ཟླ་8ཚེས་30ཉིན། ལྗོངས་ཡོངས་ཀྱི་ཞིང་འབྲོག་ཁུལ་གྱི་གཞི་རིམ་ཏང་རྩ་འཛུགས་འཛུགས་སྐྱོང་ལས་དོན་གྱི་ས་གནས་ས་ཐོག་གི་ཚོགས་འདུ་ནག་ཆུ་གྲོང་ཁྱེར་དུ་འཚོགས་པ་རེད། ཚོགས་འདུ་མ་འཚོག་གོང་། ལྗོངས་ཡོངས་ཀྱི་རྩ་འཛུགས་སྡེ་ཚན་གྱི་འགན་འཁུར་བློ་མཐུན་ནག་ཆུ་གྲོང་ཁྱེར་གསེར་རྙེད་ཆུས་ལྷོ་མ་གྲོང་རྡལ་གེ་དམར་གྲོང་ཚོ་དང་། དགའ་བདེ་སྐྱེ་ཁམས་འབྲོག་ལས་ཐོན་ལས་འཕེལ་རྒྱས་ཚད་ཡོད་ཀུང་སི།(གཤམ་དུ་དགའ་བདེ་ཀུང་སི་ཞེས་བསྡུ་རྒྱུ)ནག་ཆུ་གྲོང་རྡལ་སོགས་སུ་བསྐྱོད་དེ་ཞིང་འབྲོག་ཁུལ་གྱི་གཞི་རིམ་ཏང་རྩ་འཛུགས་འཛུགས་སྐྱོང་དང་། ཏང་འཛུགས་སྐྱོང་གིས་གྲོང་གསེབ་དར་རྒྱས་ལ་སྣེ་ཁྲིད། གཞི་རིམ་ཕྱོགས་བསྡུས་བཅོས་སྐྱོང་སོགས་ཀྱི་ལས་དོན་སྤེལ་ཚུལ་ས་གནས་ས་ཐོག་ཏུ་ཕན་ཚུན་སློབ་སྦྱོང་དང་་ཉམས་མྱོང་སྤེལ་རེས་བྱས་པ་རེད།

དེའི་ནང་དགའ་བདེ་ཀུང་སིའི་གྲངས་གཞི་མང་པོ་ཞིག་ལྟ་སྐོར་བ་མང་པོའི་དོ་སྣང་བྱ་ཡུལ་དུ་གྱུར་ཡོད།

“ང་ཚོས་ཐོན་ལས་འདྲ་མཚུངས་དང་ས་ཁོངས་ཉེ་བ་སོགས་ཀྱི་ལེགས་ཆར་བརྟེན་ནས་རང་འགུལ་ངང་དགའ་བདེ་ཀུང་སི་དང་ཐོན་ལས་མནའ་འབྲེལ་བཙུགས་ཏེ་ཏང་ཡོན་ཐོན་ལས་འཁོར་འབྲེལ་ནང་གཅིག་སྡུད་བྱེད་པ་དང་མང་ཚོགས་སྒྲིག་འཛུགས་བྱས་ནས་ཐོན་ལས་འཕེལ་རྒྱས་དང་དོ་དམ་ལྟ་སྐུལ་གྱི་བརྒྱུད་རིམ་ཧྲིལ་པོར་ཞུགས་སུ་བཅུག་སྟེ། ཁེ་ལས་དང་། མཉམ་ལས་ཁང་། འབྲོག་དུད་བཅས་ཕྱོགས་གསུམ་གྱི་ཁེ་ཕན་མཉམ་འབྲེལ་མཉམ་འདྲེས་ཀྱི་འཕེལ་རྒྱས་ལ་སྐུལ་འདེད་བཏང་ཡོད། 2022ལོར་ཀུང་སིས་མི་69ཐག་ཉེ་སར་ལས་ཞུགས་ཐུབ་པར་རོགས་རམ་བྱས་པ་དང་ལོ་རེར་མི་རེར་ཆ་སྙོམས་ཡོང་འབབ་སྒོར་ཁྲི་4.8ཟིན་གྱི་ཡོད”ཅེས་གེ་དམར་གྲོང་ཚོའི་འགྲེལ་བཤད་པའི་ངོ་སྤྲོད་ཉན་རྗེས་མི་མང་པོ་ཞིག་གིས་དགའ་བདེ་ཀུང་སིར་ཡ་མཚན་ཆེན་པོ་སྐྱེས་པ་རེད།

“དཀར་ཆུའི་ལས་སྣོན་བྱེད་མཁན་གྱིས་འོ་མ་འཇོ་བ་དང་། འོ་མ་གསོག་པ། འོ་མ་སྐྱེལ་འདྲེན་བཅས་ཀྱི་འཕྲོད་བསྟེན་དོ་དམ་ལམ་ལུགས་ལ་བརྩི་སྲུང་ནན་པོ་ཞུ་དགོས། ང་ཚོས་ཉོས་པའི་འོ་མ་ངེས་པར་དུ་འོ་མའི་བཤེར་ཆས་ཀྱི་དམིགས་ཚད་ཞིབ་དཔྱད་ལོན་དགོས་པ་མ་ཟད། ཨ་རག་ཉིང་ཁུས་འོ་མ་སོས་པ་ཡིན་མིན་ཞིབ་དཔྱད་ཚད་ལེན་བྱེད་ཀྱི་ཡོད། ཚད་གཞི་མ་ལོན་པའི་རིགས་བསྡུ་ཡི་མེད”ཅེས་ལྟ་སྐོར་བ་དང་བཅས་པ་དགའ་བདེ་ཀུང་སིའི་འོ་མ་བསྡུ་སར་སླེབས་སྐབས་སྐལ་བཟང་རྒྱལ་མཚན་གྱིས་འོ་མ་འཚོང་མཁན་གྱི་འབྲོག་པ་མང་ཚོགས་དང་ཀུང་སིའི་ཞིབ་དཔྱད་པར་འོ་མ་ཉོ་སྒྲུབ་ཀྱི་བརྒྱུད་རིམ་འགྲེལ་བཤད་རྒྱག་བཞིན་ཡོད།

“ང་ནི་ཀུང་སིའི་ཁྲིམས་མི་ཞིག་ཡིན། ཀུང་སིའི་ཞིབ་དཔྱད་པ་མང་ཆེ་བ་དངོས་སྦྱོང་སློབ་གྲྭ་ཆེ་མོ་བ་ཤ་སྟག་རེད”སྐལ་བཟང་རྒྱལ་མཚན་གྱི་ངོ་སྤྲོད་ལས་གསར་འགོད་པར་ཤེས་རྟོགས་བྱུང་བར། 2017ལོར་དགའ་བདེ་ཀུང་སི་བཙུགས་པ་ནས་བཟུང་ས་མཐོའི་ཁྱད་ལྡན་འབྲིའི་དཀར་ཆུའི་ལས་རིགས་ཀྱི་སྤུས་རྟགས་སྐྱེད་སྲིང་ལ་མཐའ་གཅིག་ཏུ་གཞོལ་བ་དང་འབྲེལ། འབྲོག་པ་མང་ཚོགས་ཚོས“ཕྱུགས་དོར”ནས་རིམ་བཞིན་འབྲོག་ལས་སླར་གསོ་ཐུབ་པར་སྐུལ་ཁྲིད་བྱས་ཏེ་འབྲོག་ལས་འཕེལ་རྒྱས་ཀྱི་འབྲེལ་ཐག་ནང་རྒྱུན་ཆད་མེད་པར་ཞུགས་ནས་འབབ་འཕར་ཕྱུག་འགྱུར་ཡོང་བ་བྱས་ཡོད། ད་ཆ་ཀུང་སི་དེར་ལས་མི་132ཡོད་པའི་ནང་ཕ་ཡུལ་དུ་ལོག་པའི་སློབ་གྲྭ་ཆེ་མོ་བ་52ཡོད་པ་དང་སྐལ་བཟང་རྒྱལ་མཚན་ཡང་དེའི་ཁྲོད་ཀྱི་གྲས་ཤིག་ཡིན།

རང་སྐྱོང་ལྗོངས་རིམ་པའི་ཞིང་འབྲོག་ལས་ཐོན་ལས་ཅན་གྱི་སྣེ་འདྲེན་ཁེ་ལས་ཤིག་ཡིན་པའི་དགའ་བདེ་ཀུང་སིའི་ཏང་ཀྲི་པུས་ཀྲི་པུའུ་ཡིས་སྣེ་ཁྲིད་དང་། རྩ་འཛུགས་ཀྱིས་མཉམ་འཛུགས། ཏང་ཡོན་གྱིས་དཔེ་སྟོན་བཅས་བྱས་ནས་གསེར་སྙེད་ཆུས་ཀྱི་ཤང་གྲོང་12དང་གྲོང་ཚོ་134དང་ཐོན་ལས་མནའ་འབྲེལ་གྱིས་ཤང་གྲོང་དུ་རིམ་པ་དང་པོའི་འོ་མའི་ས་ཚིགས་10དང་གྲོང་ཚོ་ཨུ་ལྷན་དུ་གྲོང་ཚོ་རིམ་པའི་འོ་མ་མཁོ་སྤྲོད་ས་ཚིགས་100བཙུགས་པས“ཀྲི་པུའུ་དང་། ཁེ་ལས། འབྲོག་དུད”བཅས་ཟུང་དུ་འབྲེལ་བའི་སྦྲེལ་ཐག་ཅིག་ཆགས་ཡོད།

དེའི་ནང“ཏང་ཡོན་གྱི་གདོང་ལེན་ལས་གནས”13བཀོད་སྒྲིག་བྱས་ནས་འོ་མ་བསྡུ་ལེན་ས་ཚིགས་དང་། དཀར་ཆུའི་ཐོན་རྫས་ལས་སྣོན་ས་ཚིགས། རྩྭ་འདེབས་ས་བཅས་ཀྱི་དོ་དམ་ལས་དོན་གྱི་འགན་འཁུར་བ་དང་། “ཏང་ཡོན་གྱི་ལྟ་སྐུལ་ལས་གནས”5བཀོད་སྒྲིག་བྱས་ནས་དཀར་ཆུའི་ཐོན་རྫས་འཁོར་སྦྲེལ་ཧྲིལ་པོ་དང་བརྒྱུད་རིམ་ཧྲིལ་པོ་ལྟ་སྐུལ། “ཏང་ཡོན་གྱི་དང་བླངས་ཞབས་ཞུའི་ལས་གནས”10བཀོད་སྒྲིག་བྱས་ནས་ཁེ་ལས་ཀྱིས་གསོ་ཚགས་དུད་ཚང་ལ་ཞབས་ཞུ་དང་། དོ་དམ། འབྲེལ་གཏུག་བཅས་མཐུན་སྦྱོར་གྱི་འགན་ཁུར་ཏེ། ཏང་གི་ཆབ་སྲིད་ཀྱི་ལེགས་ཆ་དང་རྩ་འཛུགས་ཀྱི་ལེགས་ཆ་ཁེ་ལས་འཕེལ་རྒྱས་གཏོང་བའི་ལེགས་ཆར་འགྱུར་གང་ཐུབ་བྱེད་ཀྱི་ཡོད། 2022ལོར་ཀུང་སི་དེར་ཡོང་འབབ་སྒོར་ཁྲི་2397བྱུང་ཡོད།

ཉེ་བའི་ལོ་ཤས་རིང་། དགའ་བདེ་ཀུང་སིས་བྲིན་ཚོང་ཐབས་ལམ་རྒྱ་ཆེར་ཧུར་ཐག་བཏང་ཞིང་། མིག་སྔར། གཙོ་བོ་ལྗོངས་ནང་ཁུལ་གྱི་ཁྲོམ་ར་གཙོ་བོར་བྱེད་པ་དང་། ལྷ་ས་དང་ནག་ཆུར་ཆེད་མངགས་ཕྱིར་ཚོང་ས་ཚིགས་བཙུགས་པ། ཚོང་ཟོག་ཁག་གཅིག་ད་དུང་ཚོང་ར་དང་སྒོ་རྩིས་ཚོང་ཁང་ཆེ་གྲས་ཀྱི་ཚོང་སྒྲོམ་ལ་་བཏོན་ཡོད། འདི་ལོའི་ཟླ་བདུན་པའི་ཟླ་མཇུག་བར་བྲིན་ཚོང་ཡོང་འབབ་སྒོར་དུང་ཕྱུར་1.05ཟིན་ཡོད། འདི་ལོ་ད་དུང་ཕྱིར་ཚོང་ཚོང་ཁང་1དང་འོ་མའི་ས་ཚིགས་3གསར་དུ་འཛུགས་རྒྱུ་ཡིན་པ་རེད། ཀུང་སི་གཉེར་སྐྱོང་གིས་ད་བར་འོ་མ་ཉོ་སྒྲུབ་དང་། བཞོན་མ་ཉོ་བ། རྩྭ་ཐང་བརྒྱུད་བཤུག ལས་མི་བསྡུ་བ། ཐོན་ལས་བགོ་འགྲེམས་སོགས་ཀྱི་རྣམ་པ་བརྒྱུད་ཁེ་སྤོགས་ཀྱི་90%དམངས་ལ་སྤྲད་པ་དང་། འབྲོག་དུད་5614ཡི་འབྲོག་པ་མང་ཚོགས་27996ལ་འབབ་འཕར་ཡོང་བར་སྐུལ་ཁྲིད་ཐུབ་པ། རིགས་ཁག་གི་ཕན་པ་ཐོབ་པའི་མ་དངུལ་སྒོར་དུང་ཕྱུར་1ལྷག་ཙམ་སྤྲད་ཡོད།

“འདི་ནི་སྣེ་འདྲེན་ཁེ་ལས་ངོ་མ་རེད། རང་ངོས་ཀྱི་སྤུས་ཚད་མཐོ་བའི་འཕེལ་རྒྱས་མངོན་འགྱུར་བྱེད་པ་དང་ཆབས་ཅིག ད་དུང་ཁེ་ལས་ཀྱི་ལས་འགན་དང་འགན་འཁྲི་ཡང་བརྗེད་མེད”ཕྱིར་ལོག་པའི་ལམ་བར་དུ་ཚང་མས་དགའ་བདེ་ཀུང་སིའི་ངོ་སྤྲོད་ལག་དེབ་ལ་ལྟ་བཞིན་དུ་བསྔགས་བརྗོད་ཡང་ཡང་བྱས།