲགས་ཀྱིས་ཧྥུའུ་ཅན་ཞིང་ཆེན་ལུང་ཡན་གྲོང་ཁྱེར་དགེ་འོས་ཞོར་གཏོགས་སློབ་ཆུང་གཉིས་པའི་ལོ་རིམ་བཞི་པའི་འཛིན་གྲྭ(4)པའི་རུ་འབྲིང་གི་རུ་མི་ཀྲང་ཧའོ་ཤོན་ལ་བསྐུར་བའི་འཕྲིན་ཡིག་ནང་དེ་ལྟར་བྲིས་ཡོད།

འདི་ནི་ཆབ་མདོ་གུང་གཞོན་སྡེ་ཚོགས་དང་ཆབ་མདོ་གྲོང་ཁྱེར་ལོ་ཆུང་ལས་དོན་ཨུ་ལྷན་གྱིས་ཆབ་མདོ་གྲོང་ཁྱེར་གྱི་རྫོང(ཆུས)11གི་སློབ་གྲྭ་འབྲིང་ཆུང་83གྱི་རུ་འབྲིང་120སྒྲིག་འཛུགས་བྱས་ནས“འཕྲིན་ཡིག་སྐུར་རེས”ཀྱི་བྱེད་སྒོ་སྤེལ་བའི་ཆ་ཤས་ཙམ་ཞིག་རེད། ལོ་ཆུང་གདོང་ལེན་རུ་མི་ཚོས་འཕྲིན་ཡིག་བྲིས་པ་དང་བསྐུར་བའི་བྱ་ཐབས་བརྒྱུད་གྲོགས་པོ་སྒྲིག་པ་དང་བརྩེ་སེམས་མཚོན་པར་བྱས་ཡོད།

ཆབ་མདོ་གྲོང་ཁྱེར་གྱི་ལོ་ཆུང་གདོང་ལེན་རུ་མི་ཚོས་འཕྲིན་ཡིག་ནང་ཧྥུའུ་ཅན་དང་། ཁྲུང་ཆིང་། ཧྲན་ཤིས། ནང་སོག་སོགས་ཞིང་ཆེན་དང་གྲོང་ཁྱེར་གྱི་གྲོགས་པོ་ཆུང་ཆུང་ཚོར་སློབ་གྲྭས་གསར་བརྗེའི་སྔོན་གཤེགས་དཔའ་བོར་དྲན་གསོ་ཞུ་བ་དང་དཔའ་བོ་དཔེ་བཟང་འཚོལ་བ་སོགས་ཀྱི་བྱེད་སྒོ་སྤེལ་བའི་སྐོར་བརྗོད་པ་དང་། གསར་བརྗེའི་རྗེས་ཤུལ་དང་རྒྱལ་གཅེས་རིང་ལུགས་ཀྱི་སློབ་གསོའི་རྟེན་གཞིར་ལྟ་སྐོར་བྱེད་པའི་མྱོང་ཚོར་ངོ་སྤྲོད་བྱས་པ། བོད་རིགས་ཀྱི་ཡུལ་སྲོལ་གོམས་གཤིས་དང་ཞིམ་ཟས་དང་མཛེས་ལྗོངས་སྐོར་གླེང་བ་མ་ཟད། ད་དུང་ཉེ་འགྲམ་གྱི་འཚོ་བའི་འགྱུར་ལྡོག་གསར་པ་དང་རང་ངོས་ཀྱི་སློབ་སྦྱོང་དང་འཚར་ལོངས་ཀྱི་བརྒྱུད་རིམ་ཡང་འཕྲིན་ཡིག་ནང་བྲིས་པ་དང་འབྲེལ། འཕྲིན་ཡིག་སྐུར་ཡུལ་གྲོགས་པོ་ཆུང་ཆུང་ལ་སྨོན་འདུན་ཡང་ཞུས་ཡོད།

འཕྲིན་ལན་ནང་ཧྥུའུ་ཅན་དང་། ཁྲུང་ཆིང་། ཧྲན་ཤིས། ནང་སོག་སོགས་ཞིང་ཆེན་དང་གྲོང་ཁྱེར་གྱི་ལོ་ཆུང་གདོང་ལེན་རུ་མི་ཚོས་འཕྲིན་ཡིག་འབྱོར་བའི་སྤྲོ་སྣང་མཚོན་པར་བྱས་པ་མ་ཟད། ཆབ་མདོ་གྲོང་ཁྱེར་གྱི་ལོ་ཆུང་གདོང་ལེན་རུ་མི་ཁོང་ཚོའི་ཕ་ཡུལ་དུ་ཡོང་རྒྱུའི་གདན་འདྲེན་ཡང་ཞུས་ཡོད།

ཤེས་རྟོགས་བྱུང་བར་གཞིགས་ན། འདི་ལོའི་ཟླ་7པ་བར་ཆབ་མདོ་གྲོང་ཁྱེར་གྱི་ལོ་ཆུང་གདོང་ལེན་རུ་མི་ཚོས་འཕྲིན་ཡིག་1529བསྐུར་བ་དང་། འཕྲིན་ལན་911འབྱོར་བ། “མཉམ་དུ་སློབ་ཚན་ཚོགས་པའི”སྤེལ་རེས་བྱེད་སྒོ་ཐེངས་7སྤེལ་བ། ལོ་ཆུང་གདོང་ལེན་རུ་མི་5000ལྷག་ཙམ་ལ་ཁྱབ་ཡོད།

“འཕྲིན་ཡིག་སྐུར་རེས”ཀྱི་བྱེད་སྒོ་སྤེལ་བ་བརྒྱུད། མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ་བའི་རྣམ་པ་ཟབ་མོ་བཏོད་དེ་ཀྲུང་ཧྭ་ལ་གཅེས་པའི་ས་བོན་གཞོན་ནུ་ལོ་ཆུང་ཚང་མའི་སེམས་སུ་ཟུག་པ་དང་། ལོ་ཆུང་གདོང་ལེན་རུ་ཁག་གིས་རླབས་ཆེན་མེས་རྒྱལ་དང་། ཀྲུང་ཧྭ་མི་རིགས། ཀྲུང་ཧྭའི་རིག་གནས། ཀྲུང་གོ་གུང་ཁྲན་ཏང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་བཅས་ལ་མོས་སེམས་བྱེད་ཤུགས་རྒྱུན་ཆད་མེད་པར་ཆེ་རུ་ཕྱིན་པས། མི་རིགས་ཁག་གི་ལོ་ཆུང་གདོང་ལེན་རུ་མིས་ལག་གདང་སྦྲེལ་བ་དང་གཅིག་སེམས་གཅིག་སྦྲེལ་གྱིས་ཕན་ཚུན་སྤེལ་རེས་དང་ཐུན་མོང་སློབ་སྦྱོང་བྱེད་རིང་མི་རིགས་ཁག་དབར་འགྲོ་འོང་དང་། སྤེལ་རེས། མཉམ་འདྲེས་བཅས་སྔར་བས་བྱེད་ཟབ་ཏུ་འགྲོ་རྒྱུ་རེད།