《མཚོ་བོད་ས་མཐོའི་སྐྱེ་ཁམས་སྲུང་སྐྱོང་བཅའ་ཁྲིམས་ཕྱོགས་ཡོངས་ནས་ལག་ལེན་བསྟར་རྒྱུའི་སྐོར་གྱི་བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་གཏན་འབེབས》ཟླ་9ཚེས་1ཉིན་ནས་ལག་བསྟར་བྱེད་རྒྱུ།

ཟླ་7ཚེས་31ཉིན། བོད་རང་སྐྱོང་ལྗོངས་མི་དམངས་འཐུས་ཚོགས་སྐབས་བཅུ་གཉིས་པའི་རྒྱུན་ལས་ཨུ་ལྷན་གྱི་ཚོགས་འདུ་ཐེངས་བཞི་པར《མཚོ་བོད་ས་མཐོའི་སྐྱེ་ཁམས་སྲུང་སྐྱོང་བཅའ་ཁྲིམས་ཕྱོགས་ཡོངས་ནས་ལག་ལེན་བསྟར་རྒྱུའི་སྐོར་གྱི་བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་གཏན་འབེབས》(གཤམ་དུ《གཏན་འབེབས》ཞེས་བསྡུ་རྒྱུ)ལ་འདེམས་ཤོག་ཆ་ཚང་ཐོབ་ནས་གྲོས་འཆམ་བྱུང་བ་རེད། 

《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མཚོ་བོད་ས་མཐོའི་སྐྱེ་ཁམས་སྲུང་སྐྱོང་བཅའ་ཁྲིམས》2023ལོའི་ཟླ་4ཚེས་26ཉིན་གྱི་རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་རྒྱུན་ལས་ཨུ་ལྷན་གྱི་ཚོགས་འདུ་ཐེངས་གཉིས་པར་གྲོས་འཆམ་བྱུང་བ་ཞིག་ཡིན་ཞིང་། 2023ལོའི་ཟླ་9ཚེས་1ཉིན་ནས་བཟུང་ལག་ལེན་བསྟར་གྱི་ཡོད། རྒྱལ་ཁབ་ཀྱི་ཁྲིམས་འཛུགས་གོམ་སྟབས་ཀྱི་རྗེས་སུ་དམ་པོར་འབྲངས་ནས་བཅའ་ཁྲིམས་ལག་བསྟར་གྱི་ལས་དོན་ཡག་པོ་བསྒྲུབ་ཆེད། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱིས《གཏན་འབེབས》ལག་བསྟར་གྱི་དུས་ཚོད་ཡང་2023ལོའི་ཟླ་9ཚེས་1ཉིན་ལ་གཏན་འཁེལ་བྱས་པ་རེད།

《གཏན་འབེབས》ནང་བརྒྱུད་རིམ་ལྡན་པའི་བཅོས་སྐྱོང་དང་། ཁྲིམས་འཛུགས་འབྲེལ་མཐུད། ཁྲིམས་སྒྱུར་ནན་པོ། ཁྲིམས་ལྟར་ལྟ་སྐུལ། ཁྲིམས་འཛིན་འགན་ལེན་སོགས་ནས་མཚོ་བོད་ས་མཐོའི་སྐྱེ་ཁམས་སྲུང་སྐྱོང་བཅའ་ཁྲིམས་ལག་ལེན་ཡག་པོ་བསྟར་བར་གཏན་འབེབས་ནན་པོ་བྱས་ཡོད་པ་མ་ཟད། ཏང་གིས་སྐྱེ་ཁམས་ཤེས་དཔལ་འཛུགས་སྐྱོང་ལ་འགོ་ཁྲིད་བྱེད་རྒྱུ་མཐའ་འཁྱོངས་དང་། འགན་ལེན་བྱེད་ཤུགས་ཆེ་རུ་གཏོང་བ། བཅའ་ཁྲིམས་ཁྱབ་གདལ་གྱི་མཉམ་ཤུགས་ཆགས་པར་བྱས་ཏེ། མཚོ་བོད་ས་མཐོའི་སྐྱེ་ཁམས་སྲུང་སྐྱོང་བཅའ་ཁྲིམས་ལག་ལེན་བསྟར་བར་མཐུན་སྦྱོར་སྐུལ་འདེད་བཏང་ནས། བཅའ་ཁྲིམས་ལག་བསྟར་བྱེད་པའི་མཉམ་ཤུགས་ཆེན་པོ་ཞིག་རྒྱ་ཁྱབ་ངང་ཆགས་པར་བྱེད་དགོས་པའི་བླང་བྱ་སྔར་བས་བཏོན་ཡོད་པ་རེད།

《གཏན་འབེབས》ནང་བཀྲག་མདངས་འཚེར་ས་ཕྱོགས་བཞི་ཡོད་པ་སྟེ། 

གཅིག་ནས། གཏན་འབེབས་ཀྱི་ནང་དོན་བརྒྱུད་རིམ་ལྡན་ལ་ཆ་ཚང་བས་ཁྲིམས་འཛུགས་དང་། སྲིད་འཛིན། ཁྲིམས་འཛིན། ལྟ་སྐུལ། བཅའ་ཁྲིམས་ཁྱབ་གདལ་སོགས་ཕྱོགས་ཁག་ལ་ཁྱབ་ནས། མཚོ་བོད་ས་མཐོའི་སྐྱེ་ཁམས་སྲུང་སྐྱོང་བཅའ་ཁྲིམས་ལག་བསྟར་བདེ་བླག་ཐུབ་པར་རྨང་གཞི་བརྟན་པོ་བཏིང་ཡོད། 

གཉིས་ནས། གོམ་སྟབས་རྗེས་མའི་ཁྲིམས་འཛུགས་ལ་ཁྲིམས་འཛུགས་ཀྱི་བར་མཐོངས་སྔར་བས་འདང་ངེས་བཞག་ཡོད་དེ། མཚོ་བོད་ས་མཐོའི་སྐྱེ་ཁམས་སྲུང་སྐྱོང་བཅའ་ཁྲིམས་བཏོན་ནས་དུས་ཡུན་རིང་པོ་སོང་མེད་པས། ད་དུང་སློབ་སྦྱོང་དང་ཞིབ་འཇུག་བྱེད་དགོས་པའི་ཕྱོགས་མང་པོ་ཡོད་ཅིང་། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ལས་ཀའི་བཀོད་སྒྲིག་ལྟར་མཚོ་བོད་ས་མཐོའི་སྐྱེ་ཁམས་སྲུང་སྐྱོང་བཅའ་ཁྲིམས་ལག་བསྟར་བྱེད་ཐབས་བཟོས་ཡོད་པ་རེད། 

གསུམ་ནས། རྒྱལ་ཁབ་ཀྱི་ཁྲིམས་འཛུགས་གནས་ཚུལ་གསར་ཤོས་དུས་ཐོག་ཏུ་མཚོན་པར་བྱས་ཡོད་དེ། 《གྲོས་ཆོད(འཆར་ཟིན)》བརྡས་ཐག་གཅོད་རྒྱུར་མ་ཕུལ་གོང་། འབྲེལ་ཡོད་ཀྱི་བསམ་འཆར་དང་གྲོས་འགོ་བསྡུ་ལེན་བྱས་ཏེ། “8·15”རྒྱལ་ཡོངས་ཀྱི་སྐྱེ་ཁམས་ཉིན་མོའི་ནང་དོན་དུས་ཐོག་ཏུ་འཆར་ཟིན་ལ་བཅུག་ཡོད་པ་རེད། 

བཞི་ནས། མཚོ་བོད་ས་མཐོའི་སྐྱེ་ཁམས་སྲུང་སྐྱོང་བཅའ་ཁྲིམས་ལག་བསྟར་དོན་འཁྱོལ་དང་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་འཛུགས་གཏོད་གཅིག་གྱུར་བྱས་ཡོད་པ་བཅས་རེད།